MAAʼULU YAA na wayuukana kapülasü naaʼin nakuwaʼipa neʼe namüiwaʼa noulia na waneinnua. Mayaainjeʼe kojutuin atumawaa naya, keeʼireesü naaʼin alanaʼaleein nakuwaʼipa noulia na waneinnua. Saashin tü Bibliakat kapüleerü naaʼin nakuwaʼipa na wayuukana namüiwaʼa jee nnojoleena naya aapüin analuʼut sülüʼütpa sükalia süpüla sajaʼttüin kasa mojusü (2 Tim. 3:2).

Kakaliairü kapülain saaʼin sukuwaʼipa wayuu. Jamüshijaʼa Adán sümaa Eva naneeküin tü anakat saaʼin namüin. Müliashiijeseʼe waya sutuma nnojoluin anain tü kasa naneekakat. Kakalia mapa wanee aluwataashi chayaa Judá, Uzías nünülia, naʼajüin wunuʼu jemeta eejuu suluʼu tü aʼwaajüleekat sümaa nnojoluin aneekuushin nia süpüla naaʼinrüinjatüin tia (2 Crón. 26:18, 19). Jülüjasü naaʼin na fariseokana jee na saduceokana kojutuinjanain naya sutuma wayuu saaʼujee nülüin naya Abrahán (Mat. 3:9).

Sutumajee kepiain waya saʼaka wayuu kapülaka aaʼin sukuwaʼipa sümüiwaʼa eejeesü waaʼin suulia washatüin nakuwaʼipa (Gal. 5:26). Eesüjaʼa süpüla jülüjain waaʼin kojutuinjanain waya natuma na waneinnua. ¿Kasa waaʼinrajatka süpüla nnojoluin müin wakuwaʼipa? Anasü watüjaale saaʼu tü jülüjakat naaʼin Jehová süchiki tia. Wekirajaajeerü anain piamasü pütchi suluʼukat tü Bibliakat.

Nüküjain Jehová wamüin jaraliinjanain na kojutuinjanakana wamüin. Wekirajaa süchiki tia.

• Keeʼireesü naaʼin Jehová kojutuinjachin wanee wayuu sutuma nuʼwayuuse jee alinjatüin nüpüla  shia chi suʼwayuusekai (Éf. 5:33). Chi wayuu kaʼwayuusekai kapülainjatüin naaʼin nuʼwayuuse suulia wanee wayuu naata (1 Cor. 7:3). Oonooinjana na tepichikana sümaa sünüiki nei jee nashi. Na kachonshiikana naaʼinmajüinjanain nachonnii sümaa alinjanain naya napüla (2 Cor. 12:14; Éf. 6:2).

• Weeʼiyatüinjatü kojutuin wamüin na laülaashiikana suluʼu tü outkajaaleekat sükajee anain maʼin tü naʼyataainkat (1 Tes. 5:12). Akanasaʼa naya nnojotsü alaülaajaainjatüin nakuwaʼipa naaʼu na wawalayuukana (1 Ped. 5:2, 3).

• Nia Maleiwa aapaka laülawaa namüin na sülaülajanakana mma. Müsüjeseʼe choʼujaain wawalaajüinjatüin tü nneerü nachuntakat wamüin jee kojutuin naya watuma (Roma 13:1, 6, 7).

Sükajee alin waya nüpüla Jehová kojutushii waya nümüin. Tü eekat sünainjee tü kaainjalaakat shia neʼe tü outaakat (Roma 6:23). Wainmapejeʼe tü kasa anasü weʼrakat nutuma Jehová sutuma alin waya nüpüla (Sal. 103:10, 11). Süpüshuaʼa tü kasa wamaʼanakat jee tü waʼyataainkat nümüin aapünüsü shia wamüin sükajee kamaneein maʼin Jehová wamüin (Roma 12:6-8; Éf. 2:8).

Eeja waaʼin suulia wanaawain waaʼin namaa na manoujainsaliikana. Eesüjaʼa kapülain waaʼin wakuwaʼipa wamüiwaʼa sümaa nnojoluin watüjaain saaʼu. Süpüla watüjaain saaʼu müin nukuwaʼipa wanee wayuu nüküja achiki Jesús nukuwaʼipa wanee wayuu eekai amaʼana wanee yüüja eere süpünajünüin uuwa. Nüsakajüin waneinnua wayuu süpüla naʼyataainjanain sümaa siraain kaʼikat naaʼu jee nuwalaajüin naya süka wanee denario. Asakajüshi nia sooʼomüin wayuu süpüla aʼyatawaa soʼu kaʼikat tia. Shiasaʼa aipaʼapa naaʼu nuwalaajaka napüshuaʼa na aʼyataakana nümüin süka wanee denario. Namaʼaleeya na wayuu aʼyataakana soʼu wanee oora. Akanasaʼa na oʼttatüjüliikana sünain aʼyatawaa naʼatapajüin walaainjanain naya sooʼomüin, jama siraain kaʼikat naaʼu sünain aʼyatawaa (Mat. 20:1-16). Tü nikirajeekalü achiki Jesús shia talatüinjanain waya sümaa tü kasa naapakat Jehová wamüin.

Nnojo wachuunajüin wainma kasa, shia anaka aluʼu talatüle waaʼin sümaa tü kasa wamaʼanakat (1 Tes. 5:18). Washata nukuwaʼipa chi aluwataaushikai Pablo sünain nnojoluin nüchuunajüin kasa namüin na chejeʼewaliikana Corinto.  Mayaainjeʼe nayainjana aapüin tü kasa choʼujaakat nümüin (1 Cor. 9:11-14). Nnojo wachuunajüin wainma kasa namüin na waneinnua shia anaka aluʼu talatüle waaʼin sümaa tü kasa asülajünakat wamüin.

Nnojo yaletüin waaʼin. Yaletüle naaʼin wanee wayuu jülüjasü naaʼin wainmainjatüin tü kasa aapünakat nümüin. Süpüla nnojoluin müin wakuwaʼipa, anasü weeʼiratüle tü jülüjakat waaʼin süchiki wakuwaʼipa.

Niiʼiyatüin Daniel anain nukuwaʼipa wapüleerua nnojotsü yaletüin naaʼin. Wayuu kojutushii na nüpüshikana Daniel. Anashi aaʼinchi nia, atüjashi maʼin sümaa tütüin nia. Eesüjaʼa jülüjale naaʼin Daniel saapünüle laülawaa nümüin saaʼujee anain nukuwaʼipa (Dan. 1:3, 4, 19, 20). Nnojotpejeʼe yaletüin naaʼin Daniel, müsüjeseʼe kojutushi nia nümüin Jehová (Dan. 2:30; 10:11, 12).

Nnojo kapülain waaʼin wakuwaʼipa wamüiwaʼa maʼaka naaʼin na manoujainsaliikana. Talata waaʼin sümaa tü kasa anasü naapakat Jehová wamüin sutuma kamaneein maʼin nia.