¿Jamüshii moʼunuinka waya maaʼulu sünain atkawaa maʼaka naaʼinrapuʼuin shia na israelitakana?
«EERE wanee jaʼakajee ayoutakai atkawaa sümaa Francia otta Inglaterra, outeena jia jüpüshuaʼa», müsü nünüiki sümaa nuʼwaatüin wanee sülaülashi surulaat nazi namüin waneinnua aküjalii pütchi nüchiki Jehová soʼunnaa tü Segunda Guerra Mundial münakat. Mayaainjeʼe pejein nanain na surulaatkana sümaa kaʼapülain naya, nnojotsü naaʼinrüin na wawalayuukana wanee kasa mojuka noʼuluʼu Jehová, yalayalasü maʼin naaʼin. Tia shia tü naaʼinrakat na aküjaliikana pütchi nüchiki Jehová. Nnojoishii waya sünainpünaain tü atkawaa eekat maaʼulu, jaʼitainna jamajüin waya atumawaa.
Eeshii waneinnua wayuu oʼunakana sünain atkawaa mayaainjeʼe nanoujain naashin. Wainma na jülüjakana aaʼin nütkaainjachin wanee anoujashi süpüla naaʼinmajüin tü mma eere kepiain nia. Eesüjaʼa jülüjale naaʼin tüü: «Aʼwaajüshii Maleiwa na israelitakana sümaiwa paala otta oʼunushii naya sünain atkawaa. ¿Jamakaʼa moʼunuinka waya sünain atkawaa maʼaka naaʼinrapuʼuin shia?». Acheküsü waküjain süchiki naatain nakuwaʼipa na israelitakana sümaiwa paala suulia nakuwaʼipa na anoujashiikana maaʼulu. Wekirajaa sünain jaʼraisü kasa naataka aaʼujee nakuwaʼipa.
1. NNOJOISHII WALAKATÜIN SÜMAIWA PAALA NA AʼWAAJAKANA MALEIWA
Sümaiwa paala nükotchojirüin Jehová na aʼwaajakana nia suluʼu wanee mma, Israel sünülia tia mmakat. Anuu nünüiki Jehová namüin: «Jieena tapueuloseka saʼakajee wayuu süpüshuaʼa süka tayain kakoroloin tü mmakat» (Éx. 19:5). Wanaa sümaa nuluwataain Jehová na israelitakana sünain atkawaa, nnojoishii atkaain naya namaa na aʼwaajakana nia. a
Maaʼulu yaa sainküinshii mmakat süpüshuaʼa na aʼwaajakana Jehová (Alat. Map. 7:9). Jamüshiijaʼa noʼunule sünain atkawaa, noʼuteena aaʼin na nawalayuukana.
2. NULUWATAAIN JEHOVÁ NA ISRAELITAKANA SÜNAIN ATKAWAA
Sümaiwa paala niapuʼu aküjaka Jehová namüin na israelitakana joujainjanain noʼunuin sünain atkawaa. Nuluwataain naya sünain atkawaa namaa na cananeokana süpüla süsalain naainjala nutuma. Aʼwaajüshii maleiwayaasü na cananeokana, naʼajüin nachonnii namüin otta amaʼüjiraashii naya. Nüküjain Jehová namüin na israelitakana najaʼlajeʼerüinjanain na wayuu kepiakana suluʼu tü mma naapüinjatkat namüin suulia nashatüin tü kasa mojusü naaʼinrakat (Lev. 18:24, 25). Nekerotapa na israelitakana suluʼu tü mma naapakat Jehová namüin, nuuʼulaain natkaain namaa na naʼünüükana suulia jamajüin naya atumawaa (2 Sam. 5:17-25). Nnojoliipejeʼe nuuʼulaain Jehová na israelitakana noʼunuin süka naaʼin namüiwaʼa sünain atkawaa. Naaʼinrüle tia, eʼrüshiijeʼe naya kasa mojusü sünainjee (Núm. 14:41-45; 2 Crón. 35:20-24).
