1, 2. ¿Jamüsü eeka süpüla shapaain naaʼin na kachonshiikana naapeere naaʼin nachonnii nümüin Jeʼwaa jee woutiiseere naya?

WAINMAINNA wayuu ekirajaakana sünain tü Wiwüliakat aapakana naaʼin nümüin Jeʼwaa jee woutiisakana. Wainma na jimaʼalii ekirajünakana sünain tü shiimainkat tepichiiwaʼaya naya jee aneekakana tü akuwaʼipa anasükat (Sal. 1:1-3). Piʼyataale nümüin Jeʼwaa, eesüjaʼa piʼreere amüin tü kaʼi woutiisakalü oʼu püchonnii (anasü paashajeʼerüle 3 Juan 4).

² Eepajaʼa süpüla shapaain paaʼin. Eesüjaʼa piʼrüle wainmain na jimaʼalii woutiisakana jee süchikijee wainmajüin naaʼin süchiki shiimainre aneerüin nakuwaʼipa naaʼinrüle tü nümakat Maleiwa. Eeshii na ooʼulaakana suulia tü shiimainkat. Eesüjaʼa shapaale paaʼin nuʼttule chi püchonkai sünain aʼyatawaa nümüin Jeʼwaa, süka eein süpüla mojutuin nümüin tü shiimainkat mapa. Eesüjaʼa süpüla müin nukuwaʼipa chi püchonkai maʼaka nakuwaʼipa na anoujashi chajanakana  Éfeso. «Eemiajaasü tü naalinkat jüpüla, nnojoluitpa müin aka paalainka jikerotoiwaʼaya sünain anoujaa», müshi Jesuu namüin (Alat. Map. 2:4, TNM). ¿Kasaka paaʼinrajatüin süpüla ayatüin alin maʼin Jeʼwaa napüla püchonnii jee nasaʼwatüin oʼtteʼennaa? (1 Ped. 2:2, TNM). Wekirajaa sünain tü nukuwaʼipakat Timoteo.

3. (1) ¿Joujachi oʼttüin Timoteo sünain anoujaa? ¿Kasa naaʼinraka süka tü nikirajaakalü anain? (2) ¿Jarat tü apünüinsükat kasa nüküjaka Pablo nümüin Timoteo?

³ Tü palajatkat nukua chi aluwataaushikai Pablo chaa Listra soʼujatü tü juyakat 47. Eeshijaʼa jimaʼaire Timoteo soʼu tia jee nikirajaale nüchiki Jesuu. Eesüjaʼa niʼitaale sünain nukuwaʼipa tü nikirajaakalü anain, müshijeseʼe nuʼunüin nümaa Pablo piama juya süchikijee tia. Anuu nünüiki Pablo nümüin Timoteo 16 juya süchikijee nuʼunüin nümaa: «Aluʼujasa piakai, anakaja müleka ayatüle pia sünain tü ekirajünakat anain, tü pünoujakat anain, süka pütüjaain saaʼu sünain shiimüin tü wamakat wayakana na ekirajakana pia. Jintüliiwaʼaya pia, pütüjaatüjülia aaʼu tü ashajuushikat suluʼu tü karaloukta nüchikimaajatkat Maleiwa, tü kekiikat atüma wayuu süpüla oʼtteʼennaa sünainjee anoujaa nünain Jesucristo» (2 Tim. 3:14, 15). Jülüjataa paaʼin tü nümakat Pablo nümüin Timoteo, 1) pütüjaatüjülia aaʼu tü ashajuushikat, 2) tü punoujakalü anain, 3) tü kekiikat atüma wayuu süpüla oʼtteʼennaa sünainjee anoujaa nünain Jesukürisüto.

4. ¿Kasa jikirajaka aʼaka na jüchonniikana? (Piirakaa sümüin tü ayaakuaa suluʼukat süpana 15).

