1. ¿Kasa naaʼinrüinjatka Jesús soʼu palitchon kaʼi?

 MAAʼUTPÜNAA yaa, aʼwanajaasü maʼin sukuwaʼipa tü mmapaʼakat, alüʼütsü sükalia süpüla süsalainjatüin saainjala wayuu nutuma Jesús. Anuujeseʼe tü nasakirakalü anain na nikirajüinkana: «Püma wamüin kasoʼuleerüin alatüin tü makat, kaseerüin wayaawatüin akajee yaaichipain pia otta sülüʼülaain sükalia süpüla sajaʼttajatüin tü kasa alatakat sainküin mma» (Mat. 24:3). Nüküjain Jesús tü nasakirakalü anain suluʼu Mateo kapiitulo 24 otta 25, Marcos kapiitulo 13 otta Lucas kapiitulo 21.

2. (1) ¿Kasa wekirajaajeetka achiki sünain ekirajaayakat tüü? (2) ¿Jamüsü wekirajaainjatkaʼa süchiki tia?

² Aashajaashi Jesús süchiki apünüinsü kasa wayaawateetka atuma tü waaʼinrajatkat süpüla yapainjanain waya. Aashajaashi nia nachiki na makana aka saaʼin sukuwaʼipa anneerü jee na makana aka saaʼin sukuwaʼipa kaaʼula, nachiki na polooshiikana majayünnüü otta nachiki na achepchiee aapünakana amüin nneerü «talento» münakat. Sünainjee tü nümakat Jesús, wayaawata aaʼu süsaleerüin saainjala wayuu nutuma sünainjee tü kasa saaʼinrakat. Sünain ekirajaayakat tüü, wekirajaweerü achiki tia apünüinsükat kasa naashajaakalü achiki Jesús jee tü kasa watüjakat sünainjee. Wekirajaa sünain tü palajatkat.

NA MAKANA AKA SAAʼIN SUKUWAʼIPA ANNEERÜ OTTA KAAʼULA

3. ¿Joujaleerü süsalaka saainjala wayuu nutuma Jesús?

³ Süsalapa naainjala na wayuukana nutuma Jesús, niyaawateerü aaʼu noonoole na wayuukana sümaa tü pütchi anakat maʼin jee nakaalinjale na aneekuushikana (Mat. 25:31-46). Soʼu tü kaʼi shiʼreetkat maʼin oʼu wayuu müliaa, nüküjeerü Jesús jaraliin na makana aka saaʼin sukuwaʼipa anneerü jee na makana aka saaʼin sukuwaʼipa kaaʼula. Naaʼinreerü tia süpülapünaa Armagedón (Mat. 24:21). Nükatajeena Jesús na wayuu akaalinjakana na aneekuushikana noulia na nnojoliikana aaʼinrüin tia. Maʼaka naaʼinrüin shia wanee anneetpüʼü nükatajapa tü anneetkat suulia tü kaaʼulakat.

4. Sünainjee tü sümakat Isaías 11:3, 4, ¿jamüsü wayaawatakaʼa saaʼu loteerüin sukuwaʼipa nutuma Jesús süsalapa saainjala wayuu nutuma? (Piirakaa sümüin tü ayaakuaakat).

