EKIRAJAAYA 39
¿Yalasüche pünülia suluʼu «tü karaloʼuta süchikimaajatkat kataa oʼuu»?
«Süshajünaka wanee karaloʼuta nanüliamaajatü na sotokana naaʼin Jehová, na kojutukana amüin nia» (MAL. 3:16).
JAYEECHI 61 ¡Ayata katchin waaʼin wawalayuu!
SÜCHIKI TÜ WEKIRAJAAINJATKALÜ ANAIN *
Soʼujeʼereʼeya nükalioʼu Abel müsü nüshajakai saaʼin Jehová nanülia waneinnua wayuu suluʼu «tü karaloʼuta süchikimaajatkat kataa oʼuu». (Paashajeʼera tü pütchikat 1 otta 2).
1. (1) Saashin Malaquías 3:16, ¿jeʼtsü tü karaloʼuta nüshajakat Jehová? (2) ¿Kasa nüshajaka suluʼu tia karaloʼutakat?
KAKALIAIRÜ müin nüshajakai saaʼin Jehová wanee karaloʼuta kaluʼuka sünülia wayuu. Chi palajaikai ashajünüin anülia suluʼu nia Abel, chi palajaikai wayuu waneepiain nümaa Jehová (Luc. 11:50, 51). * Yalejeechiki wainma na wayuu nüshajakana anülia Jehová suluʼu tia karaloʼutakat. Kojuyasü sünülia tia karaloʼutakat suluʼu tü Bibliakat, wanee shia «karaloʼuta nanüliamaajatü na sotokana naaʼin Jehová» (paashajeʼera Malaquías 3:16). Otta tü wane shia «tü karaloʼuta süchikimaajatkat kataa oʼuu», meerü sünülia watuma sünain ekirajaayakat tüü (Alat. Map. 3:5, TNM; 17:8, TNM).
2. (1) ¿Jaralii na ashajünakana anülia suluʼu tü karaloʼuta süchikimaajatkat kataa oʼuu? (2) ¿Kasa waaʼinrajatka süpüla süshajünüin wanülia suluʼu tia karaloʼutakat?
2 Suluʼu tia karaloʼutakat, ashajünüsü nanülia na wayuu aʼwaajakana Jehová jee kojutukana amüin nia sümaa alin nia napüla. Naʼatapajüin katüin noʼu süpüla kaʼikat süpüshuaʼa chaa iipünaa jee shiale yaa mmapaʼa. Eesü süpüla süshajünüin wanülia suluʼu waʼaleewajaale maʼin nümaa Jehová jee wanoujale sünain naapajiraain nikii Jesús waaʼu (Juan 3:16, 36, TNM). ¿Aashin keeʼireein waaʼin süshajünüin wanülia wapüshuaʼa suluʼu tia karaloʼutakat?
3, 4. (1) ¿Kateetche woʼu süpüla kaʼikat süpüshuaʼa sutuma süshajünüin neʼe wanülia suluʼu tü karaloʼuta süchikimaajatkat kataa oʼuu? (2) ¿Kasa wekirajaainjatka anain sünain ekirajaayakat tüü jee sünain tü wane?
3 ¿Kateetche woʼu süpüla kaʼikat süpüshuaʼa sutuma süshajünüin neʼe wanülia suluʼu tia karaloʼutakat? Watüjaajeerü aaʼu tia sünainjee tü nümakat Jehová nümüin Moisés suluʼu Éxodo 32:33, tü makat: «Nayeena tasünneʼeraka anülia suluʼujee takaraloʼutse na kaainjalakana toulia». Wayaawata aaʼu sükajee tia eein süpüla süsünneʼennüin tü anüliee ashajünakat suluʼu tia karaloʼutakat. Müsü nüshajakai saaʼin Jehová tia anülieekat süka lápiz (Alat. Map. 3:5, TNM). Meerü nüshajakai saaʼin Jehová mapeena tia anülieekat süka lapicero, müsüjeseʼe wachajaainjatüin sukuwaʼipa süpüla yalain wanülia naaʼinrapa tia.
