1. ¿Kasa anasü alateetka soʼunnaa tü miitkat juya nuluwataainjatka oʼu Cristo?

 SOʼUNNAA tü miitkat juya nuluwataainjatka oʼu Cristo, talatashaateerü waaʼin nasoʼiraapa aaʼin na outushiikana. Keeʼireesü maʼin waaʼin weʼrüin nachikuaʼa na wapüshi outuinnapakana. Keeʼireesia naaʼin Jehová tia (Job 14:15). ¿Aashin talateerüin maʼin waaʼin weʼrapa nantiraain na wayuukana namaa na napüshi outuinnapakana? Maʼaka wekirajaainnapain suluʼu ekirajaayakat 39, «na lotokana akuwaʼipa» na ashajünakana anülia suluʼu tü karaloʼuta süchikimaajatkat kataa oʼuu, asoʼiraweena aaʼin süpüla katüin noʼu (Aluw. 24:15, TNM; Juan 5:29, TNM). Eeshiijaʼa nayeenale asoʼiraain aaʼin palajana na wapüshikana. * Otta «na nnojoliikana lotuin akuwaʼipa» na nnojoliikana eʼraajüin Maleiwa, asoʼiraweena aaʼin süpüla kasalajanain naainjala namüin.

2, 3. (1) Saashin Isaías 11:9, 10, ¿kasa ekirajüneenaka anain na wayuu asoʼiraajeenakana aaʼin? (2) ¿Kasa wekirajaajeetka anain sünain ekirajaayakat tüü?

² Wainma kasa natüjaainjatka aaʼu na asoʼiraainjanakana aaʼin (Is. 26:9; 61:11). Müsüjeseʼe nukumajüin Jehová sukuwaʼipa nekirajünüinjanain napüshuaʼa, nnojoyülia ekirajünüin wayuu nüchiki Maleiwa mayaa (paashajeʼera Isaías 11:9, 10). Na nnojoliikana lotuin akuwaʼipa, ekirajaainjana nüchiki Jesucristo, süchiki niain Maleiwa aluwataain, süchiki naapajiraain nikii Jesús waaʼu, jamüin kojutuinjatka nünülia Maleiwa natuma otta jamüin niaka  anain süpüla aluwatawaa waaʼu. Jaʼitakajeʼe na wayuu lotokana akuwaʼipa, ekirajaainjana naya süchiki tü pütchi jeketü ayaawatünakalü aaʼu süchiki tü keeʼireekat naaʼin Maleiwa. Eeshii noʼutku na aʼyataapuʼukana nümüin Maleiwa outakana süpülapünaa kettaain süshajünüin tü Bibliakat. Wainma kasa natüjaainjatka aaʼu na nnojoliikana lotuin akuwaʼipa jee na lotokana akuwaʼipa.

³ Sünain ekirajaayakat tüü, wasouteerü eʼipajee pütchikat tüü: ¿Jameerü sukuwaʼipa shikirajia wayuu nüchiki Maleiwa soʼu tia? ¿Kaseerü alataka naapaale sümaa tü ekirajünakalü anain naya? ¿Kaseerü alataka nnojorüle noonooin sümaa? Anasü watüjaale saaʼu tia. Wekirajaajeerü anain waneirua pütchi aküjünatüjütkalia suluʼu tü karaloʼutakat Daniel otta Alateetkat Mapeena wayaawateetka atuma tü alateetkat soʼunnaa süsoʼireʼennüin aaʼin wayuu. Palajana wekirajaa sünain tü aküjünakat suluʼu Daniel 12:1, 2.

4, 5. ¿Kasa aküjünaka achiki suluʼu Daniel 12:1 süchiki tü alateetkat sülüʼütpa süpüla sajaʼttüin kasa mojusü?

