EKIRAJAAYA 6
JAYEECHI 18 Anashiʼiya müin waya puʼtteʼerüin
Kojutusü wamüin motuin naaʼin Jehová waainjala
«Aisü maʼin wayuu nüpüla Maleiwa, naapüinjeseʼe nikii chi waneeshikai Nüchon» (JUAN 3:16).
TÜ WATÜJEETKAT
Kojuteerü wamüin watüjaale saaʼu tü naaʼinrakat Jehová süpüla motuin naaʼin waainjala.
1, 2. ¿Kasa wanaawaka aluʼu wakuwaʼipa nümaa chi jimaʼai aashajaanakai achiki suluʼu pütchi waneesia?
JÜLÜJATAA WAAʼIN nukuwaʼipa wanee jimaʼai. Süchon nia wayuu washinnuu. Soʼu wanee kaʼi naapinnaka sünain pasiruwaain chi nüshikai sümaa tü niikat. Nütüjaaka saaʼu mapa nashaitajaain süka nanneetse jee wattain maʼin saalii nojuyaala. Eetaayaai kasain apütaain nüpüla chi jimaʼaikai neʼipünaaichipa neʼe sümaa kojuyaala. Apüleeruaanüsü joo naaʼin süpüla nuwalaajüinjatüin tia juyaalakat. Isasü nüchiki nuwalaajüinjatüin tia nneetkat, jama wattain maʼin saalii.
2 Müsia neʼe wakuwaʼipa maʼaka saaʼin nukuwaʼipa chi jimaʼaikai. Na wayuu kachonkana waya, Adán sümaa Eva, anapuʼusü nakuwaʼipa otta kepiapuʼushii naya suluʼu wanee paʼaraiisü anasü maʼin (Gén. 1:27; 2:7-9). Anayülüje nakuwaʼipa sümaa talatüin naaʼin süpüla kaʼikat süpüshuaʼa. Nnojotpejeʼe müin nakuwaʼipa. Ajünajaanüshii naya suluʼujee tia paʼaraiisükat otta nnojoluitpa eein süpüla katüin noʼu süpüla kaʼikat süpüshuaʼa. Anuu sünüiki tü Bibliakat süchiki tü neʼipünaalakat napüla na nachonniikana: «Kaainjalashii napüshuaʼa na wayuukana nünainjee waneeshia neʼe wayuu [Adán], outuinnaka naya suluʼujee tia. Aʼwalakajaasü tü outaakat naʼakapünaa napüshuaʼa na wayuukana, jama kaainjalain naya» (Roma 5:12). Tü niʼipünaalakat wapüla Adán shia tü kaainjalaakat, tü outakalü atuma waya. Tü kaainjalaakat müsü aka saaʼin wanee juyaala nnojotka süpüla wawalaajüin (Sal. 49:8).
3. ¿Jamüsü süshajünakaʼa suluʼu tü Bibliakat müin waainjala maʼaka saaʼin wanee juyaala?
3 Saashin tü Bibliakat tü kaainjalaakat müsü aka saaʼin wanee juyaala (Mat. 6:12; Luc. 11:4). Wanaa sümaa kaainjalain waya müshii kojuyaalakai waaʼin nümüin Jehová. Nnojorülejeʼe nukumajüin sukuwaʼipa Jehová süpüla nuwalaajüin waainjala ayatüinjanaʼaya neʼe waya outuin (Roma 6:7, 23).
4. (1) ¿Jamüsüjeʼe wakuwaʼipa nnojoliire wakaalinjünüin? (Salmo 49:7-9). (2) ¿Jamaluʼulu tü pütchi «kaainjalaa» ashajünakat suluʼu tü Bibliakat? (Paashajeʼera tü pütchikat « Kaainjalaa»).
4 Nnojotsü süpüla wasaʼwatüin tü amülouikat nutuma Adán sümaa Eva (paashajeʼera Salmo 49:7-9). Nnojoliirejeʼe wakaalinjünüin nnojotsüje katüin woʼu süpüla kaʼikat süpüshuaʼa jee nnojotsüje asoʼiraain waaʼin süchikijee outaa. Müsüje wakuwaʼipa maʼaka saaʼin mürüt, outule shia nnojotsü süpüla süsoʼiraainjatüin aaʼin süchikuaʼa (Ecl. 3:19; 2 Ped. 2:12).
