1, 2. ¿Kasa eeka süpüla waaʼinrüin süka anain maʼin wakumajia nutuma Jehová?

 TALATALEESIA maʼin waaʼin wasülajapa suulialeʼeya wasülajünapa amüin, jama nukumajüin waya Jehová sümaa müin wakuwaʼipa (Aluw. 20:35). Talatüsü waaʼin süsülajünapa wamüin wanee kasa, talataleepejeʼe maʼin waaʼin wayale aaʼinrüin kasa napüleerua na waneinnua. Anasü wakuwaʼipa sutuma müin wakumajia nutuma Jehová. Wekirajaa süchiki tia.

² Süka anain maʼin wakumajia nutuma Jehová, aaʼinrüinjana waya kasa süpüleerua wayuu süpüla talataleeinjatüin maʼin waaʼin. Kekiikaiche maʼin Jehová maʼaka anain maʼin wakumajia nutuma (Sal. 139:14).

3. ¿Jamüsü süshajünakaʼa suluʼu tü Bibliakat niain Jehová «chi Maleiwa talatakai aaʼin»?

³ Wayaawatüitpa aaʼu jamüin süshajünaka suluʼu tü Bibliakat niain Jehová «chi Maleiwa talatakai aaʼin» (1 Tim. 1:11). Nia Jehová chi palajachikai sünain asülajaa. Wainmaleesia tü naapakat Jehová suulialeʼeya tü saapakat wayuu wamüin. «Katoʼuchii waya nutuma, warai müshii waya jee wayuushii waya nutuma», müshi Pablo (Aluw. 17:28). Süpüshuaʼa tü kasa eekai anain jee tü eekai lotuin akuwaʼipa naapajala shia wamüin Maleiwa (Sant. 1:17).

4. ¿Kasa waaʼinrajatka süpüla talatüin maʼin waaʼin?

⁴ ¿Kasa waaʼinrajatka süpüla wasülajüin sümaa talataa aaʼin? Washatüinjatü nukuwaʼipa Jehová, wekirajaweerü anain tia (Éf. 5:1). Wekirajaweerü anainña tü waaʼinrajatkat weʼrüle mojutuin namüin na waneinnua tü waaʼinrakat napüleerua. Jalouijeerü wamüin tü wekirajaainjatkalü anain süpüla ayatüin waaʼinrüin kasa anasü napüleerua na wawalayuukana sümaa talatüin waaʼin.

 WASHATA NUKUWAʼIPA JEHOVÁ

5. ¿Kasa naapaka Jehová wamüin?

⁵ Wekirajaa sünain waneirua kasa naapaka wamüin Jehová talatakalü atuma naaʼin. Jamüshijaʼa nia naapüin wamüin tü kasa choʼujaakat wamüin. Eesüjaʼa nnojorüle wainmain korolo wamaʼana, naapapejeʼe Jehová wamüin tü kasa choʼujaakat wamüin, maʼaka saaʼin tü weküinjatkat, tü waʼatüinjatkat wanain otta tü wepiainjatkat (Sal. 4:8; Mat. 6:31-33; 1 Tim. 6:6-8). Nnojotsü nüsülajüin wamüin tia mojusheeka. Wekirajaa sünain jamüin nüsülajaka shia wamüin.

6. ¿Kasa wayaawataka aaʼu sükajee tü sümakat Mateo 6:25, 26?

⁶ Naapüin Jehová wamüin tü kasa choʼujaakat wamüin süka alin waya nüpüla. Wekirajaa sünain tü nümakat Jesús suluʼu Mateo 6:25, 26 (paashajeʼera). Suluʼu tia piamasükat wetsiikulo, nikirajüin waya Jesús sükajee tü wüchiikalüirua. Anuu nünüiki: «Nnojotsü apünajüin, nnojotsü anaajaain shiküin, keküinpejeʼe shia nutuma chi Washi iipünaajachikai. Alanaʼaleesia jaalin nüpüla Maleiwa suulialeʼeya tü wüchiikalüirua». Sükajee tia wayaawata aaʼu naaʼinmajüin waya Jehová, jama kojutuleʼeinña waya suulia tü wüchiikalüirua jee tü mürütkalüirua. Naapüin wamüin Jehová tü kasa choʼujaakat wamüin, jama niain chi Washi aikai apüla waya (Sal. 145:16; Mat. 6:32).