⁴ (Paashajeʼera Daniel 12:1). Aküjünüsü suluʼu tü karaloʼutakat Daniel joujainjatüin sülatüin waneirua kasa sülüʼütpa süpüla sajaʼttüin kasa mojusü. Jamüsüjaʼa suluʼu Daniel 12:1, aküjünüsü nüchiki Miguel «chi shaʼwatakai sünain akaalinjaa» na aʼyataakana nümüin Maleiwa. Miguel nia Jesucristo. Ekeraajüsü tia pütchikat soʼu tü juyakat 1914 wanaa sümaa nuʼttuin Jesús sünain aluwatawaa nutuma Maleiwa.

⁵ Wanee kasa aküjünaka nümüin Daniel shia shaʼwateechin Jesús soʼunnaa wanee müliaa miyoʼu maʼin nnojoyütkalia eein. Tia müliaakat shia «tü müliaa shiʼreetkat wayuu» aküjünakalü achiki suluʼu Mateo 24:21. Müshi nüshaʼwalakai aaʼin Jesús süpüla naaʼinmajüin na aʼyataashiikana nümüin Maleiwa sajaʼttiamüin tia müliaakat, tia shia soʼu Armagedón. Naya wayuukana, naya neʼe na wayuu wattakana naalii, na oʼttaajeenakana süchikijee tü müliaa miyoʼusükat aküjünaka achiki suluʼu Alateetkat Mapeena (Alat. Map. 7:9, 14).

6. (1) ¿Kaseerü alataka noʼttaapa na wattakana naalii wayuu süchikijee tü müliaa miyoʼusükat? (2) ¿Jamüsü watüjaaka saaʼu müin tia? (Paashajeʼera sünain rewiisütakat tüü tü pütchikat «Süsakiraka anain wayuu» aashajaaka süchiki süsoʼiraainjatüin saaʼin wayuu yaa mmapaʼa süchikijee outaa).

⁶ (Paashajeʼera Daniel 12:2). ¿Kaseerü alataka noʼttaapa na wattakana naalii wayuu süchikijee tü müliaa miyoʼusükat? Suluʼu Daniel aashajaana achikit wane asoʼirawaa aaʼin eeinjateetka. Tia nnojotsü shiain tü asoʼirawaa aaʼin aapünajatka namüin na chainjanakana chaa iipünaa otta nnojotsü aashajaain süchiki sükooʼomüinraainjatüin waʼyataain süpülapünaa napülajüin woulia na waʼünüükana, shiapuʼu wayaawataka aaʼu tia paala. * Aluʼusaʼa maaʼulu wayaawata aaʼu shiain tü asoʼirawaa aaʼin eejeetkat suluʼu tü paʼaraiisükat. ¿Jamüsü jülüjaka waaʼin tia? Aashajaasü Job 17:16 süchiki «sümamüla mma» süpüla süküjünüin süchiki eere süpülee tü outusükalüirua. Sünainjee tia, wayaawata aaʼu shiain süküjeekalü achiki Daniel 12:2 süsoʼiraainjatüin saaʼin wayuu süchikijee outaa, süchikijee tü kaʼi sajaʼttüinjatkalü oʼu tü kasa mojusükat, süchikijee tü atkawaa kanüliakat Armagedón.

7. (1) ¿Kasa süküjeeka achiki Daniel 12:2 wanaa sümaa sümüin eejeenain na asoʼiraainjanakana aaʼin «süpüla kaʼikat süpüshuaʼa»? (2) ¿Jamüsü anaʼleejeetka sukuwaʼipa tia asoʼirawaakalü aaʼin?

⁷ ¿Kasa süküjeeka achiki Daniel 12:2 wanaa sümaa sümüin eejeenain na asoʼiraainjanakana aaʼin «süpüla kaʼikat süpüshuaʼa»? Na asoʼiraainjanakana aaʼin eʼraajeenaka nukuwaʼipa Jehová otta na ayatakana eʼraajüin nukuwaʼipa  soʼunnaa tü miitkat juya, aapüneerü namüin kataa oʼuu süpüla kaʼikat süpüshuaʼa noonoole sümaa nünüiki Jehová otta Jesús (Juan 17:3, TNM). Saaʼujee tia, alanaʼaleeinjatü sünain anain nakuwaʼipa na asoʼiraainjanakana aaʼin soʼu tia suulia nakuwaʼipa na asoʼiraakana aaʼin paala sümaiwa (Heb. 11:35). Na wayuu asoʼiraakana aaʼin süchikijee outaa sümaiwa, outushii naya nachikuaʼa.

