1. (1) ¿Kasa aküjüneeka achiki wanaa sümaa «cheʼojaain chi Maleiwakai jümüin» sümünüin? (2) ¿Jamüsü choʼujaaka tia süpüla shiimainjatüin talatüin waaʼin?

 SHIIMAINRE talatüin naaʼin wanee wayuu, nnojotsü alatapünaain tia nuulia. Wanaa sümaa nikirajüin Jesús watta saalii wayuu saaʼu wanee uuchi, nüküjain tü talateetkalü atuma naaʼin wanee wayuu, müshi nia: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (Mat. 5:3). Nütüjaa aaʼu Jesús wakumajuushin süpüla suchuntaainjatüin waaʼin weʼraajüin otta waʼwaajüin Jehová, chi Kakumalakai kasa süpüshuaʼa. Tia shia tü süküjeekalü achiki tü Bibliakat wanaa sümaa «choʼujaain chi Maleiwakai jümüin» sümüin. Süka niain Jehová wanee Maleiwa talatakai aaʼin, eesü süpüla talatüin waaʼin wayakana aʼyataakana nümüin (1 Tim. 1:11, TNM).

2, 3. (1) ¿Jaralii na wane ountakana talatüin naaʼin naashin Jesús? (2) ¿Kasa wekirajaainjatka anain sünain ekirajaayakat tüü? (3) ¿Jamüsü choʼujaaka wekirajaain sünain tia?

² ¿Anainjatche wakuwaʼipa waneepia süpüla talatüin waaʼin? Nnojo. Eesü wanee pütchi nüküjaka Jesús ponoko saaʼin tü wayuu nikirajakat saaʼu tü uuchikat. Anuu nünüiki: «Anataʼaleeshiijaʼa maʼi jia aʼyalajakana nümüin Maleiwa saaʼu jaainjala». Na wayuu makana akuwaʼipa, eesü süpüla talatüin naaʼin. Anuu sooʼomüin nünüiki Jesús: «Anataʼaleeshiijaʼa maʼi jia müliakana aaʼin sütüma wayuu saaliijee jaaʼinrüin tü nüchekakat Maleiwa jüpüleerua [...,] müleka shiʼrüle wayumüin wayuu jümüin saaliijee jünoujain tanain» (Mat. 5:4, 10, 11). ¿Shiimainchejeʼe eein süpüla talatüin waaʼin soʼunnaa tia?

³ Nnojotsü neʼe nüküjain Jesús anainjatüin wakuwaʼipa waneepia süpüla talatüinjatüin waaʼin, nikirajüinña süchiki tü talatüinjatkalü atuma waaʼin. Tia shia waaʼinmaale tü anainjatkalü atuma wanoula otta tü aleeweenakalü atuma waya nümaa Maleiwa (Sant. 4:8). ¿Kasa waaʼinrüinjatka süpüla wountuin tia? Sünain ekirajaayakat tüü, wekirajaajeerü anain apünüinsü kasa waaʼinrajatka süpüla shiimainjatüin talatüin waaʼin.

4. ¿Jarat tü palajatkat kasa waaʼinrajatka süpüla shiimainjatüin talatüin waaʼin? (Salmo 1:1-3).

⁴ PALAJATKA KASA WAAʼINRAJATKA: Süpüla shiimainjatüin talatüin waaʼin waashajeʼerüinjatü otta wekirajaainjatü sünain tü Bibliakat. Tü Nünüikikat Maleiwa naashin Jesús müsü aka saaʼin tü eküütkat. Jamüsüjaʼa wayuu sümaa mürüt, choʼujaasü shiküinjatüin süpüla katüinjatüin soʼu. Nayapejeʼe neʼe na wayuukana aashajeʼerüin Tü Nünüikikat Maleiwa otta choʼujaasü naaʼinrüinjatüin tia. Müshijeseʼe nümüin Jesús mayaa: «Nnojotsü shiain sümüiwa tü pankat katüin atüma soʼu wayuu, kateerü oʼu shiaya sütüma süpüshua tü nünüikikat chi Maleiwakai» (Mat. 4:4). Nnojoluinjatü walatirüin wanee kaʼi sümaa nnojoluin waashajeʼerüin tü Nünüikikat Maleiwa. Naashin chi salmistakai, anasü maʼin nukuwaʼipa chi wayuu aaʼinmaakai tü Nünüikikat Jehová sümaa «naashajeʼerawalin shia soʼukai jee saʼwai sümaa jiattain nünüiki» (paashajeʼera Salmo 1:1-3).

