1, 2. (1) ¿Kasa talataka maʼin atuma waaʼin maaʼulu yaa? (2) ¿Kasa nütüjaainjatka aaʼu wanee jintüi müleka woutiiseere nia?

WOUTIISEESÜ maʼin naaʼin Christopher wanaa sümaa 12 nuuyase. Anuu nünüiki wanee laülaashi nümüin: «Teʼraajatüjüʼiya pia joʼuuiwaʼaya. Talatüsü maʼin taaʼin süka woutiiseein pia. ¿Jamüshi woutiiseeka pia?». Makaʼa nüsakirüin chi jintüikai shia süpüla nütüjaain saaʼu müleka shiimainre woutiiseein nia süka naaʼin nümüiwaʼa. Talatüsü maʼin waaʼin süka wattain naalii jimaʼalii jee majayünnüü woutiisakana juyawai (Ecl. 12:1). Na anoujashii kachonshiikana, natüjaainjatü aaʼu palajana müleka shiimainrejeʼe nuwoutiisaajeein wanee nachon ooʼulaka nayaawatüinjatü aaʼu na tepichikana nnojoluin shaittaain tia. Natüjaainjatü aaʼu tia na laülaashiikanaya.

² Saashin tü Wiwüliakat, waapapa waaʼin nümüin Jeʼwaa jee woutiisapa waya, shia palajanainjatka watuma tü aʼyatawaakat nümüin Jeʼwaa. Watteerü saaliin kasa anasü neʼreetka na aaʼinrakana tia, wainmeetpejeʼe tü kasa ooʼulaküneetkalü aka naaʼin nutuma Satanaa (Prov. 10:22; 1 Ped. 5:8). Müsüjeseʼe choʼujaain nakaaliinjain  na tepichikana na kachonshiikana süpüla natüjaain saaʼu tü naaʼinrajatkat wanee wayuu eekai nikirajüin Kürisüto. Müleka manoujainre nüshi jee nii wanee jintüi, nayainjana na laülaashiikana akaaliinjaka nia süpüla nütüjaain saaʼu jamüin nnojotka shaittaain aapaa waaʼin nümüin Maleiwa jee woutiisaa (paashajeʼera Lucas 14:27-30). Jamüshijaʼa nukumajüinjachire nipia wanee wayuu, keraatüjülüinjatia nutuma tü kasa choʼujaakat süpüla tia. Akaʼaya wanee jintüi eekai woutiiseein, keraainjatü nutuma tü achuntünakat süpüla tia. Naaʼinrüle tia, waneepieechi nia nümaa Jeʼwaa (Mat. 24:13). ¿Kasa akaaliinjeenaka na tepichikana süpüla naʼyataainjanain nümüin Jeʼwaa süpüla kaʼikat süpüshuaʼa? Joʼu wekirajaai sünain tia.

3. (1) ¿Kasa nüküjaka Jesuu otta Pedro süchiki tü woutiisaakat? (Mat. 28:19, 20; 1 Ped. 3:21). (2) ¿Jarat tü pütchi wekirajaainjatkalü anain? (3) ¿Jamüsü choʼujaaka watüjaainjatüin saaʼu tia?

³ Piakai jimaʼaikai, woutiiseere pia, anasü maʼin tü paaʼinreekat. Akaajaa piakat majayütkat, anasü süka paaʼinrüin tiaʼaya. Nnojotsü eein wanee kasa eekai anaʼleein maʼin suulia woutiisaa jee aküjaa pütchi nüchiki Jeʼwaa. Naashin Jesuu, woutiisainjana napüshuaʼa na anoujashiikana. Nüküjüin Pedro woutiisainjachin wanee anoujashi süpüla nuʼttaainjachin soʼu tü müliaa miyoʼusükat (Mat. 28:19, 20; 1 Ped. 3:21). Wekirajaajeerü anain apünüinsü pütchi akaaliinjeechika pia süpüla piyaawatüin saaʼu müleka kettaale pia süpüla woutiisaa. Choʼujaasü maʼin püsakirüinjatüin paaʼin sünain tüü: «¿Laülaasüche taaʼin sünain anoujaa? ¿Jamüshi woutiiseeka taya? ¿Tayaawatüinche saaʼu jamaluʼuluin aapaa aaʼin nümüin Jeʼwaa?». Choʼujaashaatasü pütüjaainjatüin saaʼu tia, süka jamüin, woutiisapa pia, piiʼiyatüin sünain paapüin paaʼin nümüin Jeʼwaa süpüla piʼyataainjachin nümüin süpüla kaʼikat süpüshuaʼa.