Maaʼulu yaa nnojotsü nüküjain Jehová namüin na wayuukana natkaainjanain. Na sülaülashiikana mma atkaashii naya süchiirua tü keeʼireekat naaʼin, nnojotsü shiain süchiirua tü keeʼireekat naaʼin Maleiwa. Eesü natkaale süchiirua miyoʼuinjatüin tü mma naluwataakalü aaʼu, shiiʼiree suwainmalaain nawashirüin jee shiale sutuma naatain tü jülüjakat naaʼin süchiki sukuwaʼipa wanee aluwatawaa. ¿Jama na atkaakana naashin süpüla kojutuinjatüin atumawaa tü nanoujakalü anain jee süpüla noʼutuin naaʼin na nüʼünüükana Maleiwa? Nnojoishii nuluwataain naya Jehová sünain aaʼinraa tia. Nia neʼe Jehová nümüiwaʼa aaʼinmajüinjachikai na aʼwaajakana nia jee ajaʼttirüinjachikai mapeena na nüʼünüükana soʼunnaa tü atkawaa kanüliakat Armagedón (Alat. Map. 16:14, 16). Soʼunnaa tia, naya atkaainjanakana na nümaajanakana Maleiwa chaa iipünaa, nnojoishii nayainjanain na aʼwaajakana nia yaa mmapaʼa (Alat. Map. 19:11-15).
3. NNOJOISHII NOʼUTUIN NAAʼIN NA ISRAELITAKANA NA KANOULAKANA
Nükatalüin Jehová Rahab sümaa süpüshi suulia tü atkawaa eejatkat chaa Jericó, ¿akatannüshiiche na anoujashiikana suulia tü atkawaa eekat maaʼulu?
Sümaiwa paala noʼunule na israelitakana sünain wanee atkawaa, namülialüin naaʼin na wayuu kanoulakana. Shia neʼe noʼutaka aaʼin na wayuu outajanakana naashin Maleiwa. Wanaa sümaa nuluwataain naya Jehová najaʼlajeʼerüinjatüin tü pueulokot Jericó, nnojotsü noʼutuin saaʼin Rahab otta na süpüshikana süka kanoulain shia nünain Maleiwa (Jos. 2:9-16; 6:16, 17). Nnojoishii noʼutuin naaʼin na gabaonitakana süka kojutuin Maleiwa namüin (Jos. 9:3-9, 17-19).
Maaʼulu yaa natkaapa na surulaatkana suluʼu wanee mma, noʼuta aaʼinrü wayuu eekai eein jaʼitairü anoujain jee nnojoluin surulaalüin.
4. NAAʼINRÜINJATÜ NA ISRAELITAKANA TÜ PÜTCHI NULUWATAAKALÜ ANAIN JEHOVÁ NATKAAPA
Sümaiwa paala nuluwataain Jehová na israelitakana noonooinjanain sümaa tü pütchi nuluwataakalü anain naya süpüla natkaain. Eesü nuchuntawaire Jehová namüin nachajaain süchiki anajirawaa namaa na naʼünüükana (Deut. 20:10). Nuluwataain Jehová na surulaat israelitakana keisalaainjanain naya, wuleinjatüin natuma tü mma eere neemeraain süpülapünaa atkawaa otta nnojoliinjanain sünainpünaain naya amaʼüjirawaa akuwaʼipaa (Deut. 23:9-14). Niyoutuin Jehová napüleerua nataüjaain na jieyuu kepiakana suluʼu tü mma nashutakalü aaʼu. Naaʼinrawalin tia na surulaat kepiakana suluʼu tü mma pejepünaakat nanain. Kasaaleere wanee surulaat israelita sümaa soʼutku tia jierü kepiakat suluʼu tü mma nashutakalü aaʼu, nuuʼulaainjatü sülatüin wanee kashi süchikijee tia (Deut. 21:10-13).
Maaʼulu yaa aikaleʼennüsü pütchi süpüla naaʼinmajünüin na wayuukana eepa wanee atkawaa. Wainma na sülaülashiikana mma anakana amüin tia pütchikat, nnojotpejeʼe kasajatüin namüin tia natkaapa.
