1. ¿Jamüsü naaʼin Pedro sutuma tü kasa pülasü niʼrakat?

 NÜSIRAIRÜIN Pedro aikat naaʼu sünain olojoo jime sümaa masirüin nia. Anuukalaka nünüiki Jesús nümüin: «Anashi puʼunirüle tü anuwakat chaa eere oʼutuin tü wüinkat, jujuteetka tü kusukat süpüla kasirüinjanain jia» (Luc. 5:4, TNM). Mayaainjeʼe wainmajüin naaʼin Pedro sünain aaʼinraa tia, ayatüshia oonooin nia sümaa nünüiki Jesús. Watta maʼin saalii nasirü, achatajaweematüsü tü nakusuinkat sutuma saawain. Ponusü maʼin naaʼin Pedro namaa na yalajanakana nümaa tü kasa pülasü neʼrakat. Müshijeseʼe nümüin Pedro mayaa: «Señotkalee, wattaluʼu pia toulia, wayuu kaainjarai taya» (Luc. 5:6-9, TNM). Sutuma lotuin nukuwaʼipa Jesús, eeshijaʼa japüire Pedro sutuma yalain nia nümaa.

2. ¿Jamüsü anaka wekirajaale süchiki nukuwaʼipa Pedro?

² Shiimain tü nümakat Pedro, wayuu kaainjarai nia. Saashin tü Bibliakat, eesü nüküjawaire jee naaʼinrawaire wanee kasa mojuka atuma naaʼin mapa. ¿Müsüche pukuwaʼipa maʼaka naaʼin Pedro? ¿Aʼyataashiche pia süchiirua punouteʼerüin wanee kasa sünain pukuwaʼipa? ¿Aʼyataashiche pia süchiirua püchecherüin paaʼin suulia wanee kasa mojusü jooka apüla pia? Mülejeʼeya pukuwaʼipa, sütütüleʼereerü paaʼin pikirajaale süchiki nukuwaʼipa Pedro. Nüshajirüin Jehová suluʼu tü Bibliakat tü kasa mojusü jookalü apüla Pedro süpüla watüjain sünainjee (2 Tim. 3:16, 17). Wekirajaale süchiki nukuwaʼipa Pedro, chi jookai apüla waneirua kasa mojusü jee chi makai aaʼin maʼaka waaʼin wayakana, wayaawateerü aaʼu nnojoluin nuchuntuin Jehová lotuinjatüin maʼin wakuwaʼipa. Tü keeʼireekat naaʼin shia ayatüinjanain waʼyataain nümüin.

3. ¿Jamüshii nnojoliinjanaka wamalajaain aaʼin jaʼitairü waaʼinrüin wanee kasa mojusü?

³ ¿Jamüshii nnojoliinjanaka wamalajaain aaʼin jaʼitairü waaʼinrüin wanee kasa mojusü? Anuu wanee sukuwaʼipa süpüla wayaawatüin saaʼu tia: eeshijaʼa kakaliale wanee wayuu süpüla nütüjainjachin süpüleerua  aʼyalajiraa wanee maasi. Sümaʼainruʼu nikirajaain sünain tia, eesüjaʼa kojuyatuale pounuwain shiʼira nutuma. Ayatüle nuuʼulaküin tia waneepia, atüjeechi nia mapa. Eejeerü kaʼi pounuweetka oʼu nutuma. Nnojoleechipejeʼe nia ooʼulaain suulia aʼyalajiraa shia. Müsia neʼe wakuwaʼipa, eesüjaʼa süpüla wooʼulaain wanee kasa mojusü joopuʼuka apüla waya, eepejeʼe süpüla waaʼinrüin shia süchikuaʼa. Ayataʼaya waʼyataain süchiirua wanouteʼerüin wakuwaʼipa. Eesü waküjawaire jee waaʼinrawaire kasa mojuka atuma waaʼin. Nnojoliire wamalajaain, nükaalinjeena waya Jehová süpüla wanouteʼerüin shiʼipaʼaya wakuwaʼipa (1 Ped. 5:10, TNM). Wekirajaa süchiki tü naaʼinrakat Pedro süpüla ayatüin niʼyataain nümüin Maleiwa mayaainjeʼe eein waneirua kasa mojuka nutuma. Sutuma watüjaain saaʼu nümüliajünüin Pedro nutuma Jesús, eesü süpüla sükatchinrüin waaʼin sünain aʼyatawaa nümüin Jehová.

4. (1) ¿Kasa jülüjaka naaʼin Pedro süchiki tü nukuwaʼipakat? (Lucas 5:5-10). (2) ¿Kasa naaʼinraka Jesús süpüla nükatsüinrüin naaʼin Pedro?

