TALATÜSÜ waaʼin kamaneere wayuu wamüin jee kojutule waya sümüin. ¿Kasaka waaʼinrüinjatüin süpüla kamaneeinjanain waya?

Saashin tü Wiwüliakat, chi eekai kamaneein kapülasü naaʼin sukuwaʼipa wayuu, jaʼyasü tia saaʼu nünüiki jee tü naaʼinrakat süpüla nümüliajüin wayuu. Kamaneere nia, nnojotsü nüsaküin neʼe wayuu jee anain maʼin nünüiki, aisü nüpüla shia jee aisü nümüin tü kasa alatakat sümüin. Tü kamanewaakat shia wanee akuwaʼipaa eeka nutuma chi naaʼinkai Maleiwa, makalaka kamaneeinjanain waya (Gal. 5:22, 23). Wekirajaa sünain tü naaʼinrakat Jeʼwaa nümaa Jesuu eeʼiyataka kamaneein naya otta tü waaʼinrajatkat süpüla washatüin nakuwaʼipa.

Kamaneeshi Jeʼwaa sümüin wayuu süpüshuaʼa, jaʼitakajeʼe sümüin «wayuu eekai kaainjalain [otta] eekai nnojolüin saapüin analuʼut nümüin» (Luc. 6:35). Jamüshijaʼa Jeʼwaa, «nüntirüin nuwarala chi kaʼikai je nüʼitirüin tü juyakat sünainmüin wayuu eekai kaainjaralin je eekai anamiain» (Mat. 5:45). Jaʼitakajeʼe na nnojoliikana anoujain sünain niain Jeʼwaa kakumalain tü kasakalüirua, anasü nakuwaʼipa sutuma kamaneein nia namüin otta eeshii neʼrüle talataa nutuma.

Wekirajaa sünain tü naaʼinrakat Jeʼwaa süpüla niiʼiyatüin nümanee nümüin Adán sümaa Eva. Süchikijeechon kaainjalain Adán sümaa Eva, «nayaawanajaa amaalü masheʼinyuuin naya. Naʼyapüjakalaka joo wane naicheyaa süpana tü wunuʼu «higuera» münakat». Nütüjaapejeʼe saaʼu Jeʼwaa anainjatüin nasheʼin süka nnojoluinjanain kepiain naya suluʼu tü apainkat Edén, süka jamüin, eeinjatüin mojuui otta wunuʼu keipüsesü eeʼewaliinjanale naya. Müshijeseʼe nukumajüin Jeʼwaa namüin «wane sheʼiinua süka süta mürüt» (Gén. 3:7, 17, 18, 21).

Mayaainjeʼe niiʼiyatüin Jeʼwaa nümanee sümüin «wayuu eekai kaainjaralin je eekai anamiain», naya niiʼiyateeka maʼin amüin nümanee na waneepiakana nümaa. Soʼu nükalia Zacarías, eejachi wanee aapiee shapaaka aaʼin saaliijee süshaʼwaleʼennüin suulia sukumajünüin tü süsepükat Jerusalén. Naapaka Jeʼwaa nünüiki chia aapieekai jee nüküjaka nümüin pütchi atütüleʼeraka naaʼin (Zac. 1:12, 13). Meematsia aka saaʼin tü naaʼinrakat Jeʼwaa nüka Elías. Soʼu wanee kaʼi, ayüülajaashi Elías, nuchuntaka outaʼiree nümüin Jeʼwaa. Süka jülüjain naaʼin Jeʼwaa jamüin naaʼin Elías, nuluwataain wanee aapiee nünainmüin süpüla nütütüleʼerüin naaʼin otta süpüla nütüjaain saaʼu nnojoluin nümüiwaʼain nia. Süka süküjünüin pütchi analuʼut nümüin Elías otta nükaalinjünüin, ayatüsia naaʼinrüin tü aʼyatawaa aluwataanakalü anain nia (1 Rey. 19:1-18). Eeshi wanee wayuu kamaneekai maʼin maʼaka naaʼin Jeʼwaa.

Soʼu yaajachin Jesuu mmapaʼa, eʼnnaajünüshi nia süka kamaneein nia sümüin wayuu. Nnojoishi  eʼrülin nia wayumüin otta nnojotsü nüpüleeruain saaʼin wayuu süpüla saaʼinrüin tü nümakat. Kapülasü naaʼin Jesuu sukuwaʼipa wayuu, makaʼa nümüin: «Anakajaʼa müleka jüntüle tanainmüin jia mapüsakana otta na jawatakana aaʼin, taapaiwa jümüin eemerawaa süpüla süsamalaainjatüin jaaʼin. Nnojotsü tachuntuin wanee kasa eekai kapüleein» (Mat. 11:28-30, TNM). Müsüjeseʼe suʼunuin wayuu nüchiirua Jesuu. Süka nümüliajülin, nikirüin wayuu, niiyajüin naya otta nikirajüin sünain wainma kasa nüchiki chi Nüshikai (Mar. 6:34; Mat. 14:14; 15:32-38).

