¿Sotusüche paaʼin tü pütchi ojuʼitakat suluʼu Aapiria Wayuu soʼujatka 2023? Pusouta shiʼipajee pütchikat tüü:

¿Kasa waaʼinrajatka süpüla ayatüin weeʼiratüin tü jülüjakat waaʼin? (Roma 12:2).

Nnojotsü neʼe waaʼinrüinjatüin waneirua kasa anasü. Wasakireʼerüinjatü waaʼin süpüla wayaawatüin saaʼu tü suluʼukat waaʼin otta wanouteʼerüinjatü tü wakuwaʼipakat süpüla anain shia wanaapünaa sümaa tü nuchuntakat Jehová (w23.01, süpana 8 otta 9).

¿Jamüsü süpüla laülaainjatüin waaʼin waashajaapa süchiki tü alatakat sainküin mma?

Watüjaajeerü saaʼu shikeraajüin tü pütchi aküjünatüjütkalia suluʼu tü Bibliakat sükajee tü alatakat maaʼulu, eejüinjatpejeʼe waaʼin suulia wakumajaʼalüin sooʼomüin pütchi nnojoleenaka paaʼinwain atuma na wawalayuukana. Jülüjainjatü maʼin waaʼin tü pütchi jeketü ojuʼitakat suluʼu tü karaloʼuta aapünakat wamüin (1 Cor. 1:10) (w23.02, süpana 16).

¿Jamüsü naataka tü woutiisakalü aaʼujee Jesús suulia tü woutiisakalü aaʼujee na nikirajüinkana?

Nnojoishi woutiisain Jesús süpüla naapüin naaʼin nümüin Jehová, jama joʼuuin nia naʼaka na wayuu nükatalakana Maleiwa süpüla naʼyataain nümüin. Süka lotuin nukuwaʼipa, nnojoishi ayaawajaainjachin nia suulia naainjala (w23.03, süpana 5).

¿Kasa waaʼinrajatka süpüla wakaalinjain na waneinnua süpüla nasoutuin sünain tü outkajawaakat?

Anasü paliʼirüle wanüiki wasoutapa. Waaʼinrüle tia, wainmeena na wawalayuu asoutakana. Anasü nnojorüle wainmain tü pütchi waashajaakalü achiki. Waaʼinrüle tia, eejeerü sooʼomüin pütchi süpüla nasoutuin na waneinnua (w23.04, süpana 23).

¿Jamüsü «wopu wuleka» sümünaka amüin tü wopu saashajaakalü achiki Isaías 35:8?

Tia wopukot shia tü wopu ojuʼitakat Babiloniajee chainjatka Israelmüin. Maaʼulu yaa, müshii suluʼukai waaʼin «tü Wopu Wulekat». Kakalia süpülapünaa 1919, müsü nuʼwulejakai saaʼin Jehová tia wopukot. Eʼinprimiijünüsü tü Bibliakat, ashajünüsü shia suluʼu wainma anüikii jee aainjünüsü waneirua kasa. Wainma na wayuu aʼwaajakana Jehová wanaa namaa na aʼyataakana nümüin. Ayata waya suluʼupünaa tia wopukot sünainmüinreʼeya wantüin suluʼumüin tü mma jeketükat (w23.05, süpana 15-19).

Süpüla anain wakuwaʼipa, aküjünüsü suluʼu Proverbios kapiitulo 9 süchiki piamasü wayuu, ¿jaralii naya?

Wanee shia «tü wayuu mekiikat», outushii na wayuu ekerotokana shipialuʼumüin. Otta tü wane shia «tü wayuu kekiikat», shiyaawase shia tü kekiwaa nümaʼanajeejatkat Maleiwa. «Jalainna juʼunaiwa suluʼupünaa süpüna tü kekiwaakat maʼin» müsü shia. Wacheküle suunejaain waya, eesü süpüla katüin woʼu süpüla kaʼikat süpüshuaʼa (Prov. 9:1, 6, 13, 18) (w23.06, süpana 22-24).

Sünainjee tü naaʼinrakat Jehová nüpüleerua Lot, ¿jamüsü watüjaaka saaʼu nnojolin ichein süchiirua tü nümakat otta nnojoluin yaletüin naaʼin?

Nüküjain Jehová nümüin Lot nuʼluwataainjachin saaʼumüin uuchi süka najaʼttirüinjanain na mojulaashii kepiakana Sodoma. Nuchuntuin Lot nümüin anain nuuʼulaale nia nuʼluwataain suluʼumüin tü pueulokot Zóar. Nuuʼulaain Jehová nuʼunuin chamüin (w23.07, süpana 21).

¿Kasa saaʼinrajatka wanee wawala nünajüle suʼwayuuse shiyaakua wayuu masheʼinsat?

Nnojoluinjatü shiʼitaain saaʼu shiain kasirüin tü alatakat. Saaʼinmaainjatü tü sukuwaʼipakat nümaa Maleiwa otta saashajeʼerüinjatü tü Bibliakat sümaa süsakireʼerüinjatüin saaʼin nachiki waneinnua wayuu saashajaakana achiki tü Bibliakat. Anashi sükaalinjale suʼwayuuse süpüla nuuʼulaain suulia anajaa shiyaakua wayuu masheʼinsat (w23.08, süpana 14-17).

Kekiire waya, ¿jamüsü mapüleejeetka wamüin anamiain waya namüin na wayuu asakirakana waya süchiirua tü wanoujakalü anain?

Suulialeʼeya jülüjain waaʼin nasakirüin neʼe waya shiiʼiree natkaweein wamaa, anasü jülüjale waaʼin kasain nekiiruʼuin. Watüjaale saaʼu tia palajana, asouteena waya namüin süka anakalü akuwaʼipa (w23.09, süpana 17).

Sünainjee sukuwaʼipa María, ¿jamüsü wacheküinjatka nakaalinjain waya na waneinnua?

Sütüjaapa saaʼu María ipuoluinjatüin shia jee saaʼinmajüinjachin chi Mesíaskai, achuntusü shia kaalinwaa namüin na waneinnua. Nüküjain Gabriel otta Elizabeth sümüin pütchi atütüleʼeraka saaʼin. Müshiʼiya wayakana, eesü süpüla sükatsüinnüin waaʼin nakajee na wawalayuukana (w23.10, süpana 15).

¿Kasa naaʼinraka Jehová süpüla nusoutuin wamüin?

Nüküjain Jehová naapajeerüin wanüiki otta jülüjasü naaʼin pansaale tü wachuntakat nümüin sümaa tü nüchekakat (Jer. 29:12). Eesü wanaawale tü wachuntakat nümüin Jehová sümaa naatawalin tü naaʼinrakat süpüla nusoutuin shiʼipajee wamüin. Nükaalinjeenapejeʼe waya Jehová waneepia (w23.11, süpana 21 otta 22).

¿Kasa nüküjaka achiki Pablo suluʼu Roma 5:2, 4?

Saapaiwaʼaya wanee wayuu süchiki tü kasa anasü naapüinjatkat Maleiwa, eesüjaʼa jülüjale saaʼin kepieere shia suluʼu wanee paʼaraiisü yaa mmapaʼa. Shiasaʼa süchechetpa saaʼin soʼunnaa müliaa jee shiyaawatapa saaʼu talatüin Jehová sümaa, akooʼomüinraasü tü sunoulakat sünain shiʼreerüin tü kasa anasü saʼatapajakat (w23.12, süpana 12 otta 13).