1. ¿Kasa eeka süpüla wasakinnüin anain koleejialuʼu jee waʼyataaleruʼu?

 ¿JAMÜSÜ paaʼin püsakinnüle nutuma wanee koleejiajiraakai pümaa jee niale wanee wayuu aʼyataajiraakai pümaa süchiki tü punoujakalü anain? ¿Mmotshiche pia? Alatawaisü tia wamüin wapüshuaʼa. Anapejeʼe maʼin wasakinnüle süpüla wayaawatüin saaʼu tü nanoujakalü anain na wayuukana jee tü jülüjakat naaʼin. Saaʼujee tia, watüjaajeerü aaʼu tü wanüikinjatkat namüin. Eepejeʼe wayuu asakiraka waya shiiʼiree natkaweein wamaa. Nnojotsü ponuin waaʼin tia sutuma süküjünüin maʼin alawaa süchiki tü wanoujakalü anain (Aluw. 28:22). Jee müsia süküjain tü Bibliakat sülüʼütpa sükalia süpüla sajaʼttüin kasa mojusü, nnojoleerü anashiin namüin na wayuukana anajiraain naya jee wayuujeena jashichi naya (2 Tim. 3:1, 3, TNM).

2. ¿Jamüsü anaka kamaneere waya?

² Nüsakirüle pia wanee wayuu süchiki tü punoujakalü anain shiiʼiree nütkaweein pümaa, ¿kasa paaʼinrajatka suulia jashichin pia nümüin? Kamaneeinjachi pia. Chi wayuu eekai kamaneein, atüjashi nia süpüleerua nukuwaʼipa jashichire wayuu nümüin (Prov. 16:32). Eepejeʼe kaʼi kapüleejeetka oʼu wamüin kamaneein waya. ¿Kasa waaʼinrajatka süpüla kamaneein waya? ¿Kasa waaʼinrajatka süpüla anamiain waya namüin na wayuu asakirakana waya süchiirua tü wanoujakalü anain shiiʼiree natkaweein wamaa? Kachonle pia, ¿kasa paaʼinrajatka süpüla pükaalinjain na püchonniikana süpüla kamaneein naya namüin na wayuu asakirakana naya süchiki tü nanoujakalü anain? Wekirajaa süchiki tia.

3. ¿Jamüsü watüjaaka saaʼu nnojoluin malain wanee wayuu anamiale nia? (2 Timoteo 2:24, 25).

³ Nnojoishiaaje malain wanee wayuu eekai anamiain, nüchecherüin  neʼe naaʼin suulia naashichijaain süpüleeruaanüle naaʼin. Anamieechi wanee wayuu sutuma tü nüpülainkat Maleiwa (Gal. 5:22, 23, TNM). Sümaiwa paala, eesüjaʼa suchuntunule tü pütchikat «anamia» süpüla süküjünüin nüchiki wanee ama eekai nulumajuushin süchikijee kaaʼin nia paala sümaa jashichin nia. Mayaainjeʼe anamiain nia sutuma nulumajuushin, ayatüshia katchin nia. ¿Kasa waaʼinrajatka süpüla anamiain waya sümaa wachecherüin waaʼin suulia jashiee? Nnojotsü wountuin tia wamüiwaʼa, acheküsü wachuntuin nümüin Maleiwa tü nüpülainkat süpüla müinjatüin wakuwaʼipa. Wainma na ountakana tia, wainma wawalayuu kamaneekana namüin na wayuu asakirakana naya süchiirua tü nanoujakalü anain shiiʼiree natkaweein namaa. Sutuma müin nakuwaʼipa na wawalayuukana, anasü sünüiki wayuu nachiki na Aküjaliikana pütchi (paashajeʼera 2 Timoteo 2:24, 25, TNM). ¿Kasa paaʼinrajatka süpüla anamiain pia sümaa püchecherüin paaʼin suulia jashiee?

4. ¿Kasa watüjaka sünainjee anamiain maʼin Isaac?