5, 6. (1) ¿Kasa watüjaainjatka aaʼu suluʼu tü Bibliakat? (2) ¿Jamüsü aneetka wakuwaʼipa waashajeʼerüle tü Bibliakat?

⁵ Süka alin waya nüpüla Jehová, nüküjain wamüin suluʼu tü Bibliakat tü waaʼinrajatkat süpüla talatüin waaʼin. Süküjain tü Bibliakat jamüin kataka woʼu nutuma Maleiwa, tü waaʼinrajatkat süpüla aleewain waya nümaa otta süpüla nülatirüin woulia tü waainjalakat. Otta süküjainña tü kasa anasü eejeetkat mapeena (Jer. 29:11). Talatüsü maʼin waaʼin süka eein süpüla wekirajaain sünain tia suluʼu tü Bibliakat.

⁶ Watüjaa aaʼu wainmain tü pütchi suluʼukat tü Bibliakat anaka atuma wakuwaʼipa. Waaʼinrüle tü sümakat, talatüsü waaʼin. Wattale waaʼin saaʼujee shapaain maʼin waaʼin, waashajeʼera tü Nünüikikat Jehová sümaa wasakireʼerüin waaʼin sünain.  Anuu nünüiki Jesús: «Naya müleʼoka anaa amüin na aapakana nünüiki Maleiwa sünain noonooin sümaa» (Luc. 11:28).

7. Waashajeʼerapa tü Nünüikikat Maleiwa, ¿kasa waaʼinrajatka süpüla kamalainjatüin shia wamüin?

⁷ Sümaʼinruʼu waashajeʼerüin tü Nünüikikat Maleiwa, wachajaainjatü sukuwaʼipa süpüla kamalainjatüin shia wamüin. ¿Kasa waaʼinrajatka süpüla wountuin tia? Jülüjataa paaʼin tüü: süʼlakajaanüle piyaaluʼu tü eküülü pikajaakat maʼin, eesüjaʼa pumokoto, pumokoto pümüle shia sutuma püshapajaain jee shiale sutuma shapaain maʼin paaʼin. Nnojoleetkalaka jülüjain paaʼin jemetüle shia, jama pikajaamaatüitpain shia. Eesüjaʼa süpüla müin wakuwaʼipa waashajeʼerapa tü Bibliakat. Wattale waaʼin saaʼujee shapaain maʼin waaʼin, nnojoleerü jülüjain waaʼin tü shikirajakalü anain tü Bibliakat. Anasü waashajeʼerüle weinshi tü Bibliakat sümaa müin chakai waaʼin soʼunnaa tü aküjalaa waashajeʼerakat suluʼujee, maa waapakai saaʼin nanüiki na aashajaanakana achiki otta wasakireʼera waaʼin sünain tü waashajeʼerakat suluʼujee. Waaʼinrüle süpüshuaʼa tia makat, talateerü maʼin waaʼin.

8. ¿Jamüsü süpüla nikeraajüin chi achepchieekai tü aʼyatawaa aapünakat nümüin? (Paashajeʼera tü nootakat).

⁸ Niʼitaain Jesús «chi achepchiee oonookai jee kekiikai maʼin» süpüla naapüinjatüin wamüin tü anainjatkalü atuma wanoula soʼu tü kaʼi choʼujaakalü oʼu shia wamüin (Mat. 24:45, TNM). b Anashaatasü maʼin tü pütchi naapakat wamüin chi achepchieekai süka suluʼujeejatüin shia tü Bibliakat (1 Tes. 2:13). Sükajee tü naapakat wamüin, mapüleesat wayaawatüin saaʼu tü jülüjakat naaʼin Jehová, tü aküjünakat suluʼu tü Bibliakat. Müsüjeseʼe waashajeʼerüin tü rewiisütakalüirua Aapiria Wayuu, ¡Eeja waaʼin! otta tü pütchi suluʼukat jw.org. Jee müsia, yapasü watuma tü pütchi ekirajaanajatkalü anain sünain tü outkajawaakat otta wanajüin tü programa ojuʼitakat kashiwai suluʼu JW Broadcasting^® eere shia suluʼu wanüiki. Waapaale sümaa süpüshuaʼa tü naapakat wamüin chi achepchieekai, mapüleejeerü wamüin waaʼinrüin tü piamakat kasa waaʼinrajatka süpüla shiimainjatüin talatüin waaʼin.