 ⁴ Aneekünüshi Jesús nutuma Jehová süpüla süsalainjatüin saainjala wayuu nutuma. Saashin tü Bibliakat loteerü sukuwaʼipa tia nutuma Jesús (paashajeʼera Isaías 11:3, 4). Jülüjasü naaʼin Jesús tü naaʼinrakat wanee wayuu, tü suluʼukat naaʼin, tü naashajaakalü achiki otta jamüin nukuwaʼipa namaa na aneekuushikana (Mat. 12:36, 37; 25:40). Nütüjaajeerü aaʼu Jesús jaraliin na wayuu akaalinjakana na aneekuushikana. a Wanee kasa waaʼinrajatka süpüla wakaalinjain naya shia waküjain tü pütchi anakat maʼin. Na akaalinjakana na aneekuushikana, loteerü nakuwaʼipa nutuma Jesús, eesüjaʼa kateerüle noʼu nutuma süpüla kaʼikat süpüshuaʼa (Mat. 25:46; Apoc. 7:16, 17). Anataʼaleesüjaʼa maʼin nakuwaʼipa saaʼujee waneepiain naya nümaa Jehová. Müle nakuwaʼipa soʼu tü kaʼi shiʼreetkat maʼin oʼu wayuu müliaa, ashajüneerü nanülia «suluʼu tü karaloʼuta nanüliamaajatkat na wayuu katüinjanakana oʼu» (Apoc. 20:15).

5. (1) ¿Kasa waaʼinreetka jülüjale waaʼin tü nümakat Jesús nachiki na makana aka saaʼin sukuwaʼipa anneerü jee na makana aka saaʼin sukuwaʼipa kaaʼula? (2) ¿Jaralii na jülüjainjanakana aaʼin tia?

⁵ Waneepia pia nümaa Jehová. Tü nümakat Jesús nachiki na wayuu makana aka saaʼin sukuwaʼipa anneerü jee na makana aka saaʼin sukuwaʼipa kaaʼula, napülajatü na wayuu kepiainjanakana saaʼu tü mmakat. Wayaawata aaʼu sükajee tü naaʼinrakat waneepiain naya nümaa Jehová, jama nakaalinjain na aneekuushikana sünain aküjaa pütchi otta müsia sükajee noonooin nümaa «chi achepchiee oonookai jee kekiikai maʼin eʼitaanakai nutuma» Jesús (Mat. 24:45). Na nümaainjanakana Jesús chaa iipünaa, jülüjeesü naaʼin tü nüküjakat Jesús nachiki na makana aka saaʼin sukuwaʼipa anneerü jee na makana aka saaʼin sukuwaʼipa kaaʼula. ¿Jamüsü jülüjainjatkaʼa naaʼin tia? Shia süka jülüjain naaʼin Jesús tü naaʼinrakat, tü suluʼukat naaʼin otta tü naashajaakalü achiki. Waneepiain naya nümaa Jehová sükajee tü kasa naaʼinrakat. Joʼu wekirajaai sooʼomüin süchiki tü naashajaakalü achiki Jesús suluʼu Mateo 25. Jalouijeerü tia namüin na aneekuushikana süpüla eejüinjatüin naaʼin. Wekirajaa süchiki tü poloosükat majayünnüü.

NA POLOOSHIIKANA MAJAYÜNNÜÜ

6. ¿Kasa naaʼinraka na jaʼraishiikana majayünnüü süka kekiijain maʼin naya? (Mateo 25:6-10).

⁶ Aashajaashi Jesús nachiki polooshii majayünnüü apanapajaka wanee wayuu kaʼwayuuseinjachi (Mat. 25:1-4). Tü poloosükat majayünnüü oʼuneesüirua sünain tü miʼiraa shikiirakat kaʼwayuusee. Nüküjain Jesús jaʼraishiin na majayünnüü maaʼinkana aaʼin otta jaʼraishiin na kekiijakana. Na majayünnüü kekiijakana, yapajüshii naya sünain aʼatapajaa chi kaʼwayuuseinjachikai, jaʼitashi naʼatapajüin nia kaʼlepa aika. Alüʼüjashii naya ranpara süpüla nepejüin shia kojopa piʼyuushi. Müleka shiyokojaale tü ranparakat alüʼüjatüjüliʼiya naya sooʼomüin seita (paashajeʼera Mateo 25:6-10). Süka eejüin naaʼin, ekerotushii naya nümaa chi kaʼwayuuseinjachikai sünain tü ekawaakat. Meeria neʼe nakuwaʼipa na aneekuushikana süpüla chainjanain naya aluwataain nümaa Jesús iipünaa, waneepiainjatüin naaʼin nümaa Jehová otta eejüinjatüin naaʼin (Apoc. 7:1-3). b ¿Kasakaʼa alatüin mapa namüin na jaʼraishii majayünnüü maaʼinkana aaʼin?