⁴ «Kaainjarai taya», müshi Pedro. Nnojotsü süküjain tü Bibliakat jamüin nüküjaka tia Pedro (paashajeʼera Lucas 5:5-10, TNM). Eepejeʼe süpüla naaʼinrüin kasa eekai mojuin maʼin. Japüishi Pedro sutuma nnojoluin lotuin maʼin nukuwaʼipa, niyaawata aaʼu tia Jesús. Nütüjaapejeʼe saaʼu Jesús eein süpüla waneepiain Pedro nümaa Maleiwa, müshijeseʼe nümüin nümüin mayaa: «Nnojo mmoluin pia». Akatsüinraasü naaʼin Pedro sutuma naaʼinmaain Jesús tü kasa anakat nutuma. Nuuʼulaaka mapa Pedro otta Andrés chi nuwalakai tü naʼyataainkat süpüleerua naʼyataain nümüin Maleiwa otta nümüin chi Mesíaskai. Sutuma naneeküin tia, watta saalii tü kasa anasü neʼrakat nutuma Jehová (Mar. 1:16-18).

5. ¿Kasa anasü niʼraka Pedro sutuma nnojoluin nümalajaain otta sutuma nümaataralin nia Jesús?

⁵ Watta saalii tü kasa anasü niʼrakat Pedro sutuma nümaataralin nia Cristo. Niʼrüin naawaleʼerüin Jesús na ayuuikana, niʼrüin nujuʼitirüin na yolujaakana süleʼeruʼujee wayuu otta niʼrüin nüsoʼireʼerüin saaʼin wayuu eekai outuin (Mat. 8:14-17; Mar. 5:37, 41, 42). b Niʼrüin shiiʼiranajaain nukuwaʼipa Jesús nuʼupala, shiyaawase tia saapünüinjatüin shikii aluwatawaa nümüin Jesús nutuma Maleiwa. Makataleesia tia suluʼu nikii Pedro (Mar. 9:1-8; 2 Ped. 1:16-18). Nnojotsüjeʼe niʼrüin Pedro tia, nnojoireje nia nümaataralin Jesús. Talatakajasaʼa naaʼin Pedro sutuma niʼrüin kasa anasü sünainjee nnojoluin nümalajaain.

6. ¿Jamüsü watüjaaka saaʼu nnojoluin nüsünneʼeramaatüin Pedro nuulia tü jookalü apüla nia?

⁶ Mayaainjeʼe niʼrüin jee naapüin Pedro süchiki tü kasa naaʼinrakat Jesús, ayatüinjatü nüchecherüin naaʼin suulia tü kasa mojusü jookalü apüla nia. Wanaa sümaa nüküjain Jesús müliainjachin  nia jee outuinjachin nia süpüla shikeraajüinjatüin tü pütchi aküjünatüjütkalia, achiaanüshi nia nutuma Pedro (Mar. 8:31-33). Kojuyatua nüʼülüjiraain Pedro namaa na wane aluwataaushikana süchiirua jaralinjachin miyoʼuin naʼakajee (Mar. 9:33, 34). Wanee ai süpülapünaa nuʼutunuin aaʼin Jesús, awataashi Pedro nooʼomüin wanee wayuu sümaa nüchotoʼoleein nücheʼe (Juan 18:10). Soʼuleʼeya aikat tia, eimmolojooshi Pedro otta apünüintua nuunjulajüin süchiki niʼraajüin Jesús (Mar. 14:66-72). Soʼu tia, aʼyalajashaatashi nia sutuma mojuin maʼin naaʼin (Mat. 26:75).

7. Süchikijee süsoʼiraain naaʼin Jesús, ¿kasa naaʼinrajatka Pedro süpüla sütüjaanüin aaʼu shiimain alin Jesús nüpüla?

⁷ Nnojoishi ayüülajünüin Pedro nutuma Jesús. Süchikijee nüsoʼiraain aaʼin Jesús, nüküjain nümüin Pedro naaʼinrajatüin waneirua kasa ayaawatüneetka akajee alin Jesús nüpüla. «Pikajeʼera tü taʼanneetsecheinkat», müshi Jesús nümüin (Juan 21:15-17). Yapakalaka Pedro süpüla nikeraajüin tü aʼyatawaa aapünakat nümüin. Müshijeseʼe chajachin nia Jerusalén soʼu sükalia tü miʼiraa kanüliakat Pentecostés otta eejachi nia naʼaka na palajanakana antüin aaʼu tü nüpülainkat Maleiwa.

8. ¿Kasa mojukuwaʼipatka nutuma Pedro chaa Antioquía?