⁴ Sükajee tü sümakat tü Bibliakat süchiki nakuwaʼipa waneinnua wayuu anamiakana, wayaawata aaʼu jamüin anaka müle wakuwaʼipa. Jamüshijaʼa Isaac wanaa sümaa nukolojooin Guerarmüin, wanee pueulo suluʼuka tü mmakat Filistea, nachiaain nia na wayuu kepiakana pejepünaa nünain suulia najaʼitüin wüin suluʼujee tü ishi nukumajakat chi nüshikai. Mayaainjeʼe nükoroloin shia chi nüshikai, nnojoishi nia atkaain namaa süchiirua tia. Müshijeseʼe nukolojooin yalejee sümaa nukumajüin waneirua ishi (Gén. 26:12-18). Neʼrapa tia na filisteokana, naküjain nümüin Isaac nakoroloin tia wüinkat. Mayaainjeʼe müin tia, nnojoishi jashichin nia namüin (Gén. 26:19-25). ¿Jamüshi ayataka anamiain Isaac mayaainjeʼe eein wayuu atkaweeka nümaa? Shia sutuma niʼrüin matüjain atkawaa Abrahán chi nüshikai otta sutuma anamiain Sara tü niikat (1 Ped. 3:4-6; Gén. 21:22-34).

5. ¿Jamüsü watüjaaka saaʼu eein süpüla nekirajüin na wayuukana nachonnii süpüla anamiainjanain naya?

⁵ Jia kachonshiikana, eeshii süpüla jikirajüin jüchonnii süpüla anamiain naya. Jülüjataa waaʼin nukuwaʼipa Maxence, 17 nuuyase. Eeshi naashajaʼawaire namaa wayuu katkaaralii suluʼu nukoleejiase jee nüküjapa pütchi. Ekirajünüshi nia waneepia natuma na kachooinkana nia süpüla anamiain nia. Müshii naya nüchiki: «Niyaawata aaʼu chi wachonkai nüchecherüinjatüin maʼin naaʼin suulia jashiee süpüleeruaanapa naaʼin». Anasü maʼin nukuwaʼipa Maxence sutuma anamiain nia.

6. ¿Jamüsü anaka wachuntule nümüin Maleiwa anamiainjanain waya?

⁶ ¿Kasa waaʼinrajatka airuʼurule sünüiki wayuu woʼupala nüchiki Maleiwa jee süchiki tü Bibliakat? Wachunta nümüin Jehová tü nüpülainkat jee kekiwaa süpüla wasoutuin süka anakalü akuwaʼipa namüin. ¿Kasa waaʼinrajatka wayaawatüle saaʼu airuʼuluin wanüiki namüin? Waküja shia nümüin Jehová jee jülüja waaʼin tü anakat süpüla waaʼinrüin wanee sukueena. Waaʼinrüle tia, naapeerü wamüin Jehová tü nüpülainkat süpüla wachecherüin waaʼin suulia jashiee otta süpüla anamiain waya.

7. Jashicheere wayuu wamüin, ¿jamüsü aneetka wakuwaʼipa jülüjale waaʼin waneirua wetsiikulo? (Proverbios 15:1, 18).

⁷ Eesü waneirua wetsiikulo anaka süpüla jülüjain waaʼin kapüleere wamüin anain wanüiki shiʼipajee wayuu. Nükaalinjeena waya Jehová sükajee tü nüpülainkat süpüla sotuin waaʼin tia wetsiikulokot (Juan 14:26). Jamüsüjaʼa suluʼu tü karaloʼutakat Proverbios, eesü pütchi waaʼinrajatka süpüla wayuuinjanain anamia waya (paashajeʼera Proverbios 15:1, 18). Akaʼaya Proverbios süküjain aneerüin wakuwaʼipa wachecherüle waaʼin suulia jashiee (Prov. 10:19; 17:27; 21:23; 25:15).

8. ¿Jamüsü anaka watüjaale saaʼu palajana kasain nüsakirüin anainjee waya wanee wayuu?

⁸ Kekiire waya, atüjeena waya süpüleerua  wakuwaʼipa (Prov. 19:11). Chi wayuu kekiikai nüchecherüin naaʼin suulia jashiee mojule sünüiki wayuu süchiki tü nunoujakalü anain. Jamüshiijaʼa nasakirüle waya na wayuukana, eesü nnojorüle naküjain wamüin kasain nasakirüin anainjee waya. Müsüjeseʼe anain watüjaale saaʼu tia palajana süpülapünaa wasoutuin namüin (Prov. 16:23).

9. ¿Kasa naaʼinraka Gedeón wayaawataka atuma kekiin nia jee anamiain nia?

