WAINMA kasa nüsülajaka wamüin Jehová, kojutusü maʼin wamüin nuuʼulaain waneeküin süka waaʼin wamüiwaʼa tü waaʼinrajatkat süka. Wanee kasa nüsülajaka wamüin shia tü wiinokot. Müsü tü Bibliakat: «Anasü naaʼin na wayuukana neküle otta anasü naaʼin nasüle wiino» (Ecl. 10:19; Sal. 104:15). Eepejeʼe wayuu alataleeka atuma tü asüüshikat. Naatayaa müsü tü jülüjakat saaʼin wayuu süchiki tü asüüshikat. ¿Kasa naaʼinrajatka na anoujashiikana süpüla wanaawain tü jülüjakat naaʼin sümaa tü jülüjakat naaʼin Maleiwa süchiki tia?

Jaʼitairü naatain tü jülüjakat saaʼin tü wayuu kepiakat waʼütpünaa süchiki tü asüüshikat, anasü woonoole sümaa tü nümakat Maleiwa süchiki tia. Waaʼinrüle tia, aneerü wakuwaʼipa waneepia.

Watüjaa aaʼu wainmain wayuu asakana waneepia sümaa sülataleein natuma tü asüüshikat. Eeshii na asakana süpüla anain naaʼin jee süpüla motuin naaʼin tü alatakat namüin. Eesü mma eere nasüin na wayuukana süpüla neeʼiyatüin tooloin naaʼin.

Naatapejeʼe wakuwaʼipa waya anoujashiikana süka woʼunuin süchiirua tü nümakat wamüin chi Wamaleiwasekai. Nüküjain wamüin suluʼu tü Nünüikikat tü müliaa niʼrakat wanee wayuu saalinjee sülataleein nutuma tü asüüshikat. Suluʼu Proverbios 23:29-35, aashajaasü nüchiki wanee wayuu eʼrakai müliaa sünainjee nüsülin. a Jülüja waaʼin tü nümakat Daniel, wanee laülaashi kepiakai Europa süchiki tü nukuwaʼipapuʼukat paala nnojoluiwaʼaya nunoujain. Anuu nünüiki: «Sutuma tasülin maʼin, taneeküin waneirua kasa mojusü, eʼrüshi taya müliaa sünainjee. Mojuwaisü taaʼin sotopa taaʼin tü takuwaʼipapuʼukat».

¿Kasa waaʼinrajatka süpüla anain tü waneekakat süchiki tü asüüshikat jee suulia weʼrüin müliaa sünainjee sülataleein watuma? Wanaawainjatü tü jülüjakat waaʼin sümaa tü jülüjakat naaʼin Maleiwa.

Wekirajaa sünain tü sümakat tü Bibliakat süchiki tü asüüshikat otta jamüin nasaka na wayuukana.

Saashin tü Bibliakat nnojotsü mojuin nüsüle wanee wayuu yootchon wiino. Müsü Eclesiastés 9:7: «Pika sümaa talatüin paaʼin otta püsa wiino sümaa anain paaʼin». Süküjainña tü Bibliakat nüsüin Jesús wiino jee waneinnua aʼyataashii nümüin Jehová (Mat. 26:27-29; Luc. 7:34; 1 Tim. 5:23).

Mojusü saashin tü Bibliakat nipeʼrüle wanee wayuu. Anuu tü sümakat: «Anashii nnojoliire jipeʼrüin saaʼujee jüsüin wiino» (Éf. 5:18). Saashin tü Bibliakat, na epeʼrüliikana «nnojoleerü neʼrüin tü kasa anasü eejeetkat nuluwataapeena Maleiwa» (1 Cor. 6:10). Watüjaaitpa aaʼu mojuin maʼin nümüin Jehová nipeʼrüle wanee wayuu jee sülataleere nutuma tü asüüshikat. Suulia washatüin tü naaʼinrakat na wayuukana shia woʼunaka achiirua tü nümakat Maleiwa.

«Jaʼitairü müleʼuin tasüin, kanchouleeshi taya», eeshii eekai namüin. Jalia waya suulia wekiiruʼuin tia. Na epeʼrüliikana saashin tü Bibliakat, eeshii süpüla kaainjalain naya jee namojujeʼerüin nakuwaʼipa nümaa Jehová (Tito 2:3; Prov. 20:1). Naashin Jesús eeshi süpüla nnojolin nuʼttaain wanee wayuu shiale naaʼinmaain maʼin miyoʼuin nüsüin (Luc. 21:34-36). ¿Kasa naaʼinrajatka wanee anoujashi suulia sumojujaain nukuwaʼipa sutuma tü asüüshikat?

