1. «Talatirüitpa sooʼopünaa taaʼin tü kasa paaʼinrakat tamüin», ¿kasache nüküjeeka wamüin wanee wayuu müle nünüiki?

 «TALATIRÜITPA sooʼopünaa taaʼin tü kasa paaʼinrakat tamüin», nümüle wamüin wanee wayuu, anasü waaʼin. ¿Kasache nüküjeeka wamüin wanee wayuu müle nünüiki? Eesüjaʼa shiale nüküjeein achiki eeinnapain süpüla aleewain waya nümaa otta eesüjaʼa shiale nüküjeein achiki müiriain nnojoluin nüküjain süchiki tü alatakat otta nnojoleenain aleewain waya maʼakaapuʼu. Naata tü jülüjakat saaʼin wayuu süchiki tü saaʼinrajatkat süpüla motuin saaʼin saainjala wayuu.

 2. ¿Kasa ashajünaka suluʼu tü Bibliakat süchiki motopa naaʼin Jehová saainjala wayuu? (Paashajeʼera tü nootakat).

² Naata nukuwaʼipa Jehová suulia wayuu motopa naaʼin waainjala. Anuu nünüiki wanee salmista: «Pia neʼe motoko aaʼin saainjala wayuu otta kojutushi pia atumawaa suluʼujee tia» (Sal. 130:4). a Nnojoishi eein wanee wayuu makai aka naaʼin Jehová wanaa sümaa motuin naaʼin waainjala. Süpüla motuin waaʼin saainjala wayuu anasü jülüjale waaʼin nukuwaʼipa Jehová. Suluʼu waneirua wetsiikulo suluʼuka tü Pütchi Ashajuushikat süka Hebreo aküjünüsü sükajee wanee pütchi tü sukuwaʼipakat nutuma Jehová süpüla motuin naaʼin saainjala wayuu. Nnojotpejeʼe ashajünüin tia pütchikat süküjünapa motuin naaʼin wanee wayuu naainjala na waneinnua.

 3. ¿Kasa naataka aluʼu nukuwaʼipa Jehová woulia motopa naaʼin saainjala wayuu? (Isaías 55:6, 7).

³ Motopa naaʼin Jehová naainjala wanee wayuu müsü nülaʼajaakai saaʼin otta eeichipa süpüla aleewain nia nüchikuaʼa nümaa. Nnojotkalaka jülüjakuʼu müin naaʼin Jehová naainjala wanee wayuu  motopa shia naaʼin. Anataʼaleesüjaʼa nukuwaʼipa Jehová (paashajeʼera Isaías 55:6, 7).

 4. ¿Kasa wayaawataka akajee motoleeinña naaʼin Jehová waainjala?

⁴ Süka nnojoluin wanaawain tü waaʼinrakat sümaa tü naaʼinrakat Jehová motopa waaʼin saainjala wayuu, isasü wachiki wayaawatüin saaʼu jamüin nukuwaʼipa Jehová naaʼinrapa tia. Süpüla wayaawatüin saaʼu tia nikirajüin waya Jehová sükajee waneirua pütchi ashajünaka suluʼu tü Bibliakat. Wekirajaajeerü anain tia süpüla wayaawatüin saaʼu süpüshuaʼa tü naaʼinrakat Jehová süpüla motuin naaʼin waainjala wayaawajaale suulia otta nücheküin aleewain waya wachikuaʼa nümaa. Wekirajaapa shiʼipaʼaya sünain tia pütchikat akooʼomüinraajeerü naalin Jehová wapüla otta kojuteerü wamüin tü naaʼinrakat wapüleerua.

MÜSHI NÜLÜʼÜJAKAI AAʼIN JEHOVÁ WAAINJALA

 5. ¿Jamüsü waaʼin motopa naaʼin Jehová waainjala?

