1. ¿Kasa jaʼyaka saaʼu nukuwaʼipa Jeʼwaa namaa na wayuu aʼyataakana nümüin?

SUʼTTAIWAʼAYA tü kasakalüirua, aʼyataajiraatüjüiya Jesuu nümaa Jeʼwaa. Nia Jesuu akumajünatüjüikaʼaya palajana nutuma Jeʼwaa (Prov. 8:30). Akaataajaʼa joo na aʼyataapuʼukana nümüin Maleiwa paala sümaiwa, akaaliinjiraashii naya süpüla naaʼinrüin tü nuluwataakalü anain Maleiwa. Jamüshijaʼa Noé sümaa nüpüshi, akaaliinjiraashii naya süpüla nakumajüin tü anua miyoʼushaatakat. Müshiʼiya na israeliitakana suʼunnaa chajanain naya anoouishii, akaaliinjiraashii naya süpüla nakumajüin tü jurasükeetkat; noʼunapa suluʼumüin wanee mma, natsajüin shia sümaa nalüʼüjiraain tü sukorolokot. Kottiraashii joo nayaʼaya sünain eeʼirajaa jayeechi nümüin Jeʼwaa. Na aʼyataapuʼukana nümüin Maleiwa nountüin süpüshuaʼa tia süka paaʼinwain naya jee nakaaliinjiraain (Gén. 6:14-16, 22; Núm. 4:4-32; 1 Crón. 25:1-8).

2. (1) ¿Kasa naaʼinrapuʼuka na nikirajüinkana Jesuu? (2) ¿Kasa wekirajaajeetka anain jooluʼu?

² Akaaliinjiraapuʼushii na nikirajüinkana Jesuu sünain aʼyatawaa nümüin Maleiwa. Naashin Pablo, akaaliinjiraashii na anoujashiikana sünain aʼyatawaa nümüin Jeʼwaa mayaapejeʼe naatawalin tü natüjakalü  apüleerua jee tü aʼyatawaa eʼitaanakat najapuluʼu. Nountüin tia süka niain Jesuu nashatüin akuwaʼipa. «Mayaainje eein najapü, nücheʼe, nuuʼui, noʼu wane wayuu nünain, nnojoishi sükatajiraain. Waneeshia neʼe nia» naashin Pablo (paashajeʼera 1 Corinto 12:4-6, 12). Akaataajaʼa joo wayakana, anashii wakaaliinjiraale wapüshuaʼa. Wekirajaainjatü anain jooluʼu tü waaʼinrajatkat süpüla wakaaliinjiraain sünain aküjaa pütchi, namaa na wawalayuukana jee namaa na wapüshikana.

3. ¿Kasa nüküjaka Juan nüchiki wanee aapiee?

³ Nüküjüin Juan sünain niʼrüin akaratshishii aapiee sünain aʼyalajiraa konneeta. Anuu nünüiki Juan nüchiki wanee: «Teʼrakalaka wane aapiee müshi aka saaʼin jolotsü eekai sujutuuin iipünaajee». Chia aapieekai, aapünüsü nümüin shiyaawein shirouse tü Ishikat. Suluʼujee tia, ojuʼitüsü wanee sümüsain. Saʼakajee tü sümüsainkat, shiweetakalaka wanee kaashapairua. «Achiaanüsü tü kaashapakalüirua suulia sheewainjüin tü alamakalüirua je tü aʼttieekalüirua je tü wunuʼukalüirua eekat saaʼu mmakat. Nayainjana sheewainka na wayuu nnojoliikana eʼitaana anain nejeetse chi Maleiwakai neʼipoʼunain» (Alat. Map. 9:1-4). Nütüjaa aaʼu Juan nnojoleerüin apütaain tü aʼttieekat jee tü alamakat sutuma tü kaashapakalüirua. Nütüjaa aaʼu Juan tü alatakat chaa Egipto sutuma tü kaashapakalüirua (Éx. 10:12-15). Tü kaashapakalüirua niʼraka Juan, nayaawasesü na anoujashii chainjanakana chaa iipünaa. Naya aküjaka süchiki tü kasa mojusü aainjünakat suluʼu tü iküleesia nnojotkat shiimain. Akaaliinjanapejeʼe naya natuma na wayuu wattakana aalii yaainjanaka kepiain saaʼu tü Mmakat. Süka nakaaliinjiraain sünain aʼyatawaa nümüin Maleiwa, wattainna naalii na wayuu ojuʼitüinnapakana suluʼujee tü iküleesia nnojotkat shiimain. Nia aluwataaka Satanaa saaʼu tia iküleesiakalüirua.

