¿KASA paaʼinrakawaika pütüjaweere saaʼu tü oorakat? Eesüjaʼa pünaʼlaale sümüin tü pajapünakat jee shiale sümüin wanee reloj eeka pipialuʼu. ¿Jameetka pünüiki nümüin chi eekai «¿jalapüshajana waya?», nümüin pümüin? Wainma sukuwaʼipa tia.

Jamüsüjaʼa sülatüle wanee oora sümaa 45 minuuto süchikijee las 12, eeshiijaʼa wamüle «la 1.45 waya», «choʼujaasü 15 minuuto süpüla las 2» otta eeshiijaʼa wamüle «las 13.45 waya», müleka kepiale waya suluʼu wanee mma eere shiyaawajünüin tü oorakat sünainjee la 1 sünainmüinreʼeya las 24.

Waashajeʼerapa tü Wiwüliakat, eeshiijaʼa wasakireʼerüle waaʼin sünain tüü: «¿Jamüsüche süpüla natüjaain saaʼu tü oorakat na wayuu saashajaakana achiki tü Wiwüliakat?». Wainma sukuwaʼipa tia natuma. Jamüsüjaʼa sünain tü Ashajuushikat süka Hebreo, eesü sümüle «wattaʼa maalü», «kaleʼo» otta «motsapa kaʼi» (Gén. 8:11; 19:27; 43:16; Deut. 28:29; 1 Rey. 18:26). Eepejeʼe waneirua pütchi ashajünaka süchiki tia suluʼu tü Wiwüliakat pansaaleeka sümaa tü oora sülatakalü oʼu wanee kasa.

Sümaiwa paala chaa Israel, eepuʼushii na aaʼinmajakana tü pueulokalüirua saʼwai. Kakalia paala süpülapünaa joʼuuin Jesuu, apünüinsü shiʼipapaʼa tü aikat natuma na israeliitakana, «vigilia» namüsü tia (Sal. 63:6). Shiasaʼa nükalioʼu Jesuu, pienchisü shiʼipapaʼa tü aikat natuma na israeliitakana süka nashatüin tia nachiirua na griegokana jee na romaanokana.

Kojuyatua suchuntunuin tia suluʼu tü karaloʼutakat Mateo, Marcos, Lucas otta Juan. Jamüshijaʼa soʼu waraitüin Jesuu sooʼopünaa tü palaakat nanainmüin na nikirajüinkana, «eeiwaʼaya aikat» tia saashin tü Wiwüliakat (Mat. 14:25). Jee müsü nünüiki Jesuu soʼu wanee kaʼi: «Wane wayuu nipiajachi, müleka nütüjaaleje saaʼu tü kaʼi [vigilia] nüntajaikai oʼu wane kaʼruwarai, nnojoireeja süpüla nutunküinjachin suulia nikerolüin chi kaʼruwaraikai» (Mat. 24:43).

Aashajaashi Jesuu süchiki tü pienchisükat «vigilia» soʼu nümüin namüin na nikirajüinkana: «Anakaja müleka eere jaaʼin tapüla tayakai chi kepiashikai, süka nnojolüin jütüjaain aaʼu müleka taleʼejeechire kaʼapü aikat, süseʼeruʼupünaa ai, maalia, je wattaʼachon maalü shiale» (Mar. 13:35). Tü palajatkat «vigilia» shia «kaʼapü aikat», oʼttüsü tia nikerotapa chi Kaʼikai sünainmüinreʼeya las 9 aipaʼa. Tü piamakat «vigilia» shia «süseʼeruʼupünaa ai», oʼttüsü las 9 aipaʼa sünainmüin las 12 saʼwai. Tü apünüinkat «vigilia» shia «maalia», oʼttüsü süseʼeruʼujee aikat sünainmüin las 3 maalia. Eesüjaʼa shiale suʼunnaa tü apünüinkat «vigilia» niʼyalajüin wanee kaliina soʼu nütaʼünüin Jesuu (Mar. 14:72). Tü pienchikat «vigilia» shia «wattaʼachon maalü», oʼttüsü maʼaka las 3 maalia sünainmüinreʼeya niweetüin chi Kaʼikai.

Mayaapejeʼe nnojoluin eejatüin reloj namaʼana na wayuu aküjünakana achiki suluʼu tü Wiwüliakat, atüjashii naya süpüleerua ayaawataa saaʼu tü oorakat.