1. ¿Kasa waʼatapajaka nutuma Jehová?

 WAʼATAPAJÜIN katüin woʼu süpüla kaʼikat süpüshuaʼa nutuma Jehová. Eeshii na anoujashii aʼatapajakana kepiain naya chaa iipünaa sümaa meʼrujuin naya (1 Cor. 15:50, 53). Wainma na anoujashii aʼatapajakana kepiain naya saaʼu tü mmakat süpüla kaʼikat süpüshuaʼa sümaa talatüin naaʼin jee nnojoluin ayuulin naya (Alat. Map. 21:3, 4). Jaʼitairü waʼatapajüin kepiain waya yaa mmapaʼa jee shiale chaa iipünaa, kojutusia wamüin tü waʼatapajakat nutuma Maleiwa.

2. ¿Jamüsü watüjaaka saaʼu eejeerüin tü kasa anasü waʼatapajakat?

² Suluʼu tü Bibliakat tü pütchikat «aʼatapajaa» shia süküjeeka achiki shiimain wamüin eejeerüin kasa anasü. Watüjaa aaʼu eejeerüin tü kasa anasü waʼatapajakat süka nüküjain shia Jehová (Roma 15:13). Watüjaa aaʼu tü kasa naaʼinrajatkat jee nikeraajüin waneepia tü nümakat (Núm. 23:19). Wayaawata aaʼu keeʼireein naaʼin Jehová naaʼinrüin süpüshuaʼa tü nümakat. Tü kasa anasü waʼatapajakat, nnojotsü suluʼuin neʼe wekii, watüjaa aaʼu naaʼinreerüin shia Jehová.

3. ¿Kasa wekirajaainjatka anain sünain ekirajaayakat tüü? (Salmo 27:14).

³ Aishii waya nüpüla chi Washi iipünaajachikai jee keeʼireesü naaʼin weʼitaain waaʼin nünain (paashajeʼera Salmo 27:14). Ayatüle waʼatapajüin tü kasa anasü naaʼinrüinjatkat Jehová wapüleerua, katchinjeerü waaʼin suuʼulakünapa waaʼin jee talateerü waaʼin sünain aʼatapajaa tü kasa eejeetkat nutuma. Sünain ekirajaayakat tüü, wekirajaajeerü anain jamüin anaka wakuwaʼipa sutuma tü kasa waʼatapajakat. Wekirajaajeerü anain palajana müin tü kasa waʼatapajakat nutuma Maleiwa maʼaka saaʼin tü kachueera ajapuluʼujiakat anuwa otta tü uwon kachueerakat. Otta wekirajaajeerü anain tü waaʼinrajatkat süpüla ayatüin waʼatapajüin tü eejeetkat nutuma Maleiwa.

4. ¿Jamüsü makat aka saaʼin tü kachueera ajapuluʼujiakat anuwa tü kasa waʼatapajakat nutuma Jehová? (Hebreokana 6:19, 20).

⁴ Nüküjain Pablo suluʼu tü karaloʼuta nüshajakat namüin na hebreokana müin aka saaʼin tü kachueera ajapuluʼujiakat anuwa  tü kasa waʼatapajakat nutuma Maleiwa (paashajeʼera Hebreokana 6:19, 20). Anuwaluʼupuʼushi Pablo. Soʼu wanee kaʼi, niʼrüin nojotuin tü kachueera ajapuluʼujiakat tü anuwakat na oʼunirakana shia süpüla nnojoluin sülüʼüjain shia wanee wawai otta süpüla nnojoluin süsheʼetuuin sünain ipa (Aluw. 27:29, 39-41). Sutuma tü kasa anasü waʼatapajakat, nnojoleena sükayaleʼerüin waya nuulia Jehová sülatapa kasa mojusü wamüin maʼaka nnojoluin wattakualüin tü anuwakat sutuma tü kachueera ajapuluʼujiakat. Sutuma waʼatapajüin aneerüin wakuwaʼipa mapeena, wachechereerü waaʼin soʼunnaa tü kasa mojusü alatakat wamüin. Soto waaʼin, nüküjain Jesús mülieenain waya atumawaa (Juan 15:20). Müsüjeseʼe anain jülüjale maʼin waaʼin tü kasa anasü waʼatapajakat nutuma Jehová süpüla ayatüin waʼyataain nümüin.