9. ¿Jarat tü wane kasa waaʼinrajatka süpüla shiimainjatüin talatüin waaʼin?

⁹ PIAMAKA KASA WAAʼINRAJATKA: Süpüla shiimainjatüin talatüin waaʼin kojutuinjatü wamüin tü nuluwataakalü anain Jehová. Anuu nünüiki wanee wayuu ashajakai wanee salmo: «Anataʼaleeshijaʼa chi kojutukai amüin Jehová, chi aaʼinrakai tü nuluwataakalü anain» (Sal. 128:1). Shiimainre kojutuin wamüin Jehová, nnojoleerü waaʼinrüin wanee kasa eekai mojuin nümüin (Prov. 16:6). Ayata woonooin sümaa tü nümakat süchiki tü kasa anasükat jee tü kasa mojusükat, tü ashajünakat suluʼu tü Bibliakat (2 Cor. 7:1). Waaʼinrüle tü anakat nümüin Jehová jee walerajüle tü nülerajakat, talateerü maʼin waaʼin (Sal. 37:27; 97:10; Roma 12:9).

10. Saashin Roma 12:2, ¿kasa waaʼinrajatka wapüshuaʼa?

¹⁰ (Paashajeʼera Roma 12:2). Eeshi chira wayuu atüjaakai saaʼu niain neʼe Jehová aküjaka tü kasa anasükat jee tü kasa mojusükat, oonooinjachipejeʼe nia sümaa tü nuluwataakalü anain Maleiwa. Jülüjataa paaʼin tüü: eesü nütüjaale saaʼu wanee wayuu nayain na sülaülashiikana mma aikaleʼeraka jeʼrainjatüin suwataaka aaʼu wanee kemion suluʼupünaa karateerü, eepejeʼe niʼrüle wayumüin sümüin tia pütchikat. Nuwateʼerüinjaʼa tia kemionkat sümaa nütüjaain saaʼu jeʼrainjatüin suwataaka aaʼu. Atüjaaneerü aaʼu kojutuin wamüin tü nuluwataakalü anain Jehová saaʼujee wakuwaʼipa (Prov. 12:28). Nütüjaa aaʼu David müin tia, müshijeseʼe nümüin nümüin Jehová: «Püküjain tamüin süchiki tü wopu kataamaajatkalü oʼuu. Talatüsü maʼin naaʼin chi eekai yaain pümülatuʼu.  Talatüshii na wayuu pikialuʼukana» (Sal. 16:11).

11, 12. (1) ¿Kasa eejüinjatka oulia waaʼin shapaapa waaʼin jee sümalajaapa waaʼin? (2) ¿Jamüsü aneetka tü waaʼinrakat sutuma tü sümakat Filipos 4:8?

¹¹ Shapaale waaʼin jee sümalajaale waaʼin, eesü waaʼinrüle waneirua kasa süpüla anain waaʼin. Eejüinjatpejeʼe waaʼin suulia waaʼinrüin wanee kasa niyoutaka Jehová (Éf. 5:10-12, 15-17).

¹² Suluʼu tü karaloʼuta nüshajakat Pablo namüin na anoujashii chajanakana Filipos, nüküjain namüin jülüjainjatüin naaʼin tü kasa lotokalü atuma nakuwaʼipa, tü wulekalü atuma naaʼin, tü aijiraakalü atuma naya otta tü naʼwaataakat saaʼu anain maʼin shia (paashajeʼera Filipos 4:8). Mayaainjeʼe nnojoluin naashajaain Pablo süchiki tü wanajakat, tü waapajakat jee tü washaitakat, eesü süpüla anain süneekia watuma tia sünainjee tü nümakat. Puuʼulaka paaʼinrüin tüü paashajeʼerapa tü pütchi suluʼukat Filipos 4:8: eere sümüin «tü anasükat», puʼwanajaa shia sümaa tü pütchikat «tü músicakat», «tü películakat», «tü karaloʼutakalüirua» otta «tü videojuegokalüirua». Wooʼulaküle tia, wayaawateerü saaʼu anale tü waneekakat noʼuluʼu Maleiwa. Tü keeʼireekat waaʼin shia waaʼinrüin tü nuluwataakalü anain Jehová (Sal. 119:1-3). Sutuma waaʼinrüin tia, anasü waaʼin jee mapüleejeerü wamüin waaʼinrüin tü wane kasa waaʼinrajatkat süpüla shiimainjatüin talatüin waaʼin (Aluw. 23:1).