⁵ Ashajünawaisü suluʼu tü Bibliakat müin waainjala maʼaka saaʼin wanee kasa jawatüsü. Anuu nünüiki David chi aluwataashikai: «Müshi suupünaakai taaʼin taainjala, jawatüsü maʼin shia tamüin, isasü maʼin tachiki talüʼüjain shia» (Sal. 38:4). Saashin Salmo 25:18 otta 32:5 motusü naaʼin Jehová naainjala na wayuu ayaawajaakana suulia. Tü pütchi «motoo aaʼin saainjala wayuu» ashajünakat suluʼu tia wetsiikulokot sünainjeejatü wanee pütchi hebreo, «apatawaa» otta «alüʼüjaa» maluʼulu shia. Sükajee tia pütchikat jülüjashi waaʼin müin Jehová maʼaka naaʼin wanee wayuu katchinshi maʼin apataakai woulia tü kasa jawatüsü walüʼüjakat.

 6. ¿Jalamüinsü nujutakai saaʼin Jehová waainjala?

⁶ ¿Jalamüinsü nujutakai saaʼin Jehová waainjala? Eesü wanee pütchi ashajünaka suluʼu Salmo 103:12 wayaawataka akajee jalamüin nujutuin shia Jehová, müsü yala: «Wattasü nutuma tü waainjalakat woulia, maʼaka wattain eere niweetüin chi kaʼikai suulia eere nikerotüin». Eweetüshi chi Kaʼikai wüinpejee, ekerotushi nia wopumüin. Wattasü maʼin eejeere niweetüin chi Kaʼikai suulia eejeere nikerotüin. Tü wayaawatakat sükajee tia wetsiikulokot shia müin wattakai saaʼin nujutuin Jehová tü waainjalakat. Anataʼaleesüjaʼa wakuwaʼipa nutuma Jehová.

 7. ¿Kasa ashajünaka suluʼu tü Bibliakat wayaawataka akajee tü naaʼinrakat Jehová motopa naaʼin waainjala? (Miqueas 7:18, 19).

⁷ ¿Jülüjakuʼu müsüche naaʼin Jehová waainjala nujutapa shia wattamüin woulia? Anuu nünüiki Ezequías chi aluwataashikai: «Pujutuin püchiiruajee süpüshuaʼa tü taainjalakat». Müsü tü noota ashajünakat suluʼu tia wetsiikulokot: «Püsünneʼerüin taainjala süpüla nnojoluinjatüin piʼrüin shia» (Is. 38:9, 17; noota). Wayaawajaale suulia waainjala müsü naapaakai aaʼin Jehová shia süpüla nujutuinjatüin wattamüin jee süpüla nnojoluinjatüin niʼrüin shia süchikuaʼa. Eesü süpüla süshajünüin wetsiikulokot tia mayaa: «Müshi maainjalakai taaʼin poʼuluʼu sükajee tü kasa paaʼinrakat tapüleerua». Pütchikat tia meematsü aka saaʼin tü sümakat Miqueas 7:18, 19 (paashajeʼera). Saashin tia pütchikat müsü nujutakai saaʼin Jehová waainjala shiinaluʼumüin tü palaakat. Sümaiwa paala nnojotsü süpüla süntünüin anain wanee kasa sujutuule shiinaluʼumüin tü palaakat.

 8. ¿Kasa wekirajaaitpaka anain?

⁸ Wayaawatüitpa aaʼu sükajee tü pütchi ashajünakat suluʼu tü Bibliakat tü naaʼinrakat Jehová motopa naaʼin waainjala. Müsü nülüʼüjakai saaʼin waainjala, tü jawatakat maʼin wamüin otta jimatüsü waaʼin sutuma tia. Müsü waaʼin maʼaka naaʼin David wanaa sümaa nümüin: «Anakuwaʼipalii na wayuu alatinnakana aainjala nutuma Maleiwa jee na nülaʼajaakana aainjala. Anakuwaʼipaitaʼaleejaʼa chi wayuu nnojoikai sotokuʼu müin naaʼin Jehová naainjala» (Roma 4:6-8). Niaʼala neʼe Jehová motokoi aaʼin saainjala wayuu.

NÜLAʼAJAAIN JEHOVÁ WAAINJALA

 9. ¿Kasa ashajünaka suluʼu tü Biblia wayaawatakalü atuma tü naaʼinrakat Jehová motopa naaʼin waainjala?