Watüjaaitpa aaʼu nnojoluin anain wanaawale tü waneekakat sümaa tü naneekakat na wayuukana süchiki tü asüüshikat. Wayakana anoujashiikana, jülüjasü waaʼin tü nümakat Jehová süchiki tü weküinjatkat jee tü wasüinjatkat. Müsü tü Bibliakat: «Jaʼitashii jiküin, jüsüin wanee kasa jee jaainjain wanee kasayaakaijeʼe, süpüshuaʼa tü kasa jaainjakat jaainjainjatü shia süpüla kojutuinjachin atumawaa chi Maleiwakai» (1 Cor. 10:31). Wekirajaa süchiki waneirua pütchi wasakireʼerüinjatka anain waaʼin otta waneirua wetsiikulo jülüjainjatka waaʼin.

¿Asüshiche taya shiiʼiree anain naaʼin na waneinnua tamaa? Müsü Éxodo 23:2: «Nnojo wanaawain paaʼin sümaa wayuu». Sükajee tia pütchikat nüchiaain Jehová na israelitakana suulia nashatüin tü kasa mojusü naaʼinrakat na wayuukana. Jalouisia wamüin tia pütchikat maaʼulu. Wanaawale tü jülüjakat waaʼin sümaa tü jülüjakat naaʼin na waneinnua jee woʼunule süchiirua tü naaʼinrakat, eesü süpüla nnojoluin waaʼinrüin tü nuluwataakalü anain Jehová jee wakayalaain nuulia (Roma 12:2).

¿Asüshiche taya süpüla shiʼrüinjatüin wayuu tooloin maʼin taaʼin? Eesü mma eere nnojoluin mojuin nüsüle waneepia wanee wayuu jee sülanaʼaleere nutuma nüsüin (1 Ped. 4:3). Anuupejeʼe tü sümakat tü Bibliakat suluʼu 1 Corinto 16:13: «Anakajaʼa eejüle jaaʼin, jüchechera jaaʼin sünain tü anoujaakat, yalayala jaaʼin otta katsüin jaaʼin». Watüjaa aaʼu nnojoluin yalayalain naaʼin wanee wayuu sutuma tü asüüshikat. Tü niʼrakat suluʼujee tia shia nnojoluin niyaawatüin saaʼu nukuwaʼipa jee mojuin tü nüneekakat. Nnojotsü yalayalain naaʼin wanee wayuu sutuma nüsülin maʼin, malaa neʼe naaʼinrüle tia. Saashin Isaías 28:7, na asüliikana maʼin maaʼawashii sutuma nepeʼrüin otta unatain müshii naya.

Süpüla yalayalain waaʼin sünain aaʼinraa tü kasa anasükat, wachuntuinjatü kaalinwaa nümüin Jehová, eejüinjatü waaʼin otta katsüinjatü wanoula (Sal. 18:32). Wounteerü tia eejüle waaʼin suulia waaʼinrüin kasa mojusü otta suulia waneeküin kasa amojujeʼereetka wakuwaʼipa nümaa Jehová. Shia naaʼinraka tia Jesús yaaiwaʼaya nia mmapaʼa. Müshijeseʼe kojutuin nia sümüin wayuu sutuma meimmoluin nia jee sutuma kachiiruain naaʼin kasa eekai anain.

 ¿Asüshiche taya shiiʼiree motuin taaʼin tü alatakat tamüin? Anuu nünüiki wanee salmista nümüin Jehová: «Wanaa sümaa shapaain maʼin taaʼin sutuma tü alatakat tamüin, pümülialüin taaʼin jee pütütüleʼerüin taaʼin» (Sal. 94:19). Shapaale maʼin paaʼin saaʼujee tü alatakat pümüin, nnojo puʼwachiraain sünain asawaa, shia anaka aluʼu puchuntule kaalinwaa nümüin Jehová. Puchunta maʼin waneepia nümüin Jehová. Eeshii na anakana aaʼin sutuma nachuntuin kaalinwaa nümüin wanee wawala laülaakai aaʼin sünain anoujaa. Nüsüle wanee wayuu shiiʼiree motuin naaʼin tü kasa alatakat nümüin, nnojoleerü nüchecherüin naaʼin suulia naaʼinrüin kasa mojusü (Os. 4:11). Anuu nünüiki Daniel, chi wachuntayüikai anülia paalapa: «Wainma tü shapaakalü atuma taaʼin jee tü mojukalü atuma taaʼin. Müshijeseʼe tasüin shiiʼiree motuin taaʼin tü alatakat tamüin. Akooʼomüinraasü neʼe tü alatakat tamüin sutuma tü asawaakat, mojusü takuwaʼipa namaa taʼaleewainyuu jee mojutusai taya atumawaa». ¿Kasa akaalinjaka nia? Müshi nia: «Tayaawata aaʼu tachuntajachin kaalinwaa nümüin Jehová jee nnojolinjachin tasüin shiiʼiree motuin taaʼin tü kasa alatakat tamüin. Anakalaka takuwaʼipa sutuma nükaalinjain taya Jehová». Jaʼitairü müin mepikai saaʼin tü alatakat wamüin, anasü wayaawatüle saaʼu nükaalinjeenain waya Jehová waneepia (Filip. 4:6, 7; 1 Ped. 5:7).