4 Eesü süpüla wasakirüin waaʼin sünain tüü: ¿Kasa süküjaka tü Bibliakat nachiki na wayuu ashajünakana anüliee suluʼu tü karaloʼuta süchikimaajatkat kataa oʼuu jee na nnojoliikana ashajüin anülia suluʼu? ¿Joujeerü kataka noʼu süpüla kaʼikat süpüshuaʼa na ashajünakana anülia suluʼu? ¿Kaseerü alataka namüin na wayuu outakana sümaa nnojoluin neʼraajüin Jehová? ¿Eesüche süpüla yalain nanülia suluʼu tia karaloʼutakat? Watüjaajeerü aaʼu tia sünain ekirajaayakat tüü jee sünain tü wane.
¿JARALII NA ASHAJÜNAKANA ANÜLIA SULUʼU TIA KARALOʼUTAKAT?
5, 6. (1) Saashin Filipos 4:3, ¿jaralii na ashajünakana anülia suluʼu tü karaloʼuta süchikimaajatkat kataa oʼuu? (2) ¿Joujeerü süshajünaka nanülia suluʼu tia karaloʼutakat süpüla kaʼikat süpüshuaʼa?
5 ¿Jaralii na ashajünakana anülia suluʼu tü karaloʼuta süchikimaajatkat kataa oʼuu? Süpüla watüjaain saaʼu tia, waashajaajeerü süchiki jaʼraisü shiʼipapaʼa wayuu. Noʼutku nayakana eeshii na ashajünakana anülia jee na nnojoliikana ashajünüin anülia suluʼu tia karaloʼutakat.
6 Tü palajatkat shiʼipapaʼa wayuu, naya na aneekünakana süpüla naluwataain nümaa Cristo chaa iipünaa. ¿Ashajünüsüche nanülia suluʼu tü karaloʼuta süchikimaajatkat kataa oʼuu? Watüjaa aaʼu süshajünüin nanülia suluʼu süka nüküjain Pablo tia namüin na anoujashii chajanakana Filipos (paashajeʼera Filipos 4:3, TNM). Süpüla nnojoluin müin süsünneʼennakai saaʼin nanülia suluʼujee, waneepiainjana naya nümaa Maleiwa. Ashajüneerü nanülia suluʼu tia karaloʼutakat süpüla kaʼikat süpüshuaʼa shiʼitaanapa nejeetse nanain süchikijee outuin naya jee shiale süpülapünaa suʼttuin tü müliaa miyoʼusükat (Alat. Map. 7:3).
7. Saashin Alateetkat Mapeena 7:16, 17, ¿joujeerü süshajünaka nanülia süpüla kaʼikat süpüshuaʼa na wattakana naalii wayuu?
7 Tü wane shiʼipapaʼakat wayuu, naya na wayuu wattakana naalii. ¿Ashajünüsüche nanülia suluʼu tü karaloʼuta süchikimaajatkat kataa oʼuu? Aa, ashajünüsü. ¿Ayateetche nanülia suluʼu süchikijee Armagedón? Aa, ayateeria (Alat. Map. 7:14). Naashin Jesús kateerü noʼu naya wayuukana süpüla kaʼikat süpüshuaʼa, na makana aka saaʼin anneerü (Mat. 25:46, TNM). Nnojoleerü aapünamaatüin tü kataakalü oʼuu süpüla kaʼikat süpüshuaʼa namüin na oʼttaajeenakana süchikijee Armagedón. Meerü süshajünakai saaʼin nanülia süka lápiz suluʼu tia karaloʼutakat. Soʼunnaa tü miitkat juya nuluwataajeetka oʼu Jesús, naaʼinmajeena naya maʼaka naaʼinmajüin anneerü chi anneetpüʼükai «sümaa nuʼunirüin sünainmüin tü wüin katakalü atuma soʼu wayuu». Soʼu tia, meerü süshajünakai saaʼin süpüla kaʼikat süpüshuaʼa nanülia na oonookana nümaa Cristo jee na waneepiakana nümaa Jehová (paashajeʼera Alateetkat Mapeena 7:16, 17, TNM).