⁸ Mayaainjeʼe nüneekünüin Pedro süpüla chainjachin nia iipünaa, ayatüinjatü nüchecherüin naaʼin suulia tü kasa mojusü jookalü apüla nia. Soʼu tü juyakat 36 soʼu wakalia, nuluwataain Jehová Pedro nünainmüin Cornelio, wanee wayuu nnojoikai judíoin. Soʼu tia, antüsü naaʼu Cornelio tü nüpülainkat Maleiwa. Niyaawatakalaka saaʼu Pedro nnojoluin koʼuin nukuwaʼipa Maleiwa sümüin wayuu otta eein süpüla naʼyataain nümüin Maleiwa na wayuu nnojoliikana judíoin (Aluw. 10:34, 44, 45, TNM). Soʼujeʼereeya tia, anasü nümüin Pedro nikaain namaa na nnojoliikana judíoin (Gal. 2:12, TNM). Eepejeʼe waneinnua anoujashii judío ayatakana mojuin amüin kottuin naya sünain ekawaa namaa na nnojoliikana judíoin. Nantapa noʼutku nayakana chaa Antioquíamüin, akatalaashi Pedro suulia ekawaa namaa na nnojoliikana judíoin. Eesüjaʼa mmorüle naaʼin suulia mojuin tia noʼuluʼu na anoujashii judíokana. Nnojotsü anain nümüin Pablo tü naaʼinrakat Pedro jee nüchiaain nia noʼupala na yalajanakana nümaa (Gal. 2:13, 14). Mayaainjeʼe nnojoluin anain tü naaʼinrakat Pedro, nnojoishi ayüülajaain nia. Wekirajaa joo süchiki tü naaʼinrakat.

9. ¿Jamüsü watüjaaka saaʼu waneepiain Pedro nümaa Jesús sünainjee tü sümakat Juan 6:68, 69?

⁹ Waneepiashi Pedro nümaa Jesús. Nnojotsü nuuʼulaain sütaʼülüin nukuwaʼipa wanee kasa suulia nuushikajaain süchiirua nukuwaʼipa Jesús. Eesü wanee pütchi nüküjaka Jesús mojushiika namüin na nikirajüinkana, nnojoipejeʼe nüpütüin nia Pedro nümüiwaʼa (paashajeʼera Juan 6:68, 69, TNM). Wainma na apütakana Jesús nümüiwaʼa, nnojotsü naʼatapajüin nüküjain jamaluʼuluin nünüiki. Nüküjaka Pedro niain Jesús «ekirajaka waya sünain pütchi katüinjatkalü atuma woʼu waneepia».

10. ¿Jamüsü watüjaaka saaʼu nnojoluin niyüülajünüin Pedro nutuma Jesús? (Piirakaa sümüin tü ayaakuaakat).

¹⁰ Waneepiashi Jesús nümaa Pedro. Wanee ai süpülapünaa nuʼutunüin aaʼin Jesús, nütüjaa aaʼu nüpütüneechin nümüiwaʼa nutuma Pedro otta natuma na wane aluwataaushikana. Mayaainjeʼe sülatüin tia, nütüjaa aaʼu Jesús sükatchinraajeerüin nunoula Pedro süchikuaʼa jee waneepieechin nia nümaa Jehová (Luc. 22:31, 32). «Mayaapejeʼe naaʼinreein maʼin wanee wayuu wanee kasa, eesüjaʼa matsüinre niʼiruku süpüla naaʼinrajatüin shia», müshi Jesús (Mar. 14:38, TNM). Müshijeseʼe nnojoluin niyüülajüin nia Jesús wanaa sümaa nuunjulajüin süchiki niʼraajüin nia. Süchikijee süsoʼiraain naaʼin Jesús, eeʼiyataashi nia nümüin Pedro, eeshijaʼa nümüiwaʼajachire Pedro soʼu tia (Mar. 16:7; Luc. 24:34; 1 Cor. 15:5). Akatsüinraakajasaʼa maʼin naaʼin Pedro sutuma tia.

