Católicopuʼu na kachooinkana taya. Nayaawatapa shiain Jehová nünülia chi Maleiwakai aküjaliishii pütchi nüchiki Jehová naya. Süka kanoulain maʼin chi tashikai ooʼulaashi nia suulia akumajaa niyaakua Jesús süka taapüla. Shiasaʼa sutumajee kuʼyamalin chi tashikai, nukumajaaka wanee outkajaalee wünaapünaa sünain tü wepiakat, shia tü palajatka outkajaalee akumajünakat suluʼu tü pueulokot San Juan del Monte, suluʼu tü mmakat Manila, Filipinas.

Jemeishi taya soʼu 1952. Nekirajüin na kachooinkana taya nüchiki Jehová, maʼaka nekirajünüin na akaratshishiikana tawalayuu. Nikirajüin taya chi tashikai sünain aashajeʼeraa wanee kapiitulo suluʼujee tü Bibliakat weinshi jee ekirajaashi nia tamaa sünain waneirua karaloʼuta. Ounejaanüshii na wawalayuu alapalaakana waaʼu jee na weteliitakana süpüla makatüin naya wepialuʼu, talatüsü waaʼin jee katchinsü wanoula sükajee tü naküjakat wamüin. Waaʼinmaasü maʼin tü waʼyataainkat nümüin Jehová sükajee tü waapajakat.

Wainma kasa tatüjaka nanainjee na kachooinkana taya. Soʼu 1971 süchikijee sünaajaain tü teikat, oʼttushi taya sünain pürekutsoolin nümaa chi tashikai, shiasaʼa soʼu 1973 anaajaashi chi tashikai wanaa sümaa 20 touyase. Mayaainjeʼe tasukajüin na kachooinkana taya nnojotsü mojuin maʼin taaʼin jee nnojotsü amalajaain tanoula sutuma tatüjaain saaʼu tü sümakat tü Bibliakat (Heb. 6:19). Paliʼit kaʼi süchikijee nünaajüin chi tashikai, aneekünüshi taya süpüla pürekutsoolinjachin pesiaat taya suluʼu wanee mma pasanainka sünain tü palaakat chayaa Coron suluʼu tü mmakat Palawan.

21 touyase tantapa chayaa Coron. Suluʼujeeshi taya wanee mma miyoʼu, kapüleekat tamüin tantüin suluʼumüin wanee mma joʼuuchon eere matchin luusa, eere alin shiiʼiree wüin jee kemion. Sutuma palirüin na wawalayuu chajanakana chayaa eesü kaʼi taküjakalü oʼu pütchi tamüiwaʼa. Mojusü maʼin taaʼin soʼu tü palajatkat kashi, tasukajüin maʼin na tapüshikana jee na taʼaleewainkana, mojuwaisü maʼin taaʼin saʼwai, müshi tapüteekai aaʼin tü taʼyataainkat jee taleʼejüin tachikuaʼa tepialuʼumüin.

Mojule maʼin taaʼin, achuntashaatashi taya nümüin Jehová. Atütülaasü taaʼin sutuma waneirua pütchi suluʼujee tü Bibliakat otta tü suluʼukat tü karaloʼutakalüirua.  Jülüjapuʼusü maʼin taaʼin tü sümakat Salmo 19:14 eere süküjain müin Jehová maʼaka saaʼin wanee ipa miyoʼu tounjulaaya jülüjale taaʼin tü kasa anakat noʼuluʼu jee tü nukuwaʼipakat. Atütülaasü maʼin taaʼin sutuma wanee pütchi suluʼuka wanee Aapiria Wayuu makalü anülia: «Usted nunca está solo», a taashajeʼerawalin shia kojuyatua. Mayaainjeʼe müin tamüiwaʼakai maʼin taaʼin müshi yalajachikai aaʼin Jehová tamaa, tajayatüin maʼin kaʼikat tia süpüla achuntaa nümüin Jehová, ekirajaashi maʼin taya nüchiki jee tasakireʼerüin maʼin taaʼin nünain.