13. ¿Jarat tü wane kasa waaʼinrajatkat süpüla shiimainjatüin talatüin waaʼin? (Juan 4:23, 24).

¹³ APÜNÜINKA KASA WAAʼINRAJATKA: Jülüjainjatü waaʼin waaʼinmaale aʼwaajaa Jehová. Süka nukumajalain waya, waʼwaajüinjachi nia (Alat. Map. 4:11; 14:6, 7). Tü waaʼinmaainjatkat shia waʼwaajüin nia maʼaka nücheküin shia. Waʼwaajüinjachi nia «sükajee tü nüpülainkat otta sükajee tü shiimainkat» (paashajeʼera Juan 4:23, 24, TNM). Tü keeʼireekat waaʼin shia wooʼulaain suʼunirüin wakuwaʼipa tü nüpülainkat Maleiwa süpüla waʼwaajüin nia wanaapünaa sümaa tü sümakat tü Bibliakat. Waaʼinmaainjatü maʼin tü waʼyataainkat nümüin, jaʼitainna kepiain waya suluʼu wanee mma eere süpülajünüin shia woulia. Maaʼulu yaa, alatüshii suulia 100 wawalayuu püreesakana sutuma naküjaliin neʼe pütchi nüchiki Jehová. c Mayaainjeʼe müin nakuwaʼipa, talatüsü naaʼin jee naaʼinrüin tü nountakat wanaapünaa sümaa nakuwaʼipa, maʼaka saaʼin noʼuraajüin, nekirajaain jee naashajaain namaa na waneinnua nüchiki Maleiwa jee süchiki Nuluwataainjachin. Mayaainjeʼe süpüleeruaanüin waaʼin saaʼujee wanoujain jee shiale mojuin sünüiki wayuu wamüin, talatüsia waaʼin süka watüjaain saaʼu eein Jehová wamaa jee anakuwaʼipaliijeenain waya nutuma (Sant. 1:12; 1 Ped. 4:14).

14. (1) ¿Kasa alataka nümüin wanee jimaʼai kepiakai chaa Tayikistán? (2) ¿Jamüsü sülataka tia nümüin?

¹⁴ Sünainjee tü alatakat namüin waneinnua wawalayuu maaʼulu, watüjaa aaʼu eein süpüla talatüin waya waaʼinrüle tü apünüinsükat kasa wekirajaaitpaka anain, jaʼitairü kasain alatüin wamüin. Jülüjataa waaʼin nukuwaʼipa wanee jimaʼai kepiakai chaa Tayikistán, 19 nuuyase, Yovidón Boboyónov nünülia. Sutuma niyoutuin surulaalüin nia, amaanüshi nia nipialuʼujee oʼutuupüroʼu 4 soʼu 2019. Kojuya kashi püreesain nia jee müliashi nia atumawaa maaʼatshi kaainjaraikai naaʼin. Suluʼu kojuyasü mma, aküjünüsü suluʼupünaa noticia süchiki tü kasa mojusü aainjünakat nüka. Aküjünüsü süchiki niʼyaajünüin jee süpüleeruaanüin naaʼin shiiʼiree naainjain tü juramento naainjakat na surulaatkana otta shiiʼiree naʼatüin nünain nasheʼin na surulaatkana. Akumajünüsü tü nukuwaʼipakat laülaapialuʼu jee amaanüshi nia suluʼu wanee campo de trabajo forzado. Taashishi nia atumawaa süka nüküjain tia chi laülaashikai saaʼu tia mmakat. Soʼunnaa tü müliaa niʼrakat Yovidón, ayatüsia  talatüin naaʼin jee waneepiain nia nümaa Jehová. ¿Jamüsü süpüla nuuntuin tia? Shia süka niyaawatüin saaʼu choʼujaain chi Maleiwakai nümüin.