11. Sünainjee tü naaʼinrakat Jesús, ¿jamüsü niyaawataka saaʼu Pedro naaʼinmajeechin nia Jehová?

 ¹¹ Nüküjain Jesús nümüin Pedro naaʼinmajeechin nia Jehová waneepia. Süsoʼiraapa naaʼin Jesús naaʼinrüin wanee kasa pülasü nüpüleerua Pedro otta napüleerua na wane aluwataaushikana, watta maʼin saalii jime nasitkat soʼu tia (Juan 21:4-6). Niyaawatakalaka aaʼu Pedro naapeerüin Jehová süpüshuaʼa tü kasa choʼujaakat nümüin. Eesüjaʼa sotule naaʼin Pedro tü nüküjakat Jesús süchiki naapeerüin Jehová süpüshuaʼa tü kasa choʼujaakat nümüin chi wayuu aaʼinmaakai niʼyataain nümüin (Mat. 6:33, TNM). Müsüjeseʼe naaʼinmaain Pedro tü niʼyataainkat nümüin Maleiwa suulialeʼeya tü niʼyataainkat sünain olojoo jime. Meimmoluinsai Pedro sünain aküjaa tü pütchi anakat maʼin soʼu tü Pentecostés eejatkat soʼu tü juyakat 33. Watta saalii wayuu aapaakana sümaa tia pütchikat (Aluw. 2:14, 37-41, TNM). Mapa maʼin, watta naalii na wayuu chejeʼewaliikana Samaria otta na wayuu nnojoliikana judíoin nükaalinjaka Pedro süpüla noushikajaain süchiirua nukuwaʼipa Cristo (Aluw. 8:14-17, TNM; 10:44-48, TNM). Anashaatasü maʼin tü naaʼinrakat Jehová nükajee Pedro süpüla nüntirüinjatüin wayuu maʼleekalia nünainmüin.

12. ¿Jamüsü anaka nukuwaʼipa Pedro wapüleerua kakaliairüle wachecherüin waaʼin suulia wanee kasa mojusü jooka apüla waya?

¹² Eeshiʼiya süpüla nükaalinjain waya Jehová suulia wamalajaain. Eesü kapüleere wamüin waaʼinrüin tia, shialeekajaʼa kakaliairüle wachecherüin waaʼin suulia wanee kasa mojusü jooka apüla waya. Eesüjaʼa sülanaʼaleere tü wachecherüinjatkalü oulia waaʼin suulia tü nüchechetkalü oulia naaʼin Pedro. Watüjaapejeʼe saaʼu nükatsüinreerüin waaʼin Jehová suulia wamalajaain (Sal. 94:17-19). Jülüjataa waaʼin nukuwaʼipa wanee wawala jaleetpuʼukai nnojoluiwaʼaya nikerotüin sünain anoujaa, kakalia nia suluʼu müin nukuwaʼipa. Mayaainjeʼe kakaliain süpüla nuuʼulaain tia, eesü kaʼi suchuntaawaika oʼu naaʼin tia. ¿Kasa naaʼinraka suulia nümalajaain? Anuu nünüiki: «Nia Jehová akatchinraka taaʼin. Sükajee tü nüpülainkat nükaalinjain taya süpüla anainjatüin takuwaʼipa noʼuluʼu. Nükaalinjain taya süpüla ayatüinjachin taʼyataain nümüin otta nükatsüinrüin taaʼin mayaainjeʼe eein tü kasa mojukat tatuma».

13. ¿Kasa waaʼinrajatka süpüla washatüin nukuwaʼipa Pedro? (Aluwataaushikana 4:13, 29, 31; piirakaa sümüin tü ayaakuaakat).

¹³ Wekirajaaitpa anain kojuyatuain mmoluin Pedro seema wayuu. Meimmoluinpejeʼe nia mapa sutuma nuchuntuin kaalinwaa nümüin Jehová (paashajeʼera Aluwataaushikana 4:13, 29, 31, TNM). Müshiʼiya neʼe wayakana, eeshii süpüla nnojoluin mmoluin waya seema wayuu. Jülüjataa  waaʼin tü alatakat nümüin Horst, wanee jimaʼai kepiakai Alemania soʼunnaa tü Segunda Guerra Mundial münakat. Soʼu tia, «Heil Hitler», maʼwaishii na wayuukana süpüla nasaküinjanain. «Nia Hitler oʼtteʼerüinjanaka waya», maluʼulu tia pütchikat. Jamüshijaʼa Horst apüleeruaanüsü naaʼin chaa koleejialuʼu süpüla nuchuntajatüin tia pütchikat, kojuyatua nuchuntuin tia. Suulialeʼeya kalioʼuin nia natuma na wayuu kachonkana nia, oʼuraajüshii naya nümaa süpüla yalayalainjatüin naaʼin nutuma Jehová. Sutuma nakaalinjain nia na kachonkana nia jee niʼitaain naaʼin nünain Jehová, nuuntuin nüchecherüin naaʼin suulia tü ooʼulakünakalü aka naaʼin. «Nnojoishi taya nüpütüin Jehová tamüiwaʼa», müshi nia mapa. c

14. ¿Kasa naaʼinrajatka na laülaashiikana süpüla nakatsüinrüin naaʼin na amalajaweekana anoula?

