1. ¿Jamüsü nütüjaaka saaʼu Abrahán naapeerüin Maleiwa tü nümakat nümüin?

 NÜKÜJAIN Jehová nümüin Abrahán, chi naʼaleewainkai, anakuwaʼipaliijeenain watta naalii wayuu nünainjee wanee nüchon (Gén. 15:5; 22:18). Nütüjaa aaʼu Abrahán nikeraajeerüin Maleiwa tü nümakat saaʼujee kanoulain nia nünain. Mayaainjeʼe laülaaichin Abrahán jee laülaairüin tü nuʼwayuusekat sümaa machooin shia nümüin, ayatüsia nunoujain Abrahán sünain nikeraajeerüin Maleiwa tü nümakat nümüin (Gén. 21:1-7). Müsü sünüiki tü Bibliakat nüchiki Abrahán: «Nütüjaa aaʼu Abrahán süshinjachin nia wayuu maʼleekalia mayaapejeʼe müin kapüleekai saaʼin tia. Nunouja anainrü tü münakat nümüin» (Roma 4:18). Ekeraajüsiaʼaya tü kasa anasü naʼatapajakat Abrahán, kachonshi nia, Isaac nünülia chi nüchonkai. ¿Jamüsü watüjaaka saaʼu niʼitaain maʼin naaʼin Abrahán sünain nikeraajeerüin Maleiwa tü pütchi nüpansaajakat nümüin?

2. ¿Jamüsü watüjaaka saaʼu niʼitaain maʼin naaʼin Abrahán sünain nikeraajeerüin Maleiwa tü pütchi nüpansaajakat nümüin?

² Shia saaʼujee aleewain maʼin nia nümaa Jehová. «Niʼitaain maʼin naaʼin Abrahán sünain nikeraajeerüin Maleiwa tü pütchi nüpansaajakat nümüin» (Roma 4:21). Sutuma kanoulain Abrahán nünain Jehová, lotusü nukuwaʼipa noʼuluʼu suluʼujee tia (Sant. 2:23). Maʼaka süküjain Roma 4:18, kanoulashi Abrahán jee naʼatapajüin tü kasa anasü naapüinjatkat Maleiwa nümüin. Wekirajaa sünain tü nümakat chi aluwataaushikai Pablo suluʼu  Roma kapiitulo 5 süchiki tü kasa anasü waʼatapajakat nutuma Maleiwa.

3. ¿Kasa nüküjaka Pablo süchiki tü kasa anasü waʼatapajakat?

³ Nüküjain Pablo jamüin nnojoleetka «mojuin waaʼin kanoulale waya sünain weʼreenain kasa anasü» (Roma 5:5). Nüküjainña Pablo tü waaʼinrajatkat süpüla kanoulain maʼin waya sünain weʼreerüin shikeraajüin tü kasa anasü waʼatapajakat. Sümaʼainruʼu pikirajaain sünain tü nümakat Pablo suluʼu Roma 5:1-5, jülüja paaʼin jamüin piʼitaaleejeetka maʼin paaʼin sünain nikeraajeerüin Maleiwa tü nümakat. Wekirajaa palajana süchiki tü kasa anasü waʼatapajakat nutuma Maleiwa.

4. ¿Kasa aashajaanaka achiki suluʼu Roma 5:1, 2?

⁴ (Paashajeʼera Roma 5:1, 2). Nüshajüin Pablo tia pütchikat namüin na anoujashii chajanakana Roma. Naya anoujashiikana atüjashii naya nüchiki Jehová otta Jesús, kanoulashii naya otta naapaain amaa tü anoujaakat. Lotuitkalaka nakuwaʼipa noʼuluʼu chi Maleiwakai sünainjee kanoulain naya otta naapüin tü nüpülainkat namüin. Eekalaka süpüla naʼatapajüin wanee kasa anashaatasü maʼin otta kanoulashii naya sünain neʼreerüin tia.