7. (1) ¿Kasa alataka namüin na majayünnüü maaʼinkana aaʼin? (2) ¿Jamüsü sülatakaʼa tia namüin?

⁷ Naata maʼin nakuwaʼipa na majayünnüü maaʼinkana aaʼin, nnojoishii naya yapajüin  nüpüla chi kaʼwayuuseinjachikai. Naashin Jesús alüʼülaasü süpüla shiyokojooin tü ranpara namaʼanajatkat nülüʼülaapa süpüla nüntüin chi kaʼwayuuseinjachikai. Oʼunushii naya sünain ayaʼlajaa seita jama nnojoluin keraatüjülüin natuma tü seitakat. Nüntapa chi kaʼwayuuseinjachikai, nnojoishii naya nüpüla. Nayaka neʼe apanapajüin nia na majayünnüü yapajakana nüpüla. Nekerotokoloko nümaa sünain eʼrajaa sukua tü miʼiraa shikiirakat kaʼwayuusee jee süsürünnaka tü puettoʼukot (Mat. 25:10). Shiasaʼa süchikijee tia, nantaka na wane majayünnüükana. «Nnojoishiisa jia teʼraajüin», nümaka chi kaʼwayuuseinjachikai namüin (Mat. 25:11, 12). Nnojoishii yapajüin naya sünain aʼatapajaa chi kaʼwayuuseinjachikai. ¿Kasa natüjaka na aneekuushikana nanainjee na majayünnüükana?

8, 9. ¿Kasa natüjaka na aneekuushikana sünainjee tü aküjünakat nachiki na polooshiikana majayünnüü? (Piirakaa sümüin tü ayaakuaakat).

⁸ Yapaja pia. Nnojotsü nüküjain Jesús piamain shiʼipapaʼa nakuwaʼipa na aneekuushikana: na yapatüjüliikana süpüla tü kaʼi sajaʼttajatkalü oʼu kasa mojusü sainküin mma otta na nnojoliikana yapajüin süpüla kaʼikat tia. Tü nikirajeekalü anain Jesús na aneekuushikana shia yapainjanain naya süpüla nachecherüinjatüin naaʼin sünain aʼatapajaa tia kaʼikat. Nnojorüle naaʼinrüin tia nnojoleena oʼunuin chaa iipünaamüin (Juan 14:3, 4). Jaʼitainna chainjanale waya iipünaa jee yaainjanale waya saaʼu tü mmakat, jülüjainjatü maʼin waaʼin tü nikirajeekat Jesús nachiki na polooshiikana majayünnüü. Yapajüinjana waya süpüla tü kaʼi alatajatkat mapeena (Mat. 24:13).

⁹ Nikirajüin waya Jesús nakajee na polooshiikana majayünnüü, yapajüinjana waya otta eejüinjatü waaʼin süpüla tü kasa alatajatkat. Süpüla wayaawatüin saaʼu tütüinjanain waya sünain aʼyatawaa nümüin Jehová, nüküjain mapa Jesús nachiki na achepchiee aapünakana amüin nneerü «talento».

NA ACHEPCHIEE EʼITAANAKANA AJAPULUʼU NNEERÜ «TALENTO»

10. ¿Kasa naaʼinraka na piamashiikana achepchiee süka tütüin maʼin naya? (Mateo 25:19-23).

