1, 2. ¿Kasa talataka atuma naaʼin na aʼyataashiikana nümüin Jehová? (Santiago 1:22-25).

 KEEʼIREESÜ NAAʼIN Jehová otta Jesús chi Nüchonkai talatüinjanain waya. Anuu nünüiki chi ashajüikai Salmo 119:2: «Anataʼaleeshiijaʼa maʼin na aaʼinrakana tü nuluwataakalü anain; na achajaakana nia waneepia süka süpüshuaʼa naaʼin». Otta müsü nünüiki Jesús mayaa: «Naya anakuwaʼipaliika na wayuu aapakana nünüiki Maleiwa sümaa naaʼinrüin tü nümakat» (Luc. 11:28).

² Talatüshii maʼin na aʼyataashiikana nümüin Maleiwa, wainma tü kasa talatakalü atuma waaʼin. Talatüsü waaʼin sutuma waashajeʼerüin tü Nünüikikat Maleiwa weinshi otta süka wachajaain sukuwaʼipa süpüla woonooin sümaa tü sümakat (paashajeʼera Santiago 1:22-25).

3. ¿Kasa anasü weʼreetka sutuma woonooin sümaa tü Nünüikikat Maleiwa?

³ ¿Kasa anasü weʼreetka sutuma woonooin sümaa tü nümakat Maleiwa? Talatüshii waya süka watalateʼerüin naaʼin Jehová (Ecl. 12:13). Woonoole sümaa tü Nünüikikat Maleiwa anajiraajeena waya namaa na wapüshikana otta aleeweena maʼin waya namaa na wawalayuukana suluʼu tü outkajaaleekat, eesüjaʼa müirüle pukuwaʼipa. Jamüshiijaʼa waya nnojotsü weʼrüin tü müliaa niʼrakat wanee wayuu sünainjee moonooin nia sümaa tü nümakat Jehová. «Chi eekai naaʼinrüin tü pümakat, eʼreechi anaa sutuma», müshi David chi aluwataashikai wanaa sümaa niiʼirajüin wanee jayeechi süchikimaajatü tü pütchi nuluwataakalü anain Jehová (Sal. 19:7-11).

4. ¿Jamüsü kapüleʼewaikaʼa wamüin waashajeʼerüin tü Nünüikikat Maleiwa jee wapansaajüin wakuwaʼipa sümaa?

 ⁴ Kapüleʼewaisiaʼaya wamüin waashajeʼerüin tü Nünüikikat Maleiwa jee wapansaajüin wakuwaʼipa sümaa. Mayaainjeʼe wainmain tü kasa waaʼinrawaikat, wakatalüinjatü kaʼi süpüla waashajeʼerüin tü Bibliakat jee wekirajaain sünain. Wayaawateetkalaka saaʼu tü nüchekakat Jehová süpüla waaʼinrüin. Wekirajaajeerü anain sünain ekirajaayakat tüü tü waaʼinrüinjatkat süpüla waashajeʼerawalin tü Bibliakat waneepia. Wekirajaajeerü anainña tü waaʼinrajatkat süpüla wasakireʼerüin waaʼin sünain otta süpüla waapaainjatüin sümaa tü wekirajaakalü anain.

PÜKATALA KAʼI SÜPÜLA PAASHAJEʼERÜIN NÜNÜIKI MALEIWA

5. ¿Kasa naaʼinrawaika na aʼyataashiikana nümüin Jehová?

⁵ Wainma tü kasa naaʼinrawaikat na aʼyataashiikana nümüin Jehová. Wainma oora walatirawaika sünain aaʼinraa waneirua kasa waaʼinrajatka saashin tü Bibliakat. Wainma na aʼyataakana süpüla tü nayaalujutkat jee tü neküinjatkat na napüshikana (1 Tim. 5:8). Eeshii na wawalayuu aaʼinmajakana napüshi ayuuikana jee laülaayuuinnain. Eesü tü kasa waaʼinrajatkat napüleerua na wawalayuukana, sümaʼaleeya tia waaʼinmajiraainjatüin wakuwaʼipa suulia ayuulin waya. Otta müsia wanee kojutuleeka maʼin shia waküjain pütchi. Saaʼujee wainmain tü kasa paaʼinrakat, eesüjaʼa püsakirüle paaʼin sünain tüü: «¿Kasa taaʼinrajatka süpüla taashajeʼerüin tü Bibliakat soʼukaiwai sümaa tasakireʼerüin taaʼin sünain jee tapansaajüin sünain takuwaʼipa tü tekirajaakalü anain?».

