Nnojotsü jülüjainjatüin waaʼin nooʼulaain suulia nümaain Jesús na akaratshishiikana nekii nikirajüin süka nnojoluin eejanain naya nümaa soʼu nüikaleʼerüin shikii tü ekawaa aipaʼajatkat nutuma jee nnojotsü jülüjainjatüin waaʼin nnojoluichipain talatüin Jesús namaa. Tü nüchekakat soʼu aikat tia shia eeinjachin nia namaa na polookana piamamüin aluwataaushi.

Talatüshi Jesús namaa na polookana piamamüin aluwataaushi jee müshiʼiya namaa na akaratshishiikana nekii nikirajüin. Nüneeküin palajana poloo piamamüin nikirajüin, «aluwataaushi» münüshii naya nutuma (Luc. 6:12-16). Chajachi Jesús Galilea soʼu nuutkajeʼerüin na polookana piamamüin aluwataaushi. Nüjütaka naya sünain aküjaa süchiki nuluwataajeechin Maleiwa otta süpüla naawaleʼerüin wayuu eekai ayuulin (Luc. 9:1-6). Shiasaʼa mapa chakuaika nia uuchimüin suluʼu tü pueulo kanüliakat Judea, nüneekaka «akaratshishii nekii wayuu nooʼomüin na nikirajüinkana, nüjütakalaka naya nüpüleerua suluʼu piamawalin naya» (Luc. 9:51; 10:1). Eepünaale süküjünüin tü pütchikat eejana wayuu nikirajüin.

Na judío oushikajaakana süchiirua nukuwaʼipa Jesús naainjawalin tü Pascuakat juyawai, eesüjaʼa naainjale shia namaa na napüshikana (Éx. 12:6-11, 17-20). Süpülapünaa outuin Jesús oʼunushi nia namaa na polookana piamamüin aluwataaushi Jerusalénmüin. Nnojotsü nuchuntuin namüin na nikirajüin kepiakana Judea, Galilea otta Perea naainjainjatüin tü Pascuakat nümaa. Eesüjaʼa nücheküle eeweein nia namaa na polookana piamamüin aluwataaushi soʼu aikat tia. Müshijeseʼe nümüin namüin: «Suchuntaain taaʼin tekaain tü Pascuakat jümaa süpülapünaa teʼrüin tamüliala» (Luc. 22:15).

¿Jamüshii nayakaʼa neʼe nümaain na polookana piamamüin aluwataaushi? Nütüjaa aaʼu outajachin nia süpüla nülaʼajaain saainjala wayuu, jama niain «chi Anneetchon nümaʼanajeejachikai Maleiwa» (Juan 1:29). Outajachi nia Jerusalén eere saʼajünapuʼuin mürüt nümüin Maleiwa maʼaka sümaiwa paala. Sutuma tü anneerü nekakat na israelitakana sükalioʼu tü Pascuakat, sotusü naaʼin taashin naya nutuma Jehová Egiptojee. Alanaʼaleepejeʼe tü eejeetkat sünainjee outuin Jesús, taasheerü wayuu nutuma suulia kaainjalaa jee outaa (1 Cor. 5:7, 8). Na anoujashiikana müshii aka saaʼin wanee miichi akumajünaka saaʼu wanee ipa. Sünainjee outuin Jesús, müinnapa aka saaʼin tü ipa akumajünakalü aka süsaʼa tia miichikat na polookana piamamüin aluwataaushi (Éf. 2:20-22). Anasü maʼin tü süküjakat tü Bibliakat süchiki tü jeketükat Jerusalén. Ashaʼwaleʼennüsü shia saaʼu poloo piamamüin ipa jee ashajünüsü sünain tia ipakat nanülia na polookana piamamüin aluwataaushi (Apoc. 21:10-14). Nikeraajeerü Jehová tü nüchekakat wapüleerua nakajee na polookana piamamüin aluwataaushi. Müsüjeseʼe niküin Jesús namaa tü chiiruaajatkat Pascua jee nüikaleʼerüin tü ekawaa aipaʼajatkat nutuma.

Soʼu aikat tia nnojoishii eejanain nümaa Jesús na akaratshishiikana nekii nikirajüin otta müshiʼiya na waneinnua. Aneetpejeʼe nakuwaʼipa napüshuaʼa na nikirajüinkana Jesús waneepiakana nümaa sünainjee tü ekawaa aipaʼajatkat nutuma. Anuujeseʼe nünüiki Jesús namüin na polookana piamamüin aluwataaushi: «Tapansaajüinjaʼa joo tanüiki jümüin süpüla juluwataainjanain wanaa tamaa». Napüshuaʼa na anoujashii aneekünakana aluwataainjana naya nümaa Jesús chaa sirumatuʼu (Luc. 22:29, 30).