5. ¿Kasa naaʼinraka Jehová wapüleerua süpüla nuwalaajüin waainjala? (Piirakaa sümüin tü ayaakuaa sünainkat süta tü rewiisütakat).
5 Jülüjataa waaʼin nukuwaʼipa chi jimaʼai waashajaakai achiki suluʼu pütchi waneesia. ¿Jamüsüjeʼe naaʼin nüküjale wanee wayuu washirü nümüin nuwalaajüinjatüin süpüshuaʼa nujuyaala? ¿Aashin talateechin nia otta nüchekeerü nükaalinjünüin? Müsia neʼe tü naaʼinrakat wapüleerua chi Washikai Jehová, chi aikai apüla waya. Nuwalaajüin tü waainjalakat, tü niʼipünaalakat wapüla Adán. Anuu nünüiki Jesús süchiki tü naaʼinrakat Maleiwa wapüleerua: «Aisü maʼin wayuu nüpüla Maleiwa, naapüinjeseʼe nikii chi waneeshikai Nüchon süpüla nnojoliinjanain amüloulin na wayuu anoujakana nünain. Neʼreenaka suluʼujee tia kataa oʼuu süpüla kaʼikat süpüshuaʼa» (Juan 3:16). Sükajee tü naaʼinrakat Jehová wapüleerua eeitpa süpüla anain wakuwaʼipa nümaa.
Nüküjain Jesús sümüin wayuu moteerüin naaʼin Jehová saainjala sutuma naapajiraainjachin Jesús nikii saaʼu wayuu (Juan 3:16). Outaka nia mapa süpüla taashinjatüin wayuu suulia saainjala (Paashajeʼera tü pütchikat 5).
6. ¿Jamüsü jülüjainjatkaʼa waaʼin waneirua pütchi ashajünaka suluʼu tü Bibliakat süchiki tü naainjakat Maleiwa süpüla motuin naaʼin waainjala?
6 ¿Kasa waaʼinrajatka süpüla anain wakuwaʼipa sutuma nuwalaajüin Maleiwa waainjala? Süpüla watüjaain saaʼu tia wekirajaajeerü sünain waneirua pütchi ashajünaka suluʼu tü Bibliakat otta jamaluʼuluin shia. Jülüjale waaʼin tia pütchikat kojuteerü wamüin tü naaʼinrakat Jehová süpüla motuin naaʼin waainjala.
TÜ KEEʼIREEKAT NAAʼIN: SHIA ANAJIRAAINJANAIN WAYA NÜMAA
7. (1) ¿Kasa amaa amülouika nutuma Adán sümaa Eva? (2) ¿Kasa choʼujaaka saainjünüin wapüleerua? (Roma 5:10, 11).
7 Wanaa sümaa kaainjalain Adán sümaa Eva nnojoliinnapa eein süpüla katüin noʼu süpüla kaʼikat süpüshuaʼa otta namojujaain nakuwaʼipa nümaa Jehová, chi Nashikai. Nnojoluiwaʼaya kaainjalain naya nüpüshipuʼushii naya Maleiwa (Luc. 3:38). Nüjünajaain naya Jehová naʼakajee nüpüshi wanaa sümaa neʼrüliijaain wayumüin nümüin. Alatüsü tia nnojoluiwaʼaya kachooin naya (Gén. 3:23, 24; 4:1). Choʼujaashiijeseʼe anajiraainjanain waya nümaa Jehová süka nüchonniin waya Adán sümaa Eva (paashajeʼera Roma 5:10, 11). Saashin wanee karaloʼuta tü pütchi «anajirawaa» ashajünakat suluʼujee tia wetsiikulokot sünainjeejatü wanee pütchi griego, «shia naʼaleewajaale wanee wayuu nümaa wanee nüʼünüü», maluʼulu tia pütchikat. Anataʼaleeshijaʼa maʼin Jehová süka nukumajüin sukuwaʼipa süpüla anajiraainjanain waya nümaa. ¿Jamüsü sukuwaʼipa nutuma?
TÜ SUKUWAʼIPAKAT NUTUMA: NÜLATIRÜIN SOOʼOPÜNAA NAAʼIN WAAINJALA
8. ¿Kasa naaʼinraka Maleiwa süpüla aleewainjanain na wayuukana nümaa mayaainjeʼe kaainjalain naya?
