1, 2. ¿Kasa eeka süpüla natüjaweein aaʼu na aluwataaushiikana süchikijee nuʼunüin Jesuu?

CHAJANA na aluwataaushiikana chaa eere tü wutai kanüliakat Olivos nümaa Jesuu. Neʼrüinjeseʼe nia niyaleraain iipünaamüin, «shiasaʼa wane siruma sunujuleʼetkalaka nia noulia, nnojoishijeseʼe nia neʼrüin sütüma» (Aluw. 1:9, 10). Wainma kasa anasü nikirajaka anain naya Jesuu soʼu piama juya, nütüleʼerüin naaʼin jee nuʼunirüin nakuwaʼipa. ¿Jameetka nukuwaʼipa sutuma nnojoluichipain nia namaa?

² Müsü nünüiki Jesuu namüin süpülapünaa nuʼunüin iipünaamüin: «Ojuitteena jia suluʼupünaa Jerusalén, suluʼupünaa tü mmakat Judea, suluʼupünaa Samaria otta suluʼupünaa süpüshuaʼa mma wattapünaa maʼi sünain aküjaa süchikü tü takuaippa jiʼrajakat akua» (Aluw. 1:8). ¿Jara akaaliinjaka naya sünain tia? Nüküjüin Jesuu namüin nieechin akaaliinjaka naya chi naaʼinkai Maleiwa (Aluw. 1:5). ¿Jara oʼunirüinjatka nakuwaʼipa otta sukuwaʼipa tü aküjaakat pütchi? Natüjaa aaʼu na aluwataaushiikana nüneeküin Jeʼwaa wayuu sümaiwa paala süpüla noʼunirüin nakuwaʼipa na israeliitakana. Eesüjaʼa  natüjaweere saaʼu müleka nüneekeechire Jeʼwaa wanee nekiipüʼü jekechi.

3. (1) ¿Kasa naainjaka na aluwataaushiikana süchikijee nuʼunüin Jesuu iipünaamüin? (2) ¿Kasa asakiraa wekirajaainjatka anain sünain ekirajaayakat tüü?

³ Mapa süchikijee nuʼunüin Jesuu iipünaamüin, aneekünüshi Matías niʼirakaluʼu Judas Iscariote natuma na aluwataaushiikana. Süpülapünaa naainjain tia, nekirajaa anainrü sukuwaʼipa suluʼujee tü Nünüikikat Maleiwa jee oʼuraajüshii naya. Kottüinnapa joo na 12 aluwataaushii (Aluw. 1:15-26). ¿Jamüsü choʼujaaka maʼin naainjain tia? ¿Jamüsü kojutüka nümüin Jeʼwaa tia? * Nüneeküin Jesuu na aluwataaushiikana süpüla naaʼinrüinjatüin wanee aʼyatawaa sümüin tü nupueulosekat Jeʼwaa. ¿Kasa wayuu tia aʼyatawaakat? ¿Jamüsü sukuwaʼipa nakaaliinjia nutuma Jeʼwaa nümaa Jesuu? ¿Eeshiiche wayuu maaʼulu yaa aaʼinrakana tia aʼyatawaakat? ¿Kasa waaʼinrüinjatka süpüla sotuinjanain waaʼin na oʼunirakana tü nupueulosekat Maleiwa maʼaka naaʼin «chi achepchiee oonookai otta kekiikai maʼin»? (Heb. 13:7; Mat. 24:45, TNM).

4. ¿Kasa naainjapuʼuka na aluwataaushiikana jee na wanee laülaashii chejeʼewaliikana Jerusalén?