8. ¿Kasa süküjeeka achiki Daniel 12:2 wanaa sümaa sümüin eejeenain na asoʼiraainjanakana aaʼin süpüla eʼraa japülii otta ayoutuneenaka süpüla kaʼikat süpüshuaʼa?

⁸ Naʼakajee na asoʼiraainjanakana aaʼin, eejeena na nnojoliikana oonooin sümaa tü ekirajüneenakalü anain naya nüchiki Jehová. Saashin tü pütchi nüküjatüjütkalia Daniel, eejeena na asoʼiraainjanakana aaʼin süpüla neʼrüin japülii otta nayoutunüin süpüla kaʼikat süpüshuaʼa. Sutuma neʼrüliin wayumüin, nnojoleerü ashajünüin nanülia suluʼu tü karaloʼuta süchikimaajatkat kataa oʼuu otta nnojoleena katüin oʼu süpüla kaʼikat süpüshuaʼa. Ayoutuneena naya süpüla kaʼikat süpüshuaʼa, tia shia najaʼttinneenain. Wayaawatakalaka aaʼu shiain saashajaain achiki Daniel 12:2 tü alatüinjatkat namüin napüshuaʼa na wayuukana saaʼujee tü naaʼinrakat süchikijee süsoʼiraain naaʼin (Alat. Map. 20:12). Eejeena na aapüneenakana amüin kataa oʼuu süpüla kaʼikat süpüshuaʼa otta na nnojoleenakana aapünüin amüin tia. *

9, 10. (1) Saashin Daniel 12:3, ¿kasa amaa alatüinjatka süchikijee tü müliaa miyoʼusükat? (2) ¿Jaralii na waratteenakana maʼin maʼaka saaʼin tü sirumatuʼukat?

⁹ (Paashajeʼera Daniel 12:3). ¿Kasa amaa alatüinjatka süchikijee tü müliaa miyoʼusükat alüʼütka maʼin? Suluʼu Daniel 12:3 aküjünüsü süchiki wanee kasa alatüinjatka süchikijee tü müliaa miyoʼusükat.

¹⁰ ¿Jaralii na waratteenakana maʼin maʼaka saaʼin tü sirumatuʼukat? Süpüla watüjaain saaʼu tia, waashajeʼera tü nümakat Jesús suluʼu Mateo 13:43 (TNM), tü makat: «Nuluwataapeena Maleiwa, meena warattuuikai naaʼin na wayuu oonookana sümaa nünüiki chi Nashikai maʼaka warattuuin wanee kasa nutuma chi kaʼikai». Wanaa sümaa nüküjain Jesús tia, aashajaashi nachiki «na wayuu ounejaanakana nutuma Maleiwa süpüla aluwatawaa». Naya na nuwalayuu aluwataainjanakana nümaa chaa iipünaa (Mat. 13:38, TNM). Sutuma tia eesü süpüla saashajaain Daniel 12:3 nachiki na aluwataainjanakana nümaa Jesús chaa iipünaa otta tü naaʼinrajatkat soʼunnaa tü miitkat juya nuluwataainjatka oʼu Jesús.

11, 12. ¿Kasa naʼyataainjatka anain na 144.000 wayuuinnua soʼunnaa tü miitkat juya?