6. ¿Kasa paaʼinrajatka süpüla paashajeʼerawalin tü Bibliakat? (Piirakaa sümüin tü ayaakuaakat).

⁶ Wanee kasa choʼujaaka namüin na anoujashiikana shia aashajeʼeraa tü Bibliakat, müsüjeseʼe naaʼinmaainjatüin shia (Filip. 1:10). Saashin tü karaloʼutakat Salmos anasü maʼin nukuwaʼipa chi wayuu aaʼinmaakai tü Nünüikikat Jehová, naashajeʼerawalin shia soʼukai jee saʼwai sümaa nasakireʼerüin naaʼin sünain (Sal. 1:1, 2). Wayaawataka saaʼu sünainjee tia, waashajeʼerüinjatüin tü Bibliakat soʼukaiwai.  Wayaawatüinjatü saaʼu waneʼewai wakua jalapüshinjatüin waashajeʼerüin shia. Müsü nünüiki wanee wawala Víctor nünülia: «Kamalainsü tamüin aashajeʼeraa tü Bibliakat watta maalü, nnojotsiaajeʼe shiain sünainjee kamalain tamüin atamawaa maalia, shia süka jimatuulin wanaa sümaa tia. Sutuma nnojoluin mapüsain taya jülüjasü taaʼin tü taashajeʼerakat». ¿Müsüche pukuwaʼipa maʼaka nukuwaʼipa Víctor? Püsakira paaʼin sünain tüü: «¿Jarat tü oora anakat tamüin süpüla taashajeʼerüin tü Bibliakat?».

PÜSAKIREʼERA PAAʼIN SÜNAIN TÜ PAASHAJEʼERAKAT

7, 8. ¿Kasa nnojoluinjatka waaʼinrüin waashajeʼerapa tü Bibliakat?

⁷ Kettaapa waneeküin tü oora waashajeʼerüinjatkalü oʼu tü Bibliakat, anasü jülüjale waaʼin jamüin sukuwaʼipa watuma waashajeʼerapa shia. Wainma tü kasa waashajeʼerawaikat soʼukaiwai eeka süpüla motuin waaʼin, mojukatche maʼin motomaatüle waaʼin tü waashajeʼerakat suluʼujee tü Bibliakat. Eesüjaʼa keeʼireere waaʼin waashajeʼerüin jeʼrasüirua kapiitulo suluʼujee tü Bibliakat soʼukaiwai jee wachajaale sukuwaʼipa süpüla wekeraajüin tia (1 Cor. 9:26). Eesü süpüla waaʼinrüin tia, eepejeʼe sooʼomüin tü waaʼinrajatkat süpüla anain maʼin wakuwaʼipa sünainjee tü sümakat tü Bibliakat.

⁸ Jülüjataa waaʼin sukuwaʼipa tü juyakat, choʼujaasü maʼin shia süpüla tü wunuʼuliakalüirua, jamateetpejeʼe neʼe tü wüinkat muloʼule maʼin tü juyakat, shia anaka aluʼu meemetüle tü juyakat süpüla miyoʼuinjatüin tü wunuʼuliakalüirua sutuma. Müsia neʼe wakuwaʼipa waashajeʼerapa tü Bibliakat, nnojotsü waashajeʼerüinjatüin shia sümaa süshapajaain waaʼin shiiʼiree neʼe waashajeʼerüin wainma kapiitulo sümaa nnojoluin jülüjayaain waaʼin tü waashajeʼerakat. Müle shia watuma, nnojoleerü wayaawatüin saaʼu tü wanouteʼerüinjatkat sünain wakuwaʼipa (Sant. 1:24).

9. ¿Kasa waaʼinrajatka suulia waashajeʼerüin tü Bibliakat sümaa washapajaain aaʼin?

⁹ ¿Kasa paaʼinrajatka piyaawatüle saaʼu sünain paashajeʼerüin tü Bibliakat sümaa müin püshapajaakai aaʼin? Anasü jiattale saashajeʼeria  putuma süpüla püsakireʼerüin paaʼin sünain tü paashajeʼerakat. Süpüla püsakireʼerüin paaʼin sünain tü paashajeʼerakat anasü pukooʼomüinrüle tü oora pikirajaakalü oʼu jee püneeküle palitchon wetsiikulo süpüla paashajeʼerüin. Anuu nünüiki Víctor chi wachuntayüikai anülia paala: «Nnojotsü taashajeʼerüin wainma wetsiikulo, eeshi taashajeʼerüle wanee kapiitulo neʼe. Sutuma taashajeʼerawalin tü Bibliakat watta maalü jülüjasü taaʼin tü taashajeʼerakat soʼuleʼeya tia kaʼikat». Jaʼitairü wainmainle jee palitchonle tü pütchi paashajeʼerakat shia anaʼleeka maʼin püsakireʼerüle paaʼin sünain jee piyaawatüle saaʼu tü paashajeʼerakat (Sal. 119:97; paashajeʼera tü pütchikat « Waneirua pütchi anaka süpüla püsakireʼerüin anain paaʼin paashajeʼerapa»).