⁴ Na aluwataaushiikana noʼunirüin sukuwaʼipa nupueulose Jeʼwaa soʼujee juyakat 33 soʼu wakalia. Müsü tü Wiwüliakat: «Niasaʼa Pedro namaa na [...] Aluwataaushi polookana waneemüin, nashaʼwaajaakalaka pasanainmüin nanain na jutkatshiikana». Ekirajüshii naya sünain tü pütchi katüinjatkalü atuma noʼu naya wayuukana (Aluw. 2:14, 15). Watta naalii mapa na anoujakana naʼakajee naya wayuukana jee «ayatshii naya waneepia sünain nooʼulaküin tü akuaippaa neʼikakat anain naya na Aluwataaushikana» (Aluw. 2:42). Na aluwataaushiikana naya oʼunirakana sukuwaʼipa tü aainjünajatkat süka tü nneerü nasülajakat na anoujashiikana (Aluw. 4:34, 35). Nekirajüin nupueulose Maleiwa jee oʼuraajüshii naya süpüleerua. Müsü nanüiki: «Wayakana, ayateena sünain waʼyataain waneepia sünain aashajawaa nümaa Maleiwakai je sünain aküjaa nünüikü waneepia sümüin wayuu» (Aluw. 6:4). Na aluwataaushiikana najütapuʼuin sünain aküjaa pütchi na anoujashii kakaliajüinnakana sünain aküjaa pütchi (Aluw. 8:14, 15). Mapa akaaliinjünüshii naya sünain aaʼinmajaa na anoujashiikana natuma waneeinnua laülaashii aluwataainjanaka iipünaa (Aluw. 15:2).

5, 6. (1) ¿Jamüsü sukuwaʼipa süpüla eeinjachin chi naaʼinkai Maleiwa naaʼu na aluwataaushiikana jee na laülaashiikana? (Piirakaa sümüin tü ayaakuaa suluʼukat süpana 20). (2) ¿Kasa naainjaka na aapieekana süpüla nakaaliinjain na aluwataaushiikana jee na laülaashiikana? (3) ¿Jamüsü suʼuniria nakuwaʼipa na aluwataaushiikana jee na laülaashiikana sutuma Nünüiki Maleiwa?

⁵ Na anoujashii namaiwajanakana natüjaa aaʼu niain Jeʼwaa oʼunirüin nükajee Jesuu nakuwaʼipa  na aluwataaushiikana jee na laülaashiikana. Natüjaa aaʼu tia süka naapüin Jeʼwaa chi naaʼinkai namüin naya wayuu oʼunirakana sukuwaʼipa tia aʼyatawaakat (Juan 16:13). Shiimüin naapüin Jeʼwaa chi naaʼinkai namüin napüshuaʼa na anoujashii chainjanakana chaa iipünaa, katsüinreepajaʼa chi naaʼinkai Maleiwa naaʼu na aluwataaushiikana jee na laülaashii chajanakana Jerusalén. Soʼu juyakat 49, akaaliinjünüshii naya nutuma chi naaʼinkai Maleiwa süpüla naneeküin süchotoonüinjatüle nüta wanee wayuu. Sutuma jaa namüin na anoujashiikana sümüin tia, anuu tü alatakat namüin: «Je sükatsüinraakalajaʼaka maʼi nanoula na anoujashiikana suluʼupünaa tü outkajaaleekalüirua sümaa nokojuyalaain maʼi kaʼiwai» (Aluw. 16:4, 5). Eejachi chi naaʼinkai Maleiwa naaʼu na aluwataaushiikana jee na laülaashiikana, müsüjeseʼe anain nakuwaʼipa na anoujashiikana sutuma tia pütchi eejatkat suluʼu tia karaloukta aluwataanakat, jaʼyasü naaʼu aipüraliin naya jee kanoulain maʼin (Aluw. 15:11, 25-29; Gal. 5:22, 23).