8. (1) ¿Jaralii na nnojoliikana ashajünüin anülia suluʼu tü karaloʼuta süchikimaajatkat kataa oʼuu? (2) ¿Kaseerü alataka namüin?
8 Tü apünüinkat shiʼipapaʼa wayuu, naya na makana aka saaʼin sukuwaʼipa kaaʼula, na ajaʼttinneenakana soʼu Armagedón. Nnojotsü ashajünüin nanülia suluʼu tü karaloʼuta süchikimaajatkat kataa oʼuu. Naashin Jesús «müinnamaʼaleeya naya wayuukana» (Mat. 25:46, TNM). Anuu tü nüshajakat Pablo nachiki: «Süsaleena naya naainjala otta müinnamaʼaleeya naya» (2 Tes. 1:9, TNM; 2 Ped. 2:9). Alateerü tia namüin napüshuaʼa na wayuu eʼrüliikana wayumüin sümüin tü nüpülainkat Maleiwa, nnojoleena eein naya piantua, nnojoleerü asoʼiraain naaʼin (Mat. 12:32; Mar. 3:28, 29; Heb. 6:4-6, TNM). Wekirajaa jooluʼu süchiki tü piamakat shiʼipapaʼa wayuu asoʼiraainjatka aaʼin süchikijee outaa yaa mmapaʼa.
NA ASOʼIRAAINJANAKANA AAʼIN SÜCHIKIJEE OUTAA
9. (1) ¿Jarat tü piamasükat shiʼipapaʼa wayuu asoʼiraainjatka aaʼin süchikijee outaa yaa mmapaʼa? (Aluwataaushikana 24:15). (2) ¿Jamüsü naataka nakuwaʼipa?
9 Aashajaasü tü Bibliakat süchiki piamasü shiʼipapaʼa wayuu asoʼiraainjanakana aaʼin süchikijee outaa otta eesü süpüla katüin noʼu waneepia yaa mmapaʼa. Naya «na wayuu lotokana akuwaʼipa otta na wayuu nnojoliikana lotuin akuwaʼipa» (paashajeʼera Aluwataaushikana 24:15, TNM). «Na wayuu lotokana akuwaʼipa», naya na waneepiakana nümaa Jehová kataiwaʼaya noʼu. Otta «na wayuu nnojoliikana lotuin akuwaʼipa», naya na nnojoliikana aʼyataain nümüin Jehová kataiwaʼaya noʼu. Naʼakajee naya wayuukana wainma na aaʼinrapuʼukana kasa mojusü maʼin nuʼupala Maleiwa. Saaʼujee süsoʼiraainjatüin saaʼin tü piamasükat shiʼipapaʼa wayuu, ¿maluʼutche tia yalain nanülia suluʼu tü karaloʼuta süchikimaajatkat kataa oʼuu? Süpüla watüjaain saaʼu tia, wekirajaajeerü anain sooʼomüin süchiki tia piamasükat shiʼipapaʼa wayuu.
10. (1) ¿Jamüsü süsoʼiraainjatka naaʼin süchikijee outaa «na wayuu lotokana akuwaʼipa»? (2) ¿Kasa aneeküneenaka apüla nutuma Maleiwa noʼutku naya wayuukana? (Paashajeʼera sünain rewiisütakat tüü tü pütchikat «Süsakiraka anain wayuu» aashajaaka süchiki süsoʼiraainjatüin saaʼin wayuu yaa mmapaʼa süchikijee outaa).