5. ¿Jarat tü kasa anasü aapünüinjatkat namüin na aneekuushikana?

⁵ Ashajüshi mapa Pablo namüin na anoujashii aneekuushikana süchiki tü kasa anasü naapüinjatkat Maleiwa namüin (Éf. 1:18). Otta nüküjain Pablo namüin na anoujashii chajanakana Colosas saapünüinjatüin namüin tia chaa sirumatuʼu (Col. 1:4, 5). Tü kasa anasü naʼatapajakat na aneekuushikana shia chainjanain naya iipünaa sünain aluwatawaa nümaa Cristo (1 Tes. 4:13-17; Apoc. 20:6).

6. ¿Jamüsü nünüiki wanee wawala süchiki tü kasa anasü naʼatapajakat?

⁶ Kojutusü namüin na anoujashii aneekuushikana tü kasa anasü aapünüinjatkat namüin. Anuu nünüiki chi wawalakai Frederick Franz, noʼutku nia na aneekuushikana: «Shiimain weʼreerüin shikeraajüin tü kasa anasü waʼatapajakat  nutuma Maleiwa. Naapeerü shia Maleiwa namüin na 144.000 aneekuushikana. Tü kasa anasü aapünüinjatkat wamüin, alanaʼaleesia suulia wanee kasa». Watta saalii juya niʼyataaka oʼu chi wawalakai Frederick nümüin Maleiwa. Müshi nia soʼu 1991: «Ayatüsia kojutuin wamüin tü kasa anasü waʼatapajakat, [...] kojutuleesia shia wamüin jaʼitainna kakaliain waya sünain aʼatapajaa süpüla saapünüin wamüin. Kojutushaatasü tamüin maaʼulu tü kasa anasü waʼatapajakat».

7, 8. ¿Jarat tü kasa anasü naʼatapajakat na aʼyataashiikana nümüin Jehová?

⁷ Watta maʼin naalii na anoujakana nünain Jehová aʼatapajakana tü kasa anasü aapünüinjatkat nümüin Abrahán. Naʼatapajüin katüinjatüin noʼu süpüla kaʼikat süpüshuaʼa yaa saaʼu tü Mmakat nuluwataapeena Maleiwa (Heb. 11:8-10, 13). Ashajüshi Pablo süchiki tia (paashajeʼera Roma 8:20, 21). Wanaa sümaa pütüjaain saaʼu tü kasa anasü eejeetkat mapeena saashin tü Bibliakat, ¿jarat tü kamalainkat pümüin? ¿Shiache kamalainka pümüin nnojoleerüin püleʼeruʼuin süchiki kaainjalaa soʼu wanee kaʼi? ¿Shiataapa piʼreenain nachikuaʼa suluʼu tü Paʼaraiisükat na püpüshi outuinnapakana? Watta saalii tü kasa anasü piʼreetkat nutuma Maleiwa.

⁸ Jaʼitashii kepiainjanale waya chaa iipünaa jee yaainjanale kepiain waya yaa mmapaʼa, talatüinjanaʼaya waya sümaa tü kasa aapünüinjatkat wamüin. Eesü süpüla wakooʼomüinrüin tü wanoulakat sünain weʼreerüin tia kasa anasükat. Nüküjain Pablo tü waaʼinrajatkat süpüla wountuin tia. Wekirajaa sünain tü nümakat süchiki tü kasa anasü waʼatapajakat. Sünainjee tia weʼitaʼaleejeeria maʼin waaʼin sünain nikeraajeerüin Maleiwa tü nümakat wamüin.

9, 10. ¿Kasa alateetka namüin na anoujashiikana maʼaka sülatüin nümüin Pablo? (Roma 5:3; piirakaa sümüin tü ayaakuaakat).