⁶ Akaaliinjünüshii na aluwataaushiikana jee na laülaashiikana natuma na aapieekana. Jamüshijaʼa wanee aapiee nüküjüin nümüin Cornelio nüsaajüinjachin Pedro süpüla nüküjüin pütchi nüchiki Jeʼwaa namüin na nüpüshikana jee nümüin niakai; nnojoishi judíoin Cornelio jee nnojotsü oʼyotoonüin nüta namaa na nüpüshikana. Kettaapa nünüiki Pedro, ashakatüshi chi naaʼinkai Maleiwa naaʼu naya wayuukana. Cornelio nia palajaikai anoujashi nnojoikai judíoin. Naapapa süchiki tia noʼutku na aluwataaushiikana jee na wanee anoujashiikana, oonooshii sümaa nünüiki Jeʼwaa jee kojutüshii namüin na anoujashii nnojoliikana judíoin jee nnojoliikana oʼyoteʼerüin nata (Aluw. 11:13-18). Akaaliinjünüshii na aluwataaushiikana jee laülaashiikana natuma na aapieekana sünain tü aküjaakat pütchi (Aluw. 5:19, 20). Nooʼulaain suʼunirüin nakuwaʼipa tü sümakat tü Nünüikikat Maleiwa. Anoujashiikana naainnua, neʼrajaain waneepia tü sümakat tü Nünüikikat Maleiwa süpüla naneeküin wanee kasa sünainpünaaka nanoula jee nakuwaʼipa na anoujashiikana (Aluw. 1:20-22; 15:15-20).

7. ¿Jamüsü watüjaaka saaʼu niain Jesuu oʼunirüin nakuwaʼipa na anoujashii namaiwajanakana?

⁷ Mayaapejeʼe kaawain nanüiki na laülaashiikana, nayaawata aaʼu niain Jesukürisüto Nekiipüʼüin. Watüjaa aaʼu tia sutuma tü nümakat Pablo, naashin niakai, nia aneekaka Jesuu na wayuu noʼutkuinjanakana na aluwataaushiikana. Nüküjüin mapa niain Jesukürisüto Nekiipüʼüin na aʼyataakana nümüin Jeʼwaa (Éf. 4:11, 15). Nücheküin Jeʼwaa neʼraajünüinjanain na anoujashiikana sünain noushikajaain süchiirua nukuwaʼipa Jesukürisüto, nnojotsü nücheküin nanülialuʼuin naya na aluwataaushiikana (Aluw. 11:26). Nütüjaa aaʼu Pablo choʼujaain saaʼinnüinjatüin tü nekirajakalü anain na aluwataaushiikana jee na laülaashiikana süka nayuʼluin shia suluʼujee Nünüiki Maleiwa. Naashin Pablo, chi laülaakai naaʼu wanee toolo nia Kürisüto. Tia pütchikat napülajatü shia na aluwataaushiikanaya. Mapa müsü nünüiki Pablo: «Ooʼulaka chi laülaakai naaʼu Cristo, nia Maleiwa» (1 Cor. 11:2, 3). Shiimain sünain nüneekünüin Jesuu nutuma Jeʼwaa süpüla oʼuniraa sukuwaʼipa tü nupueulosekat.

8, 9. ¿Kasa aʼyatawaa anaka maʼin naainjaka chi wawalakai Russell?

⁸ Soʼujee tü juyakat 1870, Charles Taze Russell namaa wanee naʼaleewainyuu nachajaain sukuwaʼipa süpüla naʼwaajüin Jeʼwaa maʼaka süküjüin tü Wiwüliakat. Nakaaliinjeein waneeinnua wayuu süpüla naaʼinrüin tiaʼaya. Süpüla nountüin tia, naikkaleʼerüin sukuwaʼipa wanee corporación kanüliakat Zionʼs Watch Tower Tract Society, naaʼinrüin tia soʼu juyakat 1884. Nia shikiipüʼükai  tia chi wawalakai Russell. * Sutuma nikirajaain maʼin sünain tü Wiwüliakat, nüküjüin namüin na waneeinnua alawaain tü ekirajünakat süchiki apünüinshin sümaa waneeshin Maleiwa jee süchiki ayatüin katüin naaʼin wayuu süchikijee ouktüin nia. Nütüjaa aaʼu mapa chi wawalkai Russell nüleʼejüinjachin Jesuu sümaa meʼrajuuinjachin nia otta müsia sajaʼtteerüin soʼu 1914 tü kaʼi naapakat Maleiwa namüin na gentilekana süpüla aluwatawaa (Luc. 21:24). Chi wawalakai Russell, akatatshi kaʼi otta nünneetse süpüla nikirajüin wayuu süchiki tü shiimainkat otta naaʼinmaasü maʼin tia. Shiimain niain Jeʼwaa nümaa Jesuu oʼuniraka nukuwaʼipa chia wawalakai süpüla tia aʼyatawaakat.

