1. ¿Jamüsü choʼujaaka maʼin natütüleʼerajiraain naaʼin na anoujashii namaiwajanakana naashin Pablo?

MAAʼUTPÜNAA yaa choʼujaashaatasü maʼin watütüleʼerajiraain waaʼin. Anuu nünüiki Pablo namüin na anoujashii hebreokana: «Anakaja müleka wakaaliijiraale wapüshua sünain kamaneejiraain je sünain waaʼinrüin tü anasükat. Je anakaja müleka nnojoliire müin aka waya naaʼin na wayuu akulajaakana aaʼin sünain jutkatirawaa. Shia anaka aluʼu müleka jutkatiraale waya süpüla ekirajirawaa süpüla wachecherüin waaʼin sünain anoujaa süka sülüʼülüin nükalia chi Senyotkai» (Heb. 10:24, 25). Eeshiijaʼa nasakireʼerüle naaʼin na anoujashiikana jamüin choʼujaaka natütüleʼerajiraain naaʼin naashin Pablo. Jaʼrai juya süchikijee tia, neʼrüin na anoujashiikana sünain sülüʼülüin tü kaʼi süsalainjatkalü oʼu saainjala wayuu chaa Jerusalén nutuma Jeʼwaa. Nayaawata aaʼu sünain shikeraajüin tü nümakat Jesuu süchiki Jerusalén otta nojuʼitajanain suluʼujee tia pueulokot (Luc. 21:20-23; Aluw. 2:19, 20). Antüsüjaʼaya tia kaʼikat soʼu tü juyakat 70, wanaa  sümaa sajaʼttinnüin Jerusalén natuma na romaanokana.

2. ¿Jamüsü eeinjatka maʼin waaʼin süpüla watütüleʼerüin naaʼin na wawalayuukana?

² Müsia neʼe wakuwaʼipa maaʼulu maʼaka nakuwaʼipa naya anoujashii namaiwajanakana. Alüʼütsü maʼin nükalia Jeʼwaa, «tü miyoʼukat sümaa keemain maʼin shia» (Joel 2:11). Akaʼaya tü nümakat Sofonías, ekeraajeerü maaʼutpünaa, müshi nia: «Alüʼütsü tü nükalia Jeʼwaa keemakat maʼin. Alüʼütsü maʼin, ountaashi maʼin nia süchiirua» (Sof. 1:14). Anuujeseʼe nünüiki Pablo sutuma sülüʼülüin tia: «Anakaja müleka wakaaliijiraale wapüshua sünain kamaneejiraain je sünain waaʼinrüin tü anasükat» (Heb. 10:24). Jülüjainjana maʼin waaʼin na wawalayuukana otta watütüleʼerüinjatü naaʼin choʼujaale shia namüin.

3. ¿Jamüsü nünüiki Pablo süchiki atütüleʼeraa naaʼin na wawalayuukana? (Piirakaa sümüin tü ayaakuaa suluʼukat süpana 21).

³ «Shapaale maʼin naaʼin wanee wayuu nnojotsü talatüin naaʼin, talateechipajaʼa nia sütütüleʼennüle naaʼin süka pütchi anasü» (Prov. 12:25). Choʼujaʼawaisü wamüin wayakana wapüshuaʼa sütütüleʼennüin waaʼin. Jaʼitakajeʼe neʼe na atütüleʼerawaikana naaʼin na waneinnua, choʼujaasü namüin sütütüleʼennüin naaʼin naashin Pablo. Anuujeseʼe nünüiki namüin na anoujashii chajanakana Roma: «Cheeshi taya jümaa süpüla taküjainjatüin jümüin wane pütchi anasü aapünakat nütüma chi Naaʼinkai Maleiwa tamüin süpüla katsüinjatüin jaaʼin sütüma. Keeʼireesü taaʼin wakaaliijiraain wayakana wapüshua sünain achecheraa waaʼin sükajee tü wanoulakat. Wanaa sümaa katsüin jaaʼin tatüma saaʼu jiʼrüin tü tanoulakat, katsüinjeerü taaʼin jütümaya saaʼu teʼrüin tü jünoulakat» (Roma 1:11, 12). Jaʼitaichi Pablo, choʼujaasü nümüin nütütüleʼennüin aaʼin (paashajeʼera Roma 15:30-32).