⁹ (Paashajeʼera Roma 5:3). Naashin Pablo waʼatapajaleejeeria tü kasa anasü weʼreetkat weʼrüle müliaa. Eesüjaʼa ponule waaʼin tia. Watüjaa aaʼu neʼreenain müliaa napüshuaʼa na oushikajaakana  süchiirua nukuwaʼipa Cristo. Jülüjataa waaʼin tü nümakat Pablo namüin na anoujashii chejeʼewaliikana Tesalónica. Müshi nia: «Wanaa sümaa chajanain waya jümaa waapirapuʼuin jia süchiki weʼrüinjanain müliaa, jütüjaa aaʼu shiainjaʼaya alatüin tia» (1 Tes. 3:4). Anuu tü nüshajakat Pablo namüin na chejeʼewaliikana Corinto: «Tawalayuwaa, anasü jütüjaale saaʼu tü müliaa weʼrakat [...], ayoʼujaasü maʼin waaʼin, outajanayaa waya waaʼinruʼu» (2 Cor. 1:8; 11:23-27).

¹⁰ Müsia maaʼulu, eʼrüshii müliaa na anoujashiikana (2 Tim. 3:12). ¿Eʼrüshiche pia müliaa saaʼujee punoujain nünain Jesús jee saaʼujee puushikajaain süchiirua nukuwaʼipa? ¿Nemeeʼerainpalashiche pia paʼaleewainyuu jee püpüshi saaʼujee punoujain? ¿Napüleeruasüche paaʼin na aʼyataajiraakana pümaa shiiʼiree nnojoluin lotuin pukuwaʼipa sünain aʼyatawaa? (Heb. 13:18). ¿Müliashiche pia natuma na sülaülashiikana mma saaʼujee püküjain sümüin wayuu süchiki tü kasa anasü naaʼinrajatkat Maleiwa? Jaʼitairü jeʼtsüin tü müliaa weʼrakat, talatüinjanaʼaya waya naashin Pablo soʼunnaa tia. ¿Jamüshii talatüinjanaka waya naashin Pablo?

11. ¿Jamüsü anaka wachecherüle waaʼin soʼunnaa müliaa?

¹¹ Eeshii süpüla talatüin waya soʼunnaa müliaa sünainjee tü kasa weʼreetkat suluʼujee. Saashin Roma 5:3 weʼrüle müliaa, eesü süpüla wachecherüin waaʼin suluʼujee tia. Eʼreena müliaa napüshuaʼa na anoujashiikana, müsüjeseʼe choʼujaain nachecherüin naaʼin soʼunnaa tia. Waaʼinrüle tia, weʼreerü tü kasa anasü naapüinjatkat wamüin Maleiwa. Nnojotsü meein wakuwaʼipa maʼaka naaʼin chi wayuu naashajaakai achiki Jesús, chi makai aka saaʼin sukuwaʼipa waüyee ejituukat saaʼu ipa. Chia wayuukai naapüin tü pütchikat sümaa talatüin naaʼin. Shiasaʼa «sülatapa nümüin kasa mojusü jee nüpüleeruaanapa aaʼin saaʼujee nunoujain, ooʼulaashi nia suulia anoujaa» (Mat. 13:5, 6, 20, 21). Shiimain nnojoluin talatüin waaʼin weʼrüle müliaa, eepejeʼe süpüla weʼrüin kasa anasü suluʼujee tia wachecherüle waaʼin. ¿Kasa anasü weʼreetka?

12. ¿Jamüsü aneetka wakuwaʼipa wachecherüle waaʼin soʼunnaa müliaa?

¹² Nüküjain Santiago weʼreenain kasa anasü wachecherüle waaʼin soʼunnaa müliaa. Müshi nia: «Shiakalaka anain aluʼu jüchecherüle jaaʼin soʼunnaa tü kasa alatakat jümüin, loteetkalaka jukuwaʼipa sünain kasa süpüshuaʼa otta nnojoleetkalaka eein wanee kasa mojukuwaʼipatkat jutuma» (Sant. 1:2-4). Wachecherüle waaʼin soʼunnaa müliaa, nnojoleerü ashapalaain waaʼin, kanouleena waya jee weʼitaajeerü waaʼin nünain Maleiwa. Eepejeʼe sooʼomüin kasa anasü weʼreetka.