⁹ Nnojotsü nücheküin chi wawalakai Russell sülanaainjatüin nujutü natuma na wayuukana. Soʼu juyakat 1896 nüküjüin nnojoluin anain nümüin otta namüin waneeinnua wawalayuu naʼwaajünüinjanain. Nnojotsü nücheküin shiʼitaanüin nünain wanee anüliee kojutüinjachika atuma nia, nnojotsü nücheküin neʼraajünüinjanain na wawalayuukana saaʼu nünülia. Müsü nünüiki mapa: «Nnojotsü sünainjeejatüin wayuu aʼyatawaakat tüü».

10. (1) ¿Joujachi nüneeküin Jesuu «chi achepchiee oonookai otta kekiikai maʼin»? (2) Püküja jamüin naataka na Laülaashii Jülüjakana Aaʼin na Aküjüliikana Pütchi sainküin Mma noulia na shikiipüʼükana Sociedad Watch Tower.

¹⁰ Soʼu 1919, apünüin juya süchikijee ouktüin chi wawalakai Russell, nüneeküin Jesuu «chi achepchiee oonookai otta kekiikai maʼin» süpüla naapüinjatüin tü choʼujaakat sümüin nanoula na nikirajüinkana wanaa sümaa choʼujaain maʼin shia (Mat. 24:45, TNM). Soʼutpünaa tia, aapünüsü namüin na wawalayuukana tü choʼujaakat sümüin nanoula, eejana waneeinnua anoujashii chainjanakana iipünaa aaʼinrakana tia chaa Brooklyn (Nueva York). Tü pütchikat «Laülaashii Jülüjakana Aaʼin na Aküjüliikana Pütchi sainküin Mma», ashajünüsü suluʼu tü karalouktairua eekat wamaʼana süchikijee juyakat 1940. Na shikiipüʼükana Watch Tower Bible and Tract Society, nayajiraʼa neʼe na Laülaashii Jülüjakana Aaʼin na Aküjüliikana Pütchi sainküin Mma. Shiasaʼa soʼu 1971, aküjünüsü naatain naya laülaashiikana noulia na shikiipüʼükana Sociedad Watch Tower. Na shikiipüʼükana Sociedad Watch Tower, naya akumajaka sukuwaʼipa wanee kasa laülaapialuʼu. Soʼujee tia, nnojotsü choʼujaain shikiipüʼüin Sociedad Watch Tower napüshuaʼa na Laülaashii Jülüjakana Aaʼin na Aküjüliikana Pütchi sainküin Mma. Maaʼutpünaa yaa, na wawalayuu aʼyataakana suluʼu Sociedad Watch Tower jee suluʼu waneeirua corporaciones eeka suluʼu nupueulose Maleiwa, nayashii na wanee anneetkana. Sutuma tia, na Laülaashii Jülüjakana Aaʼin na Aküjüliikana Pütchi sainküin Mma, shiaitpa neʼe naʼyataakana anain ekirajaa na wawalayuukana jee oʼuniraa nakuwaʼipa (Juan 10:16; Aluw. 6:4). Sünain tü rewiisütakat Aapiria Wayuu ojuʼitaka juulioʼu 1, 2013, aküjünüsü niain «chi achepchiee oonookai otta kekiikai maʼin» na Laülaashii Jülüjakana Aaʼin na Aküjüliikana Pütchi sainküin Mma. Naya makana, naya noʼutku na anoujashii chainjanakana chaa iipünaa.

11. ¿Jamüsü sukuwaʼipa natuma na Laülaashii Jülüjakana Aaʼin na Aküjüliikana Pütchi sainküin Mma naneeküinjanapa wanee kasa aaʼinnajatka?