Maʼaka jeʼra kashi süchikijee tantüin Coron aneekünüshi taya süpüla laülaashinjachin taya. Sükajee tayain neʼe waneeshin sünain laülaashin suluʼu tü outkajaaleekat suluʼu tia mmakat tayainjachi shikiipüʼü tü ekirajawaakat süpüla aküjaa pütchi, tü outkajawaakat süpüla aʼyatawaa nümüin Maleiwa, tü ekirajawaakat sünain tü Bibliakat namaa na wawalayuukana otta ekirajawaa sünain Aapiria Wayuu jee taküjainjatü semaanawai tü pütchi süpülajatka wayuu süpüshuaʼa. Nnojorüleeitpa apütaain kaʼi tapüla süpüla tamüiwaʼain taaʼin.

Anashantasü tü taʼyataainkat nümüin Jehová chayaa Coron, eeshii na tekirajüinkana woutiisaka mapa. Wainmapejeʼe tü kasa alatakat tamüin, eeshi maʼaka aipirua oora taya wopuluʼu süpüla tantajachin suluʼumüin tü mma taküjakalü aluʼu pütchi sümaa nnojolin tatüjaain aaʼu eeinjachire tatunkuin chayaa. Wainma mma pasanainka sünain tü palaakat choʼujaaka süküjünüin aluʼu pütchi. Süpüla tantajachin suluʼumüin tia mmakat oʼunajachi taya suluʼu wanee anuwa shirokupünaa wanee palaa kamünasü maʼin jee jashichisü maʼin sümaa matüjain joo katünaa taya shirokupünaa. Naaʼinmajapejeʼe taya Jehová jee nükaalinjain taya. Tayaawata aaʼu nikirajüin taya Jehová süpüla tachecherüinjatüin taaʼin suluʼumüin tü mma toʼunajatkalü aluʼumüin.

Aluwataanüshi taya suluʼumüin tü mmakat Papúa Nueva Guinea soʼu 1978, tia mmakat chasü palaamüin sünain Australia otta müsü aka saaʼin sajaʼapüin tü mmakat España. Wainma uuchi chayaa Papúa Nueva Guinea. Eepuʼusü maʼaka 3 miyoone na wayuu kepiakana chayaa jee alatüsü suulia 800 anüikii aashajaanakat chayaa. Wattapejeʼe naalii na aashajaakana tü anüikiikat pidgin de Nueva Guinea, eʼraajünüsü shia suluʼu tok pisin sünülia.

Aluwataanüshi taya suluʼumüin wanee mma Port Moresby sünülia eere naashajaain na wawalayuukana inglés, nnojoipejeʼe kakaliapünaain maʼin taya chayaa. Akolojooshi taya naʼakamüin na aashajaakana tok pisin jee ekirajaashi maʼin taya sünain tia anüikiikat. Aküjashi taya pütchi süka tia anüikiikat mayaainjeʼe nnojolin tatüjain maʼin süpüleerua, sutuma taaʼinrüin tia atüjamaatüshi taya süpüleerua tia anüikiikat. Nnojotsü alatüin wainma kaʼi süpüla tekirajüin na wawalayuukana nüchiki Jehová suluʼu tü anüikiikat tok pisin. Maʼaka wanee juya süchikijee tantüin Papúa Nueva Guinea aneekünüshi taya süpüla talapalaainjachin naaʼu na wawalayuu aashajaakana tok pisin sainküinpünaa tia mmakat.

Sükajee kapüleein namüin na wawalayuukana noutkajaain sünain wanee outkajawaa miyoʼu sükajee kaʼyataawain tü nepiakat, takumajaaka sukuwaʼipa saainjünajatüin kojuyasü outkajawaa miyoʼu. Sükajee toʼunawalin waneepia nnojoishi jimatüin taya, müshi tamüiwaʼakai maʼin taaʼin sutuma nnojolin teʼraajüin tia mmakat, nanüikipala na wayuukana jee tü nakuwaʼipakat. Kapüleesü maʼin talapalaainjatüin naaʼu na wawalayuukana sükajee  uuchijaasü maʼin tü mmakat, müsüjeseʼe katünasuluʼuwaishi taya. Shiasaʼa sutuma nnojoluin anain maʼin tü katünasü toʼunakalü aluʼu, mmotshi maʼin taya, maaʼayaka toʼunule suluʼu anuwa. Eepuʼusü kaʼi sünain waneeshin taya sünain oʼunajawaa suluʼu katünasü.