5. ¿Jamüshi waneepiaka Jesús nümaa Maleiwa mayaainjeʼe nütüjaain saaʼu outajachin nia?

⁵ Wekirajaa süchiki waneepiain Jesús nümaa Maleiwa sutuma tü kasa anasü naʼatapajakat mayaainjeʼe nütüjaain saaʼu nuʼutunuinjachin aaʼin. Soʼu tü Pentecostés eejatkat soʼu juyaka 33, nüküjain chi aluwataaushikai Pedro wanee pütchi aküjünatüjütkalia suluʼu tü karaloʼutakat Salmos. Sutuma tü kasa anasü naʼatapajakat Jesús, nnojotsü shapaain maʼin naaʼin. Anuu nünüiki Pedro: «Taʼatapajeetkalaka tü kasa anasü teʼreetkat mapeena. Nnojoleechi puuʼulaain taya suluʼu tü woowirakat, nnojoleerü puuʼulaain ittüin niʼiruku chi wayuu waneepiakai pümaa [...]. Talatüshi maʼin taya süka anain maʼin takuwaʼipa poʼuluʼu» (Aluw. 2:25-28, TNM; Sal. 16:8-11). Mayaainjeʼe nütüjaain saaʼu Jesús outeechin nia, jülüjasü maʼin naaʼin nüsoʼiraainjachin aaʼin nutuma Jehová jee nüleʼejüinjachin nüchikuaʼa chaa iipünaa eere chi Nüshikai (Heb. 12:2, 3, TNM).

6. ¿Kasa nüküjaka wanee wawala süchiki tü kasa anasü naʼatapajakat nutuma Maleiwa?

⁶ Sutuma tü kasa waʼatapajakat nutuma Maleiwa, wainma na anoujashii alatakana süchikumüin tü müliaa neʼrakat. Jülüjataa waaʼin nukuwaʼipa Leonard Chinn, wanee wawala waneepiakai nümaa Jehová kepiapuʼukai chaa Inglaterra. Soʼunnaa tü Segunda Guerra Mundial münakat, püreesashi nia sutuma niyoutuin surulaalüin nia. Piama kashi süpülajünüin nuulia aashajawaa sümaa wayuu otta aʼyateʼennüshi maʼin nia. Anuu tü nümakat chi wawalakai süchiki tü alatakat: «Sutuma tü kasa alatakat tamüin, tayaawata aaʼu anain maʼin jülüjale waaʼin waneepia tü waʼatapajakat nutuma Maleiwa süpüla wachecherüin waaʼin soʼunnaa müliaa. Akatchinraasü waaʼin soʼunnaa müliaa sutuma nukuwaʼipa Jesús, nakuwaʼipa na aluwataaushikana, nakuwaʼipa na nünüikimaajanakana Maleiwa otta sutuma tü kasa eeinjatkat mapeena saashin tü Bibliakat». Tü naʼatapajakat Leonard nutuma Jehová müsü aka saaʼin tü kachueera ajapuluʼujiakat anuwa. Müsia neʼe wakuwaʼipa, eesü süpüla wachecherüin waaʼin soʼunnaa müliaa sutuma tü kasa anasü waʼatapajakat.

7. ¿Jamüsü waʼatapajeetka maʼin tü kasa eeinjatkat nutuma Maleiwa weʼrapa müliaa? (Roma 5:3-5; Santiago 1:12).

⁷ Wachecherüle waaʼin soʼunnaa müliaa jee weʼrüle nükaalinjain waya Jehová, sütütüleʼereerü waaʼin süpüla ayatüin waʼatapajüin tü kasa anasü naaʼinrüinjatkat Jehová (paashajeʼera Roma 5:3-5, TNM; Santiago 1:12). Müsüjeseʼe waʼatapajüin maʼin maaʼulu tü kasa anasü eejeetkat mapeena suulialeʼeya woʼttaiwaʼaya sünain anoujaa. Keeʼireesü naaʼin Satanás shapaain maʼin waaʼin saaʼujee tü alatakat wamüin jee motuin waaʼin tü waʼatapajakat. Nükaalinjapejeʼe waya Jehová süpüla katchin waaʼin soʼunnaa tia.

8. ¿Jamüsü makat aka saaʼin tü uwon kachueerakat tü waʼatapajakat? (1 Tesalónica 5:8).