5. ATKAAPUʼUSHI JEHOVÁ NAPÜLEERUA NA ISRAELITAKANA
¿Atkaashiche Maleiwa maaʼulu yaa süchiirua wanee mma maʼaka naaʼinrüin shia napüleerua na israelitakana chaa Jericó?
Sümaiwa paala atkaashi Jehová napüleerua na israelitakana jee aaʼinrüshi kasa pülasü süpüla nakanajüin wanee atkawaa. Jamüshijaʼa nia, aaʼinrüshi kasa pülasü süpüla mapüleeinjatüin namüin na israelitakana nashutuin saaʼu tü pueulokot Jericó. Naʼwaatapa na israelitakana süpülapünaa atkawaa, sujuichijaaka süsepü tü pueulokot Jericó (Jos. 6:20). ¿Jamüsü sukuwaʼipa süpüla nakanajüin na amorreokana? Ojutuusü naaʼu miyoʼuyuu shiʼichiise juya nutuma Jehová. Kojuya na outakana sutuma tia noulia na outakana natuma na surulaat israelitakana (Jos. 10:6-11).
Maaʼulu yaa nnojoishi atkaain Jehová süchiirua wanee mma. Naata sukuwaʼipa tü aluwatawaa eekat nutuma, niʼitaain Jesús süpüla niainjachin aluwataain (Juan 18:36). Niapejeʼe Satanás sülaülain tü aluwatawaa eekat sutuma wayuu. Tü kasa keemakalü atuma tü atkawaakat shia süka süshatünüin nukuwaʼipa Satanás (Luc. 4:5-7; 1 Juan 5:19).
NACHAJAAIN SUKUWAʼIPA NA ANOUJASHIIKANA ANAJIRAAIN NAYA
Naata wakuwaʼipa maaʼulu yaa noulia na israelitakana sümaiwa. Nnojotpejeʼe shiain neʼe tia moʼunuin atumawaa waya sünain atkawaa, nnojoishiʼiya waya oʼunuin sünain atkawaa süka nüküjatüjülin Maleiwa tü waaʼinrajatkat maaʼutpünaa yaa, nnojoliinjanain waya «atkaajiraain otta ekirajaain sünain atkawaa» (Is. 2:2-4). Nüküjainña Cristo namüin na nikirajüinkana nnojoliin naya wanaawain namaa na manoujainsaliikana. Müshiijeseʼe nnojoliinjanain waya sünainpünaain atkawaa (Juan 15:19).
Nüküjainña Cristo namüin na nikirajüinkana naaʼinmajüinjatüin nakuwaʼipa suulia üttakuʼu sümüin naaʼin, nnojoliinjanain jashichin naya jee nnojoliinjanain natkaain (Mat. 5:21, 22). Nüküjainña namüin nachajaainjatüin sukuwaʼipa süpüla eeinjatüin anajirawaa jee alinjanain napüla na naʼünüükana (Mat. 5:9, 44).
¿Kasakaʼa waaʼinrajatüin süpüla wountuin tia? Eesü nnojorüle keeʼireein waaʼin woʼunuinjanain sünain atkawaa. Eepejeʼe süpüla süntüin suluʼumüin waaʼin üttüin waaʼin nünain wanee wawala. Mülejeʼeya waaʼin mayaa, waʼyataa süchiirua süpüla wasünneʼerüin shia suluʼujee waaʼin (Sant. 4:1, 11).
Nnojoishii waya sünainpünaain tü atkawaakat, shia wachajaaka achiki anajirawaa jee aijirawaa (Juan 13:34, 35). Wachajaa maʼin sukuwaʼipa süpüla nnojoliinjanain waya sünainpünaain tü atkawaakat. Waʼatapaja tü kaʼi najaʼttirajatkalü oʼu shia Jehová (Sal. 46:9).
a Natkaapa na israelitakana namaa waneinnua israelita naatakana eʼiruku, nnojoishi eein Jehová namaa (1 Rey. 12:24). Eepejeʼe anale nümüin Jehová natkaajiraale shiʼrüle wayumüin nümüin wanee eʼiruku jee saaʼinrüle kasa kashüülasü noʼuluʼu (Juec. 20:3-35; 2 Crón. 13:3-18; 25:14-22; 28:1-8).