¹⁴ Nnojoleena niyüülajüin waya Jehová otta Jesús. Wanaa sümaa nuunjulajüin Pedro süchiki niʼraajüin Cristo, nüneeküinjatü wanee kasa. ¿Amalajaweeichi nia suulia nuushikajaain süchiirua nukuwaʼipa Cristo? ¿Shiataapa ayateerüin naaʼinrüin tia? Nuchuntuin maʼin Jesús nümüin Jehová suulia sümalajaain nunoula Pedro. Nüküjain Jesús mapa nümüin Pedro nuchuntuin nüpüleerua otta nütüjaa aaʼu nükatsüinreerüin Pedro naaʼin na anoujashiikana mapa (Luc. 22:31, 32). Akatsüinraakajasaʼa naaʼin Pedro sotopa naaʼin tü nümakat Jesús nümüin. Waneeküinjatpa wanee kasa choʼujaaka maʼin, nükaalinjeenaʼaya waya Jehová nakajee na laülaashiikana. Naaʼinrüin tia süpüla nükatsüinrüin waaʼin otta süpüla ayatüinjanain waya waneepiain nümaa (Éf. 4:8, 11, TNM). Jamüshijaʼa wanee wawala kanüliakai Paul, kakaliaichi nia suluʼu laülaashin nia jee nüchajaain maʼin sukuwaʼipa süpüla nümüliajüin naaʼin na wawalayuukana. Niʼrüle seemiajaweein nanoula, nüküjain namüin anain sotule naaʼin tü kasa naaʼinrakat Jehová napüleerua süpüla nürütkeʼerüin naya nünainmüin. Nüküjainña namüin nnojoleenain nüpütüin Jehová namüiwaʼa, jama alin naya  nüpüla jee waneepiain nia namaa. Niʼrüin Paul wainmainnain na wawalayuu akatchinraakana anoula sükajee nükaalinjain naya Jehová.

15. ¿Jamüsü watüjaaka saaʼu shiimain tü sümakat Mateo 6:33 sünainjee nukuwaʼipa Pedro otta Horst?

¹⁵ Watüjaaitpa aaʼu naapüin Jehová tü kasa choʼujaakat nümüin Pedro otta namüin na wane aluwataaushikana. Naaʼinreeriaʼaya tia wapüleerua waaʼinmaale tü waʼyataainkat nümüin (Mat. 6:33, TNM). Süchikijee tü Segunda Guerra Mundial münakat, pürekutsooleeshi Horst chi wachuntayüikai anülia paalapa. Jülüjapejeʼe naaʼin iseerüin nüchiki tia sutuma maʼletsein nia. ¿Kasakaʼa naaʼinrüin? Aküjashi nia pütchi soʼu tü semaana nüntakalü oʼu chi wawala alapalaaikai naaʼu na wawalayuukana süpüla nütüjaain saaʼu naapeerüle Jehová tü kasa choʼujaakat nümüin. Ponoshootosü maʼin naaʼin naapapa nümüin chi wawala alapalaaikai naaʼu na wawalayuukana wanee sobre kaluʼuka nneerü. Nnojotsü nütüjaain saaʼu jaralüin asülajüin nümüin tia nneetkat. Eeshi süpüla pürekutsoolin nia soʼu kojuya kashi sünainjee tü nneerü asülajünakat nümüin. Niyaawatakalaka saaʼu Horst naaʼinmajeechin nia Jehová waneepia. Müsüjeseʼe naaʼinmaain tü niʼyataainkat nümüin Maleiwa outaleepa nia (Mal. 3:10).

16. ¿Jamüsü anaka maʼin wekirajaale süchiki nukuwaʼipa Pedro otta süchiki tü karaloʼuta nüshajakat?

¹⁶ Talatakajasaʼa naaʼin Pedro sutuma waneepiain Jesús nümaa mayaainjeʼe nüpütüin nia nümüiwaʼa soʼu wanee kaʼi. Ekirajünüshi nia nutuma Cristo süpüla anain maʼin nunoula otta süpüla anain maʼin nukuwaʼipa napüleerua na anoujashiikana. Wainma kasa watüjaka sünainjee tü nikirajakalü anain nia Jesús. Nüshajüin Pedro süchiki tia suluʼu tü piamasü karaloʼuta nüshajakat nutuma Maleiwa napüla na anoujashii namaiwajanakana. Sünain tü wane ekirajaayakat, wekirajaajeerü anain waneirua pütchi anakat maʼin suluʼujee tia piamasükat karaloʼuta otta tü waaʼinrajatkat süpüla jaloulin shia wamüin.