7. ¿Kasa waaʼinrajatka süpüla wasülajüliin maʼaka naaʼinrüin shia Jehová? (Piirakaa sümüin tü ayaakuaakat).

⁷ Aisü wapüla wayuu maʼaka alin wayuu nüpüla Jehová. Waaʼinrüle tia wakaalinjain naya sünain tü kasa choʼujaakat namüin. Jamüshijaʼa eere wanee wawala choʼujaakai amüin eküülü jee shiale tü nüsheʼinjatkat, eeshijaʼa nükaalinjale nia Jehová pükajee. Eʼnnaajünüshii na aküjaliikana pütchi nüchiki Jehová saaʼujee nasülajüliin, naaʼinrüin maʼin tia wanaa sümaa sülatalaʼa sümüin wanee kasa. Jülüjataa waaʼin tü alatakat soʼunnaa tü ayuuliikat COVID-19. Eejana wawalayuu asülajakana süpüshi tü eejatkat namaʼana, maʼaka saaʼin eküülü, kuluulu jee waneirua kasa choʼujaaka namüin na wawalayuukana. Eeshii na wawalayuu asülajakana nneerü süpüla nakaalinjünüin na wawalayuukana sainküinpünaa mmakat eere sülatüin kasa mojusü. Naaʼinrüin naya wawalayuukana tü sümakat Hebreokana 13:16: «Nnojo motuin jaaʼin jaaʼinrüinjanain kasa anasü süpüleerua wayuu jee jüsülajüinjanain namüin wanee kasa eekai  jümaʼanain, jama talatüin naaʼin Maleiwa jaaʼinrüle tia».

8. ¿Kasa waaʼinraka sükajee katchin waaʼin nutuma Jehová? (Filipos 2:13).

⁸ Katchinsü waaʼin nutuma Jehová. Pülashaatashi maʼin Jehová jee katchinsü waaʼin nutuma süka nüchekalain shia (paashajeʼera Filipos 2:13). ¿Puchuntuitche nümüin Jehová süpüla püchecherüin paaʼin suulia paaʼinrüin wanee kasa mojusü suchuntaakat paaʼin? ¿Puchuntuitche nümüin süpüla pülatüin süchikumüin wanee kasa alatakat pümüin? ¿Puchuntuitche nümüin süpüla pikeraajüin tü paaʼinrajatkat? Nusoutapa Jehová shiʼipajee tü puchuntakat nümüin, eesüjaʼa meerüle pünüiki maʼaka naaʼin chi aluwataaushikai Pablo soʼu nümüin: «Katchinsü taaʼin süpüla taaʼinrüin kasa süpüshuaʼa, jama niain Maleiwa katchin atuma taaʼin» (Filip. 4:13).

9. ¿Kasa waaʼinrajatka süpüla asülajüliin waya maʼaka naaʼin Jehová? (Piirakaa sümüin tü ayaakuaakat).

⁹ Nnojotsü süpüla waapüin watchin namüin na wawalayuukana, nia neʼe Jehová eekai süpüla aapüin nütchin namüin. Waaʼinrüitpejeʼe wainma kasa napüleerua isaka nachiki naaʼinrüin. Weʼrüle wanee wawala laülaaichikai jee ayuuire nia, wakaalinja nia sünain ayaʼlajaa wanee kasa choʼujaaka nümüin jee shiale wepitajüin nipia. Müleka eere süpüla wakaalinjain sünain epitajaa jee anoutaa tü Piichi Outkajaaleekat, eesü süpüla waaʼinrüin shia. Waaʼinrüle tia napüleerua na wawalayuukana, meerü waapakai saaʼin namüin tü watchinkat.

10. ¿Kasa waaʼinrajatka süpüla wakatchinrüin naaʼin na wawalayuukana sükajee tü wamakat?