4. (1) ¿Kasa nuluwataanaka anain waya Jeʼwaa? (2) ¿Kasa waaʼinrajatka süpüla wountüin waaʼinrüin tia?

⁴ Aluwataanüshii waya sünain aküjaa tü pütchi anasükat suluʼupünaa mmakat süpüshuaʼa süpülapünaa süntüin nükalia Maleiwa (Mat. 24:14; 28:19, 20). Na wayuu ekirajaweekana sünain tü Wiwüliakat, acheküshii wekirajüinjanain naya sünain (Alat. Map. 22:17). Süpüla wountüin waaʼinrüin tia, acheküshii paaʼinwainjanain waya jee akaaliinjiraainjana wayakana wapüshuaʼa (Éf. 4:16).

5, 6. ¿Kasa wakaaliinjiraʼawaika anain wapüshuaʼa?

⁵ Süpüla waküjüin tü süchikikat Nuluwataaya Maleiwa sümüin wayuu süpüshuaʼa, lotuinjatü sukuwaʼipa watuma. Sünain tü outkajawaa süpülajatkat ojuʼitaa sünain aküjaa pütchi, aküjünawaisü wamüin tü waaʼinrajatkat süpüla waküjüin pütchi. Waaʼinrüle tia, aküjeena waya süchiki Nuluwataaya Maleiwa sümüin wayuu süpüshuaʼa jee wainmeerü karalouktairua weitajaka. Eesü süküjünawaire wamüin süpüla woʼunüin sünain aküjaa pütchi eere nnojoyülüin saapajüin wayuu tü pütchi anasükat. Jüüjüüle waya sümüin tü münakat wamüin, wakaaliinjeena na wawalayuu aküjakana pütchi sainküin mmakat süpüshuaʼa ooʼulaka müshiʼiya na aapieekana (Alat. Map. 14:6).

⁶ Waashajeʼerawalin juyawai suluʼu tü anuariokat süküjünüin maʼin tü pütchikat wattapünaa, talatüsü waaʼin sutuma tia. Kojuya kaʼi süpülapünaa tü outkajawaakat miyoʼu, wounejaain na wayuukana süpüla narütkaainjanain sünain; akaaliinjiraashii waya sainküin mmakat süpüshuaʼa sünain tia aʼyatawaakat. Atütülaasü waaʼin sutuma tia outkajawaakalüirua, süka jamüin, aapajüshii waya pütchiirua jee anajüshii waya Drama. Atütülaasü waaʼin süpüla waʼyataain süka süpüshuaʼa waaʼin nümüin Jeʼwaa sutuma tia. Akaataajaʼa soʼu 14 nisán, outkajaʼawaishii waya wapüshuaʼa juyawai sünain tü outkajawaakat eere sotuin waaʼin ouktüin Jesuu. Waaʼinrüin tia süpüla jüüjüüin waya sümüin tü nuluwataakalü anain waya Jesuu. Mayaa, weeʼiyatüin sünain  kojutüin wamüin tü naaʼinrakat Maleiwa wapüleerua (1 Cor. 11:23-26). Akatatshii waya kaʼi süpüla wounejaain na wayuukana napüshuaʼa sünain tia outkajawaakat.

7. ¿Kasa wountaka waaʼinrüin süka wakaaliinjiraain?

⁷ Waneesiale neʼe kaashapa ashutaka saaʼu wanee aʼttiee jee alama, nnojotsü süpüla sajaʼttirüinjatüin shia. Akaataajaʼa joo waneeshire chi aküjakai pütchi suluʼupünaa mmakat süpüshuaʼa, iseerü nüchiki naaʼinrüin tia. Shiasaʼa sutuma joo wakaaliinjiraain wapüshuaʼa sainküin mmakat süpüshuaʼa, wountüin waküjüin sümüin wayuu nüchiki Jeʼwaa süpüla suʼwaajüin nia jee kojutüin nia namüin.