⁸ Süküjain tü Bibliakat müin aka saaʼin tü uwon kachueerakat tü kasa waʼatapajakat nutuma Maleiwa (paashajeʼera 1 Tesalónica 5:8, TNM). Nnojotsü eewaain nikii wanee surulaat sutuma nünain tü uwonkat. Akaataajaʼa neʼe wayakana, nnojoleerü mojuin tü jülüjakat waaʼin  sutuma tü kasa waʼatapajakat nutuma Maleiwa maʼaka keeʼireein naaʼin shia Satanás. Wainma kasa naaʼinraka Satanás süpüla numojujeʼerüin tü suluʼukat waaʼin. Maʼaka saaʼinmajüin nikii wanee surulaat tü uwon kachueerakat, müsia neʼe tü kasa waʼatapajakat, saaʼinmajüinña tü jülüjakat waaʼin süpüla waneepiain waya nümaa Jehová.

9. ¿Jamüsü nakuwaʼipa na wayuu nnojoliikana aʼatapajüin tü naaʼinrüinjatkat Maleiwa?

⁹ Aneerü tü kasa waneekakat sutuma waʼatapajüin katüin woʼu süpüla kaʼikat süpüshuaʼa. Jülüjale neʼe waaʼin tü keeʼireekat waaʼin, eesüjaʼa süpüla nnojoluin waʼatapajüin maʼin tia. Jülüjataa waaʼin tü alatakat namüin waneinnua anoujashii namaiwajana chajanakana Corinto. Nnojotsü neʼitaain maʼin naaʼin sünain süsoʼiraainjatüin naaʼin na outushiikana nutuma Maleiwa (1 Cor. 15:12). Naashin Pablo na nnojoliikana anoujain sünain tia, naaʼinmaasü maʼin tü suchuntaakat naaʼin (1 Cor. 15:32, TNM). Maaʼulu yaa, wainma wayuu nnojoliikana anoujain sünain tü naaʼinrüinjatkat Maleiwa, müsüjeseʼe naaʼinrüin neʼe tü suchuntaakat naaʼin jee nnojoluin jülüjain naaʼin tü alatüinjatkat mapeena. Naata wakuwaʼipa süka weʼitaain maʼin waaʼin sünain eejeerüin mapeena tü nüküjakat Maleiwa. Sutuma müin aka saaʼin tü uwon kachueerakat tü waʼatapajakat nutuma Maleiwa, saaʼinmajüin tü waaʼinkat suulia waaʼinrüin neʼe tü suchuntaakat waaʼin, tü akayaleetkat waya nuulia Jehová (1 Cor. 15:33, TNM; 15:34).

10. ¿Jamüsü nnojoleetka wanoujain sünain alawaa waaʼinmaale maʼin tü waʼatapajakat nutuma Jehová?

¹⁰ Sutuma tü waʼatapajakat nutuma Jehová, saaʼinmajüin tü waaʼinkat suulia jülüjain waaʼin amülain neʼe tü waaʼinrakat süpüla anain wakuwaʼipa noʼuluʼu. «Nnojoleerü katüin toʼu suluʼu tü Paʼaraiisükat, wayuu kaainjalashi taya, iseerü maʼin tachiki taaʼinrüin tü nuchuntakat Maleiwa namüin na aʼyataashiikana nümüin», eesüjaʼa süpüla müin tü jülüjakat naaʼin wanee wayuu. Tia meematsü aka saaʼin tü nüküjakat Elifaz nümüin Job, wanee naʼaleewainyaashi Job. Müshi nia: «¿Jamakuwaʼipai süpüla wuleinjatüin naaʼin wanee wayuu? [...] Chi Maleiwakai nnojotsü niʼitaain naaʼin nanain na nümaajanakana, akaʼaya tü sirumatuʼukat, nnojotsü wulein noʼuluʼu» (Job 15:14, 15). ¡Alawaapejeʼe tia! Nunoujireein waya tia Satanás. Nütüjaa aaʼu nnojoleerüin waʼatapajüin maʼin tü eejeetkat nutuma Jehová jülüjakuʼu müle waaʼin tia. ¡Jalia waya suulia tia! Waaʼinmaa maʼin tü kasa naaʼinrajatkat Jehová mapeena. Nnojo wainmajüin waaʼin sünain keeʼireein naaʼin Jehová katüinjatüin woʼu süpüla kaʼikat süpüshuaʼa sümaa nükaalinjeein waya süpüla wasaʼwatüin tia (1 Tim. 2:3, 4).