10 Tü pienchisükat shiʼipapaʼa wayuu waashajaainjatka achiki, naya «na wayuu lotokana akuwaʼipa» asoʼiraainjanaka aaʼin süchikijee outaa. Ashajünatüjülia nanülia suluʼu tü karaloʼuta süchikimaajatkat kataa oʼuu kataiwaʼaya noʼu. ¿Asünneʼennüsüche nanülia suluʼujee tia karaloʼutakat outapa naya? Nnojo, sotushii naya naaʼin Jehová, jama nnojolin nia «Sümaleiwasein wayuu ouktüsü. Sümaleiwase eekai katüin soʼu, süka katüin noʼu naya wayuukana nümüin» (Luc. 20:38). Nasoʼiraapa aaʼin süchikijee outaa na lotokana akuwaʼipa yaa mmapaʼa, yaleerü nanülia suluʼu tü karaloʼuta süchikimaajatkat kataa oʼuu. Eepejeʼe süpüla süsünneʼennüin nanülia yalejee süka müin süshajünakai saaʼin nanülia süka lápiz (Luc. 14:14). Noʼutku na wayuu asoʼiraainjanakana aaʼin süchikijee outaa, aneeküneena naya nutuma Maleiwa süpüla laülaashiinjanain sainküin mmakat (Sal. 45:16).
11. ¿Kasa ekirajünüinjanaka anain «na wayuu nnojoliikana lotuin akuwaʼipa» süpüla süshajünüin nanülia suluʼu tü karaloʼuta süchikimaajatkat kataa oʼuu?
11 Waashajaa joo süchiki tü jaʼraisükat shiʼipapaʼa wayuu, naya «na wayuu nnojoliikana lotuin akuwaʼipa» asoʼiraainjanaka aaʼin süchikijee outaa. Süka nnojoluin neʼraajüin tü nuluwataakalü anain Jehová, eesüjaʼa nnojorüle anain nakuwaʼipa kataiwaʼaya noʼu, müsüjeseʼe nnojoluin süshajünüin nanülia suluʼu tü karaloʼuta süchikimaajatkat kataa oʼuu. Süsoʼiraapa naaʼin süchikijee outaa nutuma Maleiwa, eesüjaʼa süpüla süshajünüin mapa nanülia suluʼu tia karaloʼutakat. Sutuma naaʼinrüin kasa mojusü noʼuluʼu Maleiwa noʼutku nayakana kataiwaʼaya noʼu, choʼujaashii nekirajünüin sünain tü pütchi nuluwataakalü anain Jehová. Süpüla nakaalinjünüin, ekirajüneena maʼin naya sünain tü nuluwataakalü anain Maleiwa. Soʼunnaa tü miitkat juya nuluwataainjatka oʼu Jesús, watteerü maʼin saalii wayuu ekirajüneetka.
12. (1) ¿Jaralii ekirajeenaka na wayuu nnojoliikana lotuin akuwaʼipa? (2) ¿Kaseerü alataka nümüin chi ayoutakai naaʼinrüin tü ekirajünakalü anain nia?
12 ¿Jaralii ekirajeenaka na wayuu nnojoliikana lotuin akuwaʼipa? Naya na wayuu wattakana naalii otta na lotokana akuwaʼipa asoʼiraainjanaka aaʼin süchikijee outaa. ¿Kasa naaʼinrajatka na wayuu nnojoliikana lotuin akuwaʼipa süpüla süshajünüin nanülia suluʼu tü karaloʼuta süchikimaajatkat kataa oʼuu? Aleewainjana naya nümaa Jehová jee naapüinjatü naaʼin nümüin. Jülüjeerü naaʼin Jesús jee na aluwataainjanakana nümaa, neeʼiratüle nakuwaʼipa na wayuu nnojoliikana lotuin akuwaʼipa (Alat. Map. 20:4). Chi eekai niyoutuin nükaalinjünüin, ajaʼttinneechi nia jaʼitairü 100 nuuyase (Is. 65:20). Nütüjaa aaʼu Jehová otta Jesús tü suluʼukat saaʼin wayuu, müsüjeseʼe jülüjeerüin naaʼin tü naaʼinreetkat na wayuukana suulia naaʼinrajüin kasa mojusü suluʼu tü paʼaraiisükat (Is. 11:9; 60:18; 65:25; Juan 2:25).