¹⁰ Eesü süpüla wakatchinrüin naaʼin na wawalayuukana sükajee tü wamakat. Paapüle nüchiki wanee wawala choʼujaakai amüin sükatchinnüin naaʼin sümaa sümüliannüin naaʼin, pülapalaa naaʼu, piyamaaja nia jee shiale püshajüin wanee tarjeta jee puluwataain wanee mensaaje süpüla pükatchinrüin naaʼin. Nnojo wainmajüin paaʼin isale püchiki tü pünüikinjatkat nümüin, shia alanaʼaleeinjatka maʼin niyaawatüin saaʼu alin nia püpüla sükajee tü pümakat otta süpüla ayatüin waneepiain nia nümaa Jehová (Prov. 12:25; Éf. 4:29).

11. ¿Jamüsü naapaka wamüin Jehová kekiwaa?

¹¹ Naapüin wamüin Jehová kekiwaa. Anuu tü nüshajakat Santiago: «Jaʼakale wanee wayuu eekai mekiin, anashi nuchuntule waneepia nümüin Maleiwa, kekiijeechikalaka nia nutuma, jama nüsülajülin Maleiwa namüin napüshuaʼa na wayuukana otta nnojoishii naya niyoujain saaʼujee tia» (Sant. 1:5). Matüjainsai Jehová jeʼiyee, naapüin sümüin wayuu kekiwaa. Nnojoishii niyoujain waya saaʼujee wachuntuin nümüin nuʼunirüin wakuwaʼipa. Nücheka  achikit Jehová wachuntuin tia nümüin (Prov. 2:1-6).

12. ¿Kasa waaʼinrajatka watüjale süpüleerua wanee kasa?

¹² ¿Kasa eeka süpüla waaʼinrüin wayakana? Washata nukuwaʼipa Jehová, wekiraja na waneinnua sünain tü kasa watüjakalü apüleerua (Sal. 32:8). Jamüshiijaʼa waya, eeshii süpüla wekirajüin na wawalayuu jekennuukana süpüla natüjain aküjaa pütchi. Akaʼaya neʼe na laülaashiikana nakaalinjain na aʼyataakana neʼipajee jee na tooloyuu jekennuukana woutiisain süpüla anain tü naʼyataainkat suluʼu tü outkajaaleekat. Eeshii wawalayuu kakaliainnakana sünain akumajaa jee anoutaa miichi outkajaalee ekirajaka waneinnua wawalayuu süpüla naaʼinrüin tia.

13. ¿Kasa waaʼinrajatka süpüla washatüin nukuwaʼipa Jehová wekirajapa na waneinnua?

¹³ Washatüin nukuwaʼipa Jehová wekirajapa na waneinnua. Talatüsü naaʼin Jehová saaʼujee kekiin waya nutuma. Müshiʼiya wayakana, talatüsü waaʼin saaʼujee wekirajüin na waneinnua tü watüjakalü apüleerua. Nnojotsü wainmajüin waaʼin saaʼujee nütüjain woulia chi wawala wekirajakai anain tü watüjakalü apüleerua. «¿Jamüshi nnojoikai nikirajaain nümüiwaʼa? Eeyaain tekirajünüin tayakai paala», nnojotsü anain müle wanüiki. Nnojotsü meein wakuwaʼipa wayakana aʼyataashiikana nümüin Jehová. Talatüsü waaʼin süka natüjain wanainjee na wawalayuukana. Talatüshiʼiya waya süka wachajaain sukuwaʼipa süpüla natüjaain saaʼu tü wekirajakalü anain naya (1 Tes. 2:8). Tü keeʼireekat waaʼin napüleerua shia natüjainjanain ekirajaa wayuu (2 Tim. 2:1, 2). Wekirajüle na waneinnua tü watüjakalü apüleerua, kekiijeena naya jee talateerü maʼin naaʼin. Müshiʼiya wayakana kekiijeena maʼin waya jee talataleejeeria maʼin waaʼin wanaa namaa.

MOJUTULE NAMÜIN TÜ WAAʼINRAKAT NAPÜLEERUA

14. ¿Kasa naaʼinraka waneinnua wayuu saaʼujee waaʼinrüin kasa anasü napüleerua?

