1, 2. (1) ¿Kasa kapüleeka aaʼujee motuin waaʼin naainjala na waneinnua? (2) ¿Kasa wayaawataka akajee shiimain motuin saaʼin Denise tü aainjünakat sümüin?

 ¿KAPÜLEESÜCHE pümüin motuin paaʼin tü kasa mojusü aainjünakat pümüin? Wainma na kapüleekana amüin tia, shialeekajaʼa airuʼurule nünüiki jee naainjale kasa mojusü wamüin wanee waʼaleewain jee niale wanee wapüshi. Eepejeʼe süpüla waaʼinrüin waneirua kasa suulia jashichikuʼu müin waya otta süpüla walatirüin sooʼopünaa waaʼin tü aainjünakat wamüin. Jülüjataa waaʼin sukuwaʼipa wanee wawala, Denise sünülia. a Mayaainjeʼe aishaatain sümüin wanee kasa aainjünaka sümüin sülatirüin sooʼopünaa saaʼin tia. Soʼu 2017, süleʼejapa namaa na süpüshikana suluʼujee tü Weteet eejeere sukumajünüin tü waʼyataainkat, suchookonojooko neʼejena chi wayuu napanapajakai, lotoko tü kemionkat nanainmüin, outapünaasü Denise. Süsoʼiraapa saaʼin Denise aküjünüsü sümüin mayeeinjain na süchonniikana otta outuin chi suʼwayuusekai. Anuu sünüiki Denise süchiki jamüin saaʼin soʼu kaʼikat tia: «Mojushaatasü maʼin taaʼin, müsü jalapaʼakai taaʼin». Sütüjaaka saaʼu mapa nnojoluin nipeʼrüin chi chupeet keewainkana naya. Alatüsü tia süka nnojoluin eejüin naaʼin sümaʼainruʼu nuwateʼerüin neʼejena. Suʼuraajaka Denise nümüin Jehová süpüla jimatüinjatüin saaʼin jee suulia üttajüin saaʼin.

² Asoutajachi chi chupeetkai saaʼu naainjala chaa laülaapialuʼu, niale kasirüin tü alatakat püreesainjachi atumawaa nutuma chi juezkai. Süpüla nütüjaain saaʼu chi juezkai tü naaʼinrajatkat shiainjatü aküjaka Denise chaa laülaapialuʼu niain kasirüin tia. Anuu sünüiki Denise: «Müsü süsaalatinnakai aaʼin talioʼu sümaa shijitünüin ichii saaʼu. Aishaatasü tamüin tia süka jülüjainjatüin taaʼin süchikuaʼa tü alatakat». Maʼaka jeʼra semaana süchikijee  tia chajatü laülaapialuʼu Denise, yalajatka shia joyotuin niʼipoʼujee chi wayuu kaainjalashikai. «Pümüliaja naaʼin chira wayuukai», sümaka Denise nümüin chi juezkai. b Kettaapa shia yootuin aʼyalajüshi chi juezkai sümaa nümüin sümüin: «25 juya juezüin taya, eeʼiwalia taapüin sünüiki wanee wayuu sünain suchuntuin tamüin tamüliajüinjatüin naaʼin wanee wayuu kaainjalakai sümüin».

 3. ¿Jamüsü motokoʼo saaʼin Denise naainjala chia wayuukai?

³ ¿Jamüsü motokoʼo saaʼin Denise naainjala chi wayuukai? Shia süka jülüjain saaʼin tü naaʼinrakat Jehová motopa naaʼin saainjala wayuu (Miq. 7:18). Kojutule wamüin tü naaʼinrakat Jehová wapüleerua süpüla motuin naaʼin waainjala meeriaʼaya wakuwaʼipa namüin na waneinnua.

 4. ¿Kasa keeʼireeka naaʼin Jehová waaʼinrajatüin? (Éfeso 4:32).

⁴ Motowaisü naaʼin Jehová saainjala wayuu, shiaʼaya keeʼireeka naaʼin washatüin nukuwaʼipa (paashajeʼera Éfeso 4:32). Anasü nümüin Jehová walatirüin sooʼopünaa waaʼin tü kasa mojusü naainjakat wamüin na waneinnua (Sal. 86:5; Luc. 17:4). Sünain ekirajaayakat tüü, wekirajaajeerü anain apünüinsü kasa waaʼinrajatka süpüla motuin waaʼin saainjala wayuu.