¹¹ Na Laülaashii Jülüjakana Aaʼin na Aküjüliikana Pütchi sainküin Mma, outkajaashii semaanawai otta naneeküin tü aainjünajatkat. Sutuma naaʼinrüin tia, yootiraashii naya jee paaʼinwashii naya (Prov. 20:18). Nnojoishi jaralin kojutüleein naʼakajee naya wawalayuukana, müshijeseʼe niiʼiratünawalin juyawai chi shikiipüʼükai tü outkajawaa naainjakat semaanawai (1 Ped. 5:1). Akaataajaʼa neʼe sukuwaʼipa tia sutuma tü aipiruasükat comité. Naʼakajee na Laülaashii Jülüjakana Aaʼin na Aküjüliikana  Pütchi sainküin Mma, nnojoishi eein wanee eekai miyoʼuweein noulia na waneeinnua. Jamüshiijaʼa naya, aapünüsü namüin tü choʼujaakat sümüin nanoula waneʼewai nakua nutuma chi achepchieekai jee oonooshii naya nümaa, napüshi naya na wanee achepchieekana (paashajeʼera «Pütchi pütüjaainjatka aaʼu»).

12. ¿Kasa asakiraa wekirajaainjatka anain jooluʼu?

¹² Na Laülaashii Jülüjakana Aaʼin na Aküjüliikana Pütchi sainküin Mma nnojoishii naya koʼupeʼejüin otta naleʼeruʼusü tü kaainjalaakat. Eeshii noʼtchejaale nekirajapa wanee kasa suluʼujee tü Wiwüliakat jee naküjapa süchiki wanee kasa. Jamüsüjaʼa suluʼu Índice de las publicaciones Watch Tower, eesü wanee pütchi «Aclaración de creencias» müsü. Yala ashajünüsü tü kasa anoukteʼennakat sünainjee tü wanoujakalü anain, aainjünüsü tia soʼujee 1870. «Nnojoleechi oʼtchejaain chi achepchieekai sünain tü nikirajakalü anain», nnojoishi müin Jesuu. ¿Jaraika chi achepchiee naashajaakai achiki Jesuu? (Mat. 24:45, TNM). ¿Nayachejeʼe eera naashajaaka achiki na Laülaashii Jülüjakana  Aaʼin na Aküjüliikana Pütchi sainküin Mma? Wekirajaa sünain apünüinsü kasa aapünaka namüin maʼaka saaʼin tü aapünakat namüin na aluwataaushiikana jee laülaashii namaiwajanakana.

13. ¿Kasa akaaliinjünaka anain na Laülaashii Jülüjakana Aaʼin na Aküjüliikana Pütchi sainküin Mma nutuma chi naaʼinkai Maleiwa?

¹³ Akaaliinjünüshii nutuma chi naaʼinkai Maleiwa. Akaaliinjünüshii naya nutuma chi naaʼinkai Maleiwa süpüla nayaawatüin saaʼu tü pütchi suluʼujeejatkat tü Wiwüliakat mayaawatujuuka aaʼu sümaiwa. Nnojoishije jaralin ayaawatüin saaʼu süka naaʼin namüiwaʼa «tü kasa jülüjakat naaʼin chi Maleiwakai» (paashajeʼera 1 Corinto 2:10). Wanaawasü naaʼin na Laülaashii Jülüjakana Aaʼin na Aküjüliikana Pütchi sainküin Mma sümaa tü nümakat Pablo: «Wanaa sümaa waküjüin sümüin wayuu süchiki tü kasa anasü aapünakat wamüin, nnojoishii aküjüin waya süka pütchi wekiirujut neʼe [...]. Shia waküjaka achiki tü pütchi ekirajünakat anain waya nütüma chi Naaʼinkai Maleiwa» (1 Cor. 2:13). Tü iküleesia nnojotkat shiimain kakalia maʼin shikirajüin sünain alawaa. ¿Jamaka sütüjaanaka maʼin aaʼu tü shiimainkat soʼujee 1919? Shia süka nükaaliinjain Jeʼwaa nükajee chi naaʼinkai na Laülaashii Jülüjakana Aaʼin na Aküjüliikana Pütchi sainküin Mma.