4, 5. (1) ¿Jamüsü nnojotka choʼujaain laülaainjachin wanee wayuu süpüla woutiisain nia? (2) ¿Kasa niyaawataka aaʼu chi eekai laülaain naaʼin?

⁴ Nnojotsü süküjüin tü Wiwüliakat jeʼrainjatüin nuuyase wanee anoujashi süpüla woutiisainjachin nia. «Sükajee tü kasa anasü naaʼinrakat wanee jintüi, jaʼyasü naaʼu sünain lotuin nukuwaʼipa» (Prov. 20:11, TNM). Wanee jintüi eesü süpüla niyaawatüin saaʼu anale wanee kasa süpüla naaʼinrüin jee mojule shia süpüla naaʼinrüin. Otta müsia eesü süpüla niyaawatüin saaʼu kasain sünainpünaain naapüin naaʼin nümüin Jeʼwaa. Laülaale naaʼin wanee jintüi otta naapüichipale naaʼin nümüin Jeʼwaa, kettaashi nia süpüla woutiisaa (Prov. 20:7).

⁵ Nnojotsü choʼujaain miyoʼuinjachin wanee wayuu süpüla laülaainjatüin naaʼin. Saashin tü Wiwüliakat, chi wayuu laülaakai aaʼin, nia chi ayaawatakai saaʼu tü anasükat süpüla naaʼinrüinjatüin jee tü mojusükat süpüla niyouktüinjatüin shia (Heb. 5:14) (paashajeʼera «Pütchi pütüjaainjatka aaʼu»). Chi wayuu laülaakai aaʼin, naaʼinrüin tü anasükat süka süpüshuaʼa naaʼin. Akaʼaya nia, eejiraashi sümaa tü ooʼulakünakalü aka naaʼin otta nnojotsü choʼujaain nümüin süküjünakuʼu sümünüinjatüin tü anakat süpüla naaʼinrüin. Woutiisale pia shia süka puuntüin paaʼinrüin tü anasükat jaʼitaichi pümüiwaʼain pia (anasü paashajeʼerüle Filipos 2:12).

6, 7. (1) ¿Kasa ooʼulakünaka aka naaʼin Daniel chaa Babilonia? (2) ¿Jamüsü watüjaaka saaʼu laülaain naaʼin Daniel?

 ⁶ ¿Shiimainche eein süpüla laülaain naaʼin wanee jintüi? Jülüja waaʼin tü aküjünakat nüchiki Daniel, wanee aʼyataai nümüin Maleiwa. Jintüishi nia wanaa sümaa nümaanüin chaa Babiloniamüin, nnojoishi eejachin chi nüshikai nümaa jee müsia tü niikat. Wainma tü kasa ooʼulakünakalü aka naaʼin chayaa. Saʼakashi nia wayuu moonooinka sümaa nünüiki Maleiwa. Kapülashi aaʼinyüü nia chaa Babilonia jee aneekünüshi nia naʼakajee na jimaʼaliikana süpüla niʼyataainjachin nümüin chi aluwataakai saaʼu tia pueulokot (Dan. 1:3-5, 13). Müsü anaʼleekai saaʼin nukuwaʼipa Daniel chaa Babilonia suulia chaa Israel.