10. ¿Kasa paaʼinrajatka süpüla poonooin sümaa tü pikirajaakalü anain sünain tü Bibliakat? (1 Tesalónica. 5:17, 18).

¹⁰ Jaʼitairü maʼin jalapüshin tü oora püneekakat süpüla paashajeʼerüin tü Bibliakat otta jeʼrasüin tü wetsiikulo paashajeʼerakat, anasü paaʼinmaale tü pikirajaakalü anain süpüla püpansaajüin pukuwaʼipa sümaa. Sümaʼainruʼu waashajeʼerüin wanee wetsiikulo suluʼujee tü Bibliakat, anasü wasakireʼerüle waaʼin sünain tüü: «¿Kasa taaʼinrajatka süpüla toonooin sümaa pütchikat tüü maaʼulu jee mapeena?». Jülüjataa paaʼin paashajeʼerüle 1 Tesalónica 5:17, 18 (paashajeʼera), jülüjaka paaʼin kasain puʼuraajawalin achiki nümüin Maleiwa, jeʼratuain puʼuraajüin nümüin otta kasain paapüin anainjee analuʼulu nümüin, jülüjaka paaʼin apünüinsü kasa paapüinjatka anainjee analuʼulu nümüin Jehová. Paaʼinrüle tia waneepia paashajeʼerapa tü Bibliakat, jaʼitasü neʼe motsomüinre shia, ojutuujeerü suluʼu paaʼin tü nümakat Maleiwa otta aneerü maʼin pukuwaʼipa sünain aʼyatawaa nümüin. ¿Jama piyaawatüle saaʼu wainmain kasa punouteʼerüinjatka sünain pukuwaʼipa?

PUNOUTEʼERA PUKUWAʼIPA SHIʼIPAʼAYA

11. ¿Kasa eeka süpüla mojuin atuma paaʼin paashajeʼerapa tü Bibliakat?

¹¹ Eesüjaʼa mojule paaʼin paashajeʼerapa tü Bibliakat sutuma wainmain kasa punouteʼerajatka sünain pukuwaʼipa. Jülüjataa waaʼin tüü. Soʼu wanee kaʼi paashajeʼerüin wanee wetsiikulo ashajünaka achiki nnojoluinjatüin koʼuin wakuwaʼipa sümüin wayuu (Sant. 2:1-8). Süpüla püpansaajüin pukuwaʼipa sümaa tia pütchikat paaʼinrüin waneirua kasa süpüla punouteʼerajatüin pukuwaʼipa. Anasü maʼin tia. Shiasaʼa waneemüin kaʼi paashajeʼeraka wanee pütchi süchiki wachecherüinjatüin waaʼin waashajaapa (Sant. 3:1-12). Süka eein kaʼi nnojotka piyaawatüin saaʼu pünüiki, püchajaain joo sukuwaʼipa süpüla kamaneeinjatüin pia  suluʼu pünüiki. Shiasaʼa apünüinka kaʼi, paashajeʼerüin suluʼu tü Bibliakat nnojoliinjanain waya aʼaleewajaain namaa na manoujainsaliikana (Sant. 4:4-12). Sünainjee tia pütüjaaka saaʼu eejüinjatüin paaʼin sünain tü peliikula pünajakat jee tü muusika paapajakat. Shiasaʼa soʼu tü pienchikat kaʼi, eesüjaʼa mojule paaʼin saaʼujee wainmain tü kasa punoutajatkat sünain pukuwaʼipa.

12. ¿Jamüsü nnojoluinjatkaʼa yüülain paaʼin paashajeʼerüle tü Bibliakat sümaa piyaawatüin saaʼu punouteʼerüinjatüin pukuwaʼipa? (Paashajeʼera tü nootakat).