¹¹ Na anoujashii chainjanakana iipünaa naya «na antirakana wainma wayuu süpüla lotuinjatüin nakuwaʼipa». ¿Jameerü sukuwaʼipa natuma? Aʼyataajeena naya nümaa Jesucristo süpüla noʼunirüin sukuwaʼipa tü ekirajaakat wayuu sainküinpünaa tü mmakat soʼunnaa tü miitkat juya. Na 144.000 wayuuinnua, nnojoishii aluwataainjanain neʼe naya, sacerdoteinjanaʼaya naya (Alat. Map. 1:6; 5:10; 20:6, TNM). Nakaalinjeena na wayuukana süpüla anainjanain naya otta süpüla lotuin maʼin nakuwaʼipa shiʼipaʼaya (Alat. Map. 22:1, 2; Ezeq. 47:12) Talatashaateena maʼin naya anoujashiikana naaʼinrapa tia.

¹² ¿Jaralii na antinnajanakana süpüla lotuin nakuwaʼipa? Naya na asoʼiraainjanakana aaʼin süchikijee outaa, na oʼttaakana süchikijee Armagedón otta na joʼuujeenakana suluʼu tü Paʼaraiisükat. Kettaapa tü miitkat juya, loteerü nakuwaʼipa napüshuaʼa na kepiakana yaa mmapaʼa.  ¿Joujeetche müin süshajünaka nanülia süpüla kaʼikat süpüshuaʼa suluʼu tü karaloʼuta süchikimaajatkat kataa oʼuu?

13, 14. ¿Kasa naaʼinrajatka na lotokana akuwaʼipa, na kepiainjanakana yaa mmapaʼa süpüla saapünüin namüin kataa oʼuu waneepia?

¹³ Nnojoleerü aapünüin nümüin wanee wayuu tü kataakalü oʼuu waneepia sutuma lotuin neʼe nukuwaʼipa. Soto waaʼin tü alatakat nümüin Adán sümaa Eva. Mayaainjeʼe lotuin nakuwaʼipa, waneepiainjana naya nümaa Jehová süpüla katüinjatüin noʼu waneepia, nnojotpejeʼe naaʼinrüin tia. Eʼrüliishii naya wayumüin nümüin Maleiwa (Roma 5:12).

¹⁴ Wekirajaaitpa anain loteerüin maʼin nakuwaʼipa na kepiainjanakana yaa mmapaʼa kettaapa tü miitkat juya. ¿Aneetche namüin nuluwataain Jehová naaʼu waneepia? ¿Nashatataajeetpa nukuwaʼipa Adán sümaa Eva, na nnojoliikana waneepiain nümaa Jehová mayaainjeʼe lotuin maʼin nakuwaʼipa? ¿Kasa aainjüneetka süpüla sütüjaanüin aaʼu tia?

15, 16. (1) ¿Joujeerü sütüjaanaka aaʼu waneepiale na wayuukana nümaa Jehová? (2) ¿Kaseerü alataka süchikijee tia?

¹⁵ Asürünneechi Satanás soʼunnaa tü miitkat juya. Soʼu tia, nnojoleerü jaralüin nimeejüin. Kettaapa tü miitkat juya, ajütüneechi achiki Satanás otta nuuʼulakeerü naaʼin na wayuukana. Soʼunnaa tia makat, eesü süpüla naneeküin na  wayuukana nuluwataain Jehová naaʼu (Alat. Map. 20:7-10). Sünainjee tü naaʼinrakat, atüjaaneerü aaʼu eere süpüla waneepiain nanülia suluʼu tü karaloʼuta süchikimaajatkat kataa oʼuu.

¹⁶ Nnojotsü watüjaain saaʼu jeʼreenain na ayouteenakana nuluwataain Jehová naaʼu, na ashatüinjanakana nukuwaʼipa Adán sümaa Eva. Anuu sünüiki Alateetkat Mapeena 20:15 (TNM): «Otta na nnojoliikana ashajünüin anülia suluʼu tü karaloʼuta süchikimaajatkat kataa oʼuu, ojutüneena naya suluʼu tü laa chuwatakat maʼin». Makalaka najaʼttinneenain napüshuaʼa. Wainmeena na wayuu lotokana akuwaʼipa oʼttaajeenaka süchikijee tü ooʼulaküneetkalü aka naaʼin. Meerü süshajünakai saaʼin nanülia süpüla kaʼikat süpüshuaʼa suluʼu tü karaloʼuta süchikimaajatkat kataa oʼuu.