⁷ Niyouktapejeʼe Daniel süpüshuaʼa tü kasa aapüneekat nümüin chaa Babilonia, süka jamüin, laülaain naaʼin. Nnojotsü niiʼiratüin nukuwaʼipa jee ayatüshia nia oonooin sümaa nünüiki Jeʼwaa. Saashin tü Wiwüliakat, «nukumajatüjülia paala suluʼu naaʼin nnojoluinjachin nia sünainpünaain kasa mojusü». Niyouktashaatain Daniel nuʼwaajüinjatüin tü maleiwayaasükalüirua (Dan. 1:8, TNM). Naainjain tia süka laülaain naaʼin.

8. ¿Kasa shikirajaka anain pia nukuwaʼipa Daniel?

⁸ ¿Kasa shikirajaka anain pia nukuwaʼipa Daniel? Piakai jimaʼaikai, piakat majayütkat, laülaale jaaʼin, oonoweena jia sümaa nünüiki Jeʼwaa, jaʼitairü kasain alatüin jümüin. Nnojo jaaʼinrüin tü naaʼinrakat chi camaleón münakai, eeʼiratawaika nünoʼu süpüla nnojolinjachin niʼnnüin. Nnojo piamain juʼupünaa; nnojotsü waneejatüinjatüin jukuwaʼipa chapa jia suluʼu tü Piichi Outkajaaleekat suulia chapa jia suluʼu tü jükoleejiasekat. Waneepiainjana jia nümaa Maleiwa, jaʼitairü kasain ooʼulakünüin aka jaaʼin (paashajeʼera Éfeso 4:14, 15).

9, 10. (1) ¿Jamüsü anaka jülüjale paaʼin tü paaʼinrakat soʼu suuʼulakünüinkain paaʼin? (2) ¿Kasa piiʼiyataka wanaa sümaa woutiisain pia?

⁹ Shiimain nnojoluin eein wanee wayuu eekai maainjalain (Ecl. 7:20). Woutiiseere pia, jülüjainjatü paaʼin paaʼinreerüle waneepia tü nüchekakat Jeʼwaa püpüleerua. ¿Kakaliaichi pia oonooin sümaa nünüiki Jeʼwaa? ¿Kasa paaʼinraka  wanaa sümaa suuʼulakünüinkain paaʼin? ¿Shia paaʼinraka tü kasa anasükat? Eesüjaʼa süpüla sülatüin pümüin tü alatakat nümüin Daniel. Eesü süpüla süküjünüin pümüin eein süpüla washirüin pia saaʼu pütüjain maʼin jee kekiin maʼin pia. Sülatapa pümüin kasakalüirua tüü, ¿paaʼinreetche waneepia tü nüchekakat Jeʼwaa püpüleerua? (Éf. 5:17).

¹⁰ Anasü maʼin jülüjale maʼin waaʼin tia kasakalüirua, süka jamüin, nnojoluin shaittaain tü woutiisaakat. Wanaa sümaa woutiisain pia, piiʼiyatüin sümüin wayuu sünain alinjachin püpüla Jeʼwaa waneepia jee sünain piʼyataainjachin nümüin süka süpüshuaʼa paaʼin süpüla kaʼikat süpüshuaʼa (Mar. 12:30). Chi eekai woutiisain, nikeraajüinjatü tü nümakat nümüin Jeʼwaa (paashajeʼera Eclesiastés 5:4, 5).

11, 12. (1) ¿Kasa jülüjainjatka paaʼin woutiiseere pia? (2) ¿Kasa paaʼinrajatka süpüla kojutüin pümüin tü woutiisaakat maʼaka nutuma Jeʼwaa?

¹¹ Süküjatüjülia tü Wiwüliakat sünain kapülainjatüin naaʼin na anoujashiikana aʼyatawaa nümüin Maleiwa. Tia shia tü naaʼinrakat na jimaʼaliikana jee na majayünnüükana maaʼulu yaa (Sal. 110:3). Woutiiseere pia, piainjachi piakai aneekaka tia süka paaʼin pümüiwaʼa. Nnojoishii nayainjanain aneekaka tia na kachonkana pia.