8, 9. (1) ¿Kasa naaʼinrajatka na anoujashiikana süpüla kottiraain naya? Piʼitaa wanee shiyaawase. (2) ¿Kaseerü weʼraka müleka nnojorüle yaletüin waaʼin?

⁸ Nüküjüin Pablo namüin na anoujashii chajanakana Éfeso tü naaʼinrajatkat süpüla nakaaliinjiraainjanain otta nüküjüin namüin anainjatüin nakuwaʼipa sünain süpüshuaʼa tü kasakalüirua (paashajeʼera Éfeso 4:15, 16). Süpüla kottiraain na anoujashiikana sünain aʼyatawaa, acheküshii nakaaliinjiraainjanain. Niʼitaain Pablo wanee shiyaawase namüin süpüla nayaawatüinjatüin saaʼu tia. Süpüla anainjachin wanee wayuu naashin Pablo, choʼujaasü nümüin tü najapükat, tü nücheʼekat, tü nuuʼuikat otta tü noʼukot. Akaataajaʼa joo wayakana, choʼujaashii wakaaliinjiraainjanain wapüshuaʼa, jaʼitainna tepichiyülin jee wataralaainnale, jaʼitainna ayuulin jee anain waya. ¿Kasa waaʼinrajatka süpüla ayatüin wakaaliinjiraain?

⁹ Tü waaʼinrajatkat shia kojutüinjanain wamüin na laülaashiikana otta jüüjüüinjana waya namüin süka niʼinaajalain naya Jesuu, chi wekiipüʼükai (Heb. 13:7, 17). Kapüleere wamüin tia, wachunta kaaliinwaa nümüin Jeʼwaa süpüla nuʼunirüin wakuwaʼipa. Nükaaliinjeena waya nükajee chi Naaʼinkai süpüla jüüjüüin waya sümüin tü aluwataanakalü anain waya. Akaaliinjiraajeena waya jee aijiraajeena waya müleka nnojorüle yaletüin waaʼin otta waʼyataajiraale namaa na laülaashiikana.

10. ¿Jamüshii kottiraaka waya sutuma tü aʼyatawaa naaʼinrakat na aʼyataakana neʼipajee na laülaashiikana? (Piirakaa sümüin tü ayaakuaa suluʼukat süpana 19).

¹⁰ Na aʼyataakana neʼipajee na laülaashiikana, nakaaliinjain na wawalayuukana süpüla kottiraain naya. Akaaliinjünüshii na laülaashiikana natuma otta talatüsü naaʼin sutuma tü aʼyatawaa eʼitaanakat najapuluʼu. Jülüjasü naaʼin süpüla eeinjatüin karalouktairua wamaʼana süpüla waküjüin pütchi, nepitajüin tü Piichi Outkajaaleekat otta nanouktüin wanee kasa eekai mojuin sünain, nasaküin na antakana sünain tü outkajawaakat. Wakaaliinjüle na aʼyataakana neʼipajee na laülaashiikana, loteerü süpüshuaʼa tü kasa aainjüneetkat (anasü paashajeʼerüle Aluwataaushikana 6:3-6).

11. ¿Kasa eeka süpüla naaʼinrüin na jimaʼaliikana süpüla nakaaliinjain na wawalayuukana?

¹¹ Eeshii wawalayuu kakaliainnakana sünain aʼyatawaa napüleerua na nawalayuukana. Shiasaʼa joo sutuma tü laülawaakat, isairü nachiki naaʼinrüin tü naaʼinrapuʼukat paala. Eepejeʼe jimaʼalii eeka süpüla akaaliinjain naya. Eeshii süpüla nekirajünüin na jimaʼaliikana süpüla nakaaliinjain na wawalayuukana. Anale natuma naʼyataain na aʼyataakana neʼipajee na laülaashiikana, eeshii süpüla laülaashiin naya mapa suluʼu tü outkajaaleekat (1 Tim. 3:1, 10). Eeshii laülaashii eeka naneekünüin süpüla nalapalaain naaʼu na wawalayuukana sümaa nnojoluin nataralaain maʼin; watta naalii na wawalayuu nakaaliinjakana. ¿Aashin kojutüin maʼin wamüin tü naaʼinrakat wapüleerua na wawalayuu jimaʼaliikana? (Paashajeʼera Salmo 110:3 otta Eclesiastés 12:1).