Paliʼirü neʼe na wayuu kamaʼanajanakana teléfono, müsüjeseʼe kapüleein tamüin yootuin taya namaa na wawalayuukana, taluwataaka tanüiki suluʼupünaa carta. Kojuyatua tantüin palajana süpülapünaa tü carta taluwataakat, tachuntuinjeseʼe kaalinwaa namüin na wayuu kepiakana yalapünaa süpüla tantüinjanain anain na wawalayuukana. Tantapa namaʼanamüin kamaneeshii naya tamüin sümaa alin taya napüla, atütülaasü taaʼin sünainjee tü nakuwaʼipakat. Sutuma nükaalinjain maʼin taya Jehová aleewashi maʼin taya nümaa.

Tantapa suluʼumüin tü mmakat Bougainville sünain wanee outkajawaa, arütkaashii tanainmüin wanee wawala sümaa nuʼwayuuse sümaa kulematüin maʼin naya tamüin, «sotushii paaʼin waya» müshii naya tamüin. Sotushii naya taaʼin, taküja amüinchi pütchi naya wanaa sümaa tantapünaain chayaa Port Moresby, tekirajüin paala naya sünain tü Bibliakat, tapütaka naya mapa nüpüla wanee wawala süpüla ayatüin nikirajüin naya. Wawalayuuinnapa naya maaʼulu, shia süpüshi tü kasa anasü teʼrakat soʼunnaa tü apünüin juya chajachikalü oʼu taya Papúa Nueva Guinea.

Oʼunushi taya chejee Coron soʼu 1978, süpülapünaa tia, teʼraajüin wanee wawala anachonsü maʼin aʼyataat maʼin sümaa tütüin shia, Adel sünülia. Piamashii süchonnii shipijaka Samuel otta Shirley. Aaʼinmajünüsü tü shiikat sutuma otta pürekutsoot rekulaat shia. Aleʼejüshi taya Filipinamüin maayoʼu soʼu 1981 süpüla kasaalüinjachin taya sümaa Adel. Pürekutsootka waya piamaleʼe otta aʼyataashii maʼin waya süpüla tü kasa choʼujaaka sümüin wapüshi.

Mayaainjeʼe tepijüin na süchonniikana Adel aneekünüshi tachikuaʼa süpüla pürekutsoolüin pesiaat taya soʼu 1983. Aluwataanüshi taya suluʼumüin tü pueulokot Linapacan suluʼu tü mmakat Palawan. Wattasü maʼin tia mmakat, nnojotsü eejanain na aküjaliikana pütchi chayaa akolojoopejeʼe waya chamüin. Waneepa juya waya chayaa, anaajaasü tü shiikat Adel. Shiasaʼa sutuma jülüjain maʼin waaʼin tü waʼyataainkat nümüin Jehová nnojotsü mojuin maʼin waaʼin. Aʼwainmalaashii na wayuu wekirajakana sünain tü Bibliakat, müsüjeseʼe wakumajüin wanee piichi outkajaalee chaa suluʼu tia mmakat. Apünüin juya süchikijee wantüin chamüin outkajaashii wamaa 110 wayuu sünain tü Outkajawaa eere Sotuin Waaʼin Outuin Jesús, talatüshii maʼin waya sünainjee tia. Kojuyashii na woutiisakana mapa süchikijee woʼunuin suluʼujee tia mmakat.

