ALATÜSÜ suulia 80 suuyase Diana. Ayuuishi chi suʼwayuusekai sutuma wanee ayuulii Alzheimer münüsü, anaajaashi nia eere naaʼinmajünüin na laülaayuucheinkana. Anaajaashii piamashii süchonnii Diana otta kansetsü süchira. Mayaainjeʼe wainmain tü kasa alatakat sümüin Diana, ayatüsia neʼrüin na wawalayuukana talatüin saaʼin waneepia sünain tü outkajawaakat jee sünain tü aküjaakat pütchi.

Alatüsü suulia 43 juya nülapalaain John naaʼu na wawalayuukana. Kojutusü maʼin nümüin tia aʼyatawaakat, nuuʼulaapejeʼe shia süpüleerua naaʼinmajüin wanee nüpüshi ayuuika. Ayatüsia talatüin naaʼin John naashin na wawalayuu eʼraajakana nia nantiraapa nümaa sünain wanee outkajawaa miyoʼu.

¿Jamüsü talataka naaʼin John sümaa Diana? ¿Jamüsü talataka saaʼin Diana mayaainjeʼe shiʼrüin müliaa? ¿Jamüsü talataka naaʼin John mayaainjeʼe nuuʼulaain suulia tü niʼyataakalü anain nümüin Maleiwa? Anuu sünüiki tü Wiwüliakat: «Chi wayuu lotokoi akuwaʼipa talateechi maʼin nutuma Jeʼwaa» (Sal. 64:10). Wekirajaa sooʼomüin süchiki tü kasa talatakalü atuma waaʼin jee tü kasa nnojotkat talatüin atuma waaʼin.

Eesü waneirua kasa talataka atuma waaʼin, maʼaka saaʼin kasaalüin waya, kachoin waya jee shiale saapünüin wamüin wanee aʼyatawaa suluʼu nupueulose Maleiwa. Anasü waaʼin sutuma tia süka nüsülajalain shia wamüin Jeʼwaa. Nia Jeʼwaa keʼinaajalaka sukuwaʼipa kaʼwayuusee otta kachonwaa, nia aapaka aʼyatawaa wamüin suluʼu tü nupueulosekat (Gén. 2:18, 22; Sal. 127:3; 1 Tim. 3:1).

Eesüjaʼa nnojorüle talatüin maʼin waaʼin waneepia sutuma tia kasakalüirua. Jamüshijaʼa wanee wayuu, eesü süpüla sünaajaain nuʼwayuuse jee shiiʼirataale nuulia (Ezeq. 24:18; Os. 3:1). Eeshiijaʼa neʼrüliire wayumüin na tepichikana namüin na kachonniikana naya jee nümüin Maleiwa, müshiijeseʼe eein süpüla nojuʼitinnüin naʼakajee na wawalayuukana. Jamüshiijaʼa na nüchonniikana Samuel akaaʼinjaashii naya nuulia Jeʼwaa; jee müshia David kaainjalashi nia jee eʼrüsü müliaa nüpüshi sünainjee tia (1 Sam. 8:1-3; 2 Sam. 12:11). Makalaka mojushaatain naaʼin wanee wayuu sülatüle tia nümüin.

Eesü isale wachiki ayatüin waaʼinrüin wanee aʼyatawaa aapünaka wamüin suluʼu nupueulose  Maleiwa saaʼujee ayuulin waya, saaʼujee waaʼinmajüinjanain wapüshi jee shiale saaʼujee suʼwanajaain sukuwaʼipa tü kasa aainjünakat suluʼu nupueulose Maleiwa. «Talatapuʼuyaaka taaʼin sünain tü taʼyataapuʼukalü anain paala», eeshii na wawalayuu makana anüiki.

Jaʼitakajeʼe wanee aʼyatawaa aapünaka wamüin sutuma nupueulose Maleiwa, nnojotsü shiain tü talateetkalü atuma waaʼin waneepia. Eepejeʼe wanee kasa talateetka atuma waaʼin waneepia, jaʼitairü kasain alatüin wamüin. Müsüjeseʼe talatüin naaʼin waneepia Samuel, David otta waneinnua wayuu mayaainjeʼe wainmain kasa alataka namüin.