JÜLÜJA WAAʼIN TÜ SULUʼUKAT WAAʼIN

 5. ¿Jamüsü waaʼin airuʼurule pütchi wamüin jee saainjünüle kasa mojusü wamüin? (Proverbios 12:18).

⁵ Eesüjaʼa süküjünüle pütchi airuʼulu wamüin jee saainjünüle kasa mojusü wamüin, aishaatasü tia wamüin, shialeekajaʼa naaʼinrüle tia wanee waʼaleewain jee niale wanee wapüshi (Sal. 55:12-14). Sülatüle tia wamüin müshii wasotonokoi aaʼin (paashajeʼera Proverbios 12:18). Suulia mojuin waaʼin, eesüjaʼa jülüjale waaʼin nnojoluin kasajatüin wamüin tü aainjünakat wamüin. Waaʼinrüle tia müshii wasoniraakai aaʼin sümaa wooʼulaain wanain tü rüikat. Nnojorüle kasain waaʼinrüin süpüla anain waaʼin ayateenaʼaya waya mojukuʼu müin waaʼin.

 6. ¿Jamüsü waaʼin saainjünüle kasa mojusü wamüin?

⁶ Eeshiijaʼa jashichire waya saainjünapa kasa mojusü wamüin, maʼwaisü wakuwaʼipa saashin tü Bibliakat. Süchiajaapejeʼe waya tü Bibliakat suulia jashichikuʼu müin waaʼin waneepia (Sal. 4:4; Éf. 4:26). ¿Jamüshii woonooinjanakaʼa sümaa tü sümakat tü Bibliakat? Eeshiijaʼa waainjeenale kasa mojusü ayatüle jashichikuʼu müin waya (Sant. 1:20). Eeshijaʼa jashichire waya saainjünüle kasa mojusü wamüin, eepejeʼe süpüla waneeküin nnojoluin ayatüin jashichikuʼu müin waaʼin.

 7. ¿Kasa amaa antajaaka suluʼu waaʼin saainjünapa kasa mojusü wamüin?

⁷ Watta saalii kasa jülüjaka waaʼin saainjünüle kasa mojusü wamüin. Jülüja waaʼin tü sümakat tü wawalakat Ann: «Jintuluiwaʼaya taya kawalaʼatasü tü teikat nutuma chi tashikai. Oʼunushi nia sümaa tü wayuu aaʼinmajapuʼukat taya. Müsü tapütünakai aaʼin tamüiwaʼa soʼu tia. Kachonpa chi tashikai sümüin tü wayuukat müsü tayüülajünakai aaʼin. Jülüjasü taaʼin maalin taya apülawaa». Anuu sünüiki Georgette süchiki jamüin saaʼin wanaa sümaa kawalaʼatain shia nutuma suʼwayuuse: «Taʼaleewaintüjüi nia jintuluiwaʼaya taya, pürekutsootshii waya wanaawa. Aishaatasü maʼin tamüin tü naainjakat». Anuu sünüiki wanee wawala Naomi sünülia: «Eetaayaai jülüjain taaʼin müinjatüin takuwaʼipa nutuma taʼwayuuse. Wanaa sümaa nüküjain tamüin nünajüin shiyaakua wayuu  masheʼinsat tojuunaluʼu, mojushaatasü taaʼin, müsü kawalaʼatakai aaʼin taya nutuma».

 8. (1) ¿Jamüsü motuinjatkaʼa waaʼin tü kasa mojusü aainjünakat wamüin? (2) ¿Kasa weʼreetka motule waaʼin tü aainjünakat wamüin? (Paashajeʼera tü pütchikat « ¿Kasa taaʼinrajatka shapaale taaʼin waneepia sutuma tü naaʼinrakat tamüin wanee wayuu?»).