¹² Nnojo yüülain paaʼin punouteʼerüinjatüle waneirua kasa sünain pukuwaʼipa. Piyaawatüin saaʼu tia saaʼujee anain saashajeʼeria tü Bibliakat putuma sümaa nnojoluin yaletüin paaʼin otta süka keeʼireein paaʼin anainjatüin pukuwaʼipa noʼuluʼu Jehová. a Soto paaʼin wachajaainjatüin sukuwaʼipa waneepia süpüla jeketüinjatüin wakuwaʼipa (Col. 3:10). ¿Kasa paaʼinrajatka süpüla püpansaajüin pukuwaʼipa sümaa Nünüiki Maleiwa?

13. ¿Kasa paaʼinrajatka süpüla püpansaajüin pukuwaʼipa sümaa tü pikirajaakalü anain? (Piirakaa sümüin tü ayaakuaakat).

¹³ Anasü püpansaajüle shiʼipaʼaya pukuwaʼipa sümaa süpüshuaʼa tü pikirajaakalü anain (Prov. 11:2). Puuʼulaka paaʼinrüin tüü: püshaja suluʼu wanee karaloʼuta süpüshuaʼa tü punouteʼerüinjatkat sünain pukuwaʼipa, püneeka wanee jee shiale piama süpüla punouteʼerajatüin jee mapa puuʼulakeerü tü wane. ¿Kasache püneeküinjatka palajana?

14. ¿Kasa punouteʼerüinjatka sünain pukuwaʼipa palajana?

¹⁴ Püneeka palajana tü mapüleekat süpüla punouteʼerüinjatüin shia jee shiale wanee kasa punouteʼeramaatüinjatka maalü sünain pukuwaʼipa. Püneekapa shia, püchajaa pütchi wanaapünaa  sümaa tü pukuwaʼipakat suluʼu Índice de las publicaciones Watch Tower jee shiale Nachajaayainjatü pütchi na aküjaliikana pütchi nüchiki Jehová. Puchunta nümüin Jehová süpüla niʼitaain suluʼu paaʼin paaʼinreein tü kasa punoutajatkat sünain pukuwaʼipa (Filip. 2:13). Paaʼinramaata tü pikirajaaitpakalü anain. Piʼrapa sunoutaain pukuwaʼipa shiʼipaʼaya, püchajaweerü sukuwaʼipa süpüla punoutuin tü waneirua kasa püshajakat suluʼu tü karaloʼutakat. Eesüjaʼa mapüleejeerüle pümüin punoutuin shia.

WAAʼINRA WANEEPIA TÜ SÜMAKAT TÜ BIBLIAKAT

15. ¿Kasa naataka aluʼu nakuwaʼipa na aʼyataashiikana nümüin Jehová noulia noʼutku na aashajeʼerakana tü Bibliakat? (1 Tesalónica 2:13).

¹⁵ Eeshii na wayuu makana wainmatuairüin naashajeʼerüin tü Bibliakat. ¿Nanoujainche eere tü sümakat? ¿Oonooshiiche naya sümaa tü sümakat? Wainma na nnojoliikana aaʼinrüin tia. Naatapejeʼe maʼin nakuwaʼipa na aʼyataashiikana nümüin Jehová. Wanaawasü naaʼin namaa na anoujashii namaiwajanakana. Nnojotsü naapaain amaa tü Bibliakat maʼaka saaʼin sünüiki wayuu, naapaa amaalü shia süka Nünüikin shia Maleiwa. Akaʼaya wayakana wachajaain maʼin sukuwaʼipa süpüla waaʼinrüin waneepia tü sümakat tü Bibliakat (paashajeʼera 1 Tesalónica 2:13).

16. ¿Kasa waaʼinrajatka süpüla woonooin sümaa tü Nünüikikat Maleiwa?

¹⁶ Eejeeriaʼaya kaʼi kapüleejeetkalü oʼu wamüin waashajeʼerüin tü Bibliakat jee shiale wapansaajüin wakuwaʼipa sümaa. Eesüjaʼa kapüleere wamüin waashajeʼerüin shia süka wainmain kasa waaʼinraka suulia. Eesüjaʼa waashajeʼerüle shia sümaa washapajaain aaʼin otta nnojoluin wayaawatüin saaʼu tü sümakat. Jee shiale yüürale waaʼin sutuma wainmain tü kasa wanouteʼerajatkat sünain wakuwaʼipa. Nükaalinjeechi pia Jehová jaʼitairü kapüleein shia pümüin. Paapaa sümaa tü nükaalinjakalü akajee pia Jehová. Nnojo motomaatüin paaʼin tü paashajeʼerakat suluʼujee tü Nünüikikat Maleiwa, shia anaka aluʼu poonoole sümaa. Püpansaajüle pukuwaʼipa sümaa tü sümakat tü Bibliakat, talateechi maʼin pia (Sant. 1:25).