8 Nukumajüin sukuwaʼipa Jehová süpüla aleewainjanain na wayuukana nümaa mayaainjeʼe kaainjalain naya. Nunouteʼerüin sukuwaʼipa Jehová tü numojujakat Adán sükajee wanee kasa wanaawaka ojutu sümaa tü amülouikat nutuma. Suluʼu tü Pütchi Ashajuushikat suluʼu griego ashajünüsü tü pütchikat «nülaʼajaain Maleiwa saainjala wayuu», tü aküjüneekat sükajee tia meematüsü aka saaʼin tü aküjüneekat sükajee tü pütchikat «nülatirüin Maleiwa sooʼopünaa naaʼin saainjala wayuu» (Roma 3:25). Nülaʼajaain Maleiwa naainjala na wayuukana süpüla aleewainjanain naya nümaa.
9. ¿Kasa naaʼinraka Jehová süpüla nülatirüin sooʼopünaa naaʼin naainjala na israelitakana?
9 Nakalioʼu na israelitakana nukumajüin sukuwaʼipa Jehová tü naaʼinrajatkat süpüla motuin naaʼin naainjala otta süpüla aleewain naya nümaa. Uwatua süpüla juyakat chi laülaashikai napüleerua na sacerdotekana oʼutushi saaʼin mürüt soʼu tü Kaʼi Alatinnakalü oʼu Naainjala na Israelitakana. Nnojotsü süpüla sülaʼajaanüin waneepia naainjala wanee wayuu sutuma amülain neʼe süsha mürüt, jama kojutuin wayuu suulia mürüt. Anapejeʼe nümüin Maleiwa suʼutunule saaʼin mürüt saaʼu saainjala wayuu. Nücheküin tia niyaawajaale suulia naainjala wanee israelita otta naaʼinrüle tia wanaapünaa sümaa tü nuchuntakat (Heb. 10:1-4). Nayaawata aaʼu na israelitakana naleʼeruʼuin süchiki kaainjalaa wanaa sümaa noʼutuin saaʼin mürüt nümüin Maleiwa soʼu tü Kaʼi Alatinnakalü oʼu Naainjala jee müsia nayaawata aaʼulu choʼujaain saainjünüinjatüin wanee kasa napüleerua süpüla nülatirüin Maleiwa sooʼopünaa naaʼin naainjala süpüla kaʼikat süpüshuaʼa.
10. ¿Kasa naaʼinraka Jehová süpüla nülaʼajaain saainjala wayuu uwatuwoʼushi?
10 ¿Kasa naaʼinraka Jehová süpüla nülaʼajaainjatüin saainjala wayuu süpüla kaʼikat süpüshuaʼa? «Uwatua neʼe naapajiraain nikii [chi Nüchon aishikai nüpüla] süpüla müinjatüin nülüʼüjakai saaʼin saainjala watta saalii wayuu» (Heb. 9:28). Aapajiraashi nikii Jesús «süpüla suʼttaainjatüin watta saalii wayuu» (Mat. 20:28). ¿Kasa nuwalaajaka akajee Jehová süpüla naakajirüin waya suulia waainjala?
TÜ NUWALAAJAKALÜ AKAJEE SÜPÜLA NAAKAJIRÜIN WAYA
11. (1) ¿Kasa naaʼinraka Jehová süpüla naakajirüin waya? (2) ¿Jamüinjatü nukuwaʼipa wanee wayuu nuwalaajüinjatka akajee Jehová waainjala?
11 Saashin tü Bibliakat nüneeküin Jehová nuwalaajüin waainjala süpüla naakajirüin waya otta süpüla aleewain waya nümaa. ¿Kasa nuwalaajaka akajee Jehová süpüla saapünüin süchikuaʼa namüin na wayuukana tü amülouikat nutuma Adán? Sutumajee kaainjalain paala Adán sümaa Eva nnojotsü lotuin nakuwaʼipa otta nnojoliinnapa eein süpüla katüin noʼu süpüla kaʼikat süpüshuaʼa. Tü nuwalaajüinjatkalü akajee Jehová waainjala wanaawainjatüin sujutu sümaa tü amülouikat nutuma Adán (1 Tim. 2:6). Süpüla naakajirüin waya Maleiwa naapüinjatüin nikii wanee wayuu maainjalasai, wanee wayuu eekai süpüla katüin noʼu waneepia otta nücheküinjatü naapajiraain nikii waaʼu. Müle nukuwaʼipa wanee wayuu naapüinjee Maleiwa süchikuaʼa wamüin tü amülouikat paala nutuma Adán otta nülatirüinjee sooʼopünaa naaʼin waainjala.
