«Shiasaʼa mapa maʼin niiʼiyalaakalaka tamüin. Müshijeseʼe müin taya maʼaka naaʼin wanee joʼuu eweetakai süpülapünaa keraain nükalia», müshi Pablo suluʼu 1 Corinto 15:8. Aashajaashi nia yala süchiki tü kaʼi niʼrakalü oʼu Jesús chaa iipünaa sümaa pülashin maʼin nia. ¿Kasa nüküjeeka achiki Pablo wanaa sümaa nümüin: «Müshijeseʼe müin taya maʼaka naaʼin wanee joʼuu eweetakai süpülapünaa keraain nükalia»? Wayaawatapuʼu aaʼu paala müin nüsoʼireʼennakai aaʼin Pablo süpüla oʼunaa chaa iipünaamüin sümaa nnojoyülüin kettaain nükalia süpüla tia. Tia müsü aka saaʼin niweetüle wanee joʼuu süpülapünaa keraain nükalia. Süka wekirajaain maʼin süchiirua tia wetsiikulokot, wayaawata aaʼu wapansaajüinjatüin tü wamakat süchiki.

Watüjaa aaʼulu shiain naashajaain achiki Pablo suluʼu tia wetsiikulokot tü alatakat soʼu tü kaʼi nunoujakalü oʼu nünain Jesús. ¿Kasa nüküjeeka achiki Pablo wanaa sümaa nümüin: «Müshijeseʼe müin taya maʼaka naaʼin wanee joʼuu eweetakai süpülapünaa keraain nükalia»? Eesü waneirua kasa eeka süpüla nüküjeein achiki.

Eesüjaʼa shiale nüküjeein achiki suʼwanajaʼalaa sümüin nukuwaʼipa sümaa kapüleein maʼin nümüin tü alatakat. Nnojotsü antapünaain suluʼu shikii wanee wayuu jemeyulüinjatüin shia süpülapünaa sükalia. Wopuluʼupa Saulo (chi Pablo münakai mapa) chamüin Damasco süpüla nuʼutuin naaʼin na anoujashiikana, eeʼiyalaashi Jesús nümüin eepa nükalia süchikijee nüsoʼiraain aaʼin. Nnojotsü antapünaain suluʼu nikii Pablo suʼwanajaainjatüin nukuwaʼipa jee müshiʼiya na anoujashii chajanakana Damasco. Otta kapüleesü maʼin nümüin tü alatakat süka moʼupaʼain nia maʼaka jeʼra kaʼi (Aluw. 9:1-9, 17-19).

Eesüjaʼa shiale nüküjeein achiki suʼwanajaain nukuwaʼipa mayaainjeʼe soʼujatüin shia wanee kaʼi nnojotka eʼitaanüin apüla tia. Tü Bibliakat Traducción Kadosh Israelita Mesiánica de estudio süshajüin tü pütchikat mayaa: «Jemeishi taya soʼu tü kaʼi nnojotkalü eʼitaanüin oʼu jemelinjachin taya». Chajachi Jesús iipünaa wanaa sümaa suʼwanajaain nukuwaʼipa Pablo. Süchikijee nüsoʼiraain aaʼin Jesús jee süpülapünaa nuʼunuin iipünaamüin, eeʼiyalaashi nia namüin waneinnua wayuu, nnojoipejeʼe nia niʼrüin Pablo wanaa sümaa tia (1 Cor. 15:4-8). Eeʼiyalaʼalaa müshi Jesús nümüin Pablo mayaainjeʼe soʼujatüin shia wanee kaʼi nnojotka eʼitaanüin apüla tia.

Eesüjaʼa shiale nüküjeein achiki nnojoluin niain kojutuleein maʼin noulia na waneinnua. Naashin noʼutku na ekirajaakana süchiirua sukuwaʼipa pütchi, tü pütchi nüküjakat Pablo suluʼu wetsiikulokot tüü, eesüjaʼa shiale süpüla süküjünüin süchiki wayuu nnojotka kojutuin maʼin. Eesüjaʼa shiale nüküjeein achiki Pablo sükajee tia nnojolin anain nia süpüla napüshin na aluwataaushikana. Anuu nünüiki: «Saaʼin tamüin, nnojotsü wanaain sümaa kojutüin taya sütüma wayuu maa aka nayakana, saaʼu teʼrapüʼüin wayumüin namüin na anoujashiikana [...]. ¿Kasa aneekünaka anainjee taya? Aneekünüshi taya nütüma chi Maleiwakai süka anamiain neʼe nia tamüin» (1 Cor. 15:9, 10).

Eesüjaʼa shiale nüküjeein achiki Pablo kojuyasü kasa. Eesüjaʼa shiale nüküjeein achiki suʼwanajaʼalaa sümüin nukuwaʼipa sümaa kapüleein maʼin nümüin tü alatakat wanaa sümaa niiʼiyalaain Jesús nümüin. Eesüjaʼa shiale nüküjeein achiki suʼwanajaain nukuwaʼipa mayaainjeʼe soʼujatüin shia wanee kaʼi nnojotka eʼitaanüin apüla tia jee shiale nnojoluin anain nia saaʼin nümüin süpüla napüshin na aluwataaushikana. Mayaainjeʼe nnojoluin watüjaain maʼin saaʼu tü nüküjeekalü achiki Pablo, watüjaa aaʼu kojutuin maʼin nümüin tü alatakat. Shiajaʼa nüküjawaika süchiki tü alatakat nümüin nüküjapa pütchi namüin na waneinnua süchiki nüsoʼiraain aaʼin Jesús (Aluw. 22:6-11; 26:13-18).