¿EEIRIA piʼrüin müliaa sümaa nnojoluin jaralin akaalinjain pia? Eesü kaʼi wamüiwaʼakai waaʼin sümaa mojuin waaʼin sutuma kapüleein maʼin tü kasa alatakat jee keemain maʼin tü mmapaʼakat. Nnojoliipejeʼe waya wamüiwaʼain (2 Tim. 3:1). Saashin tü Bibliakat eejeena na waʼaleewainyuu akaalinjeenakana waya müliale waya (Prov. 17:17).

Oʼunushii na naʼaleewainkana chi aluwataaushikai Pablo nümaa sünain alapalawaa naaʼu na nawalayuukana jee nakaalinjain maʼin nia soʼu tia (Col. 4:7-11). Wanaa sümaa püreesain Pablo chayaa Roma akaalinjünüshi nia natuma na naʼaleewainkana sünain aaʼinraa waneirua kasa isaka nüchiki. Jamüshijaʼa Epafrodito naapüin nümüin Pablo tü kasa naluwataalakat na wawalayuu chejeʼewaliikana Filipo (Filip. 4:18). Akaalinjünüshi Pablo nutuma Tíquico sünain eʼikajaa tü karaloʼuta nüshajalakat namüin na anoujashiikana (Col. 4:7). Akaalinjünüshi Pablo natuma na naʼaleewainkana süpüla ayatüin nia sünain akatchinraa nanoula na anoujashiikana wanaa sümaa chajachin nia püreesain nipialuʼu jee wanaa sümaa püreesain nia chayaa Roma. ¿Kasa waaʼinrajatka süpüla weeʼiyatüin shiimain waʼaleewain wanee wayuu?

Maaʼulu yaa eeshii wawalayuu akaalinjakana otta aaʼinrakana kasa napüleerua na naʼaleewainyuukana. Jülüja waaʼin sukuwaʼipa Elísabet, wanee wawala pürekutsoot rekulaat shia chayaa España. Wanaa sümaa süküjünüin sümüin mepin tü kanset sünainkat tü shiikat eejatü wanee wawala atütüleʼerakat maʼin saaʼin sükajee waneirua pütchi suluʼuka tü Bibliakat. Müsü sünüiki Elísabet: «Atütülaasü maʼin taaʼin sutuma tü pütchi aluwataanakat tamüin, nnojotsü tamüiwaʼain taaʼin otta akatchinraasü taaʼin sutuma» (Prov. 18:24).

Aleeweena maʼin waya namaa na wawalayuukana waküjale pütchi namaa otta watütüleʼerüle naaʼin sünain tü outkajawaakat. Eesü süpüla wakaalinjain wanee wawala eekai laülaaichin süpüla nuʼunajachin sünain tü outkajawaakat otta waküjain pütchi nümaa. Waaʼinrüle tia atütülaajiraajeerü waaʼin namaa na wawalayuukana (Roma 1:12). Eepejeʼe waneinnua wawalayuu kapüleekana amüin nojuʼitüinjanain nepialuʼujee. ¿Kasa waaʼinrajatka süpüla wakaalinjain naya?

Kapüleʼewaisü namüin waneinnua wawalayuu oʼunaa sünain tü outkajawaakat sutumajee ayuulin naya jee shiale sutumajee waneirua kasa. Tia shia tü alatakat nümüin David, ayuuishi nia sutuma kanset. Eeshi maʼaka aipirua kashi nia sünain saainjünüin quimioterapia nümüin. Soʼunnaa tia, outkajaashi nia sümaa tü nuʼwayuusekat suluʼupünaa internet.

¿Kasa naaʼinraka na wawalayuukana süpüla natütüleʼerüin naaʼin? Sajaʼlajaapa tü outkajawaakat  yootushii waneinnua wawalayuu namaa suluʼupünaa videoconferencia. Eeshii waneinnua wawalayuu aluwataakana mensaaje, natütüleʼerüin maʼin naaʼin sutuma anain nanüiki sünain tü outkajawaakat. Anasü naaʼin David sümaa Lidia süka neʼrüin alin maʼin naya napüla na wawalayuukana.

