1. Sülüʼütpa nükalia Pedro süpüla outaa, ¿kasa nüneekaka apüla nia Jehová?

 KAKALIASHI chi aluwataaushikai Pedro sünain aʼyatawaa nümüin Jehová. Nümaashi nia Jesús sünain aküjaa tü pütchi anakat maʼin, oʼttushi nia sünain aküjaa pütchi namüin na nnojoliikana judíoin otta noʼutku nia na laülaashii jülüjakana aaʼin na anoujashii namaiwajanakana. Nütüjaapa saaʼu Pedro sülüʼülüin nükalia süpüla outaa, eesü wanee kasa nüneekaka apüla nia Jehová. Soʼutpünaa juyakat 62-64 soʼu wakalia, nüshajirüin nia Jehová piamasü karaloʼuta suluʼuka tü Bibliakat, Palajatkat otta Chiiruaajatkat Pedro münüsü tia karaloʼutakat. Keeʼireesü maʼin naaʼin Pedro jaloulinjatüin tia karaloʼutakat namüin na anoujashiikana nüchikupünaa (2 Ped. 1:12-15).

2. ¿Jamüsü jalouika namüin na anoujashiikana tü piamasü karaloʼuta nüshajakat Pedro?

² Nüshajüin Pedro tia piamasükat karaloʼuta wanaapünaa sümaa neʼrüin müliaa na anoujashiikana (1 Ped. 1:6). Eejana waneinnua wayuu naʼaka naya anoujashiikana ekirajakana alawaa otta maapülinsalii naya sünain aaʼinraa kasa mojusü (2 Ped. 2:1, 2, 14). Na anoujashii chakana Jerusalén alüʼütsü süpüla neʼrüin sajaʼttüin tü pueulokot Jerusalén sümaʼaleeya tü aʼwaajüleekat natuma na romanokana (1 Ped. 4:7). Jalouisü maʼin namüin naya anoujashiikana tü nüshajakat Pedro süpüla nachecherüin naaʼin soʼunnaa tü müliaa neʼrakat otta süpüla tü müliaa neʼreetkat mapeena. b

3. ¿Jamüsü anaka wekirajaale süchiki tü karaloʼuta nüshajakat Pedro?

³ Mayaainjeʼe nüshajüin Pedro tia piamasükat karaloʼuta namüin na anoujashii namaiwajanakana, nücheküinña Jehová suluʼuinjatüin shia tü Nünüikikat. Müsüjeseʼe jaloulin wamüin tü  nüshajakat Pedro (Roma 15:4). Kepiashii waya naʼaka na maapülinkana sünain aaʼinraa kasa mojusü otta weʼrüinña müliaa kapüleeka atuma waʼyataain nümüin Jehová. Otta müsia pejesü maʼin tü kaʼi weʼreetkalü oʼu tü müliaa miyoʼukat. Keemaleejeeria maʼin tia suulia tü müliaa eekat soʼu sajaʼttinnüin Jerusalén sümaʼaleeya tü aʼwaajüleekat. Suluʼu tü karaloʼuta nüshajakat Pedro, eesü pütchi eejeetka atuma waaʼin süpüla tü nükaliakat Jehová, suulia weimmolojooin seema wayuu otta süpüla aijiraain maʼin waya namaa na wawalayuukana. Eesiaʼaya pütchi suluʼu jalouijeetka namüin na laülaashiikana süpüla nakatsüinrüin nanoula na wawalayuukana.

4. Sünainjee tü sümakat 2 Pedro 3:3, 4, ¿kasa eeka süpüla wainmajüin atuma waaʼin?

⁴ Naʼakashii waya wayuu nnojoliikana anoujain sünain tü sümakat tü Bibliakat süchiki tü alatüinjatkat mapeena. Eeshii wayuu nemeeʼerainpalaka waya sutuma kakaliainnain waya sünain aküjaa süchiki sajaʼttüinjatüin tü kasa mojusükat, eeshii na jülüjakana aaʼin nnojoleerüin antüin tia kaʼikat (paashajeʼera 2 Pedro 3:3, 4, TNM). Nüküjale tia wamüin wanee wayuu waküjakai amüin pütchi, niale wanee aʼyataajiraakai wamaa jee niale wanee wapüshi, eesüjaʼa süpüla wainmajüin waaʼin sünain tü wanoujakat. Wekirajaa süchiki tü nüshajakat Pedro süpüla watüjaain saaʼu tü waaʼinrajatkat sülatüle tia wamüin.

5. ¿Kasa jülüjainjatka waaʼin süpüla nnojoluin süshapalaain waaʼin sünain aʼatapajaa tü nükaliakat Jehová? (2 Pedro 3:8, 9).