⁴ Akaʼaya piakai süka piʼyataain nümüin Jeʼwaa, pücheküin napüleerua püchonnii neʼraajüin tü ashajuushikat süka hebreo otta griego. Jaʼitainna joʼuuyüliin püchonnii eesü süpüla natüjaain saaʼu tü süküjakat tü Wiwüliakat nachiki waneinnua wayuu namaiwajana. Eesü sutuma nupueulose Jeʼwaa karaloʼutairua jee wainma video eeka süpüla nekirajüin aka nachonnii na kachonshiikana. ¿Eesüche tia suluʼu wayuunaiki? Choʼujaasü namüin na jüchonniikana neʼraajüin tü sümakat tü Wiwüliakat süpüla aleewain naya nümaa Jeʼwaa.

5. (1) ¿Jamaluʼulu tü pütchi «tü pünoujakat anain» makat? (2) ¿Jamüsü watüjaaka saaʼu nunoujain Timoteo tü aküjünakat nümüin nüchiki Jesuu?

⁵ Nnojoishii neʼe jikirajüinjanain jüchonnii sünain tü süküjakat tü Wiwüliakat nachiki waneinnua wayuu namaiwajana. «Tü pünoujakat anain» müshi Pablo nümüin Timoteo. Tü pütchi griego nuchuntakat Pablo, «nütüjaashaataka aaʼu» otta «shiimain nümüin wanee kasa», maluʼulu. Nütüjaatüjülia aaʼu Timoteo tü ashajuushikat süka Hebreo «jintüliiwaʼaya» nia. Jee mapa nütüjaashaata aaʼuchi niain Jesuu chi Mesíaskai. Sutuma katsüin nunoula Timoteo sünain tia, woutiisashi nia jee misioneeroshi nia mapa nümaa Pablo.

6. ¿Kasa paaʼinrajatka süpüla katsüin nunoula püchon sünain tü Wiwüliakat?

⁶ ¿Kasa paaʼinrajatka süpüla katsüin nunoula püchon maʼaka naaʼin Timoteo? Nnojo püshapataain aaʼin, nnojoleerü katsüinmaatüin nunoula waneemüin kaʼi. Nnojoleechi anoujain püchon sünain wanee kasa sutuma punoujain sünain nüpüleerua. Süpüla katsüin nunoula, niyaawatüinjatüin  saaʼu tü sümakat tü Wiwüliakat chi jintüikai jee tü jintutkat shiale (paashajeʼera Roma 12:1, TNM). Jia kachonshiikana, wainmale tü kasa natüjaweekalü aaʼu jüchonnii, eeshii süpüla jükaaliinjain naya süpüla katsüin nanoula. Wekirajaa sünain tü naaʼinrakat wanee wawala süpüla katsüin sunoula nüchon.

7, 8. (1) ¿Jamüsü nnojotka süshapataain naaʼin Thomas sünain ekirajaa nüchon? (2) ¿Alatüirü pümüin tü alatakat nümüin Thomas?

⁷ Wainma tü kasa asakinnakalü anain Thomas sutuma tü nüchonkat, eereje 11 suuyase. «¿Nukumajüinche Jeʼwaa wayuu sümaa mürüt süka tü evolucionkat? ¿Jamüshii nnojoliika sünainpünaain waya wayuu? Jamüshiijaʼa wawotaajüle eesü süpüla sunoutaain nakuwaʼipa», müsü nümüin. Eeshi nüchecherüle naaʼin suulia nüküjajaain sümüin tü nanoujakalü anain. Nütüjaa aaʼulu Thomas, nnojoluin nunoujamaatüin wanee wayuu tü shiimainkat uatuoshi, kojuyatuainjatü emeʼejünüin naaʼin.