13, 14. (1) ¿Jameerü naaʼin Jehová wachecherüle waaʼin soʼunnaa müliaa? (2) ¿Kaseerü waaʼinraka wayaawatüle saaʼu talatüin Jehová wamaa? (Roma 5:4).

¹³ (Paashajeʼera Roma 5:4). Nüküjain Pablo talateechin Maleiwa wamaa wachecherüle waaʼin soʼunnaa müliaa. Shiimain talateechin Jehová pümaa püchecherüle paaʼin soʼunnaa müliaa. Nnojotsü aküjüneein sükajee tia talatüin naaʼin Jehová sünainjee piʼrüin müliaa. Tü talatakalü atuma naaʼin Maleiwa shia sutuma anain pukuwaʼipa noʼuluʼu. Anasü maʼin sutuma watüjaain saaʼu talatüin Jehová wamaa saaʼujee wachecherüin waaʼin soʼunnaa müliaa (Sal. 5:12).

¹⁴ Sutuma nüchecherüin naaʼin Abrahán soʼunnaa müliaa, talatüshi Jehová nümaa, aleewashi nümaa otta lotusü nukuwaʼipa noʼuluʼu (Gén. 15:6; Roma 4:13, 22). Eesü süpüla müin wakuwaʼipa noʼuluʼu Jehová. Talatüshi nia wamaa, nnojotsü shiain saaʼujee wainmain tü waʼyataainkat nümüin jee saaʼujee wanee aʼyatawaa aapünakat wamüin. Talatüshi nia wamaa wachecherüle waaʼin soʼunnaa  müliaa süpüla waneepiain waya nümaa. Jaʼitairü jeʼtsüin wouyase, wakuwaʼipa jee tü watüjakalü apüleerua, eesü süpüla wountuin wachecherüin waaʼin soʼunnaa müliaa. ¿Püchecherüinche paaʼin maaʼulu soʼunnaa müliaa? Mülejeʼeya tia, talatüshi Jehová pümaa. Sutuma wayaawatüin saaʼu talatüin Jehová wamaa, weʼitaʼaleejeeria waaʼin sünain nikeraajeerüin tü nümakat wamüin.

15. ¿Kasa nüküjaka achiki Pablo suluʼu Roma 5:4, 5?

¹⁵ Wekirajaaitpa anain talatüin Jehová wamaa waneepiale waya nümaa jee wachecherüle waaʼin soʼunnaa weʼrüin müliaa. Anuu sooʼomüin tü nümakat Pablo: «Talatüle naaʼin Maleiwa wamaa, eʼreena waya kasa anasü sünainjee tia. Nnojoleerü mojuin waaʼin kanoulale waya sünain weʼreenain kasa anasü» (Roma 5:4, 5). Saashin Roma 5:2, natüjaa maʼin aaʼu na anoujashii chajanakana Roma kojuteenain naya nutuma Maleiwa. Mayaainjeʼe natüjaain saaʼu tia, eesü waneirua kasa kanouleenaka maʼin atuma naya sünain neʼreerüin tü kasa anasü naapüinjatkat Maleiwa namüin.

16. ¿Kasa naaʼinrajatka wanee wayuu süpüla sükooʼomüinraain nunoula sünain niʼreerüin tü kasa anasü naapüinjatkat Maleiwa? (Piirakaa sümüin tü ayaakuaakat).