Aluwataanüshi taya soʼu 1986 suluʼumüin tü mmakat Culion eejanale kojuyashii wayuu ayuuijaashii sutuma lepra. Maʼaka jeʼra kashi süchikijee tia, aneekünüsü Adel süpüla pürekutsoolüin pesiaat shia. Sutumajee sajaʼlajaain natoʼuta na wayuukana sutuma tia ayuuliikat mmotpuʼushii waya neema sünain aküjaa pütchi namüin. Naküjain wamüin na wawalayuukana nnojoleerü oʼttuin wanain tia ayuuliikat sükajee saapünüin nepinase na wayuu ayuuikana. Eeshii noʼutku naya wayuukana outkajakana wamaa shipialuʼu wanee wawala. Kiʼrashii waya mapa namaa jee anasü waaʼin sükajee yootuin waya süchiki tü  kasa naaʼinrajatkat Maleiwa napüleerua jee süchiki nnojoluin niyoutuin naya Maleiwa. Talatüsü maʼin naaʼin süka natüjaain aaʼu nnojoleenain naya ayuulin mapeena (Luc. 5:12, 13).

Süpüla kiʼrainjatüin naaʼin na wachooinkana suluʼu tü mmakat Culion, wounejaain piamashii wawalayuu majayünnüü kepiakana chayaa Coron süpüla naʼaleewain naya na wachooinkana. Talatüshii maʼin naya sünain neʼraajirüin waneirua wayuu nüchiki Maleiwa. Adel tamaa tayakai wekirajüin na wayuukana jee na wachonniikana nekirajüin nachonnii naya wayuukana. Aʼwainmalaashii na wekirajüinkana müsüjeseʼe sukumajünaka wanee suwalaʼata tü outkajaaleekat.

Sükajee tayain neʼe chi laülaashikai suluʼu tü outkajaaleekat suluʼu tia mmakat, nachuntuin na wawalayuu aʼyataakana suluʼu Weteet tayainjachin shikiipüʼüin tü outkajawaa aainjünakat semaanawai namüin na mekiisatshii aküjalii pütchi chajanakana suluʼu tü mmakat Culion jee toʼunirajatüin sukuwaʼipa tü outkajawaa semaanawaitkat suluʼu tü mmakat Marily namüin na mekietsatshii wawalayuu chajanakana. Eesü maʼaka apünüin oora woʼunuin shirokupünaa tü palaakat süpüla wantüinjanain suluʼumüin tia mmakat. Süchikijee tü outkajawaakat, oʼunushi taya namaa na tapüshikana sünain ekirajaa wayuu saaʼupünaa wanee uuchi, suluʼu tü pueulokot Halsey.

Kojuya wayuu Aküjaliikana pütchi mapa suluʼu tü mmakat Marily otta Halsey, wakumajaka piamasü piichi outkajaalee suluʼu tia piamasükalüirua mma. Maʼaka saainjünüin chayaa suluʼu tü mmakat Linacapan, na wawalayuukana otta na wayuu ekirajaakana sünain tü Bibliakat akaalinjüshii naya sümaa nasülajüin kasa süpüla sukumajünajatüin tia piamasükat piichi outkajaalee. Eesü süpüla suutkajaain maʼaka 200 wayuu suluʼu tü piichi outkajaalee chajatkat Marily jee tia miichikat eesü süpüla shimiyoʼunnüin süpüla kojuyaleein na wayuu outkajaakana wamaa.

Soʼu 1993 miyoʼuyuupa na tachonniikana, alapalaashi taya sümaa Adel naaʼu na wawalayuu chakana Filipinas. Shiasaʼa soʼu juyakat 2000, ounejünüshi taya sünain Ekirajawaa sünain tü Bibliakat napülajatkat na Tooloyuu Maʼwayuusekana süpüla shikiipüʼüinjachin taya mapa tia ekirajawaakat. Jülüjasü taaʼin iseerüin tachiki tia aʼyatawaakat, shiasaʼa sütütüleʼeraka taaʼin Adel jee süküjain tamüin niain Jehová aapeechika tatchin süpüla tekeraajüin shia (Filip. 4:13). Sütüjaa aaʼulu Adel nükaalinjawalin waya Jehová, jama nükaalinjain shia süpüla shikeraajüin tü shiʼyataainkat nümüin mayaainjeʼe ayuulin shia.