¹⁴ Eeshii na aapakana analuʼut saaʼu tü kasa waaʼinrakat napüleerua, eeshii wawalayuu ashajakana carta wamüin eere naküjain kojutuin namüin wakaalinjain naya (Col. 3:15). Talatüsü waaʼin süka weʼrüin kojutuin namüin tia.

15. ¿Kasa jülüjainjatka waaʼin nnojorüle saapünüin wamüin analuʼut saaʼujee tü waaʼinrakat?

¹⁵ Eesü nnojoleerüle saapünüin wamüin analuʼut saaʼujee tü waaʼinrakat. Eeshiijaʼa wakatarüle kaʼi jee shiale wakataajüin nneerü süpüla wakaalinjain wanee wayuu, nnojotpejeʼe weʼrayaain kojutuin nümüin tü waaʼinrakat nüpüleerua. ¿Kasa waaʼinrajatka süpüla nnojoluin sümalajaain waaʼin? ¿Kasa waaʼinrajatka süpüla ayatüin talatüin waaʼin? Soto waaʼin tü wayaawatakalü aaʼu sünainjee tü sümakat Aluwataaushikana 20:35. Talataleejeeria maʼin waaʼin ayatüle wasülajüliin jaʼitairü nnojoluin saapünüin wamüin analuʼut saaʼujee tü waaʼinrakat. Wekirajaa sünain waneirua kasa waaʼinrajatka.

16. ¿Kasa jülüjainjatka waaʼin?

¹⁶ Jülüja paaʼin püshatüin nukuwaʼipa Jehová püsülajüle. Asülajüi maʼin Jehová jaʼitainna eein na mojutukana amüin tü naaʼinrakat napüleerua (Mat. 5:43-48). Nüküjain Jehová namüin na aʼyataashiikana nümüin nasülajüliinjanain sümaa nnojoluin jülüjain naaʼin keeʼirakainjatüin shia namüin (Luc. 6:35). Nnojo mojuin paaʼin nnojorüle naapüin analuʼut pümüin na waneinnua. Soteesü paaʼin naapeerüin pümüin Jehová kasa anasü saaʼujee tü paaʼinrakat napüleerua na waneinnua jee soteesü paaʼin alin nüpüla chi wayuu asülajakai sümaa talataa aaʼin (2 Cor. 9:7; Prov. 19:17).

17. ¿Jamüshii wasülajüliinjanakaʼa maʼaka naaʼin Jehová? (Lucas 14:12-14).

 ¹⁷ Wanee kasa paaʼinrajatka mojutule namüin na waneinnua tü paaʼinrakat napüleerua shia paaʼinrüin tü sümakat Lucas 14:12-14 (paashajeʼera). Nnojotsiaajeʼe mojuin wakaalinjale na eekana süpüla akaalinjain waya. Jülüjainjatpejeʼe waaʼin jamüin wakaalinjeeka na waneinnua, ¿shiache sutuma waʼatapajüin naapüin wamüin wanee kasa? Müle wakuwaʼipa mayaa, wachajaa sukuwaʼipa süpüla waaʼinrüin tü nümakat Jesús, wasülaja nümüin wanee wayuu isakai achiki nüleʼejirüin tü waaʼinrakat nüpüleerua. Waaʼinrüle tia talateerü maʼin waaʼin saaʼujee washatüin nukuwaʼipa Jehová otta saaʼujee kamaneein waya sümaa nnojoluin waʼatapajüin saapünüin analuʼut wamüin.

18. ¿Kasa waaʼinrajatka süpüla nnojoluin jülüjain waaʼin matüjain aapaa analuʼut na waneinnua?