17. ¿Kasa aküjünaka nümüin Daniel alatüinjatka wakalioʼu? (Daniel 12:4, 8-10).

¹⁷ Anashaatasü maʼin süka watüjaaitpain aaʼu shikeraajeerüin süpüshuaʼa tü wekirajaaitpakalü anain. Eepejeʼe wanee pütchi nüküjaka wanee aapiee nümüin Daniel alatüinjatka wakalioʼu sülüʼütpa sükalia sajaʼlajaainjatka oʼu tü kasa mojusükat (paashajeʼera Daniel 12:4, 8-10; 2 Tim. 3:1-5). Müshi nia: «Sütüjaweerü aaʼu wayuu maʼleekalia nüchiki chi Maleiwakai».  Makalaka nayaawateerüin saaʼu na aʼyataashiikana nümüin Maleiwa tü pütchi aküjünatüjütkalia achiki suluʼu tü karaloʼutakat Daniel. Anuu sooʼomüin nünüiki chi aapieekai süchiki tü alatajatkat sülüʼütpa sükalia süpüla sajaʼttüin tü kasa mojusükat: «Eʼrüliijeena maʼin wayumüin na mojulaashiikana otta nnojoleerü nayaawatüin aaʼu tü pütchikat».

18. ¿Kaseerü alataka namüin na mojulaashiikana soʼu palit kaʼi?

¹⁸ Müsü nnojotkai jaralüin kasalajanain atuma naainjala na mojulaashiikana wakalioʼu (Mal. 3:14, 15). Alüʼütsü sükalia süpüla kasalajanain nutuma Jesús naainjala na wayuu makana aka saaʼin sukuwaʼipa kaaʼula otta nükataleena naya noulia na wayuu makana aka saaʼin sukuwaʼipa anneerü (Mat. 25:31-33). Nnojoleena oʼttaain na mojulaashiikana süchikijee tü müliaa miyoʼusükat otta nnojoleerü asoʼiraain naaʼin suluʼu tü paʼaraiisükat. Nnojoleerü ashajünüin nanülia suluʼu tü karaloʼuta «nanüliamaajatkat na sotokana naaʼin Jehová», tü aküjünakat achiki suluʼu Malaquías 3:16.

19. (1) ¿Kasa waaʼinrajatka maaʼulu? (2) ¿Jamüsü waaʼinrajatka tia?

¹⁹ Choʼujaasü maʼin anainjatüin wakuwaʼipa maaʼulu otta naatain wakuwaʼipa noulia na mojulaashiikana (paashajeʼera Malaquías 3:16-18). Nürütkeʼerüin nünainmüin Jehová na wayuu nüneekakana süpüla nümaainjanain naya. ¿Aashin keeʼireein waaʼin naʼakeein waya?

20. (1) ¿Jeʼtsü tü pütchi chiiruaajatkalü aküjünüin nümüin Daniel? (2) ¿Jamüsü keeʼireeka paaʼin shikeraajüin tia?

²⁰ Anashaatasü maʼin tü watüjaaitpakat aaʼu maaʼulu. Alüʼütsü tü kaʼi sajaʼttajatkalü oʼu tü mojulawaakat. Sülatapa tia, weʼreerü shikeraajüin tü nümatüjütkalia Jehová nümüin Daniel, tü makat: «Akaisaʼa pütamaajeechin püchikuaʼa mapeena süpüla tü aapünajatkat pümüin» (Dan. 12:13). ¿Aashin keeʼireein paaʼin süntüin tü kaʼi süsoʼiraainjatkalü oʼu naaʼin Daniel namaa na püpüshikana? Mülejeʼe tia, ayataʼaya waneepiain pia nümaa Maleiwa süpüla süshajünüin pünülia süpüla kaʼikat süpüshuaʼa suluʼu tü karaloʼuta süchikimaajatkat kataa oʼuu.