⁹ Wekirajaainjatü anain jooluʼu waneirua  pütchi ashajünaka suluʼu tü Bibliakat wayaawateetka atuma tü naaʼinrakat Jehová süpüla motuin naaʼin waainjala sükajee naapajiraain nikii Jesús waaʼu. Saashin tü Bibliakat müsü nüshijaakai aaʼin Jehová waainjala süpüla wuleinjatüin shia. Sutuma naaʼinrüin tia wulesü nukuwaʼipa chi kaainjalashikai nutuma (Sal. 51:7; Is. 4:4; Jer. 33:8). Anuu tü nümakat Jehová süchiki tü naaʼinrakat süpüla motuin naaʼin waainjala: «Jaʼitairü müin ishokai saaʼin tü jaainjalakat, kasuujeerü shia tatuma maʼaka saaʼin nieve, jaʼitairü müin ishokai saaʼin maʼaka saaʼin kuluulu carmesí, kasuujeerü tatuma maʼaka saaʼin laana» (Is. 1:18). Kapüleesü maʼin süpüla saakatünüin suulia tü kuluulu kasuutatkat tü ishokot sünain. Nüshajirüin tia Jehová süpüla wayaawatüin saaʼu eein süpüla nülaʼajaain waainjala.

10. ¿Jarat tü pütchi ashajünakat suluʼu tü Bibliakat wayaawataka akajee motowalin naaʼin Jehová waainjala?

¹⁰ Wekirajaaitpa anain suluʼu ekirajaaya 31 müin waainjala maʼaka saaʼin wanee juyaala (Mat. 6:12; Luc. 11:4). Kaainjalawaipa waya nümüin Jehová müsü sükooʼomüinraakai saaʼin wojuyaala. Motopa naaʼin Jehová waainjala müsü nuwalaajakai saaʼin tü wojuyaala wattakat saalii. Nnojoluitpakalaka choʼujaain wawalaajüin shia. Nnojotsü nuchuntuin wamüin wawalaajüinjatüin tü waainjala motuitpakat naaʼin. Amülialaasü waaʼin süka müin nukuwaʼipa Jehová.

11. ¿Kasa süküjeeka achiki tü Bibliakat wanaa sümaa sümüin «sülatinnajatüin [sülaʼajaanüin] jaainjala juulia»? (Aluwataaushikana 3:19).

¹¹ (Paashajeʼera Aluwataaushikana 3:19). Tü pütchi «sülatinnajatüin jaainjala juulia» makat, ashajünakat suluʼu tia wetsiikulokot sünainjeejatü wanee pütchi griego, «alaʼajawaa wanee kasa» maluʼulu shia. Nnojotsü neʼe nuwalaajüin Jehová waainjala, nülaʼajaainña shia. Tü naaʼinrakat Jehová wapüleerua müsü aka saaʼin tü naaʼinrakat wanee wayuu nüpüleerua chi wayuu kojuyaalakai nuulia. Nüshajüin chi wayuukai suluʼu wanee karaloʼuta jeʼrain maʼin tü nujuyaalakat nuulia. Eesüjaʼa nejeettüle tü karaloʼuta sümaajatkat nujuyaala chi kojuyaalashikai nuulia, nnojotpejeʼe neʼe naaʼinrüin tia, nülaʼajaainña süpüshuaʼa. Tü süshajapuʼukat wayuu sümaiwa sünain wanee karaloʼuta alaʼajaanapuʼusü sükajee wüin. Wanaa sümaa sülaʼajaanüin tü juyaala ashajünakat sünain wanee karaloʼuta müiria nnojoluin jayain shia. Müshi mojuyaalakai naaʼin chi wayuukai. Kojutusü maʼin wamüin süka nülaʼajaain Jehová waainjala (Sal. 51:9).

12. ¿Kasa watüjaka sünainjee Isaías 44:22 süchiki tü naaʼinrakat Jehová motopa naaʼin waainjala?