⁹ Jülüjataa waaʼin sukuwaʼipa nünüiki Gedeón namüin na nüpüshikana Efraín. Jashichishii naya nümüin sutuma nnojoluin nuunejaain naya sünain atkawaa. ¿Shiache jashichika neʼe anainjee tia? ¿Shiataapa sutuma yaletüin naaʼin? Eeshiijaʼa jashichire naya sutuma mojutuin naya atumawaa. Mayaainjeʼe nnojoluin watüjaain maʼin saaʼu jamüin jashichika naya, anasü tü naaʼinrakat Gedeón süka kojutuin naya nümüin otta anain nünüiki namüin. Sutuma naaʼinrüin tia Gedeón, eimalaasü naaʼin (Juec. 8:1-3).

10. ¿Kasa waaʼinrajatka süpüla anain wanüiki neʼipajee na asakirakana waya süchiirua tü wanoujakalü anain? (1 Pedro 3:15).

¹⁰ Eeshijaʼa eere wanee wayuu aʼyataajiraakai wamaa jee niale wanee koleejiajiraakai wamaa aküjakai wamüin jamüin woonooka sümaa tü sümakat tü Bibliakat süchiki wanee kasa. Waküjeerü nümüin süka anakalü akuwaʼipa jamüin anaka woonoole sümaa tü sümakat tü Bibliakat sümaa kojutuin nia wamüin (paashajeʼera 1 Pedro 3:15, TNM). Suulialeʼeya jülüjain waaʼin nüsakirüin  neʼe waya shiiʼiree nütkaweein wamaa, anasü jülüjale waaʼin kasain nikiiruʼuin. Jaʼitairü nnojoluin watüjaain maʼin saaʼu jamüin nüsakiraka anain waya, anashii wasoutule nümüin süka anakalü akuwaʼipa sümaa kamaneein waya nümüin. Anale wanüiki niʼipajee, eesü süpüla nunoutuin tü jülüjakat naaʼin wachiki. Ayataʼaya kamaneein waya nümüin, jaʼitairü airuʼuluin nünüiki wamüin jee nimeeʼerainpalain waya (Roma 12:17).

11, 12. (1) ¿Kasa wasakireʼerüinjatka anain waaʼin palajana süpülapünaa wasoutuin nümüin wanee wayuu asakirakai waya? (Piirakaa sümüin tü ayaakuaakat). (2) Püküja süchiki tü waaʼinrajatkat süpüla yootuin waya süka anakalü akuwaʼipa nümaa wanee wayuu asakirakai waya.

¹¹ ¿Kasa waaʼinrajatka nüsakirüle waya wanee wayuu aʼyataajiraakai wamaa jamüin nnojoliika sünainpünaain waya tü miʼiraa aainjünakat shikiira ouyasee? Anasü wasakirüle waaʼin sünain tüü: «¿Jülüjasüche naaʼin nnojorüleeinña eein süpüla naainjain wanee miʼiraa na Aküjaliikana pütchi? ¿Jülüjasüche naaʼin nnojoleenain paaʼinwajiraain na aʼyataajiraakana wamaa sutuma nnojoluin sünainpünaain waya tia miʼiraakat?». Eesüjaʼa aneerüle naaʼin chi aʼyataajiraakai wamaa waküjale nümüin anain maʼin tü naaʼinrakat saaʼujee kachipünaain naaʼin nakuwaʼipa na waneinnua otta waküjale nümüin wacheküin paaʼinwajiraain waya namaa na aʼyataajiraakana wamaa. Waaʼinrüle tia, eeshii süpüla yootuin waya nümaa süka anakalü akuwaʼipa süchiki jamüin nnojoliika sünainpünaain waya tü miʼiraa aainjünakat shikiira ouyasee.