¹⁰ Aashajaashi Jesús nachiki apünüinshii achepchiee. Piamashii na tütükana otta waneeshia chi shokulakai (Mat. 25:14-18). Süpülapünaa nuʼunuin chi nalaamainkai suluʼumüin  wanee mma naata, niʼitaain nneerü «talento» najapuluʼu waneʼewai nakua. Najapuluʼu chi palajachikai, niʼitaain jaʼraisü talento, najapuluʼu chi wane, niʼitaain piamasü talento jee najapuluʼu chi chiiruaajachikai, niʼitaain waneesia talento. ¿Kasa naaʼinraka na achepchieekana nüntapa chi nalaamainkai? Jamüshijaʼa chi palajachikai, antitshi jaʼraisü talento sooʼomüin otta chi wane, antitshi piamasü talento sooʼomüin. Tütüshii naya sünain aʼyatawaa. Talatakalaka maʼin naaʼin chi nalaamainkai namaa, anuu nünüiki namüin waneʼewai nakua: «Anakajaʼa jooluʼu talatüle maʼin paaʼin wanaa tamaa» (paashajeʼera Mateo 25:19-23). ¿Kasakaʼa naaʼinrüin chi wane achepchieekai süka tü nneerü aapünakat nümüin?

11. (1) ¿Kasa alataka nümüin chi achepchiee shokulashikai? (2) ¿Jamüsü sülatakaʼa tia nümüin?

¹¹ Naʼatapüin chi laamakai kachoinjatüin tü nneerü niʼitaakat najapuluʼu chi chiiruaajachikai achepchiee. ¿Kasakaʼa naaʼinrüin chia achepchieekai? Shokulashi neʼe nia, nupotuin wanee ishi jee nojoitaka tü nneerü aapünakat nümüin. Nüleʼejirüin tü nneetkat sümaa nnojoluin niʼyateʼerüin shia. Eeyaai neʼe mojuin naaʼin saalinjee nnojoluin niʼyateʼerüin tia nneetkat. Mojusü neʼe nünüiki nüchiki chi nülaamainkai. «Puchuntawalin wainma kasa», müshi nia nümüin. Nüchiaaka nia chi nülaamainkai sümaa nüsütüin nuulia tü nneerü nümaʼanajatkat otta nujutuin nia nipialuʼujee (Mat. 25:24, 26-30).

12. ¿Jaralii kayaawaseka maaʼulu yaa na piamashii achepchiee tütükana?

¹² Nayaawase na anoujashii aneekuushikana na piamashii achepchiee tütükana. Anuujeseʼe nünüiki Jesús, chi nalaamainkai: «Anakajaʼa jooluʼu talatüle maʼin paaʼin wanaa tamaa». Tia maluʼulu chainjanain naya iipünaa nümaa Jesús jee naya asoʼiraainjanakana aaʼin palajana süchikijee outaa (Mat. 25:21, 23; Apoc. 20:5₂). Sünainjee nukuwaʼipa chi achepchiee shokulashikai, nayaawateerü aaʼu na anoujashii aneekuushikana tü eejüinjatkalü oulia naaʼin. Wekirajaa sünain tia.

13, 14. ¿Kasa natüjaka na aneekuushikana sünainjee nakuwaʼipa na achepchiee aapünakana amüin nneerü? (Piirakaa sümüin tü ayaakuaakat).

¹³ Tütü pia. Wanaa sümaa naashajaain Jesús nüchiki chi achepchiee shokulashikai, nnojotsü shiain nüküjeein shokulainjanain na aneekuushikana. Tü nüküjeekalü achiki Jesús namüin shia nnojoleenain noʼunuin nümaa  sünain aluwatawaa nnojorüle naaʼinmaain tü naʼyataainkat nümüin Jehová (2 Ped. 1:10).

¹⁴ Nayaawateerü aaʼu na anoujashii aneekuushikana yapainjanain naya jee tütüinjanain naya sünainjee tü nümakat Jesús nachiki na polooshiikana majayünnüü jee nachiki na achepchiee aapünakana amüin nneerü «talento». ¿Shiache neʼe nüküjaka Jesús tia namüin na aneekuushikana süpüla eejüinjatüin naaʼin? Nüküjain Jesús sooʼomüin süchiki tia suluʼu Mateo 24:40, 41. Wekirajaa sünain tia.