4, 5. ¿Jaralii na wawalayuu choʼujaakana amüin watütüleʼerüin aaʼin maaʼutpünaa? ¿Jamüsü watütüleʼerüinjatka naaʼin?

⁴ Maaʼulu yaa, watta naalii wawalayuu apütakana wainma kasa süpüla waneepiainjanain naya sünain aʼyatawaa nümüin Jeʼwaa. Eeshii na pürekutsootkana, na misioneerokana, chi wawala alapalaakai waaʼu sümaa nuʼwayuuse otta na aʼyataakana suluʼu Weteet jee shiale suluʼu tü piichi eere sülatinnüin pütchi. Choʼujaasü watütüleʼerüin naaʼin wawalayuukana naainnua otta waaʼinrüinjatü shia. Akaʼaya na wawalayuu nnojoliinnapakana waneepiain sünain aʼyatawaa nümüin Jeʼwaa sutuma kapüleeitpain shia namüin, choʼujaasü watütüleʼerüin naaʼin.

⁵ ¿Jaraliiche na wane wawalayuu choʼujaakana amüin atütüleʼennaa aaʼin? Naya na wawalayuu maʼwayuusekana sutuma noonooin sümaa tü nümakat Jeʼwaa süchiki kasaalüinjanain neʼe naya sümaa wanee wayuu eekai sunoujain wanaa namaa (1 Cor. 7:39). Na wawalayuu jieyuu kaʼwayuusekana, atütülaasü naaʼin wanaa sümaa «aisü pia tapüla», nümüin chi suʼwayuusekai sümüin otta naapüle analuʼut sümüin saaʼu tü kasa anasü saaʼinrakat (Prov. 31:28, 31). Akaʼaya na wawalayuu waneepiakana nümaa Jeʼwaa mayaapejeʼe müliain naya atumawaa jee ayuulin naya, choʼujaasü natütüleʼennüin aaʼin (2 Tes. 1:3-5). Atütüleʼennüsü naaʼin naya wawalayuukana nutuma Jeʼwaa nümaa Jesuu (paashajeʼera 2 Tesalónica 2:16, 17).

6. ¿Kasa watüjaka sünainjee naʼyataain na laülaashii aküjünakana achiki suluʼu Isaías 32:1, 2?

⁶ (Paashajeʼera Isaías 32:1, 2). Joutsü maʼin müliaa maaʼulu yaa, müsüjeseʼe mojuwalin waaʼin. Nütütüleʼerüin waaʼin Jesuu nakajee na anoujashii chainjanakana chaa iipünaa jee nakajee na laülaashii yaainjanaka yaa mmapaʼa. Nnojoliipejeʼe «aluwataain» na laülaashiikana saaʼu wanoula, aʼyataashii naya süpüla talatüinjatüin waaʼin. Keeʼireesü naaʼin talatüin waya otta wachecherüin  waaʼin sünain anoujaa (2 Cor. 1:24, TNM).

7, 8. ¿Kasa amaa naaʼinrajatkat na laülaashiikana süpüla natütüleʼerüin naaʼin na wawalayuukana?

⁷ Anasü maʼin nashatüle nukuwaʼipa Pablo na laülaashiikana. Anuu nünüiki namüin na anoujashii müliakana atumawaa chaa Tesalónica: «Aishaatashii jia wapüla, nnojoliishii talatüin neʼe waya süka waküjain jümüin tü pütchi anasükat nüchiki Maleiwa, talatüshii waya süka waapajiraain wekii jaaʼu süka alin maʼin jia wapüla» (1 Tes. 2:8, TNM).

⁸ Eesü süpüla watütüleʼerüin naaʼin na wawalayuukana sükajee wanüiki. Eepejeʼe wanee kasa waaʼinrajatka naashin Pablo, müshi nia namüin na laülaashii chejeʼewaliikana Éfeso: «Müinjanaʼinya waya aʼyataain süpüla wakaalinjüinjatüin tü wayuu jaʼijaakat amüin kasa. Soto jaaʼin tü nümakat chi Senyotkai Jesús wanaa sümaa nümüin: ‹Anakuaippaʼireʼeya chi wayuu aapakai nuulia chi aapünakai amüin›» (Aluw. 20:35). Nnojotsü nütütüleʼerüin neʼe Pablo naaʼin na nuwalayuukana, nükaaliinjain naya. Müshi nia namüin: «Mayaasüje sajaʼtteerüin tanneetse, ayateechia taya sünain takaaliijain jia» (2 Cor. 12:15). Na laülaashiikana, nnojotsü neʼe natütüleʼerüinjatüin naaʼin na wawalayuukana sükaje neʼe nanüiki, aaʼinrüinjana kasa anasü napüleʼerua. Müle shia natuma, shiimainjaʼa jülüjain naaʼin na wawalayuukana (1 Cor. 14:3).