NA ASOʼIRAAINJANAKANA AAʼIN SÜPÜLA KATÜIN NOʼU OTTA NA ASOʼIRAAINJANAKANA AAʼIN SÜPÜLA SÜSALAIN NAAINJALA
13, 14. (1) ¿Kasa wayaawatapuʼuka aaʼu süchiki tü nümakat Jesús suluʼu Juan 5:29? (2) ¿Kasa jülüjainjatka waaʼin waashajeʼerapa tia pütchikat?
13 Nüküjainña Jesús nachiki na wayuu asoʼiraainjanakana aaʼin süchikijee outaa yaa mmapaʼa. Anuu nünüiki: «Nnojo ponuin jaaʼin tia süka sünteerüin wanee kaʼi naapeetka oʼu napüshuaʼa na wayuu outushiikana nünüiki chi Süchonkai Wayuu otta atamaajeena naya. Nayasaʼa na wayuu aaʼinrapuʼukana kasa anasü asoʼiraweena aaʼin süpüla katajatüin noʼu otta na wayuu aaʼinrapuʼukana kasa mojusü asoʼiraajeena aaʼin süpüla kasalajanain naainjala namüin» (Juan 5:28, 29, TNM). ¿Kasa nüküjeeka achiki Jesús?
14 Wanaa sümaa nüküjain Jesús süchiki tü naaʼinrapuʼukat na wayuu asoʼiraainjanakana aaʼin süchikijee outaa, wayaawatapuʼu aaʼu eejeenain na wayuu aaʼinrakana kasa anasü otta na aaʼinrakana kasa mojusü katapa noʼu nachikuaʼa. Nnojotpejeʼe nüküjain Jesús süchiki tü naaʼinrajatkat na wayuukana nasoʼiraapa aaʼin süchikijee outaa, shia naashajaaka achiki tü naaʼinrapuʼukat kataiwaʼaya noʼu. Pansaasü tia süka nnojoleerüin nuuʼulaain Maleiwa saainjünüin kasa mojusü suluʼu tü paʼaraiisükat. Tü kasa mojusü naaʼinrakat na wayuu nnojoliikana lotuin akuwaʼipa, naaʼinrüin shia kataiwaʼaya noʼu. ¿Kasa nüküjeeka achikii Jesús wanaa sümaa nümüin «na wayuu aaʼinrapuʼukana kasa anasü asoʼiraweena aaʼin süpüla katajatüin noʼu otta na wayuu aaʼinrapuʼukana kasa mojusü asoʼiraajeena aaʼin süpüla kasalajanain naainjala namüin»?
15. (1) ¿Jaralii na asoʼiraainjanakana aaʼin «süpüla katajatüin noʼu»? (2) ¿Jamüsü yalaka nanülia suluʼu tü karaloʼuta süchikimaajatkat kataa oʼuu?
15 Na lotokana akuwaʼipa, na aaʼinrakana kasa anasü kataiwaʼaya noʼu, naya na asoʼiraainjanakana aaʼin süpüla katajatüin noʼu süka yaleerüin nanülia suluʼu tü karaloʼuta süchikimaajatkat kataa oʼuu. Wayaawata aaʼu sükajee tia «na wayuu aaʼinrapuʼukana kasa anasü», na asoʼiraainjanakana aaʼin saashajaaka achiki Juan 5:29, naya neʼe «na wayuu lotokana akuwaʼipa» saashajaaka achiki Aluwataaushikana 24:15. Pansaasü tia sümaa tü sümakat Roma 6:7 (TNM), eere sümüin: «Chi wayuu eekai outuin, alaʼajaanüsü naainjala nuulia». Outule wanee wayuu lotokai akuwaʼipa, taashishi nia suulia naainjala. Sotusü naaʼin Jehová tü kasa anasü naaʼinrakat kataiwaʼaya noʼu süpüla waneepiain nia nümaa (Heb. 6:10). Ayatüinjanapejeʼe waneepiain nümaa Jehová na lotokana akuwaʼipa nasoʼiraapa aaʼin süpüla eeinjatüin waneepia nanülia suluʼu tü karaloʼuta süchikimaajatkat kataa oʼuu.