⁵ Eesüjaʼa jülüjale naaʼin waneinnua wayuu kamaʼain Jehová süpüla najaʼttirüin tü kasa mojusükat. Wayaawatapejeʼe sünainjee tü nümakat Pedro waneejatüin shiyaawajia kaʼi nutuma Jehová suulia shiyaawajia kaʼi sutuma wayuu (paashajeʼera 2 Pedro 3:8, 9, TNM). Miit juya müsü aka saaʼin wanee kaʼi nümüin Jehová, nnojoishi kashapajaaralin nia otta niyouta achikit amüloulin wanee wayuu. Najaʼttireenapejeʼe na mojulaashiikana süntapa tü nükaliakat. Anataʼaleesüjaʼa tü wakuwaʼipakat maaʼulu sutuma waküjain maʼin pütchi sümüin wayuu maʼleekalia.

6. ¿Kasa waaʼinrajatka süpüla jülüjain maʼin waaʼin tü nükaliakat Jehová? (2 Pedro 3:11, 12).

⁶ Nütütüleʼerüin waaʼin Pedro süpüla jülüjain maʼin waaʼin tü nükaliakat Jehová (paashajeʼera 2 Pedro 3:11, 12, TNM). ¿Kasa waaʼinrajatka süpüla wountuin tia? Anasü jülüjale waaʼin tü kasa anasü weʼreetkat paʼaraiisüpa tü Mmakat. Maa chakai paaʼin suluʼu tü Paʼaraiisükat sümaa püsanalaain aaʼin süka anakalü akuwaʼipa, maa pikakai saaʼin eküülü eekai anain, maa pujuupatakai naaʼin na wayuu aikana püpüla asoʼiraakana aaʼin süchikijee outaa, maa pikirajakai naaʼin na wayuu eetüjüliikana sümaiwa süchiki tü pütchi ekeraajüitkat suluʼujee tü Bibliakat. Jülüjale paaʼin tia, eejeerü paaʼin süpüla tü nükaliakat Jehová otta nnojoleerü jülüjain paaʼin wattayülüin shia. Sutuma watüjaaitpain saaʼu tia, eeja waaʼin suulia wakayaleʼennüin nuulia Maleiwa natuma na ekirajakana sünain alawaa (2 Ped. 3:17).

7. ¿Kasa eeka süpüla wooʼulaain mmorüle waya seema wayuu?

⁷ Sutuma jülüjain maʼin waaʼin tü nükaliakat Jehová, keeʼireejeerü maʼin waaʼin waküjain tü pütchikat namüin na waneinnua. Eejeetpejeʼe kaʼi nnojoleenaka waküjain oʼu pütchi sutuma mmoluin waya seema wayuu. Alatüsü tia nümüin Pedro. Wanee ai süpülapünaa nuʼutunuin aaʼin Jesús, kojuyatua nuunjulajüin süchiki Pedro nümaajachin nia Jesús otta süchiki niʼraajüin nia (Mat. 26:69-75). Nnojoipejeʼe mmoluin nia seema wayuu mapa, müsüjeseʼe nüküjain nnojoliinjanain waya mmoluin seema tü kasa mmotkalü eema wayuu jee nnojoluinjatüin shapaain waaʼin (1 Ped. 3:14). Sükajee tü nümakat Pedro, wayaawata aaʼu eein süpüla nnojoluin mmoluin waya seema wayuu.

8. ¿Kasa waaʼinrajatka süpüla nnojoluin mmoluin waya seema wayuu? (1 Pedro 3:15).

 ⁸ ¿Kasa waaʼinrajatka süpüla nnojoluin mmoluin waya seema wayuu? Müshi Pedro: «Jütüjaainjatü aaʼu suluʼu jaaʼin niain Cristo chi Señotkai» (paashajeʼera 1 Pedro 3:15, TNM). Eesü süpüla sotuin waaʼin saapünüin pülaa nümüin Cristo Jesús, chi Waseñotsekai otta chi Aluwataainjachikai waaʼu. Püküjeere pütchi nümüin wanee wayuu jee nnojorüle paaʼinrüin tia sutuma mmoluin pia, anashi sotule paaʼin Jesús, chi Aluwataainjachikai paaʼu. Maa piʼrakai naaʼin chaa iipünaa sümaa piʼrüin watta naalii aapiee nümaa. Soto paaʼin laülaashin nia atumawaa chaa sirumatuʼu jee yaa saaʼu tü mmakat otta eejeechin nia pümaa waneepia süntaleepa sükalia süpüla sajaʼttajatüin tü kasa alatakat sainküin mma (Mat. 28:18-20). Nütütüleʼerüin waaʼin Pedro süpüla yapainjanain waya waneepia süpüla wasoutuin saaʼu wanoula. ¿Eeshiche süpüla püküjain pütchi piʼyataaleruʼu, pukoleejiaseruʼu jee eepünaale pia? Jülüja paaʼin jalain anain püpüla süpüla püküjain pütchi otta yapa putuma tü pünüikinjatkat. Puchunta nümüin Jehová yalayalaa aaʼin jee piʼitaa paaʼin sünain nükaalinjeechin pia suulia mmoluin pia seema wayuu (Aluw. 4:29).