⁸ Nütüjaa aaʼulu Thomas nnojoluinjatüin ashapataain naaʼin sünain ekirajaa nüchon. Choʼujaasü wamüin wapüshuaʼa waya anoujashiikana nnojoluinjatüin kashapajaaralüin waaʼin (Col. 3:12). Niyaawata aaʼulu Thomas sülatüinjatüin wainma kaʼi otta wainmatuainjachin nia yootuin sümaa nüchon süpüla katsüinjatüin sunoula. Nimeʼejüinjatü saaʼin süpüla sunoujain tü nikirajakalü anain shia suluʼujee tü Wiwüliakat. Anuu nünüiki Thomas: «Sütüjawee aaʼulu tü taʼwayuusekat otta tayakai shiimainre sunoujain tü wachonkat sünain tü wekirajaakalü anain shia. Anasü waaʼin süka süsakirüin waya. Mojuinje waaʼin sunoujale sünain süpüshuaʼa tü münakat sümüin sümaa nnojoluin süsakirüin süchiirua».

9. ¿Kasa paaʼinrajatka süpüla nunoujain püchon tü sümakat tü Wiwüliakat?

⁹ Nnojorüle süshapataain naaʼin na kachonshiikana sünain ekirajaa nachonnii, nayaawateerü aaʼu mapa jamüin shiimainka tü nanoujakalü anain (Éf. 3:18, TNM). Eeshii süpüla wekirajüin naya wanaapünaa sümaa nouyase jee tü nountakat nayaawatüin aaʼu. Shiasaʼa katsüinpa nanoula, mapüleejeerü namüin nasoutüin saaʼu tü nanoujakalü anain sümüin wayuu jee namüin na koleejiajiraakana namaa (1 Ped. 3:15). Püsakirapa paaʼin, ¿eesüche süpüla nüküjain püchon süka tü Wiwüliakat kasain alataka wamüin outule waya? ¿Pansaasüche namüin tü süküjakat tü Wiwüliakat süchiki tia? * Soto paaʼin nnojoluinjatüin süshapataain paaʼin pükaaliinjeere püchon süpüla nunoujain tü sümakat tü Wiwüliakat. Paaʼinrüle shia, piʼreerü kasa anasü sünainjee (Deut. 6:6, 7).

10. ¿Kasa naaʼinrajatka na kachonniikana süpüla nekirajüin nachonnii?

 ¹⁰ Choʼujaapejeʼe laülaainjatüin paaʼin sünain anouja nüpüleerua püchon süpüla nushatüin sukuwaʼipa punoula. Jamüsüjaʼa Stephanie, apünüinsü süchonnii. Anuu sünüiki: «Joʼuuiwaʼaya tachonnii, tasakirapuʼuin taaʼin: ¿Taküjainche sümüin tachonnii jamüin tatüjaaka maʼin saaʼu eein Jeʼwaa, aipüralin nia otta lotuin nukuwaʼipa? ¿Shiʼrüinche maʼin tachonnii alin maʼin tapüla Jeʼwaa? Nnojoleerü sunoujain tachonnii tia nnojorüle shiimain maʼin shia tamüin».

11, 12. ¿Kasa wayu tü kekiwaakat? ¿Jamüsü nnojotka choʼujaain miyoʼuin wanee wayuu süpüla kekiin nia?

¹¹ Watüjaa aaʼuchi Timoteo sünain 1) nütüjaatüjülüin aaʼu tü ashajuushikat otta 2) nunoujain sünain shiimain tia. ¿Kasa nüküjeeka achiki Pablo nümüin Timoteo wanaa sümaa nümüin «tü kekiikat atüma wayuu süpüla oʼtteʼennaa»?

¹² Saashin tü karaloʼutakat Perspicacia, volumen 2, «kekiishi maʼin chi wayuu atüjakai anouteʼeraa tü kasa alatakat nümüin süka tü kasa nütüjaakalü aaʼu. Akayalaashi suulia tü kasa mojeetkalü atuma nukuwaʼipa. Nüsaʼwatüin tü niʼitaakalü nüpüleerua jee nütütüleʼerüin naaʼin na waneinnua süpüla nasaʼwatüin tü neʼitaakat napüleerua. Naata sümüin suulia tü malaakat». Saashin tü Wiwüliakat, «suluʼusü naaʼin chi jintüikai tü malaakat» (Prov.  22:15, noota). Shiimain naatain tü kekiwaakat suulia tü malaakat. Nia kekiika wanee wayuu eekai laülaain aaʼin. Laülaasü naaʼin wanee wayuu sünain anouja kojutule Jeʼwaa nümüin jee noonoole nümaa, nnojoishi niain neʼe kekiin wanee wayuu eekai miyoʼuin (paashajeʼera Salmo 111:10).