12, 13. ¿Kasa waaʼinrajatka süpüla kottiraain waya sümaa wapüshi?

¹² Choʼujaasü wakaaliinjiraainjanain namaa na wapüshikana. Kottiraajeena waya sümaa  wapüshi wekirajaale semaanawai soʼu tü ai waʼwaajakalü oʼu Maleiwa sümaa wapüshi. Paaʼinwashii jee kottiraashii na wayuukana namaa nachonnii sutuma nekirajaain nüchiki Jeʼwaa. Soʼu tia aikat, eesü süpüla nashatüin sukuwaʼipa tü nanüikinjatkat sünain aküjaa pütchi, naaʼinrüle tia, atüjeena naya ekirajaa. Aijiraajeena na wayuukana sümaa napüshi müleka kottiraale naya sünain aashajawaa süchiki tü Nünüikikat Maleiwa, aire nia napüla jee naaʼinrüle tü nüchekakat napüleerua.

¹³ ¿Kasa naaʼinrajatka wanee wayuu sümaa nuʼwayuuse süpüla aijiraainjanain naya? (Mat. 19:6). Aire Jeʼwaa napüla jee naʼyataale nümüin, aijiraajeena maʼin naya. Naaʼinrüle tia, nashateerü nukuwaʼipa Abraham sümaa Sara, nukuwaʼipa Isaac sümaa Rebeca otta nukuwaʼipa Elqaná sümaa Ana (Gén. 26:8; 1 Sam. 1:5, 8; 1 Ped. 3:5, 6). Aijiraale maʼin na kaʼwayuuseshiikana, aleeweena naya nümaa Jeʼwaa (paashajeʼera Eclesiastés 4:12).

14. Maʼyataainre puʼwayuuse nümüin Jeʼwaa, ¿kasa eeka süpüla paaʼinrüin süpüla aijiraain jia?

¹⁴ Saashin tü Wiwüliakat, nnojoishi kasaalüinjachin wanee aʼyataai nümüin Jeʼwaa sümaa wanee jierü eeka manoujain. Akaataajaʼa tü jierü aʼyataakat nümüin Jeʼwaa, nnojotsü kasaalüinjatüin shia nümaa wanee manoujainsai (2 Cor. 6:14). Eeshi chi wawala kasaattüjüikai süpülapünaa nunoujain, nnojotpejeʼe anoujain mapa tü nuʼwayuusekat wanaa nümaa. Eeshi chi wawala kasaatkai sümaa wanee wawala aʼyataaka nümüin Jeʼwaa, ooʼulaapejeʼe shia mapa suulia aʼyatawaa nümüin Jeʼwaa. ¿Kasa akaaliinjeechika pia sülatüle pümüin tia? Paaʼinrüinjatü tü sümakat tü Wiwüliakat mayaapejeʼe kapüleejeerüin shia pümüin. Tia, shia tü alatakat sümüin Mary. Aʼyataajiraapuʼusü shia nümüin Jeʼwaa nümaa chi suʼwayuusekai. Alatüirü maʼaka 25 juya süchikijee nuuʼulaain chi suʼwayuusekai suulia oʼunaa sünain tü outkajawaakat. Ayatüsia oʼunüin Mary sünain tü outkajawaakat jee sünain tü outkajawaakat miyoʼu. Shiʼitaain suluʼu sukuwaʼipa tü sümakat tü Wiwüliakat jee müsia shikirajüin na aipiruashiikana süchonnii sünain tü Wiwüliakat. Miyoʼupa na süchonniikana, akatalaashii naya suulia saashin. Mayaainjeʼe mojuwalin saaʼin Mary sutuma sümüiwaʼain, nnojotsü ooʼulaain suulia aʼyatawaa nümüin Jeʼwaa. Shiasaʼa mapa, naashajeʼerawalin David tü rewiisütakalüirua. Süpütayaain Mary tia rewiisütakalüirua süpüla naashajeʼerüin shia David. Mapa, outkajaashi nüchikuaʼa. Chi nülüinkai David,  nükatalawalin wanee einasee nüpüla suluʼu tü Piichi Outkajaaleekat. Müleka nnojoire nuʼunüin David sünain tü outkajawaakat, «taata, mojusü taaʼin sutuma nnojoluin puʼunüin sünain tü outkajawaakat», maʼwaishi chi nülüinchonkai nümüin. Mapa, aleʼejüshi nüchikuaʼa David suluʼumüin tü nupueulosekat Jeʼwaa, 25 juya nnojolin nia sünain tü outkajawaakat. Talatüsü maʼin saaʼin Mary süka shiʼyataaitpain süchikuaʼa nümüin Jeʼwaa nümaa suʼwayuuse.