9. ¿Kasa naaʼinraka Pedro soʼu wanee kaʼi sutuma mmoluin nia seema wayuu? (Piirakaa sümüin tü ayaakuaakat).

⁹ Niyaawata aaʼu Pedro tü naaʼinrajatkat shiimainre  alin nüpüla wayuu. Eejachi nia wanaa sümaa nümüin Jesús mayaa: «Taluwataain jia sünain wanee kasa jeketü, aijiraainjana jia waneʼewai jukua maʼaka alin jia tapüla» (Juan 13:34, TNM). Mayaainjeʼe nütüjaain saaʼu tia Pedro, eesü wanee kaʼi niyouta achikit nikaain namaa na anoujashii nnojoliikana judíoin sutuma mmoluin nia, piama oʼupünaachi Pedro sutuma naaʼinrüin tia. Müshijeseʼe nüchiaain nia Pablo (Gal. 2:11-14). Naapaa amaalü Pedro tü achiaanakalü oulia nia, anakalaka nukuwaʼipa suluʼujee tia. Nüküjain maʼin Pedro suluʼu tü karaloʼuta nüshajakat nnojoliinjanain aijiraain neʼe waya, jaʼyainjatiaʼaya tia waaʼu.

10. ¿Kasa waaʼinrajatka süpüla wountuin aijiraain waya namaa na wawalayuukana «maʼaka alin wanee wayuu nüpüla nuwala sümaa nnojoluin piamain nuʼupünaa»? (1 Pedro 1:22).

¹⁰ Nüküjain Pedro aijiraainjanain waya namaa na wawalayuukana «maʼaka alin wanee wayuu nüpüla nuwala sümaa nnojoluin piamain nuʼupünaa» (paashajeʼera 1 Pedro 1:22, TNM). Wountuin tia wanaa sümaa waaʼinrüin tü wekirajaakalü anain suluʼujee tü Bibliakat. Wanee kasa shikirajaka anain waya tü Bibliakat shia nnojoluin koʼuin nukuwaʼipa Maleiwa sümüin wayuu (Aluw. 10:34, 35). Nnojoleena waya oonooin sümaa nünüiki Jesús aire neʼe wapüla noʼutku na wawalayuukana. Eepejeʼe aleewale maʼin waya namaa waneinnua wawalayuu maʼaka naaʼinrüin shia Jesús (Juan 13:23; 20:2). Nüsoʼirapejeʼe waaʼin Pedro sünain wachajaainjatüin sukuwaʼipa süpüla alinjanain wapüla napüshuaʼa na wawalayuukana «maʼaka alin wanee wayuu nüpüla nuwala» (1 Ped. 2:17).

11. ¿Kasa waaʼinreetka aire wapüla wayuu süka süpüshuaʼa waaʼin?

¹¹ «Anakajaʼa aijiraale jia süka süpüshuaʼa jaaʼin», müshi Pedro. Wayaawatakalaka saaʼu alinjachin wanee wayuu wapüla süka süpüshuaʼa waaʼin, jaʼitasüjaʼa kapüleein shia wamüin. ¿Kasa waaʼinrajatka airuʼurule nünüiki wamüin wanee wawala jee naainjale kasa mojusü wamüin? Eesüjaʼa suchuntaale waaʼin pasalaawaa suulialeʼeya alin nia wapüla. Niyaawata aaʼu Pedro nünainjee Jesús nnojoluin anain nümüin Maleiwa suchuntaale waaʼin pasalaawaa (Juan 18:10, 11). Anuu nünüiki Pedro: «Saainjale wayuu kasa mojusü jümüin, nnojo jaainjain kasa mojusü sümüin. Süʼülüjale jümüin, nnojo jüʼülüjain sümüin. Shia anaka aluʼu jücheküle süchiki anainjatüin sukuwaʼipa tia wayuukot» (1 Ped. 3:9, TNM). Aire wapüla wayuu süka süpüshuaʼa waaʼin, kamaneejeena waya namüin, jaʼitakajeʼe namüin na wayuu aainjakana kasa mojusü wamüin.