9. ¿Kasa naaʼinrajatka na laülaashiikana süpüla anain natuma nachiaaya na wawalayuukana?

⁹ Eeshii nachiaanüle na wawalayuukana natuma na laülaashiikana süpüla sükatsüinnüin nanoula. Süpüla anain nachiaaya na wawalayuukana, jülüjeesü naaʼin na laülaashiikana tü sümakat tü Wiwüliakat. Anasü nashatüle sukuwaʼipa tü naaʼinrakat Jesuu soʼu nüchiaain na anoujashii chejeʼewaliikana Asia Menor. Naaʼinrüin tia, süchikijee nüsoʼiraain aaʼin. Jamüshijaʼa nia, süpülapünaa nüchiaain na anoujashii chajanakana Éfeso, Pérgamo otta Tiatira, anasü nünüiki namüin saaʼu tü kasa anasü naaʼinrakat (Alat. Map. 2:1-5, 12, 13, 18, 19). Anuu nünüiki Jesuu namüin na anoujashii chajanakana Laodicea: «Tachiajaain jia jooluʼu süka alin jia tapüla. Je napüshua na aikana tapüla, kalioʼushii tatüma. Je sükajee tia, anakaja jiyaawajaale suulia kaainjalaa süpüla jiʼyataainjanain tamüin süka süpüshua jaaʼin» (Alat. Map. 3:19). Anasü maʼin nashatüle na laülaashiikana nukuwaʼipa Jesuu nachiaainjanapa na wawalayuukana.

10. ¿Kasa waaʼinrajatka wapüshuaʼa süpüla watütüleʼerajiraain waaʼin namaa na wawalayuukana?

¹⁰ Nnojoishii nayain neʼe na laülaashiikana atütüleʼerüinjanain naaʼin na wawalayuukana. Naashin Pablo, aashajaainjana waya wapüshuaʼa namaa na wawalayuukana «süka pütchi analuʼut akaaliijüinjatkat naya sünain tü anasükat» (Éf. 4:29). Jülüja maʼin waaʼin tü alatakat namüin na wawalayuukana süpüla wakaaliinjain naya. Anuujeseʼe nünüiki Pablo namüin na anoujashii hebreokana: «Anakaja müleka sotüle jaaʼin tü juwalayuukolüirua eekai malain naaʼin sünain anoujaa. Jükaaliijiraa jümaala jüpüshua süpüla süchecherüinjatüin jaaʼin. Anakaja müleka lotüle jia sünain anoujaa napüleerua na juwalayuukana süpüla katsüinjatüin naaʼin nachikua suulia nooʼulaajüin suulia anoujaa» (Heb. 12:12, 13). Jaʼitainna na wawalayuu tepichijayüliikana, eeshii süpüla natütüleʼerüin naaʼin na wawalayuukana sükajee nanüiki.

11. ¿Kasa atütüleʼeraka saaʼin tü wawalakat Marthe suʼunnaa mojuin maʼin saaʼin?

¹¹ Wekirajaa süchiki tü alatakat sümüin wanee wawala Marthe sünülia. * Mojupuʼusü maʼin saaʼin: Anuu sünüiki: «Soʼu wanee kaʼi tachuntaka oʼu kaaliinwaa nümüin Jeʼwaa, antiraasü taya sümaa wanee wawala laülaairü, kamaneesü maʼin shia tamüin sümaa sümülialaain saaʼin taalin. Shiaʼaya choʼujaaka tamüin tü saaʼinrakat tia  wawalakat. Saashin shiaka, majatia sukuwaʼipa maʼaka taaʼin tayaka. Anasü taaʼin sutuma tü sümakat tamüin». Eesüjaʼa nnojorüle sütüjaain saaʼu tü wawalakat anain saaʼin Marthe sutuma tü sümakat sümüin.