Püsawaire, anasü püsakirüle paaʼin sünain waneirua pütchi. «¿Nüküjainche tamüin wanee tapüshi jee niale wanee taʼaleewain tayaawatüinjatüin saaʼu tasüin?». Sükajee tia, eesü süpüla piyaawatüin saaʼu kiʼrale pia sünain asawaa sümaa nnojoluin pütüjaain saaʼu. «¿Miyoʼuche tatuma tü tasüinkat maaʼulu?». Sükajee tia, eesü süpüla piyaawatüin saaʼu kiʼreere paaʼin sünain asawaa. «¿Suchuntaainche taaʼin waneepia tasüin asüüshi?». Sükajee tia, eesü süpüla piyaawatüin saaʼu kiʼrain pia sünain asawaa. Eesü süpüla choʼujaain pümüin puchuntuin kaalinwaa nümüin wanee tottoolu.

Eeshii wawalayuu ooʼulaʼaleekana suulia asaa yootshi suulia namojujain nakuwaʼipa. Eetaashii waneinnua wawalayuu nnojoliikana asüin sutuma mamalain namüin seʼejü. Weʼraajüle wanee anoujashi  aneekaka tia, kojuta wamüin tü nüneekakat jee nnojo wayoujain nia.

Eeshii anoujashii ayaawatakana saaʼu jeʼtsüinjatüin nasüin suulia sülataleein natuma. Eesüjaʼa naneeküle jeʼratuainjatüin nasüin, naneeküle nasüinjanain yootchon sümaa neküin jee nasüinjanale uwatua süpüla semaanaka. Eesüjaʼa naneeküle jeʼtsüinjatüin tü yootshi nasüinjatkat. Eeshii na asakana yootchon wiino otta seruweesa, nnojoliipejeʼe asüin naya yootshi jaʼitairü süpalirajaanüin sümaa wanee kasa. Nüneeküle wanee anoujashi jeʼtsüinjatüin nüsüin jee jaralüinjatüin nüsüin, mapüleejeerü nümüin naaʼinrüin tia. Nnojolinjachi japülin wanee anoujashi nüneeküle tia.

Wasüinjanale yootchon yootshi, jülüjainjatü waaʼin jamüin naaʼin na waneinnua. Müsü sünüiki Roma 14:21: «Anashi nnojoire piküin asalaa, püsüin wiino jee paaʼinrüin wanee kasa amalajaajeetka atuma nunoula wanee puwala». Tü waaʼinrajatkat saashin tia pütchikat shia jülüjainjatüin waaʼin jamüin naaʼin na waneinnua sutuma tü waaʼinrakat jee jaʼyainjatü waaʼu alin naya wapüla. Wayaawatüle saaʼu mojeerüin nümüin wanee wawala wasüin yootchon yootshi, nnojoleena waya asüin, jama alin nia wapüla. Waaʼinrüle tia, jaʼyeerü waaʼu kojutuin wamüin jamüin naaʼin na waneinnua otta nnojoluin kapülain waaʼin wakuwaʼipa wamüiwaʼa (1 Cor. 10:24).

Oonooinjanaʼaya na anoujashiikana sümaa tü pütchi naikaleʼerakat na sülaülakana mma süchiki tü asüüshikat, maʼaka nnojoliinjanain nasüin yootshi na tepichikana jee na oʼunitkana kemion jee waneirua maakina (Roma 13:1-5).

Nuuʼulaain Jehová waneeküin süka waaʼin wamüiwaʼa tü waaʼinrajatkat süka tü kasa nüsülajakat wamüin. Eesü süpüla waneeküin tü weküinjatkat jee tü wasüinjatkat. Waneeküle wanee kasa wanaapünaa sümaa tü anakat nümüin chi Washi iipünaajachikai, jaʼyeerü waaʼu kojutuin wamüin nuuʼulaain waneeküin süka waaʼin wamüiwaʼa tü keeʼireekat waaʼin.