12. (1) ¿Kasa amaa waaʼinreetka sutuma aijiraain maʼin waya? (2) ¿Kasa piʼyataainjatka maʼin achiirua maʼaka piʼrüin suluʼu tü videokot Cuidemos nuestra valiosa unidad?

¹² «Shia alanaʼaleeinjatka maʼin jümüin aijiraain jia», müshi Pedro. Waaʼinrüle tia, walatireerü waneepia sooʼopünaa waaʼin tü kasa aainjünakat wamüin (1 Ped. 4:8, TNM). Wanaa sümaa nikirajüin Jesús süchiki motuinjatüin waaʼin saainjala wayuu, eesüjaʼa jülüjale naaʼin Pedro kamaneein nia sutuma motuin naaʼin akaratshitua naainjala wanee wayuu. «Nnojotsü akaratshituainjatüin neʼe, akaratshituainjatü shikii akaratshimüin» müshi Jesús nümüin (Mat. 18:21, 22, TNM). Kapüleere pümüin paaʼinrüin tia, nnojo pümalajaain, kapüleesia tia wamüin wapüshuaʼa. Tü paaʼinmaainjatkat maʼin maaʼulu shia motuinjatüin paaʼin tü naainjakat pümüin wanee puwala otta püchajaainjatü sukuwaʼipa süpüla anajiraain pia nümaa. c

13. ¿Kasa kapüleeka atuma namüin na laülaashiikana naaʼinmajüin na wawalayuukana?

¹³ Makataleesia suluʼu nikii Pedro tü nümakat Jesús nümüin. Müshi Jesús nümüin süchikijee nüsoʼiraain aaʼin: «Pürüleeja tü  taʼanneetsecheinkat» (Juan 21:16, TNM). Piale wanee laülaashi, pümüinjatü tia pütchikat. Eesüjaʼa kapüleere nümüin wanee laülaashi nükatalüin kaʼi süpüla naaʼinrüin tia aʼyatawaakat. Na laülaashiikana naaʼinmaainjatü napüshi, naapüinjatü tü kasa choʼujaakat namüin, alinjana naya napüla otta nakaalinjainjana naya süpüla aleewain naya nümaa Jehová. Jee müsia, naaʼinmaasü tü aküjaakat pütchi otta yapasü natuma tü nanüikinjatkat süpüla tü outkajawaakat jee shiale tü outkajawaakat miyoʼu. Eeshii waneinnua laülaashii akaalinjaka na wawalayuukana suulia shiʼitaanüin isha nanain otta eeshii na aneekünakana süpüla naʼyataain suluʼu Departamento Local de Diseño y Construcción. Wainma maʼin naʼyataain na laülaashiikana.

14. ¿Kasa atütüleʼeraka naaʼin na laülaashiikana süpüla naaʼinmajüin na wawalayuukana? (1 Pedro 5:1-4).

¹⁴ «Müinjana jürüleejakai naaʼin na anoujashiikana nünain Maleiwa», müshi Pedro namüin na laülaashiikana wanaa nümaa (paashajeʼera 1 Pedro 5:1-4, TNM). Piale wanee laülaashi, watüjaa aaʼulu alin püpüla na wawalayuukana sümaa paaʼinmajeein naya. Eesüjaʼa isale püchiki paaʼinrüin tia sutuma wainmain maʼin piʼyataain jee shiale sutuma mapüsain pia. ¿Kasa paaʼinrajatka sülatüle tia pümüin? Püküja nümüin Jehová jamüin paaʼin. «Chi wayuu akaalinjakai wanee wayuu, naaʼinrajatü tia maʼaka naaʼinrüin shia chi wayuu akaalinjünakai nutuma Maleiwa sükajee tü nüpülainkat», müshi Pedro (1 Ped. 4:11, TNM). Jamüshiijaʼa na wawalayuu puutkajaakana amaa, eesüjaʼa sülatüle namüin kasa kapüleesü isaka süchiki sunoutunuin. Anapejeʼe sotule paaʼin eein süpüla nakaalinjain naya Jesucristo, «chi arüleejüi kojutukai maʼin». Eeshii süpüla nükaalinjain naya maaʼulu jee mapeena. Tü nuchuntakat maʼin Maleiwa namüin na laülaashiikana shia alinjanain napüla na wawalayuukana, jülüjainjanain naya naaʼin otta anainjatüin nakuwaʼipa napüleerua.

15. ¿Kasa naaʼinraka wanee laülaashi süpüla naaʼinmajüin na wawalayuukana? (Piirakaa sümüin tü ayaakuaakat).