12. ¿Jamüsü nuuntakaʼa Jesús naakajirüin waya suulia waainjala?
12 Anuu apünüinsü kasa nuuntaka akajee Jesús naakajirüin waya suulia waainjala: (1) maainjalasai nia, (2) eein süpüla katüin noʼu waneepia yaa saaʼu tü mmakat otta (3) anain nümüin naapajiraain nikii waaʼu (1 Ped. 2:22; Heb. 10:9, 10). Lotusü nukuwaʼipa Jesús maʼaka lotopuʼuin nukuwaʼipa Adán nnojoluiwaʼaya kaainjalain nia (1 Cor. 15:45). Sükajee naapüin nikii Jesús waaʼu nuwalaajüin waainjala süpüla saapünüin süchikuaʼa wamüin tü amülouikat nutuma Adán (Roma 5:19). «Chi chiiruaajaikai Adán» müshijeseʼe nümünüin Jesús. Nnojoikalaka choʼujaain wane wayuu lotokoi akuwaʼipa süpüla naakajirüin waya suulia waainjala, aapajiraashi nikii Jesús uwatua süpüla nükaalinjain wayuu süpüla kaʼikat süpüshuaʼa (Heb. 7:27; 10:12).
13. ¿Kasa anajiraaka atuma waya nümaa Jehová?
13 Wekirajaaitpain anain tü naaʼinrakat Jehová süpüla motuin naaʼin waainjala jee anajiraain waya nümaa: nukumajüin sukuwaʼipa süpüla nülaʼajaainjatüin waainjala, awalaajünüsü waainjala saaʼujee amülain nüsha Jesús (Éf. 1:7; Heb. 9:14).
TÜ KASA ANASÜ WEʼRAKAT: ALAʼAJAANÜSÜ WAAINJALA OTTA LOTUSÜ WAKUWAʼIPA
14. (1) ¿Kasa wekirajaainjatka anain? (2) ¿Jamüsü anakaʼa wekirajaale sünain tia?
14 ¿Kasa weʼraka sünainjee tü naaʼinrakat Jehová süpüla anajiraainjanain waya nümaa? Süpüla watüjaain saaʼu tia wekirajaajeerü anain piamasü pütchi ashajünaka suluʼu tü Bibliakat. Sükajee tia wayaawateerü saaʼu tü naaʼinrakat Jehová süpüla motuin naaʼin waainjala otta kojuteerü maʼin shia wamüin.
15, 16. (1) ¿Kasa aakajinnaka oulia waya? (2) ¿Jamüsü waaʼin sutuma taashitpa wakuwaʼipa suulia kaainjalaa jee outaa?
15 Saashin tü Bibliakat aakajinnüshii waya sükajee suwalaajünüin waainjala. Anuu nünüiki chi aluwataaushikai Pedro süchiki tia: «Oʼtteʼennüshii jia [«aakajinnüshii jia» maluʼulu tia] suulia tü nakuwaʼipapuʼukat jüpüleerua na jutuushinuukana, nnojoliipejeʼe jia oʼtteʼennüin süka wanee kasa atüjaka ajaʼttaa maʼaka saaʼin tü oorokot jee tü pülaatakat. Oʼtteʼennüshii jia sükajee tü nüshakat Cristo, kojutusü maʼin tia ishakat, müsü nüsha maʼaka saaʼin nüsha wanee anneerü mamojulakai jee anasü maʼin tia ishakat» (1 Ped. 1:18, 19).
16 Saaʼujee waakajinnüin taashisü wakuwaʼipa suulia kaainjalaa jee outaa, tü müliakalü maʼin atuma wayuu (Roma 5:21). Kojutushaatasü wamüin tü naaʼinrakat Jehová otta Jesús süka nawalaajüin waainjala saaʼujee amülain nüsha Jesús waaʼu (1 Cor. 15:22).