11. ¿Jamüshii nnojoliinjanaka washapajaain sünain aʼatapajaa nikeraajüin Jehová tü nümakat?

¹¹ Eesü kapüleere wamüin ayatüin waʼatapajüin tü kasa eejeetkat nutuma Maleiwa. Eeshii washapajaale sünain aʼatapajaa nikeraajüin Jehová tü nümakat. Eetüjüiya Jehová otta eejeechi nia süpüla kaʼikat süpüshuaʼa. Tü kasa kakaliakat wamüin, nnojotsü kakaliain shia nümüin Jehová (2 Ped. 3:8, 9). Naaʼinreerü tü keeʼireetüjütkalia naaʼin. Eesüjaʼa nnojorüle naaʼinrüin tia soʼu tü kaʼi waʼatapajakalü oʼu shia. ¿Kasa waaʼinrajatka süpüla nnojoliin washapajaain sünain aʼatapajaa nikeraajeerüin Jehová tü nüküjatüjütkalia? (Sant. 5:7, 8).

12. Saashin Hebreokana 11:1, 6, ¿jamüshi ayateechika naʼatapajüin wanee wayuu tü naaʼinrüinjatkat Jehová kanourale maʼin nia?

¹² Süpüla ichein waya süchiirua tü waʼatapajakat nutuma Jehová, aleewainjana maʼin waya nümaa, jama niain chi apansaajakai tia wamüin. Saashin tü Bibliakat, kanourale wanee wayuu nünain Jehová, shiimainjeerü nümüin shikeraajüin tü kasa naʼatapajakat otta naapeerüin Jehová kasa anasü namüin na achajaakana maʼin nüchiki (paashajeʼera Hebreokana 11:1, 6, TNM). Kanourale maʼin waya nünain Jehová, waʼatapajeerü maʼin nikeraajüin süpüshuaʼa tü nümakat. Sutuma tia, wekirajaa sünain tü waaʼinrajatkat süpüla aleewain maʼin waya nümaa Jehová.

13. ¿Kasa waaʼinrajatka süpüla aleewain waya nümaa Maleiwa?

 ¹³ Woʼuraaja nümüin Jehová otta waashajeʼera tü Nünüikikat. Eeshi süpüla waʼaleewain Jehová mayaainjeʼe nnojolin weʼrüin nia. Eeshii süpüla waashajaain nümaa Jehová woʼuraajapa nümüin sümaa watüjaain saaʼu naapajeerüin wanüiki (Jer. 29:11, 12). Eesü süpüla waapajüin nünüiki waashajeʼerapa tü Bibliakat sümaa wasakireʼerüin waaʼin sünain tü sümakat. Atütülaasü waaʼin süpüla ayatüin waʼatapajüin tü naaʼinrajatkat Jehová wapüleerua waashajeʼerapa tü naaʼinrakat napüleerua na aʼyataapuʼukana nümüin. Tü pütchi ashajünakat suluʼu tü Nünüikikat Maleiwa süpülajatü «wekirajaajiraain sünain [...,] süchecherüinjatüin waaʼin suʼutpünaa tü müliaakat. Je müleka süshapajaale waaʼin sünain waʼatapajüin tü naaʼinrüinjateetkat chi Maleiwakai wamüin, katsüinsü waaʼin sütüma tü pütchikat sümaʼinruʼu waʼatapajüin» (Roma 15:4).

14. ¿Jamüsü anaka jülüjale waaʼin tü naaʼinrüitkat Jehová napüleerua waneinnua wayuu?