¹⁵ Eeshi wanee wawala kanüliakai William, kakaliaichi nia laülaashin. Niyaawata aaʼu jamüin naaʼinmajüinjanaka na wawalayuukana. Suʼttaiwaʼaya COVID-19, nüchajaain maʼin sukuwaʼipa namaa na wane laülaashiikana süpüla nayamaajüin na wawalayuukana semaanawai. Anuu nünüiki süchiki jamüin naaʼinraka tia: «Wainma na wawalayuu namüiwaʼakana nepialuʼu sümaa wattain saalii tü kasa jülüjakat naaʼin. Eesüjaʼa  mojule naaʼin sutuma tü kasa jülüjakat naaʼin». Nüküjale wanee wawala nümüin William tü alatakat nümüin, naapajüin nünüiki süpüla niyaawatüin saaʼu kasain choʼujaain nümüin otta kasain shapaain atuma naaʼin. Nütüjaapa saaʼu tia, nüchajaain video jee pütchi suluʼujee jw.org atütüleʼereetka naaʼin. Müshi nia: «Choʼujaashii maʼin waaʼinmajüin na wawalayuukana maaʼulu. Aʼyataashii maʼin waya süchiirua wakaalinjain na wayuukana süpüla neʼraajüin Jehová. Akaʼaya joo wayakana, aʼyataainjana maʼin waya süchiirua waaʼinmajüin na wawalayuukana süpüla ayatüin naʼyataain nümüin Jehová».

16. ¿Kasa waʼyataainjatka achiirua sünainjee tü watüjakat suluʼujee tü nüshajakat Pedro?

¹⁶ Wekirajaaitpa anain soʼutku neʼe tü watüjakat sünainjee tü piamasü karaloʼuta nüshajakat Pedro. Eesüjaʼa jülüjale paaʼin tü choʼujaayütkalia punoutuin sünain piʼyataain nümüin Jehová. ¿Aʼyataweeshiche pia süchiirua püsakireʼerawalin paaʼin süchiki tü kasa anasü piʼreetkat paʼaraiisüpa tü Mmakat? ¿Aʼyataweeshiche pia süchiirua püküjain pütchi piʼyataaleruʼu, pukoleejiaseruʼu jee eepünaale pia? ¿Aʼyataweeshiche pia süchiirua pükaalinjain na wawalayuukana saaʼujee alin maʼin naya püpüla? Jia laülaashiikana, ¿aʼyataweeshiiche maʼin jia süpüla jaaʼinmajüin na wawalayuukana süka anakalü akuwaʼipa? Piyaawatüle saaʼu tü choʼujaayütkalia püpüleerua, nnojo pümalajaain. Soto paaʼin kamaneein maʼin chi Señotkai jee nükaalinjeechi pia süpüla puuntuin tü choʼujaayütkalia püpüleerua (1 Ped. 2:3, TNM). Müshi Pedro: «Ekirajüneena jia jee yapeena jia süpüla aʼyatawaa nutuma chi Maleiwa kamaneekai maʼin, chi aneekakai jia süpüla kojutuinjanain jia süpüla kaʼikat süpüshuaʼa nükajee Cristo. Katsüinjeerü junoula nutuma chi Maleiwakai, katsüinjeerü jaaʼin nutuma jee nükaalinjeena jia suulia jaaʼinrajüin kasa mojusü» (1 Ped. 5:10, TNM).

17. Nnojoliire wamalajaain otta wooʼulaale nikirajüin waya Jehová, ¿kasa anasü weʼreetka?

¹⁷ Niʼraiwaʼaya Pedro chi Nüchonkai Maleiwa, jülüjasü naaʼin nnojoluin anain nia süpüla nümaain nia (Luc. 5:8). Sükajee nükaalinjain nia Jehová otta Jesús, ayatüshia nia oushikajaain süchiirua nukuwaʼipa Cristo. Müshijeseʼe nüneeküin nia Jehová süpüla nuluwataainjachin nümaa «chi Waseñotsekai Jesucristo, chi Oʼtteʼerakai waya» (2 Ped. 1:11, TNM). Anataʼaleesüjaʼa nukuwaʼipa Pedro sutuma nnojoluin nümalajaain. Nnojoliire jümalajaain maʼaka nnojoluin nümalajaain Pedro otta juuʼulaale nikirajüin jia Jehová, aapüneerü jümüin tü kataakalü oʼuu süpüla kaʼikat süpüshuaʼa, juunteetka juʼtteʼennüin süka kanoulain maʼin jia (1 Ped. 1:9).