Wekirajaa sünain tü sümakat tü Bibliakat süchiki tia.

Saashin Aluwataaushikana 24:15 (TNM), asoʼiraainjatü naaʼin süchikijee outaa na lotokana akuwaʼipa otta na nnojoliikana lotuin akuwaʼipa. Na lotokana akuwaʼipa naya na oonookana nümaa Maleiwa kataiwaʼaya noʼu. Müsüjeseʼe süshajünüin nanülia suluʼu tü karaloʼuta süchikimaajatkat kataa oʼuu (Mal. 3:16). Na nnojoliikana lotuin akuwaʼipa naya na nnojoliikana eʼraajüin nukuwaʼipa Jehová kataiwaʼaya noʼu, müsüjeseʼe nnojolin süshajünüin nanülia suluʼu tia karaloʼutakat.

Wanaawasü tü aküjünakat suluʼu Juan 5: 28, 29 (TNM) sümaa tü sümakat Aluwataaushikana 24:15 nachiki na wayuu asoʼiraainjanakana aaʼin süchikijee outaa. Naashin Jesús asoʼiraainjatü naaʼin na aaʼinrapuʼukana kasa anasü süpüla katüinjatüin noʼu ooʼulaka na aaʼinrapuʼukana kasa mojusü süpüla süsalain naya naainjala. Na lotokana akuwaʼipa naaʼinrüin tü kasa anasükat kataiwaʼaya noʼu. Asoʼiraajeerü naaʼin süpüla katüinjatüin noʼu süka süshajünüin nanülia suluʼu tü karaloʼuta süchikimaajatkat kataa oʼuu. Eekajasaʼa na nnojoliikana lotuin akuwaʼipa naaʼinrüin kasa mojusü kataiwaʼaya noʼu. Asoʼiraajeerü naaʼin süpüla süsalain naya naainjala, nnojotyülia ashajünüin nanülia suluʼu tü karaloʼuta süchikimaajatkat kataa oʼuu. Ooʼulaaneerü sülatüin kojuya juya süpüla sütüjaanüin aaʼu naaʼinreerüle tü nümakat Maleiwa. Sümaʼinruʼu tia, eeshii süpüla nekirajünüin nüchiki Jehová otta süshajünüin nanülia suluʼu tü karaloʼuta süchikimaajatkat kataa oʼuu.

Saashin Alateetkat Mapeena 20:12, 13, oonooinjana napüshuaʼa na asoʼiraainjanakana aaʼin sümaa tü pütchi ashajünakat suluʼu tü karaloʼuta ojutannajatkat, tia shia tü pütchi sümaajatkat tü naaʼinrüinjatkat suluʼu tü Paʼaraiisükat. Ajaʼttinneena na nnojoliikana oonooin sümaa tia pütchikat (Is. 65:20).

Ashajünüsü suluʼu Daniel 12:2 eejeenain waneinnua wayuu asoʼiraainjanakana aaʼin süpüla katüinjatüin noʼu waneepia otta eejeenain waneinnua ayoutuneenaka. Tü süküjeekalü achiki tia wetsiikulokot shia tü alatajatkat namüin na asoʼiraainjanakana aaʼin. Kettaapa tü miitkat juya, aneeküneena na kettaakana süpüla katüinjatüin noʼu waneepia otta na ajaʼttinnajanakana (Alat. Map. 20:15; 21:3, 4).

Nakuwaʼipa na piamakana neʼipapaʼa wayuu asoʼiraainjanakana aaʼin, müsü aka saaʼin nakuwaʼipa waneinnua wayuu kepieekana suluʼu wanee mma naatajatü. Na lotokana akuwaʼipa, müshii aka naaʼin na aapünakana amüin karaloʼuta süpüla naʼyataainjanain jee shiale süpüla kepiainjanain naya suluʼu tia mmakat. Eekajasaʼa na nnojoliikana lotuin akuwaʼipa, müshii aka naaʼin na aapünakana amüin karaloʼuta süpüla makatüinjanain maʼaka jeʼra kaʼi suluʼu tia mmakat. Süpüla nooʼulaanüinjanain kepiain naya suluʼu, anainjatü nakuwaʼipa süpüla makatüin naya. Müsia tü naaʼinrajatkat na nnojoliipuʼukana lotuin akuwaʼipa, naaʼinrüinjatü tü nuluwataakalü anain Jehová otta anainjatü nakuwaʼipa süpüla kepiain naya suluʼu tü Paʼaraiisükat. Jaʼitairü kasain karaloʼuta aapünaka namüin na wayuu antakana suluʼumüin wanee mma naatajatü, eejeena na aneekünakana süpüla kepiain naya suluʼu otta eejeena na ajünajaanakana suluʼujee. Nayeena aneekünaka süpüla makatüin na anakana akuwaʼipa. Müshia neʼe napüshuaʼa na asoʼiraainjanakana aaʼin, nayeena aneekünaka süpüla katüinjatüin noʼu waneepia na waneepiakana nümaa Jehová otta na aaʼinrakana tü kasa anasükat suluʼu tü Paʼaraiisükat.

Nnojotsü alin neʼe wayuu nüpüla Jehová, aaʼinrüshi nia kasa anasü napüleerua (Deut. 32:4; Sal. 33:5). Naaʼinreerü tia nüsoʼireʼerapa naaʼin na lotokana akuwaʼipa namaa na nnojoliikana lotuin akuwaʼipa. Naaʼinrüinjatpejeʼe na asoʼiraainjanakana aaʼin süpüshuaʼa tü nuluwataakalü anain. Na aikana apüla Jehová otta na oonookana sümaa tü nuluwataakalü anain, nayeena katakana oʼu suluʼu tü Paʼaraiisükat.