12, 13. ¿Kasa waaʼinrajatka süpüla weʼitaain suluʼu wakuwaʼipa tü sümakat Filipos 2:1-4?

¹² Anuu wanee nünüiki Pablo namüin na anoujashii chejeʼewaliikana Filipos: «Talatüsü maʼi taaʼin jütüma, süka jüchecherüin jaaʼin waneepia sünain anoujaa sütümajee saʼaniraaitpain jukuaippa nümaa Cristo. Tatüjaa aaʼulu sünain jükaaliijünüin waneepia nütüma wanaa sümaa mojuin jaaʼin, süka alin maʼi jia nüpüla. Tatüjaa aaʼulu sünain wanaawajiraain jaaʼin nümaa chi Naaʼinkai Maleiwa, je sünain jümüliajüin na juwalayuukana eekai müliain. Je jooluʼu, süpüla kooʼomüinjatüin tü talataa eekat tamaʼana, tachuntüin jooluʼu jümüin süka süpüshua taaʼin süpüla paaʼinwainjanain jia otta müsia süpüla aijiraainjanain jia jüpüla sünain jiʼyataain nümüin chi Senyotkai. Tü kasa anasü jaaʼinrakat sümüin wayuu, nnojo jaaʼinrüin shia süpüla juʼwaajüneein süka ooʼulaka süpüla juʼwaataainjanain suluʼu sümaa pülayaain jaaʼin suulia wayuu. Je nnojo yaletayaain jukuaippa suʼupala wayuu. Shia anaka aluʼu kojutule napüshua na juwalayuukana jütüma. Meeshii aka jia naaʼin Cristo Jesús sünain kapülain jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filip. 2:1-4).

¹³ Saashin wetsiikulokot tüü, jülüjainjana waaʼin na wawalayuukana süpüla watütüleʼerawaliin naaʼin. Wamülialüinjatü naaʼin, alinjana naya wapüla, paaʼinwainjana waya namaa otta amülialaainjana waya naalin.

14. ¿Kasa eeka süpüla watütüleʼerüin akajee naaʼin na wawalayuukana?

¹⁴ Talatüsü waaʼin waapüle nachiki na wawalayuu wakaaliinjalakana sünain tü nanoulakat sünain ayatüin naya aʼyataain nümüin Jeʼwaa.  Anuu nünüiki chi aluwataaushikai Juan: «Talataleesia maʼi taaʼin taapapa nachiki na tachooinkana, na takaaliijalakana sünain tü nanoulakat, sünain noonooin waneepia sümaa tü shiimüinkat ekirajünakat anain naya» (3 Juan 4). Naashin wainma pürekutsoot, talatüsü naaʼin wanaa sümaa naapüin sünain ayatüin nümaa Jeʼwaa wanee wayuu nekirajakai sünain tü Wiwüliakat. Shialeekajaʼa naapüle sünain pürekutsoolin nia. Mojule naaʼin wanee pürekutsoot, atütülaajeerü naaʼin waashajaale nümaa süchiki süpüshuaʼa tü kasa anasü naaʼinrakat napüleerua na waneinnua.

15. ¿Kasa eeka süpüla waaʼinrüin süpüla watütüleʼerüin naaʼin na wawalayuu waneepiakana sünain aʼyatawaa nümüin Jeʼwaa?

¹⁵ Naashin waneinnua wawalayuu alapalaakana waaʼu, atütülaasü naaʼin otta atütülaasü saaʼin naʼwayuuse nüshajüle wanee wawala wanee karaloʼuta namüin süpüla naapüin analuʼutka namüin saaʼu nalapalaain naaʼu. Akaʼaya na laülaashiikana, na misioneerokana, na pürekutsootkana jee na weteliitakana, atütülaajeerü naaʼin waapüle tü analuʼutkat namüin saaʼu waneepiain naya sünain aʼyatawaa nümüin Jeʼwaa.

16. ¿Kasa eeka süpüla watütüleʼerüin aka naaʼin na wawalayuukana?

