¿Ashanaapuʼushi pia motsoyüiwaʼaya pia? Eesüjaʼa eʼikaale pajapü jee püsapain soʼu tia. Awataasüjaʼa püi sünain akaaliinjaa pia sümaa shiiyajüin pia. «Koʼuta uuton, aneechi joo pia», müsü tü piikat sümaa sutuʼuin pia. Sülatüle wanee kasa nümüin wanee jintüi, eemaatüshi chi amülialaakai aaʼin naalii.

Najaʼapülaapa wanee wayuu, kapüleesia tü alatakat nümüin. Nnojotsü jaralüin amülialaain aaʼin naalii. Kapüleesü maʼin anoukteʼeraa tü alatakat nümüin wanee wayuu miyoʼupa nia, nnojotsü müin aka saaʼin eiyajaa nülioʼu wanee jintüi sutuʼukai nii. Wekirajaa sünain tü alatakat namüin waneeinnua wayuu.

• ¿Eeiria shapaain paaʼin sutuma pujutünüin piʼyataaleruʼujee? Naashin Julián, maaʼatsü jalapaʼakai naaʼin soʼu nujutünüin suluʼujee niʼyataain. Müshi nia: «¿Kaseerü joo shikaka tapüshi? ¿Jamüshiche nnojoika kasain anain apüla taya naashin? Kakaliaichipejeʼe taya aʼyataain namaa».

• ¿Shapaairü paaʼin sutuma puuʼulaajiraain suulia puʼwayuuse? «Polooirü mekiisat kashi süchikijee nuuʼulaajaain toulia chi taʼwayuusekai. Mojushaatasü taaʼin jee aisü tamüin müitpain takuwaʼipa. Müsü suchotoonokoi saaʼin shiʼipa tü taaʼinkat. Mmotshaanasü maʼin taya», müsü Raquel.

• ¿Eeichia ayuulin pia sümaa müin nnojoikai paawalaweekai aaʼin? Eesüjaʼa süpüla müin pünüiki maʼaka naaʼin Job: «Eʼrüshi maʼin taya tamüliala, anashi mmata ouktüle taya» (Job 7:16, Nueva Traducción Viviente). Eesüjaʼa wanaawale paaʼin nümaa Luis, 80 nuuyase, müshi nia: «Shia neʼe taʼatapajaka ouktüin taya».

• ¿Eeiria choʼujaain pümüin sümüliajünüin paaʼin saaliijee nünaajaain wanee püpüshi? «Taapinnapa sujutuuin tü katünasü kalujuchikai chi tachonkai sümaa ouktüin nia, mojushaanasü taaʼin. Aishaatasü tamüin, maaʼatshi aka saaʼin tasotünakai aaʼin süka chajaruuta», müshi Robert (Lucas 2:35, TNM).

Mayaainjeʼe kapüleeshaatain tü alatakat nümüin Julián, Raquel, Luis nümaa Robert, amüliajünüshii naya. Chi amüliajakai naya nia chi Maleiwa pülashikai maʼin. ¿Kasa nümüliajaka aka waaʼin Maleiwa? ¿Nümüliajeeiche aaʼin pia Maleiwa sülatüle pümüin wanee kasa?