14. Saashin Alateetka Mapeena 14:6, 7, ¿kasa naainjaka na aapieekana süpüla nakaaliinjain na Laülaashii Jülüjakana Aaʼin na Aküjüliikana Pütchi sainküin Mma jee tü nupueulosekat Maleiwa?

¹⁴ Akaaliinjünüshii natuma na aapieekana. Naya Laülaashiikana, nakumajüin sukuwaʼipa süpüla naküjüinjanain pütchi na wawalayuukana sainküin mmakat süpüshuaʼa, alatüshii suulia oocho miyoone na wawalayuukana. Anasü nakuwaʼipa na wawalayuukana sünain tia süka nakaaliinjünüin natuma na aapieekana (paashajeʼera Alateetkat Mapeena 14:6, 7). Na aapieekana noʼunirüin na wawalayuukana eemüin wanee wayuu achuntakai kaaliinwaa nümüin Jeʼwaa. * Akaʼaya naya, nakaaliinjüin na wawalayuukana süpüla sükooʼomüinraain tü aküjaakat pütchi eere shiyouktünüin maʼin sutuma wayuu jee süpüla nawainmalaain na ekirajaakana sünain tü Wiwüliakat.

15. Püküja jamüin waneejatka nakuwaʼipa na Laülaashii Jülüjakana Aaʼin na Aküjüliikana Pütchi sainküin Mma noulia na nekiipüʼükana na anoujakana nünain Kürisüto naashin.

¹⁵ Oʼuninnüsü nakuwaʼipa sutuma tü Nünüikikat Maleiwa (paashajeʼera Juan 17:17). Wekirajaa sünain tü alatakat 1973. Tü rewiisüta Aapiria Wayuu ojuʼitakat soʼu juyakat tia müsü sünüiki: «¿Eeshiche süpüla nuwoutisaajüin wanee wayuu ayatakai akamüjüin?». Nnojoishi süpüla nuwoutisaajüin saashin tia karalouktakat otta süküjüin tü sümakat tü Wiwüliakat. Aküjüsü kojuyasü pütchi suluʼujee tü Wiwüliakat eeʼiyataka nujuʼitinnüinjachin wanee wayuu ayatakai sünain akamüjaa (1 Cor. 5:7; 2 Cor. 7:1). «Tia pütchikat nümaʼanajeejatü Maleiwa, suluʼusü shia tü Nünüikikat, nnojotsü süleʼeruʼujeejatüin wayuu», müsü tia rewiisütakat. Shiaʼala neʼe nupueulose Jeʼwaa sümüiwaʼa ooʼulaaka suʼuninnüin sukuwaʼipa sutuma tü Wiwüliakat. Ayatüsia saainjain shia mayaapejeʼe eein na kapüleekana amüin aaʼinraa tia. Müsü wanee pütchi suluʼu wanee karaloukta aashajaaka süchiki nakuwaʼipa na anoujashiikana chaa Estados Unidos: «Na shiikiipüʼükana tü iküleesiakalüirua, naʼwanajaʼawalin tü nanoujakalü anain wanaapünaa sümaa tü kamalainkat namüin na outkajaakana namaa jee sümüin wayuu süpüshuaʼa». Na Laülaashii Jülüjakana Aaʼin na Aküjüliikana Pütchi sainküin Mma, nnojotsü naaʼinrüin tia. Shia naaʼinraka tü sümakat tü Nünüikikat Maleiwa. Shiimainjaʼa niain Jeʼwaa oʼuniraka sukuwaʼipa nupueulose.

16. ¿Kasa waaʼinrüinjatka napüleerua na Laülaashii Jülüjakana Aaʼin na Aküjüliikana Pütchi sainküin Mma?