¹⁴ Jülüja waaʼin tü naaʼinrüitkat Jehová süpüla nikeraajüin nünüiki. Jülüja waaʼin tü naaʼinrakat Jehová nüpüleerua Abrahán sümaa Sara. Nnojoishii süpüla kachooinjanain naya süka laülaayuuin naya, nüpansaajapejeʼe nünüiki Jehová namüin sünain kachooinjanain naya (Gén. 18:10). ¿Kasa naaʼinraka Abrahán süpüla niʼitaainjatüin naaʼin sünain tia pütchikat? Anuu tü sümakat tü Bibliakat: «Katsüinsü tü nünoulakat sünain naʼatapajüin tü naaʼinrüinjatkat chi Maleiwakai nümüin» (Roma 4:18). Kapüleesü sümüin wanee wayuu eekai laülaain kachoinjatüin shia. Nunoujapejeʼe Abrahán nikeraajeerüin Jehová nünüiki nümüin. Nnojotsü amülain neʼe naʼatapajüin Abrahán tia süka kachooin tü nuʼwayuusekat (Roma 4:19-21). Sükajee tü naaʼinrakat Jehová nüpüleerua Abrahán otta waneinnua wayuu namaiwajana, weʼitaain maʼin waaʼin sünain nikeraajeerüin waneepia tü nümakat mayaainjeʼe müin kapüleekai saaʼin wamüin.

15. ¿Jamüsü anaka jülüjale waaʼin tü naaʼinrüitkat Jehová wapüleerua?

 ¹⁵ Jülüja waaʼin tü naaʼinrüitkat Jehová wapüleerua. ¿Eeiria jülüjain waaʼin shikeraajüin wanain waneirua pütchi süküjaka tü Bibliakat? Jamüshijaʼa Jesús nüküjain naapeerüin chi Nüshikai tü kasa choʼujaakat wamüin (Mat. 6:32, 33). Nüküjainña Jesús naapeerüin Jehová tü nüpülainkat wachuntule shia nümüin (Luc. 11:13, TNM). Shiimainña nikeraajüin Jehová tü nüküjakat Jesús. Eesüjaʼa süntajaale suluʼu wekii waneirua kasa nikeraajaka Jehová wamüin, maʼaka saaʼin nülatirüin sooʼopünaa naaʼin waainjala, nümüliajüin waya otta naapüin wamüin tü choʼujaakat süpüla katchin wanoula (Mat. 6:14; 24:45; 2 Cor. 1:3). Wasakirüle waaʼin sünain tü naaʼinrüitkat Jehová wapüleerua, ayateerü waʼatapajüin tü naaʼinrajatkat mapeena.

16. ¿Jamüsü kojutuinjatka wamüin tü waʼatapajakat nutuma Maleiwa?

¹⁶ Kojutusü maʼin wamüin waʼatapajüin katüin woʼu süpüla kaʼikat süpüshuaʼa nutuma Maleiwa. Waʼatapajashaatain maʼin tia kaʼikat otta watüjaa aaʼu shikeraajeerüin. Tü waʼatapajakat nutuma Maleiwa müsü aka saaʼin tü kachueera ajapuluʼujiakat anuwa süka sajapuluʼujain waaʼin soʼunnaa müliaa, süpüleeruaanapa waaʼin otta jamajüle waya atumawaa. Jee müsia, tü waʼatapajakat nutuma Maleiwa müsü aka saaʼin tü uwon kachueerakat süka saaʼinmajüin tü waaʼinkat suulia tü kasa mojukat noʼuluʼu Maleiwa. Aleewashii maʼin waya nümaa Maleiwa sutuma tü kasa waʼatapajakat jee wayaawata aaʼu alin waya nüpüla Maleiwa saaʼujee tia. Ichere waya süchiirua tü kasa waʼatapajakat nutuma Maleiwa, aneerü wakuwaʼipa.

17. ¿Jamüsü talataka waaʼin sutuma tü waʼatapajakat nutuma Maleiwa?

¹⁷ Anuu nünüiki Pablo namüin na anoujashii chajanakana Roma: «Jüchunta waneepia nümüin Maleiwa, sümaa talatüin maʼin jaaʼin sümaʼinruʼu jaʼatapajüin tü naaʼinrüinjatkat jümüin» (Roma 12:12). Talatüsü naaʼin Pablo süka nütüjaain saaʼu kateerüin noʼu waneepia chaa iipünaa waneepiale nia nümaa Jehová. Müshiʼiya wayakana, eesü süpüla talatüin waaʼin sünain aʼatapajaa tü naaʼinrajatkat Maleiwa wapüleerua süka watüjaain saaʼu nikeraajeerüin nünüiki maʼaka nüküjain shia wanee wayuu ashajakai wanee salmo, müsü nünüiki: «Anataʼaleeshijaʼa chi [...] eʼitaakai naaʼin nünain Jehová chi Nümaleiwasekai, [...] chi ekeraajakai waneepia nünüiki» (Sal. 146:5, 6).