Amüliajüi Jesuu otta niyaawata aaʼu tü choʼujaakat sümüin wayuu. Niiʼiyatüin nümanee namüin na wayuu antakana nünainmüin, jaʼitashi mapüsain nia (Luc. 9:10, 11). Soʼu wanee kaʼi, arütkaasü wanee wayuu ayuuisü nünainmüin Jesuu, polooirü piamamüin juya amülain isha sümüin. Shipettaka sot nüsheʼin, anaka shia. Nnojoishi süpüla nipettünüin wanee wayuu sutuma wanee jierü eekai amülain isha sümüin saashin tü Pütchi aapünakat nümüin Moisés (Lev. 15:25-28). Nnojoipejeʼe aʼülüjüin Jesuu sümüin. Anuu nünüiki sümüin süpüla nümüliajüin shia: «Nii waaʼiraa, anaitpa pia süka pünoujain tanain. Anasü puʼunüle sünain anain paaʼin. Müiria nnojolüin müliain pia sütüma tü ayuuliikat» (Mar. 5:25-34). ¡Kamaneekaiche maʼin Jesuu!

Sünainjee tü wekirajaaitpakalü anain, watüjaa aaʼu niiʼiyatüin wanee wayuu nümanee sükajee tü kasa naaʼinrakat. Süpüla waaʼinrüin kasa anasü süpüleerua wayuu, nüküjain Jesuu süchiki tü naaʼinrakat wanee wayuu samariajeʼewai. Mayaainjeʼe paʼünüüwajiraain na samariajeʼewaliikana namaa na judíokana, ayatüshia amüliajünüin wanee judío nutuma wanee samariajeʼewai. Aʼluwajünüshi, asheʼejünüshi jee ojunaanüshi chi judíokai soʼuluʼu tü wopukot sutuma kaʼruwarannuu. Niasaʼa chi samariajeʼewaikai, niiyajüin nülioʼu chi judíokai, nüntirüin nia suluʼumüin wanee atunkülee jee awalaajüshi nia süpüla naaʼinmajünüin chi mayeinshikai. Nümakalaka nümüin chi aaʼinmajüshikai: «Müleka cheʼojaale pümüin sooʼomüin, piʼitaajeerü neʼe. Tawalaajeeru pümüin taleʼejapa» (Luc. 10:29-37).

Eesü süpüla weeʼiyatüin wamanee sükajee tü kasa waaʼinrakat otta tü wamakat süpüla wakatsüinrüin saaʼin wayuu. Mojushaatasü naaʼin wanee wayuu sutuma tü shapaakalü atuma naaʼin. Talatapejeʼe nia sütütüleʼennüle naaʼin süka pütchi anasü saashin tü Wiwüliakat (Prov. 12:25). Talateerü naaʼin na waneinnua watuma waaʼinrüle kasa anasü napüleerua. * Jee müsia talateerü naaʼin kamaneere waya namüin otta watütüleʼerüle naaʼin süka pütchi analuʼut (Prov. 16:24).

Eeshii süpüla kamaneein waya süka müin wakuwaʼipa maʼaka saaʼin nukuwaʼipa Maleiwa (Gén. 1:27). Wekirajaa nachiki waneinnua wayuu namaiwajannuu kamaneekana maʼin. Eejachi wanee sülaülashi surulaat, Julio nünülia. Amaanüshi Pablo nutuma Julio Roomamüin. Süka kamaneein Julio nümüin Pablo, nalatapa suluʼupünaa tü pueulokot Sidón, «nuuʼulaain nia nuwaraijaain saaʼu tü nütünajunnuukat otta naapünajachin amüin natüma tü choʼujaakat nümüin» (Aluw. 27:3). Shiasaʼa mapa, amüliajünüshi Pablo otta waneinnua wayuu natuma na wayuu chajanakana Malta süchikijee sujuʼichajaain tü anuwa kalujunakat naya. Nayasaʼa na wayuu chajanakana Malta, nachuwajaaka siki sümaa miyoʼuin maʼin suwarala natuma süpüla naaturujüin Pablo otta na waneinnua otta nakaalinjain naya sünain tü choʼujaakat namüin (Aluw. 28:1, 2). Anashantasü maʼin tü naaʼinrakat naya wayuukana.

Kamaneeinjana waya waneepia, nnojotsü waaʼinrüinjatüin neʼe tia soʼu wanee kaʼi. Talateere maʼin Jeʼwaa watuma, weeʼiyatüinjatü wamanee waneepia sümüin wayuu. Eesüjaʼa kapüleere wamüin waaʼinrüin waneepia kasa anasü sümüin  wayuu. ¿Kasa kapüleeka atuma tia? Eesü shiale sutuma nayoutuin wapüleerua waküjain pütchi, japüleʼere waya jee shiale sutuma jülüjain neʼe waaʼin wakuwaʼipa wamüiwaʼa. Eepejeʼe süpüla kamaneein waya jüüjüüle waya nümüin chi naaʼinkai Maleiwa otta washatüle nukuwaʼipa Jeʼwaa (1 Cor. 2:12).