13. ¿Jamüsü nakuwaʼipa na tepichi kekiikana süpüla oʼtteʼennaa?

¹³ Na tepichi laülaakana aaʼin sünain anouja nnojoishii «joojüin süpüla eʼikeʼennaa» sutuma tü suchuntaakat naaʼin jee sutuma tü namakat na waneinnua namüin (Éf. 4:14). Atüjashii naya «süpüla nayaawatüin saaʼu anale jee mojule wanee kasa» (Heb. 5:14, TNM). Akaʼaya naya, anasü tü kasa naaʼinrakat jee tü naneekakat, jaʼitainna nnojoliin nashi otta nei jee wanee wayuu miyoʼu eʼrajakana naaʼu (Filip.  2:12). Choʼujaasü namüin kekiinjanain naya süpüla noʼtteʼennüinjanain (paashajeʼera Proverbios 24:14). ¿Kasa paaʼinrajatka süpüla kekiin püchonnii? Pütüjaainjatü aaʼu, natüjaale saaʼu jaralüin tü akuwaʼipaa noʼunajatka achiirua. Tü kasa paashajaakalü achiki otta tü paaʼinrakat, shiiʼiyateerü namüin piʼitaale sünain pukuwaʼipa tü sümakat tü Wiwüliakat (Roma 2:21-23).

14, 15. (1) ¿Kasa jülüjüinjatka naaʼin wanee jintüi eekai woutiiseein? (2) ¿Kasa paaʼinrajatka süpüla jülüjain naaʼin püchon tü kasa anasü niʼreetkat naaʼinrüle tü nümakat Maleiwa?

¹⁴ Nnojotpajaʼa püküjainjatüin neʼe tü  anakat jee tü mojukat nümüin püchon süpüla katsüin nunoula. Choʼujaasü pikirajüin nia süpüla nüsakirüin naaʼin jee niyaawatüin saaʼu pütchi makatka tüü: ¿Jamüsüche mojuka saashin tü Wiwüliakat waneirua kasa anaka saaʼin wamüin? ¿Jamüsü watüjaaka saaʼu aneerüin wakuwaʼipa waaʼinrüle tü sümakat tü Wiwüliakat? (Isa. 48:17, 18).

¹⁵ Woutiiseere püchon, nütüjaainjatü aaʼu nnojoluin shaittaain tia, nütüjaainjatü aaʼu laülaainjatüin naaʼin otta naaʼinrajatüin tü nümakat Jeʼwaa nümüin. ¿Jamüsüche naaʼin süchiki tia? ¿Nütüjaa aaʼuche tü kasa anasü eekat suluʼujee tia? ¿Nütüjaa aaʼuche eein tü kasa eejiraainjachikalü amaa nia? ¿Nütüjaa aaʼuche jamüin sülanaʼaleejeetka tü kasa anasü niʼreetkat suulia tü kasa mojusükat? (Mar. 10:29, 30). Choʼujaasü maʼin nütüjaain saaʼu tia süpülapünaa nuwoutisaajünüin. Pükaaliinja püchon süpüla jülüjain naaʼin tü kasa anasü niʼreetkat naaʼinrüle tü nümakat Maleiwa nümüin jee tü kasa mojusü alateetkat nümüin nnojorüle naaʼinrüin shia. Müle shia putuma, nütüjaajeerü aaʼu aneerüin nukuwaʼipa naaʼinrüle waneepia tü sümakat tü Wiwüliakat (Deut. 30:19, 20).

16. ¿Kasa paaʼinrajatka sümatsüinjaale nunoula püchon eekai woutiisain?