¹² Anuu tü nümakat Jehová suluʼu Isaías 44:22 süchiki wanee kasa naaʼinraka motopa naaʼin waainjala: «Talatireerü sooʼopünaa taaʼin tü paainjalakat maʼaka sülatüin wanee siruma sooʼopünaa wanee kasa sümaa nnojoluin jaʼyain shia sutuma, nnojoleerü jaʼyain paainjala maʼaka nnojoluin jaʼyain kasa sukojojoopa tü sirumakat». Motopa naaʼin waainjala Jehová müsü süsirumajaakai aaʼin tü mmapaʼakat nutuma süpüla nnojoluin jaʼyain tü waainjalakat.

13. ¿Jamüinjatü paaʼin motopa naaʼin Jehová paainjala?

¹³ ¿Kasa watüjaka sünainjee tü pütchi ashajünakat suluʼu tü Bibliakat süchiki tü naaʼinrakat Jehová motopa naaʼin waainjala? Nnojoluinjatüin mojukuʼu müin waaʼin saalinjee waainjala, jama motuitpa shia naaʼin Jehová. Nnojoluitpa choʼujaain wawalaajüin waainjala, jama suwalaajünüitpain saaʼu amülain nüsha Jesucristo waaʼu. Süka nülaʼajaaitpain waainjala Jehová müshii maainjalakai waya noʼuluʼu. Naaʼinrüin Jehová tia wanaa sümaa wayaawajaain suulia waainjala.

NÜCHEKÜIN JEHOVÁ ALEEWAIN WAYA WACHIKUAʼA NÜMAA

14. ¿Jamüsü nnojoluinjatkaʼa mojukuʼu müin waaʼin motopa naaʼin Jehová waainjala? (Piirakaa sümüin tü ayaakuaakat).

¹⁴ Süka motuin naaʼin Jehová waainjala eeshii süpüla aleewain waya wachikuaʼa nümaa. Sutuma watüjaain saaʼu tia, nnojoleerü mojukuʼu müin waaʼin saalinjee tü kasa mojusü waaʼinrapuʼukat,  nnojoleerü jülüjakuʼu müin waaʼin jashichin Jehová wamüin otta nnojoleena süsalain waainjala nutuma. Nnojoleerü müin wakuwaʼipa nutuma. Anuu nünüiki Jehová nükajee Jeremías, chi nünüikimaajachikai: «Süka moteerüin taaʼin naainjala otta nnojorüleejeeria sotuin taaʼin tü kasa mojusü naainjakat» (Jer. 31:34). Nüküjain tia chi aluwataaushikai Pablo wanaa sümaa nümüin: «Nnojoleerü sotuin taaʼin tü naainjalakat» (Heb. 8:12). ¿Jamaluʼulu nnojoleerüin sotuin naaʼin Jehová waainjala?

15. ¿Jamaluʼulu nnojoleerüin sotuin naaʼin Jehová waainjala?

¹⁵ Tü pütchi «sotoo aaʼin» makat ashajünakat suluʼu tü Bibliakat nnojotsü neʼe aküjünüin sükajee tia tü jülüjakat naaʼin wanee wayuu süchiki tü alatakat sümaiwa. Aküjüneesiaʼaya sükajee tia pütchikat süchiki tü naaʼinrajatkat wanee wayuu saaʼujee wanee kasa alatakat sümaiwa. Süpüla wayaawatüin saaʼu tia jülüja waaʼin tü nümakat chi wayuu mojulaashi akachennakai naʼatoʼu Jesús. Müshi nia: «Sotoiwa taya paaʼin Jesús puluwataapeena» (Luc. 23:42, 43). Nnojotsü neʼe nuchuntuin chia wayuukai nümüin Jesús jülüjainjachi nia naaʼin, achuntushiaʼaya nia kaalinwaa nümüin. Sükajee tü nümakat Jesús wayaawata aaʼu tü naaʼinreetkat nüpüleerua chia wayuukai, nüsoʼireʼerüinjatüin naaʼin. ¿Jamaluʼulu nnojoleerüin sotuin naaʼin Jehová waainjala? Müiria nnojoluin süsalain waya waainjala nutuma otta nnojoleerü nüchekajüin wamüin tü kasa naainjakat wapüleerua, jama nülatirüitpain sooʼopünaa naaʼin waainjala.