¿Kasa waaʼinrajatka süpüla kamaneeinjanain waya? Püsakira paaʼin sünain pütchikat tüü: «Nüküjale tamüin wanee wawala tü alatakat nümüin, ¿jülüjasüche taaʼin jamüin naaʼin? ¿Jülüjasüche taaʼin tü choʼujaakat namüin na waneinnua? ¿Eeiche taainjain wanee kasa anasü nüpüleerua wanee wayuu nnojoika tapüshin jee nnojoikai taʼaleewain?». Eesü süpüla wachajaain sukuwaʼipa süpüla weʼraajüin na wayuukana, nayapejeʼe na wawalayuukana weʼraajüinjanaka maʼin akuwaʼipa. Waaʼinrüle tia, watüjaajeerü aaʼu tü alatakat namüin jee tü kasa choʼujaakat namüin. Watüjaale saaʼu tia, waaʼinreerü kasa anasü namüin, maʼaka wacheküin naaʼinrüin kasa anasü wamüin (Mat. 7:12). Jee müsia, wachunta kaalinwaa nümüin Jeʼwaa süpüla kamaneeinjanain waya waneepia (Luc. 11:13).

Watüjaa aaʼuchi Pablo kamaneein nia sünainjee tü kasa anasü naaʼinrakat süpüleerua wayuu. Saashin tü Wiwüliakat, «kapülawaisü naaʼin süpüshuaʼa tü eekai suwaraijaain naaʼu» (Aluw. 28:30, 31). Jaʼyasü naaʼu Pablo kapülain naaʼin sukuwaʼipa wayuu saaʼujee tü nümakat jee tü naaʼinrakat. Müsüjeseʼe aleeweein wayuu nümaa. Jamüshiijaʼa kamaneere waya, kamalainjeerü sümüin wayuu shikirajaain sooʼomüin nüchiki Maleiwa. Jaʼitakajeʼe na aainjakana kasa mojusü wamüin, eesü süpüla neeʼiratüin nakuwaʼipa kamaneere waya namüin (Roma 12:20). Otta eeshii süpüla nekirajaain sünain tü Wiwüliakat mapa.

Paʼaraiisüpa tü Mmakat, wainmeerü wayuu asoʼiraaka aaʼin. Shiasaʼa neʼrapa kamaneein wayuu namüin, talateerü naaʼin otta kamaneejeena naya. Naapeerü Jeʼwaa kataa oʼuu waneepia namüin na aipüraliikana wayuu otta namüin na kamaneekana. Akanasaʼa na mamaneekana, nnojoleerü katüin noʼu waneepia (Sal. 37:9-11). Anashaateerü sukuwaʼipa tü mmapaʼakat suluwataapa Nuluwataaya Maleiwa. Sümaʼinruʼu waʼatapajüin tia kaʼikat, ¿kasa anasü weʼreetka maaʼulu kamaneere waya?

Saashin tü Wiwüliakat, aneerü nukuwaʼipa chi wayuu kamaneekai (Prov. 11:17). Aleeweesü wayuu nümaa wanee wayuu eekai kamaneein otta süshateein nukuwaʼipa. Müshi Jesuu: «Matüjüinre asülajaa jia sümüin wayuu, meeria jukuaippa nütüma Maleiwa» (Luc. 6:38). Chi wayuu makai akuwaʼipa, mapüleesat nümüin aleewaa sümaa wayuu.

Anuu nünüiki Pablo namüin na anoujashii chejeʼewaliikana Éfeso: «Shia anakaja aluʼu müleka anamiajiraale jia jümüin jüpüshua sümaa aijiraain jia jüpüla. Anakaja müleka motüle jaaʼin naainjala wane juwala» (Éf. 4:32). Kamaneejiraale jee namüliajiraale na wawalayuukana, katsüinsü nanoula jee paaʼinwajiraashii naya. Nnojotsü airuʼuluin nanüiki, nnojoishii katuraaraliin naya otta nnojoishii nayoujüin na waneinnua. Natütüleʼerüin naaʼin süka pütchi analuʼut otta nnojoishii aküjain perulaa nachiki (Prov. 12:18). Sutuma tia, talatüshii maʼin naya sünain aʼyatawaa nümüin Jeʼwaa.

Wekirajaaitpa anain jaʼyain waaʼu kamaneein waya sükajee tü wamakat jee tü waaʼinrakat. Kamaneere waya, weeʼiyatüin sünain aipüralin waya jee wasülajüliin maʼaka naaʼin Jeʼwaa (Éf. 5:1). Waaʼinrüle tia, katsüinjeerü nanoula na wawalayuukana otta ekeroteerü wayuu sünain anoujaa. Weeʼiyata sükajee wakuwaʼipa, wayuuin kamaneeshii na aküjaliikana pütchi nüchiki Jeʼwaa.