¹⁶ ¿Kasa paaʼinrajatka wainmajüle naaʼin wanee püchon süchiki tü nunoujakalü anain süchikijee woutiisain nia? Eesüjaʼa  kamalainre nümüin püchon tü naaʼinrakat na manoujainsaliikana. Eesüjaʼa wainmajüle naaʼin süchiki shiimainre anain sukuwaʼipa wayuu saaʼinrüle tü sümakat tü Wiwüliakat (Sal. 73:1-3, 12, 13). Eeshi süpüla ayatüin jee nuuʼulaain suulia aʼyatawaa nümüin Jeʼwaa sutuma tü paaʼinrakat jee tü pümakat nümüin shiʼipajee tia. Nnojo jashichin pia nümüin saaʼu tia, jaʼitaichi jintülin jee jimaʼalin nia. Shia anaka püküjale nümüin alin nia püpüla jee pükaaliinjeein nia.

17, 18. Wainmajüle naaʼin püchon süchiki tü nunoujakalü anain, ¿kasa paaʼinrajatka süpüla pükaaliinjain nia?

¹⁷ Chi jintüi woutiisakai naapüin naaʼin nümüin Jeʼwaa. Nüpansaajüin nünüiki nümüin Jeʼwaa alinjachin nia nüpüla jee niʼyataainjachin nümüin sooʼopünaa kasa süpüshuaʼa (paashajeʼera Marcos 12:30). Kojutusü nümüin Jeʼwaa wapansaajüle wanüiki nümüin sünain waapüinjatüin waaʼin nümüin jee kojutuinjatü shia wamüinya (Ecl. 5:4, 5). Nütüjaainjatü aaʼu tia chi jintüikai. Paashajeʼerüinjatpejeʼe palajana sümaa pikirajaain sünain tü karaloʼuta eekat sutuma tü nupueulosekat Jeʼwaa napülajatka na kachonshiikana. Anale pünüiki jee anale tü kaʼi püneekakat, eesü süpüla püsoʼirüin naaʼin püchon naapüitpain naaʼin nümüin Jeʼwaa jee woutiisaitchipain nia süka naaʼin nümüiwaʼa, jee nnojoluin shaittaain tia otta wainmeerüin kasa anasü niʼreetka sünainjee.

¹⁸ «Niyoutuin tachon tü shiimainkat», nnojoishii mamaatüinjanain waya saashin tü apendicekat «Los padres preguntan» (Los jóvenes preguntan, volumen 1). Watüjaainjatpejeʼe saaʼu kasain müin aaʼujee nia. Eeshi apüleeruaanüle nia atumawaa jee mojule naaʼin süka nümüiwaʼain nia. Eesü shiale süka niʼrüin anain maʼin naʼyataain na wane jimaʼaliikana nümüin Jeʼwaa nuulia. Nnojoleechipajaʼa nia ooʼulaain suulia aʼyatawaa nümüin Jeʼwaa sutuma tia, saashin tia pütchikat. Eesüjaʼa shiale kasirüin waneirua kasa eejiraaka amaa nia. Süküjain tia apendicekat waneirua kasa naaʼinrajatka na kachonshiikana süpüla nakaaliinjain nachonnii wainmajüle naaʼin süchiki tü nanoujakalü anain.

19. ¿Kasa naaʼinrajatka na kachonshiikana süpüla kekiinjanain nachonnii süpüla oʼtteʼenaa?

¹⁹ Süka piain kachonka naya, piainjachi ekirajaka püchonnii «sünain tü nuluwataakat anain chi Maleiwakai» (Éf. 6:4). Wekirajaaitpa anain, nekirajüinjanain nachonnii na kachonshiikana tü shikirajakat tü Wiwüliakat. Nakaaliinjainjana naya süpüla shiimainjatüin namüin tü ekirajünakalü anain naya. Katsüinpa nanoula, naapeerü naaʼin nümüin Jeʼwaa süka naaʼin namüiwaʼa, jee aʼyataajeena naya nümüin süka süpüshuaʼa naaʼin. Sükajee tü Wiwüliakat, chi naaʼinkai Maleiwa otta ayatüle pükaaliinjain püchon, nounteerü «tü kekiikat atüma wayuu süpüla oʼtteʼennaa».