¹² Eesü süpüla waaʼinrüin tia wasakinnüle süchiirua waneirua kasa kapüleeka süpüla waküjain sümüin wayuu. Eesüjaʼa nüküjale wamüin wanee koleejiajiraakai wamaa neeʼiratüinjatüin na Aküjaliikana pütchi tü jülüjakat naaʼin nachiki na jaleetshiikana. ¿Jülüjasüche naaʼin tia sutuma nnojoluin nütüjaain saaʼu tü nanoujakalü anain na Aküjaliikana pütchi? ¿Nüküjainche tia sutuma jaleerüin wanee naʼaleewain jee niale wanee nüpüshi? ¿Jülüjasüche naaʼin maalin wapüla na jaleetshiikana? Anasü waküjale nümüin kachipünaain waaʼin nakuwaʼipa na wayuukana jee kojutuin wamüin tü naneekakat (1 Ped. 2:17). b Wounteetkalaka waküjain nümüin jamüin anaka wakuwaʼipa sutuma waaʼinrüin tü sümakat tü Bibliakat.

13. ¿Kasa paaʼinrajatka süpüla pükaalinjain wanee wayuu nüküjale pümüin nnojoluin nunoujain sünain eein chi Maleiwakai?

¹³ Niyoutule wanee wayuu tü wanoujakalü anain, nnojo jülüjain waaʼin watüjaain saaʼu jamüin niyoutaka tia (Tito 3:2). Nüküjale pümüin wanee koleejiajiraakai pümaa malain wanee wayuu nunoujale sünain eein chi Maleiwakai, ¿jülüjamaatüinjatche waaʼin nunoujain sünain tü evoluciónkat sümaa nütüjaain saaʼu süpüshuaʼa tü sünainpünaakat? Eesüjaʼa nüküjale tia sutuma naapüin neʼe sutuma wayuu. Suulia ichein pia süchiirua jamüin nnojotka punoujain sünain tia, anasü püküjale nümüin süchiki wanee pütchi nüsakireʼerüinjatka anain naaʼin. Eesüjaʼa süpüla püküjain nümüin anain nüchajaale suluʼu jw.org wanee pütchi aashajaaka süchiki tü nukumalakat Maleiwa. Sutuma paaʼinrüin tia, eeshi süpüla naashajaweein pümaa süchiki wanee pütchi naashajeʼeraka suluʼujee jw.org jee shiale wanee video. Sutuma niʼrüin kojutuin nia putuma, eeshi süpüla nikirajaweein sooʼomüin süchiki tü Bibliakat.

14. ¿Kasa naaʼinraka Niall süpüla niiʼiyatüin sükajee jw.org alawaain tü aküjünakat nachiki na aküjaliikana pütchi nüchiki Jehová?

¹⁴ Jülüjataa waaʼin tü naaʼinrakat Niall sükajee jw.org süpüla niiʼiyatüin alawaain tü aküjünakat nachiki na aküjaliikana pütchi nüchiki Jehová. Anuu nünüiki: «Nüküjawalin tamüin wanee tacompañetse nnojoluin tanoujain sünain tü namakat na científicokana sutuma tanoujain neʼe sünain wanee karaloʼuta kakaliaitka ashajünüin».  Sutuma nnojoluin nuuʼulaain chi nücompañetsekai nüküjain süchiki tü nunoujakalü anain, nüküjain Niall nümüin anain nüchajaale tü pütchikat «Tü Bibliakat otta tü namakat na científicokana» suluʼuka jw.org. Sükajee wanee pütchi nümakat chi nücompañetsekai, niyaawata aaʼu Niall naashajeʼerüitpain tia pütchikat, müsüjeseʼe mapüleein nümüin Niall naashajaain nümaa süchiki jamakuwaʼipalüin sukumajaain tü kasakalüirua. Eesü süpüla puuntuin tü naaʼinrakat Niall.

15. ¿Kasa naaʼinrajatka na kachonshiikana süpüla anamiain nachonnii nasoutapa namüin na nacompañetse asakirakana naya süchiki tü nanoujakalü anain?

¹⁵ Jia kachonshiikana, eeshii süpüla jikirajüin jüchonnii süpüla anamiain naya nasoutapa namüin na asakirakana naya süchiirua tü nanoujakalü anain (Sant. 3:13). Eeshii wawalayuu ekirajakana nachonnii sünain tü nanüikinjatkat soʼu tü kaʼi naʼwaajakalü oʼu Maleiwa. Ekirajaashii naya namaa süchiki tü kasa eekat süpüla nasakinnüin anain suluʼu nakoleejiase. Nekirajüin naya sünain tü sukuwaʼipainjatkat nanüiki nasoutapa otta süpüla anamiainjanain naya naküjapa süchiki tü nanoujakalü anain (paashajeʼera tü pütchikat « Tü eekat süpüla jikirajaain namaa jüchonnii»).