¹⁶ Eesüjaʼa sotule paaʼin tü palajatkat sukua paapüin süchiki tü kasa anasü naaʼinrüinjatkat Maleiwa saashin tü Bibliakat. Eesüjaʼa wainmajüle paaʼin shiimainre katüinjatüin soʼu wayuu süpüla kaʼikat süpüshuaʼa suluʼu wanee paʼaraiisü. Sümaʼainruʼu piʼraajüin maʼin nukuwaʼipa Jehová jee pütüjaain maʼin saaʼu tü kasa anasü süküjakat tü Bibliakat, akooʼomüinraasü punoula sünain piʼreerüin tü kasa anasü naapüinjatkat Maleiwa wamüin.

17. ¿Jamüsü ayataka paʼatapajüin tü kasa anasü naapüinjatkat Maleiwa pümüin süchikijee woutiisain pia?

¹⁷ Ayatüsia akooʼomüinraain tü punoulakat sünain piʼreerüin tü kasa anasü naapüinjatkat Maleiwa süchikijee woutiisain pia, jama pikirajaain sooʼomüin süchiki nukuwaʼipa Jehová jee piʼyataain süchiirua laülaain paaʼin sünain anoujaa (Heb. 5:13–6:1). Eesüjaʼa sülatüirüle  pümüin tü sümakat Roma 5:2-4. Piʼrüirü talatüin Jehová pümaa sünainjee püchecherüin paaʼin soʼunnaa müliaa. Sutuma piyaawatüin saaʼu talatüin nia pümaa, akooʼomüinraasü punoula suulialeʼeya paala sünain piʼreerüin tü kasa anasü naapüinjatkat Maleiwa pümüin. Sutuma kanoulain pia, aneesü pukuwaʼipa sümaa püpüshi, jülüjeesü paaʼin aneein maʼin tü kasa püneeküinjatkat jee tü paaʼinrüinjatkat.

18. ¿Jamüsü pütüjaaka saaʼu nikeraajeerüin Maleiwa tü nümakat pümüin?

¹⁸ Süchikijee nüküjain chi aluwataaushikai Pablo süchiki piʼreerüin tü kasa anasü naapüinjatkat Maleiwa pümüin saaʼujee talatüin nia pümaa, nüküjainña jamüin punoujainjachika sünain shiimain tia. Müshi Pablo: «Nnojoleerü mojuin waaʼin kanoulale waya sünain weʼreenain kasa anasü. Naapüin Maleiwa wamüin tü nüpülainkat süpüla watüjaain saaʼu alin waya nüpüla» (Roma 5:5). Anasü piʼitaale paaʼin sünain nikeraajeerüin Maleiwa tü nümakat pümüin.

19. ¿Jamüsü pütüjaaka saaʼu saapüneerüin pümüin tü kasa anasü paʼatapajakat?

¹⁹ Jülüja paaʼin tü pütchi nüpansaajakat Jehová nümüin Abrahán. Talatüshi Jehová nümaa otta aleewashi nia nümaa. Nnojoishi amülain Abrahán sünain aʼatapajaa tü nümakat Maleiwa nümüin. Anuu sünüiki tü Bibliakat: «Saaʼujee nnojolin nüshapajaain aaʼin Abrahán, nüpansaajüin Maleiwa tia pütchikat nümüin» (Heb. 6:15; 11:9, 18; Roma 4:20-22). Maʼaka naaʼin Abrahán, eesü süpüla weʼitaain waaʼin sünain nikeraajeerüin Maleiwa tü nümakat wamüin waneepiale waya nümaa. Wainma kasa wayaawataka atuma nikeraajeerüin Maleiwa tü nümakat, nnojoleerü mojuin waaʼin kanoulale waya sünain weʼreenain kasa anasü (Roma 12:12). Müshi Pablo: «Tachuntuin nümüin [Maleiwa] talatüinjanain jia jee jimatajatüin jaaʼin nutuma saaʼujee jiʼitaain jaaʼin nünain. Tachuntuinña nümüin junoujainjanain sünain jiʼreenain kasa anasü nutuma saaʼujee naapüin jümüin tü nüpülainkat» (Roma 15:13).