¹² Eeshijaʼa piʼrüichire sünain woutiisain wanee paʼaleewain jee nayale na puwalayuukana. Nnojoipejeʼe woutiisainjachin pia süka joo piʼrüin woutiisayaa namüin na waneeinnua jee shiale neʼe süka miyoʼuichin pia. ¿Kasa paaʼinrajatka süpüla kojutüin pümüin tü woutiisaakat maʼaka nutuma Jeʼwaa? Jülüja paaʼin jamüin nnojotka shaittaain tü woutiisaakat. Wekirajaajeerü anain sünain ekirajaayakat tüü jee sünain tü wanee ekirajaayakat jamüin jülüjainjatka paaʼin tia.

13. ¿Kasa paaʼinrajatka süpüla pütüjaain saaʼu woutiiseere pia süka paaʼin pümüiwaʼa?

¹³ ¿Kasa paaʼinrajatka süpüla pütüjaain saaʼu woutiiseere pia süka paaʼin pümüiwaʼa? Pütüjaajeerü aaʼu tia jülüjale paaʼin pünüiki puʼuraajapa nümüin Jeʼwaa. Püsakira paaʼin sünain tüü: «¿Jeʼratua toʼuraajüin nümüin Jeʼwaa? ¿Lotusüche tanüiki nümüin Jeʼwaa tachuntajachipa wanee kasa nümüin?». Tia sükaaliinjeechi pia süpüla pütüjaain saaʼu shiimainrejeʼe paʼaleewainshaatain Maleiwa (Sal. 25:4). Eeshi nusouktawaire pümüin Jeʼwaa sükajee tü sümakat tü Wiwüliakat. Jee wanee kasa akaaliinjeechika pia woutiiseere pia shia pikirajaale sünain tü Wiwüliakat (Jos. 1:8). Püsakira paaʼin sünain tüü: «¿Tekirajaainche anain tü Wiwüliakat semaanawai? ¿Taʼatapajüinche maʼin tü kaʼi eere taʼwaajüin Maleiwa sümaa tapüshi?». Tia pütchikalüirua sükaaliinjeechi pia süpüla pütüjaain saaʼu woutiiseere pia süka paaʼin pümüiwaʼa.

14. Püküja jamüin naataka aapaa aaʼin nümüin Jeʼwaa suulia woutiisaa.

¹⁴ «Taapüitpa taaʼin nümüin Jeʼwaa, nnojoyüipejeʼe kettaain taya süpüla woutiisaa», eeshii jimaʼalii jee majayünnüü makana anüiki. Müshii naya süka nnojoluin nayaawatüin saaʼu jamaluʼuluin aapaa aaʼin nümüin Maleiwa jee woutiisaa. Paapüin paaʼin nümüin Jeʼwaa wanaa sümaa puʼuraajüin süpüla püpansaajüin pünüiki nümüin; suʼunnaa tia püküjüin nümüin piʼyataainjachin waneepia nümüin. Eekajasaʼa tü woutiisaakat süpülajatü sütüjaainjatüin saaʼu wayuu sünain paapüitpain paaʼin nümüin Jeʼwaa. Süpülapünaa woutiisain pia, acheküsü pütüjaain saaʼu jamaluʼuluin aapaa aaʼin nümüin Jeʼwaa.

15. ¿Jamüsü nnojotka shaittaain tü aapaakalü aaʼin nümüin Maleiwa?

¹⁵ Paapapa paaʼin nümüin Jeʼwaa, niaichipa püneekaka süpüla laülaain saaʼu pukuwaʼipa. Jee müsia püpansaajüin pünüiki nümüin sünain piʼyataainjachin nümüin waneepia (paashajeʼera Mateo 16:24). Müsüjeseʼe nnojoluin  shaittaain tü woutiisaakat (Mat. 5:33). ¿Kasa paaʼinrajatka süpüla piiʼiyatüin sünain niaichipain Maleiwa laülaain saaʼu pukuwaʼipa? (Roma 14:8, TNM).

16, 17. (1) Piʼitaa wanee shiyaawase eeʼiyataka sünain nnojoluin laülaain pia saaʼu pukuwaʼipa. (2) Wanaa sümaa naapüin naaʼin wanee wayuu nümüin Jeʼwaa, ¿kasa nüküjaka nümüin?