 Soʼu juyaka 2006 wanaa sümaa chajachin taya shikiipüʼüjanain wanee ekirajawaa, aküjünüsü sümüin Adel süntüin wanee ayuulii sünain, kanüliaka párkinson. Mojusü maʼin waaʼin sutuma tia. Taküjaka sümüin Adel anain wooʼulaale suulia tü aʼyatawaa aapünakat wamüin süpüla taaʼinmajüin shia. Sümaka tamüin: «Püchajaa tamüin wanee tottoot süpüla taawalainjatüin nutuma. Tatüjaa aaʼu nükaalinjeenain waya Jehová sünain tü waʼyataainkat nümüin». Aipirua juya Adel ayuulin shia, mayaapejeʼe tia ayatüsia shia talatüin saaʼin sümaa shiʼyataain nümüin Jehová. Isapa süchiki oʼunaa Adel, ayatüsia shia aküjain pütchi sümaa joyotuin shia saaʼu wanee silla de ruedas. Kapüleejaapa sümüin Adel aashajawaa, eesü maʼaka wanee jee piantua soʼu sünüiki saashajaapa sünain tü outkajawaakat. Natütüleʼerüin saaʼin Adel na wawalayuukana süka süchecherüin maʼin saaʼin otta süka anain maʼin tü shiʼyataainkat nümüin Jehová. Anaajaasü shia soʼu juyakat 2013. Alatüsü suulia 30 juya sümaain taya tü taʼwayuusekat, kanoulapuʼusü maʼin shia otta aishi taya süpüla. Shiasaʼa jooluʼu süka nnojoluitpain shia mojusü maʼin taaʼin jee tamüiwaʼashi maʼin taya.

Ayatüshi taya sünain tü taʼyataainkat nümüin Jehová maʼaka süküjain shia Adel tamüin paala, nnojotsü tamüiwaʼain maʼin taaʼin süka taʼyataain nümüin Jehová. Soʼu juyaka 2014 sünainmüin juyaka 2017, aneekünüshi taya süpüla talapalaainjachin naaʼu na wawalayuu aashajaakana tü anüikiikat tagalo eere apülajünüin noulia tü aküjaakat pütchi. Süchikijee tia, talapalaaka naaʼu na wawalayuu aashajaakana tia anüikiikat chayaa Taiwán, Estados Unidos otta Canadá. Soʼu juyakat 2019 oʼunitshi taya sukuwaʼipa Ekirajawaa napülajatkat na Aküjalikana pütchi aainjünakat suluʼu inglés chayaa India otta Tailandia. Anasü maʼin taaʼin sünain tia aʼyatawaakat. Süka taaʼinmaain maʼin tü taʼyataainkat nümüin Jehová talatüsü maʼin taaʼin.

Eepünaale taluwataanüin sünain aʼyatawaa nümüin Jehová kapüleesü tamüin tapütüin na tawalayuukana süka alin maʼin naya tapüla. Tatüjaain saaʼu nükaalinjeechin maʼin taya Jehová müsüjeseʼe suchuntunule suʼwanajaain sukuwaʼipa tü taʼyataainkat nümüin Jehová, taaʼinrawalin shia. Pürekutsootshi taya pesiaat maaʼulu suluʼu tü mmakat Filipinas, naaʼinmajüin sümaa alin taya napüla na tawalayuukana, müshi aka saaʼin tapüshi naya, anasü maʼin taaʼin namaa jee talatüsü maʼin taaʼin süka katchin nunoula Samuel otta Shirley maʼaka sunoula tü neikat (3 Juan 4).

Wainma tü kasa alatakat tamüin, maʼaka saaʼin müliain saaʼin jee outuin tü taʼwayuusekat sutuma wanee ayuulii otta wainma tü kasa aʼwanajaaka sünain tü taʼyataainkat nümüin Jehová. Tatüjaapejeʼe saaʼu nnojoluin wattain Jehová woulia (Aluw. 17:27). Pülashi maʼin Jehová, nükaalinjeena waya jee nüchechereerü waaʼin jaʼitainna jalain waya (Is. 59:1). Taapüin analuʼutka nümüin Jehová süka müin nia maʼaka saaʼin wanee ipa miyoʼu tounjulaaya, eeshi nia waneepia tamaa nnojoishi nüpütüin taya tamüiwaʼa.