⁸ Isasü wachiki wataʼülüin sukuwaʼipa nanüiki na waneinnua otta tü naainjakat wamüin. Eepejeʼe süpüla wachecherüin waaʼin suulia waaʼinrüin kasa mojusü. Anasü maʼin motomaatüle waaʼin tü aainjünakat wamüin. Waaʼinrajatü tia süka alin wapüla Jehová otta süka nücheküin motomaatüin waaʼin tü kasa mojusü aainjünakat wamüin. Ayatüle jashichikuʼu müin waaʼin jee nnojorüle motuin waaʼin tü kasa mojusü aainjünakat wamüin, eeshiijaʼa ayuuire waya sünainjee otta waainjeenale wanee kasa mojeetka atuma waaʼin mapa (Prov. 14:17, 29, 30). Jülüjataa waaʼin sukuwaʼipa wanee wawala, Christine sünülia. Müsü shia: «Ayatüle jashichikuʼu müin taaʼin saalinjee tü kasa aainjünakat tamüin nnojotsü talatüin taya, meküinñesat taya, matuinküinñesat taya otta kapüleesü tamüin tachecherüin taaʼin suulia jashiee. Nnojotsü anain takuwaʼipa nümaa taʼwayuuse otta nnojotsü anain takuwaʼipa namaa na waneinnua».

 9. ¿Jamüsü anakaʼa nnojoliire jashichikuʼu müin waaʼin?

⁹ Nnojoire nunouteein wanee wayuu tü kasa mojusü naainjakat wamüin, anasü wachajaale sukuwaʼipa süpüla nnojoluin mojuin waaʼin sünainjee tia. Anuu tü saaʼinrakat Georgette, tü wachuntayütkalü anülia paalapa: «Mayaainjeʼe kakaliain taya jashichin nümüin chi taʼwayuusepuʼukai, tachajaain sukuwaʼipa süpüla nnojoluin üttakuʼu müin taaʼin. Sutuma taaʼinrüin tia jimatüsü taaʼin». Wooʼulaale suulia jashichikuʼu müin waaʼin aneerü wakuwaʼipa otta aneerü wakuwaʼipa namaa na waneinnua, nnojoleerü waaʼinmaain tü kasa aainjünakat wamüin otta talateena waya wachikuaʼa (Prov. 11:17). ¿Kasa paaʼinrajatka ayatüle jashichikuʼu müin paaʼin otta kapüleere pümüin motuin paaʼin tü kasa aainjünakat pümüin?

NNOJO JASHICHIKUʼU MÜIN WAAʼIN

10. ¿Jamüsü anakaʼa nnojorüle süshapajaain waaʼin süpüla motuin waaʼin tü kasa aainjünakat wamüin? (Piirakaa sümüin tü ayaakuaakat).

¹⁰ ¿Kasa waaʼinrajatka suulia jashichikuʼu müin waaʼin? Nnojo washapajaain aaʼin, eejeerü sükalia süpüla anainjatüin waaʼin. Jamüsüjaʼa eʼikaale nütapaʼa wanee wayuu, eejeerü sükalia süpüla süshatüin nülioʼu. Müsia neʼe wakuwaʼipa saainjünapa kasa mojusü wamüin, eejeerü sükalia süpüla anain waaʼin jee motuin shia waaʼin (Ecl. 3:3; 1 Ped. 1:22).

11. ¿Jamüsü anakaʼa wachuntule kaalinwaa nümüin Jehová süpüla motuin waaʼin tü kasa aainjünakat wamüin?

 ¹¹ Wane kasa waaʼinrajatka suulia jashichikuʼu müin waaʼin shia wachuntule nümüin Jehová nükaalinjaiwa waya süpüla motuin waaʼin tü kasa aainjünakat wamüin. c Saaʼinrüin tia Ann, tü wachuntayütkalü anülia paalapa. Anuu sünüiki: «Tachuntuin nümüin Jehová motoiwa naaʼin tü kasa mojukat tatuma otta tü mojukat natuma na tapüshikana. Tashajaka wanee karaloʼuta nümüin chi tashikai otta sümüin tü nuʼwayuusekat eere taküjain namüin motuitpain taaʼin tü kasa naainjakat tamüin». Saashin Ann kapüleesü sümüin motuinjatüin saaʼin tü aainjünakat sümüin. «Kasataalejeseʼe nikirajaain chi tashikai sümaa tü nuʼwayuusekat nüchiki Jehová saaʼujee neʼrüin tashatüin nukuwaʼipa Jehová, chi motokoi aaʼin saainjala wayuu», müsü shia.