16. ¿Jarat tü pütchi ashajünakat suluʼu tü Bibliakat wayaawataka atuma jameerüin waaʼin motopa naaʼin Jehová waainjala?

¹⁶ Wekirajaa sünain wane pütchi ashajünakat suluʼu tü Bibliakat wayaawataka atuma jameerüin waaʼin motopa naaʼin Jehová waainjala. Süka nnojoluin lotuin wakuwaʼipa süchepchiashii waya tü waainjalakat, müshii kapükai waaʼin süka kaleena. Shiasaʼa motopa naaʼin Jehová waainjala, müsü nüchoujeʼerakai saaʼin tü kaleenakat, taashikalaka waya suulia waainjala (Roma 6:17, 18; Apoc. 1:5). Talatüshi wanee achepchiee taashipa nia atumawaa. Talataleepejeʼe maʼin waaʼin taashipa wakuwaʼipa suulia waainjala nutuma Jehová.

17. ¿Jamaluʼulu naawaleʼerüin waya Jehová suulia wanee ayuulii? (Isaías 53:5).

 ¹⁷ (Paashajeʼera Isaías 53:5). Saashin tü Bibliakat müsü wanainkai saaʼin wanee ayuulii outasiroʼu süka waleʼeruʼuin süchiki kaainjalaa. Tia shia tü chiiruaajatkat pütchi wekirajaainjatka anain ashajünakat suluʼu tü Bibliakat. Naawaleʼerüin waya Jehová suulia tia ayuuliikat saaʼujee naapajiraain nikii chi Nüchonkai waaʼu. Müshiijeseʼe eein süpüla aleewain waya wachikuaʼa nümaa, tü amülouikat kaainjalapa waya (1 Ped. 2:24). Talatüshi wanee wayuu naawalaapa suulia wanee ayuulii, talataleepejeʼe maʼin waaʼin süka müin naawaleʼerakai waaʼin Jehová süpüla aleewainjanain waya wachikuaʼa nümaa.

ANASÜ WAKUWAʼIPA SUTUMA MOTUIN NAAʼIN JEHOVÁ WAAINJALA

18. ¿Kasa watüjaaitpaka aaʼu sünainjee tü pütchi wekirajaaitpakalü anain süchiki motuin naaʼin Jehová waainjala? (Paashajeʼera tü pütchikat «Tü naaʼinrakat Jehová süpüla motuin naaʼin waainjala»).

¹⁸ ¿Kasa watüjaaitpaka aaʼu sünainjee tü pütchi wekirajaaitpakalü anain suluʼujee tü Bibliakat süchiki motuin naaʼin Jehová waainjala? Wanaa sümaa motuin naaʼin Jehová waainjala nülaʼajaain shia. Suluʼujee tia eeinnapa süpüla aleewain maʼin waya nümaa chi Washi iipünaajachikai. Nnojoluinjatü jülüjain waaʼin motuin naaʼin Jehová waainjala saaʼujee waaʼinrüin wanee kasa anasü, naaʼinrüin tia süka nücheküin shia. Nüsülajala wamüin Jehová tia süka alin waya nüpüla sümaa kamaneein maʼin nia wamüin (Roma 3:24).

19. (1) ¿Kasa talataka atuma waaʼin? (Roma 4:8). (2) ¿Kasa wekirajaainjatka anain sünain tü wane ekirajaayakat?

¹⁹ (Paashajeʼera Roma 4:8). Saashin Salmo 130:4 nnojoishi eein wane maʼaka naaʼin Jehová suluʼu motuin naaʼin saainjala wayuu, kojutusü maʼin wamüin tia. Keeʼireere waaʼin motuin naaʼin Jehová waainjala waaʼinrüinjatü tü nümakat Jesús, tü makat mayaa: «Nnojorüle motuin jaaʼin naainjala na waneinnua, nnojoleerü motuin naaʼin jaainjala chi Jüshi iipünaajachikai» (Mat. 6:14, 15). Washata tü naaʼinrakat Jehová süpüla motuin waaʼin naainjala na waneinnua. Wekirajaajeerü anain tia sünain tü wane ekirajaayakat.