JARALEECHI CHI AMAANAKAI

15, 16. Saashin Mateo 24:40, 41, ¿jamüsü eejüinjatkaʼa naaʼin na anoujashii chainjanakana iipünaa?

¹⁵ Süpülapünaa naashajaain Jesús nachiki na wayuu makana aka saaʼin sukuwaʼipa anneerü jee na makana aka saaʼin sukuwaʼipa kaaʼula, na polooshiikana majayünnüü otta na achepchiee eʼitaanakana ajapuluʼu nneerü «talento», nüküjainña nachiki piamashii wayuu aʼyataakana yüüjapaʼa jee nachiki piamashii jieyuu ayüüjaakana. Mayaainjeʼe naʼyanaajiraain piamaleʼeya, amaaneechi wanee jee apütüneechi chi wane naashin Jesús (paashajeʼera Mateo 24:40, 41). Suluʼu wetsiikulo 42, nüküjain Jesús namüin na nikirajüinkana tü makat mayaa: «Müsüjeseʼe eejüinjatüin maʼin jaaʼin waneepia süka nnojoluin jütüjaain saaʼu tü kaʼi nünteechikalü oʼu chi Jüseñotsekai» (Mat. 24:42). Meematsü aka saaʼin tü nümakat naashajaapa nachiki na polooshiikana majayünnüü (Mat. 25:13). Shiajiraʼaya neʼe nüküjeeka achiki Jesús tia, jülüjeerüin naaʼin jaraliin na aneekuushi oʼunuinjanakana nümaa chaa iipünaamüin sünain aluwatawaa. Naya neʼe oʼuneenakana nümaa na waneepiakana nümaa (Juan 14:3).

¹⁶ Eeja paaʼin waneepia. Nnojorüle eejüin naaʼin chi anoujashi chainjachikai iipünaa suulia tü kasa amojujeʼereetkat nukuwaʼipa nümaa Jehová, nnojoleechi chain namaa na aneekuushikana (Mat. 24:31). Müshiʼiya neʼe na wayuu kepiainjanakana yaa saaʼu tü mmakat, oonooinjana naya sümaa tü nümakat Jesús, waneepiainjana naya nümaa Jehová otta eejüinjatü naaʼin suulia sumojujaain nakuwaʼipa nümaa Jehová.

17. ¿Jamüsü nnojotkaʼa wainmajüin waaʼin nüneeküle Jehová wanee anoujashi chainjachikai iipünaa?

¹⁷ Süka weʼraajüin nukuwaʼipa Jehová, watüjaa aaʼu aneerüin süpüshuaʼa tü kasa naaʼinrakat. Jamüshijaʼa nüneeküle Jehová wanee anoujashi süpüla chainjachin nia iipünaa, nnojotsü wainmajüin waaʼin saaʼujee tia. c Soto waaʼin tü nümakat Jesús nachiki na wayuu asakajünakana süpüla aʼyatawaa maʼaka «las cinco aliika» süpüla naʼyataain suluʼu niyüüjase wanee wayuu (Mat. 20:1-16). Wanaawasü tü nneerü nakanajakat namaa na wayuu oʼttatüjüliikana wattaʼa maalü sünain aʼyatawaa. Meeria neʼe nakuwaʼipa na anoujashii aneekuushikana, oʼuneena naya chaa iipünaa waneepiale naya nümaa Jehová jaʼitainna jekenale jee kakaliainnale naya aneekünüin nutuma Jehová.

EEJA WAAʼIN SÜNAIN TÜ NÜMAKAT JESÚS

18, 19. ¿Kasa wekirajaaitpaka anain sünain ekirajaayakat tüü?