¹⁸ Nnojo jülüjain paaʼin matüjain aapaa analuʼut na waneinnua (1 Cor. 13:7). Waaʼinrüle wanee kasa nüpüleerua wanee wayuu sümaa nnojoluin naapüin analuʼut wamüin, eesüjaʼa wasakirüle waaʼin sünain tüü: «¿Mojutusüche nümüin tü taaʼinrakat nüpüleerua? ¿Shiataapa motuin naaʼin naapüin analuʼutkat tamüin?». Eesüjaʼa sülatüle wanee kasa nümüin nnojotka jaʼyain atuma naaʼu talatüin naaʼin saaʼujee tü kasa waaʼinrakat nüpüleerua. Eeshiʼiya na japüikana aaʼin saaʼujee nakaalinjünüin, shialeekajaʼa nayapuʼule akaalinjain na waneinnua jee isale nachiki naaʼinrüin tia maaʼulu. Aire wapüla na wawalayuukana, nnojoleerü jülüjakuʼu müin waaʼin kasa nachiki saaʼujee nnojoluin naapüin analuʼut wamüin. Ayateena waya aaʼinrüin kasa anasü napüleerua sümaa talatüin waaʼin (Éf. 4:2).

19, 20. ¿Jamüsü nnojoluinjatkaʼa süshapajaain waaʼin nnojorüle saapünüin analuʼut wamüin? (Piirakaa sümüin tü ayaakuaakat).

¹⁹ Nnojo püshapajaain aaʼin, eesü saapüneerüle pümüin tü analuʼutkat mapa. Anuu wanee pütchi nümaka chi aluwataashikai Salomón anaka maʼin: «Pujuta tü pankat shiroku tü wüinkat, süka jamüin, puusüteerüin sünain mapa sülatapa kojuya kaʼi» (Ecl. 11:1). Wayaawata  aaʼu eejeenain wayuu aapakana analuʼut wamüin «kojuya kaʼi» mapa. Jülüjataa waaʼin tü alatakat sümüin wanee wawala.

²⁰ Jamüsüjaʼa nuʼwayuuse wanee wawala alapalaaikai naaʼu na wawalayuukana, ashajüsü wanee karaloʼuta sümüin wanee wawala jeketükat sünain woutiisaa, süküjain sümüin waneepiainjatüin shia nümaa Jehová. Anuujeseʼe tü süshajakat tü wawala jeketükat woutiisain mekiisat juya süchikijee tia: «Ashajüsü taya pümüin süpüla taküjain pümüin pükaalinjain maʼin taya. Anasü maʼin tamüin tü pütchi püshajamaʼainkat tamüin, sütanalüin taaʼin tü wetsiikulo püshajakat. Sotowaisü taaʼin tia waneepia». a Süküjain sümüin waneirua müliaa shiʼraka, anuu sünüiki: «Eepuʼusü isale tachiki tü takuwaʼipainjatkat, jülüjale taaʼin tooʼulaweein suulia anoujaa jee tooʼulaweein suulia aaʼinraa waneirua kasa. Jülüjapejeʼe maʼin taaʼin tü wetsiikulo püshajakat tamüin, sükaalinjain taya tia pütchikat süpüla ayatüin taaʼinrüin tü nüchekakat Jehová. Soʼunnaa tü mekiisat juya alatüitpakat, sütütüleʼerüin maʼin taaʼin tü wetsiikulo püshajakat tamüin». Talatakajasaʼa maʼin saaʼin nuʼwayuuse chi wawala alapalaaikai naaʼu na wawalayuukana saashajeʼerapa tia karaloʼutakat. Waaʼinrüle kasa nüpüleerua wanee wayuu, eesüjaʼa naapeerüle wamüin analuʼut «kojuya kaʼi» mapa.

21. ¿Jamüsü anakaʼa püshatüle nukuwaʼipa Jehová?

²¹ Wekirajaaitpa anain talataleein maʼin waaʼin wasülajapa suulialeʼeya wasülajünapa amüin, jama nukumajüin waya Jehová sümaa müin wakuwaʼipa. Anasü waaʼin wakaalinjapa na wawalayuukana sümaa naapüin analuʼut wamüin. Jaʼitairü nnojoluin naapüin analuʼut wamüin, talatüsia waaʼin saaʼujee waaʼinrüin tü nüchekakat Jehová. Alanaʼaleejeeria tü naapakat Jehová wamüin suulia tü kasa waapakat namüin na waneinnua (2 Crón. 25:9). Talataleesia waaʼin saaʼujee tü kasa naapakat Jehová wamüin. Kamaneeshi maʼin Jehová, müsüjeseʼe nnojoluin amülain neʼe tü waaʼinrakat washatüle nukuwaʼipa.