16. ¿Jamüsü süsoʼiraainjatka naaʼin waneinnua wayuu süpüla kasalajanain naainjala?
16 ¿Jama na aaʼinrapuʼukana kasa mojusü kataiwaʼaya noʼu? ¿Yalasüche nanülia suluʼu tü karaloʼuta süchikimaajatkat kataa oʼuu? Nnojo, nnojotsü yalain. Mayaainjeʼe sülaʼajaanüin naainjala noulia outapa naya, nnojoishii aʼyataapuʼuin nümüin Jehová. Wayaawata aaʼu sükajee tia «na wayuu aaʼinrapuʼukana kasa mojusü» asoʼiraainjanaka aaʼin süpüla kasalajanain naainjala, naya neʼe «na wayuu nnojoliikana lotuin akuwaʼipa» asoʼiraainjanaka aaʼin saashajaaka achiki Aluwataaushikana 24:15. Asoʼiraajeerü naaʼin süpüla kasalajanain naainjala. * Tia makat shia jülüjeerüin naaʼin Jesús naaʼinrüle nayakana tü kasa anasükat nuʼupala Maleiwa (Luc. 22:30, TNM). Nnojoleerü atüjaanamaatüin aaʼu jaraliin na anakana süpüla süshajünüin nanülia suluʼu tü karaloʼuta süchikimaajatkat kataa oʼuu. Süpüla tia, neeʼiratüinjatü nakuwaʼipa jee naapüinjatü naaʼin nümüin Jehová.
17, 18. (1) ¿Kasa naaʼinrajatka na asoʼiraainjanakana aaʼin yaa mmapaʼa? (2) ¿Kasa nasoutuinjatka aaʼu saashin Alateetkat Mapeena 20:12, 13?
17 Jaʼitairü lotopuʼuin nakuwaʼipa jee nnojoluin lotopuʼuin nakuwaʼipa na asoʼiraainjanakana aaʼin, oonooinjana naya sümaa tü sümakat tü jeketükat karaloʼuta ojutannajatka soʼunnaa tü miitkat juya. Anuu tü niʼrakat chi aluwataaushikai Juan: «Teʼrakalaka na wayuu outakana paala shaʼwatüin sümülatuʼu tü einaseekat, na miyoʼuyuukana otta na tepichikana; sujutannakalaka wanee karaloʼutairua. Sujutannataalaka joo wanee karaloʼutaya, shia tü süchikimaajatkat kataa oʼuu. Asoutuinjana naya saaʼu tü naaʼinrakat, tü ashajünakat suluʼu tü karaloʼutakalüirua» (Alat. Map. 20:12, 13, TNM).
18 ¿Kasanainjeesüche kasalajanain atuma naainjala na asoʼiraainjanakana aaʼin? ¿Shiache sutuma tü kasa naaʼinrakat kataiwaʼaya noʼu? Nnojotsü shiain sutuma tia. Soto waaʼin taashin naya suulia naainjala outapa naya. Sutuma tia, wayaawata aaʼu nnojoleenain süsalain naainjala sutuma tü kasa naaʼinrakat kataiwaʼaya noʼu. Shia kasalajanainjatka namüin noonoole jee nnojorüle noonooin sümaa tü pütchi ekirajünakalü anain naya nüchiki Maleiwa suluʼu tü paʼaraiisükat. Jaʼitainna na wayuu namaiwajana waneepiakana nümaa Jehová maʼaka naaʼin Noé, Samuel, David otta Daniel, nekirajaainjatü anain nüchiki Jesucristo otta neʼitaainjatü naaʼin sünain naapajiraain nikii waaʼu, nayaleekajaʼa na aaʼinrapuʼukana kasa mojusü.