¹⁶ (Paashajeʼera Hebreokana 13:7). Müsü tü Wiwüliakat: «Motojoyoo jaaʼin na wayuu müloʼushiikana jüpüleerua». Naya na oʼunirakana wakuwaʼipa. Tü eekat süpüla waaʼinrüin shia woʼuraajüin napüleerua na Laülaashii Jülüjakana Aaʼin na Aküjüliikana Pütchi sainküin Mma (Éf. 6:18). Wainma maʼin kasa naaʼinraka naya wawalayuukana. Naapüin wamüin tü katsüinkalü atuma wanoula, noʼunirüin sukuwaʼipa tü aküjaakat pütchi jee nakumajüin sukuwaʼipa tü nneerü asülajünakat sümüin nupueulose Jeʼwaa. Choʼujaashaatasü woʼuraajüinjanain napüleerua naya wawalayuukana.

17, 18. (1) ¿Kasa waaʼinrajatka sotule waaʼin na Laülaashii Jülüjakana Aaʼin na Aküjüliikana Pütchi sainküin Mma? (2) ¿Jamüsü waaʼinmaainjatka maʼin tü aküjaakat pütchi?

¹⁷ Wanee kasa eeka süpüla waaʼinrüin napüleerua na Laülaashii Jülüjakana Aaʼin na Aküjüliikana Pütchi sainküin Mma shia woonooin sümaa tü naluwataakalü anain waya. Naya wawalayuukana noʼunirüin wakuwaʼipa sükajee tü karalouktakalüirua, tü outkajawaakat jee tü outkajawaakat miyoʼu. Naya aneekaka na wawalayuu alapalaakana waaʼu, müshiʼiya naainnua, naya aneekaka na laülaashiikana. Na wawalayuu alapalaakana waaʼu jee na laülaashiikana, shiimüin sotuin naaʼin na Laülaashii Jülüjakana Aaʼin na Aküjüliikana Pütchi sainküin Mma müleka naaʼinrüle tü naluwataakalü anain naya. Waaʼinrüle tü namakat na wawalayuu nüneekakana Jesuu maaʼulu yaa, kojuteechi wamüin süka niain Wekiipüʼüin (Heb. 13:17).

¹⁸ Tü wanee kasa eekat süpüla waaʼinrüin sotule waaʼin na Laülaashii Jülüjakana Aaʼin na Aküjüliikana Pütchi sainküin Mma shia waaʼinmaale maʼin tü aküjaakat pütchi. Saashin Hebreokana 13:7, washatüinjatü nanoula na wawalayuu müloʼushiikana wapüleerua. Neeʼiyatüin na Laülaashii Jülüjakana Aaʼin na Aküjüliikana Pütchi sainküin Mma sünain kanoulain maʼin naya süka naküjüin pütchi sümaa talatüin naaʼin; wainma sukuwaʼipa natuma tü aküjaakat pütchi. ¿Wakaaliinjainche naya sünain aʼyatawaakat tia? Talateerü maʼin waaʼin nümapa Jesuu wamüin: «Jaaʼinrüle wanee kasa anasü napüleerua na tawalayuukana, müshi tayakai aaʼin jaainjain amüin tia» (Mat. 25:34-39; Mat. 25:40, TNM).

19. ¿Jamüsü pütüjaaka saaʼu niain Jesuu chi Wekiipüʼükai?

¹⁹ Soʼu nüleʼejüin Jesuu iipünaamüin nnojoishii motuin naaʼin na nikirajüinkana (Mat. 28:20). Wanaa sümaa yaajachin Jesuu yaa Mmapaʼa, nütüjaa aaʼu nükaaliinjünüin sünain oʼuniraa nakuwaʼipa na nikirajüinkana nutuma chi naaʼinkai Maleiwa, na aapieekana jee tü Nünüikikat Maleiwa. Ayatüshia nükaaliinjain maaʼulu yaa chi achepchieekai. Jee chi achepchieekai icheshi «waneepia nünain chi Anneetchonkai» (Alat. Map. 14:4). Waaʼinrüle tü namakat na Laülaashii Jülüjakana Aaʼin na Aküjüliikana Pütchi sainküin Mma, müshijaʼa aka waaʼinrakai aaʼin tü nuluwataakalü anain Jesuu, chi Wekiipüʼükai. Nuʼunireena waya sünain tü wüin katakalü atuma soʼu wayuu (Alat. Map. 7:14-17, TNM). Nnojoishi eein wanee wayuu ountaka tia.