Anasü wachajaale sukuwaʼipa süpüla waküjain pütchi namaa na wawalayuu kapüleekana amüin ojuʼitaa suluʼujee nepia. Wakatarüle kaʼi süpüla waaʼinrüin tia, natüjaajeerü aaʼu sotuin naya waaʼin (Prov. 3:27). Eesü süpüla waküjain pütchi namaa süka carta jee shiale suluʼupünaa teleepono. Otta na laülaashiikana anasü nachajaale sukuwaʼipa süpüla naapajüinjatüin na wawalayuukana tü outkajawaa süpülajatkat aküjaa pütchi suluʼupünaa internet. Talatüsü maʼin naaʼin David sümaa Lidia süka sukumajünüin sukuwaʼipa tia napüleerua. «Atütülaasü maʼin waaʼin süka yalain waya namaa na wawalayuukana sünain aapajaa tü pütchi suluʼujeejatkat tü Bibliakat otta woʼuraajüin namaa süpülapünaa nojuʼitüin sünain aküjaa pütchi», müsü nünüiki chi wawalakai. Anashi wounejaale chi wekirajüinkai nipialuʼu chi wawala kapüleekai amüin ojuʼitaa suluʼujee nipia süpüla wekirajüin nia chayaa nümaa, eesü süpüla waaʼinrüin tia müleka analejeʼeya shia.

Walatirüle kaʼi namaa na wawalayuu kapüleekana amüin ojuʼitaa suluʼujee nepia, weʼraajeerü maʼin nakuwaʼipa otta aleeweena maʼin waya namaa. Sutuma natüjaain maʼin süpüleerua aküjaa pütchi sümüin wayuu kojuteena maʼin naya wamüin. Waaʼinrüle tia napüleerua na wawalayuukana aleeweena maʼin waya namaa (2 Cor. 6:13).

Atütülaasü naaʼin Pablo sutuma aleewain nia nümaa Tito (2 Cor. 7:5-7). Tü watüjakat sünainjee nukuwaʼipa Tito shia nnojoluinjatü neʼe anainjatüin wanüiki namüin na wawalayuukana, waaʼinrüinjatü kasa anasü napüleerua otta nnojoliinjana wapütüin naya namüiwaʼa (1 Juan 3:18).

Akaalinjiraashii maʼin na wawalayuu chakana Rusia. Jülüjataa waaʼin nukuwaʼipa chi wawalakai Serguéi sümaa tü nuʼwayuusekat. Antüsü tü pulusiiakat suluʼumüin nepia süpüla süsaijüin shia jee mapa namaanaka sutuma süpüla süsakiijain naya. Süjütünaka mapa tü nuʼwayuusekat. Nüküjain Serguéi sükaalinjünüin tü nuʼwayuusekat wanaa sümaa süleʼejüin shipialuʼumüin. Antüsü sünainmüin wanee wawala meimmoluinka maʼin aaʼin jee süchikijee nantaka waneinnua wawalayuu süpüla nakaalinjain shia sünain anoutaa süpüshuaʼa tü kasa chakat nepialuʼu.

Anuu nünüiki Serguéi: «Kamalainsü maʼin tamüin tü sümakat Proverbios 17:17: ‹Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin›. Anasü maʼin tamüin tia pütchikat. Shiimain, nakaalinjain waya na waʼaleewainkana wanaa sümaa süpüleeruaanüin waaʼin. Nnojoishi nüpütüin taya Jehová tamüiwaʼa, naapüin na wawalayuukana süpüla nakaalinjain taya». a

Sutuma kapüleejeerüin maʼin tü kasa alatakat choʼujaasü maʼin aleewain maʼin waya namaa na wawalayuukana otta wakaalinjiraain. Sutuma sülüʼülüin tü kaʼi eere shiʼrüinjatüin maʼin oʼu wayuu müliaa choʼujaasü maʼin aleewain waya namaa na wawalayuukana, aijiraainjanain waya sümaa wakaalinjiraain maʼin (1 Ped. 4:7, 8).