19. ¿Kaseerü alataka namüin na nnojoliikana ashajünüin nanülia suluʼu tü karaloʼuta süchikimaajatkat kataa oʼuu?
19 ¿Kaseerü alataka namüin na nnojoliikana ashajünüin anülia suluʼu tü karaloʼuta süchikimaajatkat kataa oʼuu sutuma nnojoleerüin neʼitaain naaʼin sünain naapajiraain nikii Jesús waaʼu? Anuu tü sümakat Alateetkat Mapeena 20:15 (TNM): «Otta na nnojoliikana ashajünüin anülia suluʼu tü karaloʼuta süchikimaajatkat kataa oʼuu, ojutüneena naya suluʼu tü laa chuwatakat maʼin». Anasü jülüjale maʼin waaʼin süshajünüin wanülia suluʼu tia karaloʼutakat otta eejüinjatü waaʼin suulia waaʼinrajüin wanee kasa nnojoleetka atuma wanülia suluʼu.
Wanee wawala ekirajakai soʼunnaa tü Miitkat juya, nikirajüin na wayuu asoʼiraakana aaʼin. (Paashajeʼera tü pütchikat 20).
20. ¿Kasa tü anakat maʼin aainjünüinjatka soʼunnaa tü miitkat juya nuluwataainjatka oʼu Jesús? (Piirakaa sümüin tü ayaakuaa sünainkat süta tü rewiisütakat).
20 Anasü maʼin tü aainjünüinjatkat soʼunnaa tü miitkat juya nuluwataainjatka oʼu Jesús. Ekirajüneena maʼin wayuu sainküin mmakat süpüshuaʼa nüchiki Maleiwa otta süchiki naapajiraain nikii Jesús waaʼu. Otta jülüjeerü naaʼin Jesús nakuwaʼipa na wayuu lotopuʼukana akuwaʼipa otta na nnojoliipuʼukana lotuin akuwaʼipa (Is. 26:9; Aluw. 17:31). ¿Jameerü sukuwaʼipa süpüla shikirajünüin wainma wayuu soʼu tia? Wekirajaajeerü anain tia sünain tü wane ekirajaayakat.
JAYEECHI 147 Kateerü woʼu waneepia
^ Sünain ekirajaayakat tüü, wekirajaajeerü anain tü apansaajünakat süchiki tü nümakat Jesús suluʼu Juan 5:28, 29, wanaa sümaa nüküjain süsoʼiraainjatüin saaʼin wayuu süpüla katüinjatüin soʼu süpüla kaʼikat süpüshuaʼa otta süsoʼiraainjatüin saaʼin wayuu süpüla süsalain saainjala. Wekirajaajeerü anain jaraliin na asoʼiraainjanakana aaʼin süpüla kaʼikat süpüshuaʼa otta jaraliin na asoʼiraainjanakana aaʼin süpüla süsalain naainjala.
^ Ashajünüsü karaloʼutakat tüü «soʼujeʼereʼeya shiʼitaanüin shikii wayuu». Naya wayuukana, naya na eekana süpüla taashin atumawaa suulia naainjala (Mat. 25:34, TNM; Alat. Map. 17:8, TNM). Saaʼujee tia, eesüjaʼa süpüla shiain nünülia Abel tü palajatkalü anüliee ashajünaka suluʼu tü karaloʼuta süchikimaajatkat kataa oʼuu.
^ Sükajee tü pütchi «kasalajana» makat, wayaawatapuʼu aaʼu kasalajanainjatüin atumawaa saainjala wayuu, wainmapejeʼe sukuwaʼipa tia pütchikat. Eesüjaʼa nüküjeere achiki Jesús suluʼu Juan 5:29 jülüjainjanain naaʼin na asoʼiraainjanakana aaʼin süpüla niyaawatüin saaʼu müleka anale jee mojule nakuwaʼipa. Saashin wanee diccionario griego «jülüjaa aaʼin sukuwaʼipa wayuu» maluʼulu tü pütchi nuchuntakat Jesús suluʼu wetsiikulokot tüü.