12. ¿Jamüsü anakaʼa waaʼinrüle tü nümakat Jehová suulia jashichikuʼu müin waaʼin? (Proverbios 3:5, 6).

¹² Wane kasa waaʼinrajatka shia jülüjain waaʼin anain tü jülüjakat naaʼin Jehová suulialeʼeya tü jülüjakat waaʼin (paashajeʼera Proverbios 3:5, 6). Nütüjaa aaʼulu Jehová tü anainjatkalü atuma wakuwaʼipa (Is. 55:8, 9). Nnojorüleejaʼa nuchuntajatüin wamüin wanee kasa mojeetka atuma wakuwaʼipa. Nuchuntuin wamüin motuinjatüin waaʼin tü kasa aainjünakat wamüin süka aneerüin wakuwaʼipa sünainjee tia (Sal. 40:4; Is. 48:17, 18). Ayatüle jashichikuʼu müin waaʼin kapüleejeerü wamüin motuin waaʼin tü kasa aainjünakat wamüin (Prov. 14:12; Jer. 17:9). Anuu sünüiki Naomi, tü wachuntayütkalü anülia paalapa: «Jülüjapuʼusü taaʼin nnojoluinjatüin motuin taaʼin tü kasa naainjakat tamüin chi taʼwayuusekai saaʼujee nünajüin shiyaakua wayuu masheʼinsat. Wainmajüsü taaʼin nünajüle tia süchikuaʼa jee moteerüle naaʼin mojuin taaʼin sutuma tü kasa mojusü naaʼinrakat. ‹Nütüjaa aaʼulu Jehová jamüin taaʼin›, müsü taaʼin taleʼeruʼu. Tayaawatapejeʼe saaʼu nnojoluin nücheküin Jehová tapüleerua ayatüinjatüin jashichikuʼu müin taaʼin saalinjee tü naainjakat chi taʼwayuusekai. Nütüjaa aaʼulu Jehová eejeerüin sükalia süpüla anainjatüin taaʼin otta nücheküin tapüleerua motuinjatüin taaʼin tü aainjünakat tamüin». d

 TÜ WAAʼINMAAINJATKAT

13. ¿Kasa waaʼinrajatka saashin Roma 12:18-21?

¹³ Motule waaʼin tü kasa mojusü aainjünakat wamüin nnojoleerü waküjakuʼu müin namüin na waneinnua süchiki tia. Wachajaajeerü sukuwaʼipa wanouteʼerüin tü alatakat süpüla anajiraain waya nümaa, nialeekajaʼa wawalale nia (Mat. 5:23, 24). Anasü wamüliajüle naaʼin chia wayuukai otta walatirüle sooʼopünaa waaʼin tü kasa naainjakat wamüin suulialeʼeya jashichikuʼu müin waaʼin (paashajeʼera Roma 12:18-21; 1 Ped. 3:9). ¿Kasa waaʼinrajatka süpüla wountuin tia?

14. ¿Kasa waaʼinmaainjatka sünain nakuwaʼipa na waneinnua? ¿Jamüsü anakaʼa waaʼinrüle tia?

¹⁴ Naaʼinmaasü Jehová tü kasa anasü naaʼinrakat na wayuukana suulialeʼeya tü kasa mojukat natuma. Washata nukuwaʼipa Jehová, jülüja waaʼin tü kasa anasü naaʼinrakat chi wayuu aainjakai kasa mojusü wamüin (2 Crón. 16:9; Sal. 130:3). Jülüjale waaʼin nukuwaʼipa wanee wayuu weʼreerü tü kasa mojusü naaʼinrakat otta tü kasa anasü naaʼinrakat. Waaʼinmaale tü kasa anasü naaʼinrakat mapüleejeerü wamüin motuin waaʼin naainjala. Anuu nünüiki wanee wawala, Jarrod nünülia: «Mapüleesat tamüin motuin  taaʼin tü naainjakat wanee wawala jülüjale taaʼin wainmain tü kasa anasü naainjakat suulialeʼeya tü kasa mojukat nutuma».