15. ¿Kasa naaʼinrajatka na kakaliainnakana kasaalüin süpüla nakaaliinjain na jekenakana kasaalüin?

¹⁵ Nümalajeʼereein Satanaa wanoula sümaa sunoula wapüshi, müsüjeseʼe choʼujaain kottiraain jee aijiraain maʼin waya sümaa wapüshi. Wachajaa sukuwaʼipa süpüla aijiraain maʼin waya sümaa waʼwayuuse, jaʼitainna kakaliainnain waya sünain kasaalüü. Na kakaliainnakana sünain kasaalüü, anashii nakaaliinjale na jekenakana sünain kasaalüü. Juunejaa naya soʼu tü ai juʼwaajakalü oʼu Maleiwa sümaa jüpüshi. Nashateetka tia jüchiirua jee müsia waneepieena naya jaʼitairü jeʼrain juya alataka (Tito 2:3-7).

16, 17. ¿Kasa anasü weʼreetka müleka wakaaliinjiraale wapüshuaʼa maaʼulu yaa?

¹⁶ Wanaa sümaa noʼunawalin na israeliitakana Jerusalénmüin sünain aʼwaajaa Maleiwa, akaaliinjiraapuʼushii naya. Yapapuʼushii naya süpüla oʼunajawaa jee akaaliinjiraapuʼushii naya wopuluʼu sünain tü kasa choʼujaakat namüin. Kottapuʼushii naya sünain aʼwaajaa Jeʼwaa suluʼu tü aʼwaajüleekat (Luc. 2:41-44). Akaataajaʼa joo wayakana wopuluʼuinnapa waya suluʼumüin tü mma jeketkat, müsüjeseʼe choʼujaain wakaaliinjiraainjanain jee anajiraainjanain waya wapüshuaʼa. Kapüleepejeʼe süpüla waaʼinrüin tia. ¿Kasa maa eeka süpüla waaʼinrüin süpüla wakaaliinjain na wawalayuukana?

¹⁷ Matüjüinsat akaaliinjirawaa wayuu maaʼulu yaa jee mojujiraasü saaʼu kasa eeka eein neʼe. Eekajasaʼa wayakana, nükaaliinjain waya Jeʼwaa süpüla anajiraainjanain waya otta süpüla wayaawatüin saaʼu tü sümakat tü Wiwüliakat. Kojutüsü maʼin wamüin tia. Talatüshi maʼin Jeʼwaa süka nuʼwaajünüin sainküin mmakat süpüshuaʼa sutuma tü nupueulosekat. Maaʼulu yaa, akaaliinjiraashii maʼin waya jee weʼrüin sünain shikeraajüin tü nümakat Isaías nümaa Miqueas. Naküjüin sünain soʼotooinjatüin saaʼu nuʼuuchise Jeʼwaa tü nupueulosekat (Is. 2:2-4; paashajeʼera Miqueas 4:2-4). Wakaaliinjiraale maaʼulu yaa, wainmeerü kasa anasü weʼreetka. Jee müsia, weʼreerü tü kaʼi eere kottiraajeenain wapüshuaʼa sünain aʼwaajaa Jeʼwaa.