15. ¿Kasa naaʼinraka Yovidón süpüla naashajeʼerüin jee nikirajaain sünain tü Bibliakat soʼunnaa püreesain nia?

¹⁵ Wanaa sümaa püreesain Yovidón, naashajeʼerüin jee nikirajaain sünain tü Bibliakat mayaainjeʼe nnojoluin nümaʼanain shia jee nnojoluin nümaʼanain tü karaloʼutakalüirua. ¿Kasa naaʼinraka süpüla naashajeʼerüin tü Bibliakat? Nalüʼüjapa na wawalayuukana eküülü nümüin, nashajüin suluʼu tü wotsakat tü pütchi waashajeʼerakat wattaʼa maalü. Mayaa naashajeʼerüin Yovidón weinshi tü Bibliakat sümaa nüsakireʼerüin naaʼin sünain. Nujuʼitapa suluʼujee tü kaatsetkat, nüküjain wanee pütchi namüin na nnojoyüliikana eʼrüin maʼin müliaa: «Jujayata tü kaʼikat maaʼulu eiwaʼaiya jia süpüla aleewain maʼin jia nümaa Jehová. Süpüla tia, choʼujaasü maʼin jaashajeʼerüin tü Bibliakat jee tü karaloʼutairua eekat wamaʼana».

16. ¿Kasa naaʼinmaaka maʼin Yovidón?

¹⁶ Chi wawalakai Yovidón oonooshi nia sümaa tü nuluwataakalü anain Jehová. Naaʼinmaashi maʼin Jehová jee naaʼinmaasü tü kasa anakat noʼuluʼu suulialeʼeya naaʼinrüin tü kasa mojusü suchuntaakat naaʼin. Nünanajawalin tü kasa nukumajakat Maleiwa. Wattaʼa maaʼulu, achijiraashi nia sutuma neeʼirain na wüchiicheinkana otta aipaʼa nünanajüin chi Kashikai jee tü shüliwaikat.  Anuu nünüiki: «Wanaa sümaa mojuin taaʼin, jülüjasü taaʼin tü kasa nukumajakat Jehová süpüla anain taaʼin». Kojutule wamüin süpüshuaʼa tü kasa naapakat wamüin Jehová maʼaka saaʼin tü kasa nukumajakat jee tü Bibliakat, talateena maʼin waya jee wachechereerü waaʼin soʼunnaa müliaa.

17. Sülatüle nümüin wanee wawala tü alatakat nümüin Yovidón, ¿jamüsü süpüla sükatchinrüin naaʼin tü sümakat 1 Pedro 1:6, 7?

¹⁷ Wanee kasa naaʼinraka Yovidón shia naaʼinmaain maʼin aʼwaajaa Jehová. Nütüjaa aaʼu choʼujaain maʼin waneepiainjachin wanee wayuu nümaa chi Maleiwa shiimainshikai. Anuu nünüiki Jesús: «Nia juʼwaajüinjachika, chi Jümaleiwasekai nümüiwa, nia jiʼyataainjachika amüin nümüiwa» (Luc. 4:8). Na sülaülashiikana surulaat jee na surulaatkana, nooʼuleʼereein Yovidón suulia tü nunoujakalü anain. Oʼuraajapejeʼe nia nümüin Jehová jee nuchuntuin nümüin süpüla nüchecherüin naaʼin süpüla waneepiainjachin nia nümaa. Mayaainjeʼe müliain nia atumawaa, ayatüshi nia waneepiain nümaa Jehová. Talatüsü naaʼin maaʼulu süka katchinreein maʼin tü nunoulakat suulialeʼeya paala wanaa sümaa nümaanüin, niʼyaajünüin jee nüpüreesajinnüin (paashajeʼera 1 Pedro 1:6, 7).

18. ¿Kasa waaʼinrajatka süpüla ayatüin talatüin waaʼin?

¹⁸ Nütüjaa aaʼu Jehová tü choʼujaakat süpüla shiimainjatüin talatüin waaʼin. Waaʼinrüle tü apünüinsükat kasa wekirajaaitpaka anain, ayateerü talatüin waaʼin mayaainjeʼe weʼrüin müliaa. Eekalaka süpüla wamüin mayaa: «Anataʼaleeshiijaʼa na wayuu Kamaleiwasekana Jehová» (Sal. 144:15).