15. ¿Jamüsü aneetkaʼa waaʼin waküjale nümüin wanee wayuu motuitpain waaʼin naainjala?

¹⁵ Anasü waküjale nümüin chi wayuukai motuitpain waaʼin naainjala. ¿Jamüsü aneetkaʼa waaʼinrüle tia? Anuu sünüiki Naomi, tü wachuntayütkalü anülia paalapa: «Wanaa sümaa ‹¿Motuitpa paaʼin taainjala?›, nümüin chi taʼwayuusekai tamüin, isasü tachiki tü tanüikinjatkat nümüin, müsü motsotokai taaʼin. Tayaawata aaʼu soʼu tia nnojoluin motuin taaʼin naainjala. Taküjaka nümüin mapa motuitpain taaʼin naainjala süka suluʼuin taaʼin shia. Niyaawatapa saaʼu chi taʼwayuusekai motuitpain taaʼin naainjala, aʼyalajeematüshi nia jee jimatüsü naaʼin otta müsia tayakat jimatüsia taaʼin. Soʼujeʼereeya kaʼikat tia aijiraashii maʼin waya otta aleewajiraashii waya».

16. ¿Kasa wekirajaaitpaka anain süchiki tü waaʼinrajatkat süpüla motuin waaʼin naainjala na waneinnua?

¹⁶ Nuchuntuin wamüin Jehová motuinjatüin waaʼin naainjala na waneinnua (Col. 3:13). Mayaainjeʼe waaʼinreein tü nuchuntakat Jehová eesiaʼaya süpüla kapüleein wamüin motuin waaʼin naainjala na waneinnua. Wounteerü waaʼinrüin tia jülüjale waaʼin jamüin waaʼin, nnojorüle jashichikuʼu müin waaʼin otta wachajaale sukuwaʼipa süpüla anainjatüin waaʼin (paashajeʼera tü pütchikat « Apünüinsü kasa paaʼinrajatka süpüla motuin paaʼin naainjala na waneinnua»).

JÜLÜJA WAAʼIN TÜ KASA ANASÜ WEʼREETKAT

17. ¿Kasa weʼreetka motule waaʼin naainjala na waneinnua?

¹⁷ Wainma kasa motuinjatka aaʼujee waaʼin naainjala na waneinnua. Washateerü nukuwaʼipa chi Washikai Jehová, chi amüliajüikai wayuu, talateechi nia watuma (Luc. 6:36). Jaʼyeerü waaʼu kojutuin wamüin motuin naaʼin Jehová waainjala (Mat. 6:12). Nnojoleena ayuulin waya sünainjee jashichikuʼu müin waaʼin otta aleewajiraajeena waya namaa na waneinnua.

18, 19. ¿Kasa anasü eeka sünainjee walatirüin sooʼopünaa waaʼin tü aainjünakat wamüin?

¹⁸ Eesü süpüla weʼrüin kasa anasü motule waaʼin naainjala na waneinnua. Jülüjataa waaʼin tü kasa anasü shiʼrakat Denise, tü wachuntayütkalü anülia paalapa. Nnojotsü sütüjaain saaʼu Denise nuʼunajiraweein naaʼin chi wayuu ochokojookoi namaa nüküjapa chi juezkai tü nukuwaʼipainjatkat atumawaa. Sülatirüin sooʼopünaa saaʼin Denise naainjala chi wayuukai, süntaka suluʼumüin naaʼin tü saaʼinrakat. Sünainjee tia nikirajaaka sünain tü Bibliakat namaa na aküjaliikana pütchi nüchiki Jehová.

¹⁹ Kapüleesü wamüin motuin waaʼin naainjala na waneinnua, wainmeetpejeʼe tü kasa anasü weʼrakat waaʼinrüle tia (Mat. 5:7). Anakalaka maʼin wachajaale sukuwaʼipa süpüla washatüin nukuwaʼipa Jehová, anasü motule waaʼin saainjala wayuu.