17, 18. (1) ¿Kasa naaʼinraka Jehová süpüla lotuin wakuwaʼipa? (2) ¿Kasa anasü weʼreetka sünainjee tia?
17 Süpüla lotuinjatüin wakuwaʼipa nülaʼajaain Maleiwa waainjala jee nnojotsü nuchuntuin wawalaajüinjatüin shia. Pansaasü tü naaʼinrakat Jehová sümaa tü nuluwataakalü anain, matüjainsai nia oʼtchejawaa sümaa wanee kasa, müsüjeseʼe nnojoliin anain neʼe wakuwaʼipa noʼuluʼu sünainjee waaʼinrüin wanee kasa eekai anain otta nnojotsü anain nümüin kaainjarale waya. Nücheküin Jehová motuinjatüin naaʼin waainjala saaʼujee kojutuin wamüin tü naaʼinrakat otta tü naaʼinrakat Jesús wapüleerua süpüla nawalaajüin waainjala (Roma 3:24; Gal. 2:16).
18 ¿Kasa weʼraka sünainjee lotuin wakuwaʼipa noʼuluʼu Jehová? Eeshii anoujashii aneekünakana süpüla naluwataain nümaa Jesús chaa iipünaa otta nüchoinshii naya Maleiwa (Tito 3:7; 1 Juan 3:1). Alaʼajaanüsü naainjala, müshii maainjalakai naya. Müshiijeseʼe naluwataainjanain chejee iipünaajee (Roma 8:1, 2, 30). Eetaashii joo na anoujashii aʼatapajakana katüin noʼu waneepia yaa saaʼu tü mmakat, aleewashii naya nümaa Maleiwa otta alaʼajaanüsü noulia naainjala (Sant. 2:21-23). Na wayuu wattakana aalii oʼttaajeenakana süchikumüin Armagedón, müinnia nnojoluin outuin naya (Juan 11:26). Asoʼiraajeerü naaʼin süchikijee outaa na lotokana akuwaʼipa otta na nnojoliikana lotuin akuwaʼipa (Aluw. 24:15; Juan 5:28, 29). Taasheerü nakuwaʼipa mapa na aʼyataashiikana nümüin Jehová, na yaainjanakana kepiain saaʼu tü mmakat, maʼaka taashin nakuwaʼipa na nüchooinkana Maleiwa (Roma 8:21). Saaʼujee nülatirüin woulia waainjala chi Washikai Jehová eeshii süpüla anajiraain waya nümaa. Anataʼaleesüjaʼa maʼin tü naaʼinrakat wapüleerua.
19. ¿Jamüsü wakuwaʼipa sünainjee tü naaʼinrakat Jehová otta Jesús? (Paashajeʼera tü pütchikat « Motusü naaʼin Jehová waainjala»).
19 Tü wakuwaʼipakat müsü aka saaʼu nukuwaʼipa chi jimaʼai waashajaakai achiki suluʼu pütchi waneesia. Amülouisü nuulia kasa süpüshuaʼa, watta maʼin saalii juyaala niʼipünaaka chi nüshikai jee tü niikat nüpüla. Anapejeʼe wakuwaʼipa saaʼujee tü naaʼinrakat Jehová wapüleerua. Nülatirüin sooʼopünaa naaʼin waainjala otta naakajirüin waya suulia waainjala saaʼujee amülain nüsha Jesús waaʼu. Sükajee kanoulain waya nünain Jesucristo oʼtteʼennüshii waya suulia kaainjalaa jee suulia outaa. Jee müsia alaʼajaanüsü woulia waainjala, müshii maainjalakai waya suluʼujee tia. Tü anaʼleekalia maʼin shia eein süpüla aleewain waya nümaa chi Washikai Jehová, chi aikai apüla waya.
20. ¿Kasa wekirajaainjatka anain sünain tü wane ekirajaayakat?
20 Kojutusü maʼin wamüin tü naaʼinrakat Jehová otta Jesús (2 Cor. 5:15). Nnojotsüjeʼe anain wakuwaʼipa nnojoliireje nakaalinjain waya. Sünain tü wane ekirajaayakat wekirajaajeerü anain waneirua pütchi suluʼujeejatka tü Bibliakat süpüla wayaawatüin saaʼu tü kasa anasü eejeetka sutuma motuin naaʼin Jehová waainjala.
JAYEECHI 10 Kojuta watuma Jeʼwaa
