Wasakira waaʼin sünain tüü süpülapünaa wekirajaain: «¿Kasa tatüjaweeka aaʼu sünainjee tüü?». Mayaainjeʼe eein waneirua kasa watüjaweeka aaʼu, eesü wanee kasa naata nikirajeekalü anain waya Jehová sükajee tü pütchi wekirajaakalü anain. ¿Kasa waaʼinrajatka süpüla waapaain sümaa tü nümakat Jehová wamüin?

Puchunta kekiwaa nümüin Jehová. Nnojo anain neʼe paaʼin sümaa tü pütüjaaitpakalü aaʼu (Prov. 3:5, 6). Puchunta kaalinwaa nümüin Jehová süpüla piyaawatüin saaʼu tü pütchi jeketü nikirajeekalü anain pia (Sant. 1:5).

Kojuta pümüin tü nümakat Maleiwa süpüla sütanalüin paaʼin. Müsü katakai soʼu tü Nünüikikat Maleiwa (Heb. 4:12). Waashajeʼerawaitpa tü Bibliakat, atüjeena waya süchiki waneirua kasa jeketü aneetka atuma wakuwaʼipa. Waainjeerü tia wayaawatüle saaʼu choʼujaain wamüin tü nikirajeekalü anain waya Maleiwa.

Ana paaʼin sümaa tü nikirajakalü anain pia Jehová. Tü nikirajakalü anain waya Jehová müsü aka saaʼin wanee eküülü jemetüsü (Is. 25:6). Nnojo puuʼulaain suulia ekirajawaa sünain wanee pütchi süka nnojoluin kamalain shia pümüin. Pikirajaale sünain tia aneerü pukuwaʼipa nutuma Jehová otta kamalainjeerü pümüin ekirajawaa sünain tia pütchikat.