Na wayuu kachooinkana nayainjana na ekirajakana nachonnii nüchiki Jehová (Éf. 6:4). Watta saalii tü karaloʼuta jee video eekat natuma na wawalayuu oʼuniraka sukuwaʼipa waʼyataain jalouijeetka namüin na wayuukana süpüla nekirajüin nachonnii. ¿Kasa paaʼinrajatka süpüla pikirajüin püchonnii sükajee tia?

• Püchajaa suluʼu jw.org. Puusüteerü sünain watta saalii kasa akumajuushika napüla na tepichikana maʼaka saaʼin video jee karaloʼutairua eeka süpüla nashajüin anain jee nepintajüin. a Süpüla puusütüin sünain tia, pünaʼla eere sümüin «Shikirajaka anain tü Bibliakat», piʼitaajeetka clic eere sümüin «Tepichi» jee shiale eere sümüin «Jimaʼalii jee majayünnüü».

• Püneeka tü jalouijeetkat namüin püchonnii. Eere sümüin «Tepichi», puusüteerü anain video, jayeechi jee waneirua pütchi jalouijeetka pümüin süpüla pikirajüin püchonnii. Puusüteerü anain tia eere sümüin «Shikirajaka anain tü Bibliakat», piʼitaajeetka clic eere sümüin «Tepichi» otta eere sümüin «Aleewa pia nümaa Jehová».

• Pikirajaa namaa püchonnii. Nnojo pünajirüin naya video jee shiale paapüin karaloʼuta namüin shiiʼiree jimatüinjanain naya pujuunaluʼu. Anashii pikirajüle naya sünain tia otta pükaalinja naya süpüla aleewain naya nümaa Jehová.