16, 17. ¿Jamüsü jalouika namüin na jimaʼaliikana jee na majayünnüükana tü nekirajakalü anain naya na kachooinkana naya?

¹⁶ Jikirajaale namaa jüchonnii, jükaalinjeena naya süpüla pansaainjatüin namüin tü nanoujakalü anain jee süpüla naküjain shia namüin na waneinnua. Suluʼu jw.org eesü piamasü sección tü kanüliakat «Natüjaweeka aaʼu jimaʼalii otta majayünnüü» otta «Ponlo por escrito» (alijunaikiruʼusü). Akumajünüsü tia süpüla pansaainjatüin namüin tü nanoujakalü anain otta süpüla natüjain süpüleerua nanüiki nasakinnapa. Jikirajaale tia namaa jüchonnii, atüjeena jia jüpüshuaʼa süpüleerua jünüiki jüsakinnapa sünain tü junoujakalü anain otta anamieena jia.

 ¹⁷ Jülüjataa waaʼin tü nümakat wanee jimaʼai kanüliakai Matthew süchiki jamüin jalouika nümüin tü nekirajakalü anain nia na kachooinkana nia. Ekirajaʼawaishii naya sünain tü eekat süpüla nüsakinnüin anain Matthew natuma na nücompañetsekana. Müshi nia: «Jülüjasü waaʼin tü eekat süpüla tasakinnüin anain otta ekirajaashii waya sünain tü tanüikinjatkat wanaapünaa sümaa tü wekirajaakalü anain. Pansaale tamüin tü tanoujakalü anain, yalayalasü taaʼin taashajaapa namaa na waneinnua jee kamaneeshi taya taküjapa süchiki tü tanoujakalü anain».

18. ¿Jamüsü anaka waaʼinrüle tü sümakat Colosas 4:6?

¹⁸ Jaʼitairü pansaain maʼin tü wamakat, eejeena na ayoutakana shia. Eepejeʼe süpüla naapaain sümaa tü wamakat waküjale shia süka anakalü akuwaʼipa sümaa kamaneein waya (paashajeʼera Colosas 4:6, TNM). Tü waaʼinrakat wanaa sümaa waküjain süchiki tü wanoujakalü anain, müsü aka saaʼin wojutule wanee pelota nümüin wanee wayuu. Eesü süpüla wojutuin tü pelotakat süka süpüshuaʼa watchin jee jiattale shia watuma. Wojutule tü pelotakat sümaa jiattain shia nümüin chia wayuukai, mapüleejeerü nümüin nujuupatüin shia. Müsia neʼe tü waaʼinrakat waküjapa süchiki tü wanoujakalü anain. Waaʼinrüle tia süka anakalü akuwaʼipa sümaa kamaneein waya, mapüleejeerü namüin na wayuukana naapaain sümaa tü wamakat jee ayateena naya yootuin wamaa. Nütkaweere neʼe wanee wayuu wamaa jee nimeeʼerainparale waya, nnojotsü choʼujaain ayatüin yootuin waya nümaa (Prov. 26:4). Palitchon na wayuu makana akuwaʼipa noulia na aapajeekana wanüiki.

19. ¿Jamüshii anamieeka waya wasoutapa saaʼu tü wanoujakalü anain?

¹⁹ Anashii waʼyataale süchiirua anamiain waya. Puchunta nümüin Jehová süpüla püchecherüin paaʼin suulia jashiee otta süpüla kamaneein pia nümüin chi asakirakai pia süchiirua tü punoujakalü anain shiiʼiree nütkaweein pümaa. Anamiale pia sümüin wayuu pusoutapa shiʼipajee, nnojoleechi pia atkaain sümaa. Anale wanüiki neʼipajee na wayuukana jee kojutule naya wamüin, eesü süpüla nanouteʼerüin tü jülüjakat naaʼin wachiki jee süchiki tü sümakat tü Bibliakat. Yapainjana waya waneepia süpüla wasoutuinjanain saaʼu tü wanoujakalü anain. Anamiainjana waya waaʼinrapa tia jee kojutuinjatü wayuu watuma (1 Ped. 3:15). Kasataalejeseʼe anamiain jia waneepia.