¹⁸ ¿Kasa wekirajaaitpaka anain sünain ekirajaayakat tüü? Sünainjee tü nümakat Jesús nachiki na wayuu makana aka saaʼin sukuwaʼipa anneerü jee na makana aka saaʼin sukuwaʼipa kaaʼula, nayaawateerü aaʼu na kepiainjanakana yaa saaʼu tü mmakat waneepiainjanain naya nümaa Jehová maaʼulu yaa otta soʼu tü kaʼi shiʼreetkat maʼin oʼu wayuu müliaa. Süntapa tia kaʼikat, nüneekeena Jesús jaraliin na waneepiakana nümaa Jehová sümaa kateerüin noʼu nutuma süpüla kaʼikat süpüshuaʼa (Mat. 25:46).

¹⁹ Wekirajaaitpa anain piamasü kasa naashajaakalü achiki Jesús jalouijeetka namüin na  anoujashii chainjanakana iipünaamüin. Wanaa sümaa naashajaain Jesús nachiki na polooshiikana majayünnüü, nüküjain jaʼraishiin neʼe na yapajakana süpüla aʼatapajaa chi wayuu kaʼwayuuseinjachikai jaʼitashi kamaʼain nia. Eekajasaʼa tü jaʼraisü majayünnüü maaʼinkana aaʼin, nnojotsü yapajüin sünain aʼatapajaa, nnojoliika nekerotuin nümaa chi kaʼwayuuseinjachikai sünain tü miʼiraa shikiirakat kaʼwayuusee. ¿Kasa watüjaka nanainjee? Yapajüinjana waya jaʼitainna kakaliainnain waya sünain aʼatapajaa tü kaʼi najaʼttirajatkalü oʼu Jesús tü kasa mojusü alatakat sainküin mma. Aashajaashi Jesús nachiki na achepchiee aapünakana amüin nneerü «talento». Piamashii neʼe na achepchiee tütükana sünain aʼyatawaa. Nachajaain sukuwaʼipa süpüla naʼyateʼerüin tü nneerü aapünakat namüin, kachoinjatüin shia jee talatüinjachin chi nalaamainkai nümaa. Eekajasaʼa chi achepchiee shokulashikai ojutunushi yalejee. ¿Kasa watüjaka nanainjee? Waaʼinmaainjatü tü aʼyatawaakat nümüin Jehová sümaʼainruʼu süntüin nükalia. Wekirajaaitpa anain wanee kasa naaʼinrajatka na aneekuushikana, eejüinjatü maʼin naaʼin süpüla nümaainjanain naya Jesús chaa iipünaamüin sünain aluwatawaa. Süchikijee tü atkawaa kanüliakat Armagedón, anteerü tü kaʼi kasaalüinjachikalü oʼu chi anneetchonkai jee yapajüinjatü tü nuʼwayuuseinjatkat. Chi anneetchonkai nia kayaawaseka Jesús jee tü nuʼwayuuseinjatkat nayaawase na anoujashii chainjanakana iipünaa (2 Tes. 2:1; Apoc. 19:7, 9).

20. ¿Kasa naaʼinreetka Jehová waapaale sümaa tü nümakat wamüin?

²⁰ Alüʼütsü tü kaʼi süsalainjatkalü oʼu nutuma Jesús saainjala wayuu, nnojoliipejeʼe mmoluinjanain waya. Waneepiale waya nümaa Jehová naapeerü wamüin tü nüpülainkat süpüla shaʼwatüin waya nümülatuʼu «chi Süchonkai Wayuu» (2 Cor. 4:7; Luc. 21:36). Jaʼitainna chainjanale waya iipünaa jee yaainjanale waya kepiain saaʼu tü mmakat, jülüjainjatü waaʼin tü nikirajakalü anain Jesús. Müle shia watuma, talateerü naaʼin chi Washi iipünaajachikai. Saaʼujee alin waya nüpüla, nüshajeerü wanülia suluʼu «tü karaloʼuta nanüliamaajatkat na wayuu katüinjanakana oʼu» (Dan. 12:1; Apoc. 3:5).