Nütüjaa aaʼu Jesuu tü kasa talatakalü atuma naaʼin waneepia wanee wayuu. Anashaatasü nukuwaʼipa wanaa sümaa chajachin nia iipünaa. Müsüjeseʼe talatüin maʼin naaʼin waneepia nümaa Jeʼwaa (Prov. 8:30). Wainma tü kasa mojusü eejiraakalü amaa Jesuu wanaa sümaa yaajachin nia mmapaʼa. Mayaainjeʼe sülatüin tia nümüin, ayatüsia talatüin maʼin naaʼin sünain aaʼinraa tü nüchekakat chi Nüshikai nüpüleerua (Juan 4:34). ¿Kasa achechetka naaʼin Jesuu süpülapünaachon outuin nia? Anuu sünüiki tü Wiwüliakat süchiki tia: «Sükajee tü talataa eʼitaanakat nüpüleerua, nüchecherüin naaʼin soʼunnaa nükachennüin sünain wanee wunuʼu» (Heb. 12:2, TNM). Wekirajaa sünain piamasü kasa nüküjaka Jesuu süchiki tü talatüinjatkalü atuma waaʼin.

Soʼu wanee kaʼi, aleʼejüshii 70 nikirajüin Jesuu süchikijee naküjain pütchi wattapünaa. Talatüsü maʼin naaʼin süka naainjain wainma kasa pülasü, maʼaka nayuʼlüin yolujaa süleʼeruʼujee wayuu. Anuu nünüiki Jesuu namüin: «Nnojo talatüin neʼe jaaʼin saaʼu jüujüüin tü yolujaakalüirua jümüin. Talata jia saaʼu [süshajünüin jünülia chaa iipünaa, TNM]» (Luc. 10:1-9, 17, 20). Tü kojutuleeinjatkat maʼin wamüin shia tü wakuwaʼipakat nümaa Jeʼwaa, shia talateetka maʼin atuma waaʼin suulialeʼeya wanee aʼyatawaa aapünaka wamüin sutuma nupueulose Maleiwa.

Soʼu wanee kaʼi, wanaa sümaa nikirajüin Jesuu watta saalii wayuu, eejatü wanee wayuu judío maka nümüin: «Anataʼaleesüjaʼa maʼi tü wayuu kachonkat pia». Nümaka Jesuu sümüin: «Naya müleʼoka anaa amüin na aapakana nünüiki Maleiwa sünain noonooin sümaa» (Luc. 11:27, 28). Anale nakuwaʼipa püchonnii, talatüsü paaʼin namaa. Shiapejeʼe talateerüin maʼin atuma paaʼin poonoole sümaa nünüiki Jeʼwaa otta aleewale pia nümaa.

 Tü talateetkalü atuma waaʼin waneepia shia watüjaale saaʼu anain tü wakuwaʼipakat noʼuluʼu Jeʼwaa. Eesü süpüla ayatüin talatüin waaʼin mayaainjeʼe sülatüin kasa mojusü wamüin. Wanaa sümaa wachecherüin waaʼin soʼunnaa müliaa otta waneepiain waya nümaa Jeʼwaa, talataleesia maʼin waaʼin (Roma 5:3-5). Jülüja waaʼin naapüin Jeʼwaa chi naaʼinkai namüin na eʼitaakana naaʼin nünain, naapüin Jeʼwaa wamüin tü talataakalü aaʼin nükajee chi naaʼinkai (Gal. 5:22). Müsüjeseʼe sümüin Salmo 64:10: «Chi wayuu lotokoi akuwaʼipa talateechi maʼin nutuma Jeʼwaa».