¹⁶ Weʼitaa wanee sukuwaʼipa. Jamüshijaʼa nüsülajüle wanee paʼaleewain pümüin wanee kemion sümaa nümüin pümüin: «Anuu peʼejena» sümaa naapüin pümüin sükaraloukse tü kemionkat. Shiasaʼa süchikijee tia nüküjüin pümüin chi paʼaleewainkai sünain niainjachin kamaʼanain shiyaawein tü kemionkat sümaa niainjachin oʼunirüin shia. ¿Shiimainche nüsülajüin pümüin tü kemionkat? ¿Jaraiche kakoroloko tü kemionkat?

¹⁷ Wanaa sümaa naapüin naaʼin wanee wayuu nümüin Maleiwa, müshi nia: «Piaichipa joo taneekaka süpüla laülaain saaʼu takuwaʼipa». Tü naʼatapajakat Jeʼwaa shia nikeraajüin nünüiki chia wayuukai. Nümüraajiraale chia anoujashikai sümaa wanee jierü eeka manoujain, nnojotsüjaʼa mata nikeraajüin tü nümakat nümüin Maleiwa. Akaataajaʼa joo nücheküle wanee aʼyatawaa eere siraain kaʼi naaʼu sümaa nnojoluin nujuʼitüin sünain aküjaa pütchi jee nnojoluin nuʼunüin sünain tü outkajawaakat sutuma. Meerü nukuwaʼipa maʼaka naaʼin chi asülajakai kemion naaʼinruʼu. Süka niaichipain püneeküin Jeʼwaa süpüla laülaain saaʼu pukuwaʼipa, acheküsü pikeraajüin tü pümakat nümüin, jaʼitasü nnojoluin shiain tü keeʼireekat paaʼin. Shia anaka aluʼu washatüle nukuwaʼipa Jesuu, müshi nia: «Ashakatüshi taya yaamüin chajee iipünaajee süpüla taaʼinrüinjatüin tü talatakat atüma naaʼin Maleiwa chi kajünalakai taya, nnojotsü shiain süpüla tü talatakat atüma neʼe taaʼin tayakai tamüiwa» (Juan 6:38).

18, 19. (1) ¿Kasa süküjaka Rose otta Christopher süchiki tü woutiisaakat? (2) ¿Kasa jülüjaka paaʼin süchiki tü woutiisaakat?

¹⁸ Woutiiseere pia, soteesü paaʼin nnojoluin shaittaain tia. Talateerü maʼin paaʼin paapüle paaʼin nümüin Jeʼwaa jee woutiisale pia. Aire püpüla Jeʼwaa otta pütüjaale saaʼu jamaluʼuluin aapaa aaʼin nümüin, woutiiseechi pia süka paaʼin pümüiwaʼa. Nnojoleerü wainmajüin paaʼin süka püneeküin tia. Anuu sünüiki wanee majayülü, Rose sünülia: «Aishi maʼin tapüla Jeʼwaa, talatüsü maʼin taya süka taʼyataain nümüin. Wanaa sümaa woutiisain taya, tayaawata aaʼu shiain wanee kasa anashaatasü tü taneekakat».

¹⁹ Jülüja waaʼin tü aküjünakat nüchiki Christopher. Woutiisashi nia wanaa sümaa 12 nuuyase. ¿Jamüsü naaʼin sutuma nüneeküin tia? Talatüshi maʼin nia naashin. Pürekutsootshi rekulaat nia wanaa sümaa 17 nuuyase, shiasaʼa 18 nuuyase aneekünüshi nia süpüla niʼyataainjachin neʼipajee na laülaashiikana. Maaʼulu yaa, aʼyataashi nia suluʼu Weteet. Müshi Christopher: «Talatüsü maʼin taaʼin süka woutiisain taya, süka taʼyataain nümüin Jeʼwaa jee müsia sümüin tü nupueulosekat». ¿Jama piakai? ¿Woutiiseeshi pia? Woutiiseere pia, ¿kasa paaʼinrajatka süpüla kettaain pia? Wekirajaajeerü anain tia sünain tü wanee ekirajaayakat.