¹⁶ Jaʼitaina japüleʼein waya otta manüleʼuin waya, eeshii süpüla watütüleʼerüin naaʼin na wawalayuukana. Nnojotsü kapüleein maʼin aaʼinraa tia. Eeshii süpüla wakulemeraain namüin wasakapa naya. Nnojoliire nakulemeraain wamüin, eesüjaʼa tü alatakat namüin otta eesüjaʼa naashajaweere nümaa wanee wawala süchiki tü alatakat namüin. Jamüshiijaʼa waapajüle nanüiki, eesü süpüla sütütülaajeerüin naaʼin (Sant. 1:19).

17. ¿Kasa naainjaka wanee wawala süpüla nütütüleʼerüin naaʼin wanee jimaʼai?

¹⁷ Wekirajaa süchiki tü alatakat nümüin wanee wawala jimaʼai, Henri nünülia. Eemiajaasü nunoula sümaa mojuin maʼin naaʼin sutuma nooʼulaain suulia aʼyatawaa nümüin Jeʼwaa kojuyashii  nüpüshi. Wane nüpüshi Henri akatalaaka nuulia Jeʼwaa, nia chi nüshikai, laülaapuʼushi nia suluʼu tü outkajaaleekat. Niasaʼa chi wawala alapalaaikai naaʼu, nümaashi nia eere wanee oikaalee kepein. Chajana naya yootuin, jülüjashaanasü naaʼin chi wawalakai tü nümakat Henri nümüin. Niyaawata aaʼu Henri nükaaliinjeenain na nüpüshikana süpüla naleʼejüin nachikuaʼa nünainmüin Jeʼwaa müleka waneepiale nia nümaa Jeʼwaa. Jee atütülaasü naaʼin sutuma naashajeʼerüin Salmo 46, Sofonías 3:17 otta Marcos 10:29, 30.

18. (1) ¿Jamüsü nünüiki chi aluwataaikai Salomón? (2) ¿Kasa anaka süpüla waaʼinrüin naashin chi aluwataaushikai Pablo?

¹⁸ ¿Kasa watüjaka sünainjee tü alatakat sümüin Marthe otta nümüin Henri? Wapüshuaʼa wayakana, eeshii süpüla watütüleʼerüin naaʼin na wawalayuu choʼujaakana amüin shia. Anuu nünüiki chi aluwataaikai Salomón: «Aneerü maʼin naaʼin [wanee wayuu] müleka anale pütchi nümüin soʼu choʼujaain shia nümüin [...]. Talatüsü naaʼin wanee wayuu nukulemeraanüle amüin otta akatchinraasü naaʼin sutuma pütchi anasü» (Prov. 15:23, 30). ¿Kasa eeka süpüla waaʼinrüin weʼrüle wanee wawala eekai mojuin maʼin naaʼin? Anasü waashajeʼerüle nümüin wanee pütchi suluʼujee Aapiria Wayuu jee shiale suluʼujee jw.org. Eeshii süpüla weeʼirajüin namaa tü jayeechiirua waʼwaajakalü aka Jeʼwaa, aneerü naaʼin sutuma. Anuu nünüiki Pablo süchiki tia: «Anakaja müleka jikirajiraale, je anashii sotojiraale jaaʼin aapaa analuʼut nümüin chi Maleiwakai sümaa eeʼirajaa süka süpüshua jaaʼin. Juʼwaaja nia süka jayeechi süpüshua, maa aka tü eeʼirajuushi kanüliakat Salmos je maa aka tü weeʼirajakat maaʼulu yaa sünain aʼwaajaa Maleiwa» (Col. 3:16; Aluw. 16:25).

19. ¿Jamüsü choʼujaaka watütüleʼerajiraain waaʼin namaa na wawalayuukana maaʼulu? ¿Kasa waaʼinrüinjatka sutuma tia?

¹⁹ Suʼunnaa sülüʼülaain maʼin tü nükaliakat Jeʼwaa, choʼujaasü maʼin watütüleʼerajiraain waaʼin namaa na wawalayuukana (Heb. 10:25). Müsüjeseʼe anain maʼin waaʼinrüle tü nümakat Pablo, müshi nia: «Anakaja müleka ayatüle jütütüjüin na juwalayuukana sünain anoujaa süpüla laülaajiraainjatüin jaaʼin sünain anoujaa jüpüshua» (1 Tes. 5:11).