Wayaawata aaʼu sünainjee tia jamüin talataka naaʼin waneepia John otta Diana mayaainjeʼe kapüleein tü alatakat namüin. Anuu sünüiki Diana: «Nia tawataamaataka anainmüin Jeʼwaa, maʼaka nuwataamaatüin wanee jintüi nünainmüin nüshi. Teʼrüin nükaalinjain taya Jeʼwaa süpüla ayatüin taküjain tü pütchikat sümaa talataa aaʼin». ¿Kasa eeka süpüla waküjain nüchiki John? Naashin John, aneekünüshi nia soʼu 1998 süpüla nikirajüinjachin sünain tü kanüliakat Escuela de Entrenamiento Ministerial. Ekirajaashi maʼin John wanaa sümaa tia. Sutuma naaʼinrüin tia, talatüsü maʼin naaʼin otta waneepiashi nia sünain aküjaa pütchi süchikijee nuuʼulaain suulia alapalawaa naaʼu na nuwalayuukana. Naashin John, nnojotsü kapüleein maʼin nümüin otta sümüin nuʼwayuuse nooʼulaainjanain suulia tü aʼyatawaa aapünakat paala namüin, süka jamüin, anain namüin naʼyataain eere najütünüin nutuma Jeʼwaa. «Talatüsü maʼin waaʼin saaʼu tü waneekakat», müshi John sümaa nuʼwayuuse.

Wainma na wawalayuu eʼrakana shiimain tü sümakat Salmo 64:10. Jülüja waaʼin tü alatakat nümüin wanee wawala sümaa nuʼwayuuse, alatüsü suulia 30 juya naʼyataain suluʼu tü Weteet chakat Estados Unidos. Aküjünüsü namüin pürekutsoolüinjanain pesiaat naya. Anuu nanüiki: «Shiimain mojuin waaʼin müleka wooʼulaale suulia wanee aʼyatawaa kamalainka maʼin wamüin, nnojoluinjatpajaʼa isainjatüin waaʼin waneepia süchiirua tia». Oʼttamaatüshii naya sünain aküjaa pütchi namaa na wawalayuu nantakana amaʼanamüin, müshii naya: «Wanaa sümaa woʼuraajüin waküjain nümüin Jeʼwaa tü kasa choʼujaakat wamüin. Shiasaʼa weʼrapa nusoutuin Jeʼwaa shiʼipajee tü wachuntakat maʼin nümüin, talatashaatasü waaʼin otta akatchinraasü waaʼin. Nayasaʼa noʼutku na wawalayuu woutkajaakana amaa, pürekutsootshii naya sutuma neʼrüin pürekutsooliin waya. Talataleesia maʼin waaʼin sükajee wekirajüin piamashii wayuu kooʼomüinka anoula».

Eejeerü kaʼi nnojoleetka oʼu talatüin waaʼin. Nümülialapejeʼe waaʼin Jeʼwaa sükajee tü nümakat wamüin suluʼu Salmo 64:10. Jaʼitairü nnojoluin waaʼin sünain aaʼinraa wanee kasa, watüjaa aaʼu talateerüin naaʼin chi wayuu lotokoi akuwaʼipa sünain aaʼinraa tü nüchekakat Jeʼwaa nüpüleerua. Talateerü waaʼin waneepiale waya nümaa Jeʼwaa, jaʼitasü kasain alatüin wamüin. Waʼatapajüin maʼin tü kaʼi eeinjatkalü oʼu «wanee sirumatuʼu jeketü jee müsia wanee mma jeketü». Soʼu kaʼikat tia, loteerü nakuwaʼipa na aʼyataashiikana nümüin Maleiwa otta talateerü naaʼin waneepia sutuma tü kasa anasü naaʼinrakat Jeʼwaa napüleerua (Is. 65:17, 18).

Anashaateerü maʼin wakuwaʼipa soʼu tia. Nnojoleena ayuulin waya otta nnojoleerü kasain alin wanain. Nnojoleerü jülüjain waaʼin tü kasa mojukalü atuma waaʼin maaʼutpünaa jee shiale wanee kasa mojusü eekai sülatüirüin wamüin. Nüküjain wamüin Jeʼwaa nnojoleerüin jülüjain waaʼin tü kasa alatüitpakat. Otta müsia süka süsoʼiraainjatüin naaʼin na outushiikana, weʼreena nachikuaʼa na wapüshi anaajaakana. Talatashaateerü maʼin saaʼin watta saalii wayuu soʼu tia, maʼaka talatüin naaʼin süshi jee shii tü jintut asoʼiraakalü aaʼin nutuma Jesuu (Mar. 5:42). Anteerü wanee kaʼi eere lotuinjatüin sukuwaʼipa wayuu süpüshuaʼa saaʼu tü Mmakat, shiimain talateerüin naaʼin süpüla kaʼikat süpüshuaʼa sünain aaʼinraa tü nüchekakat Jeʼwaa.