¿Kasa paaʼinrajatka süpüla keraain pia süpüla woutiisaa?
«Maleiwakalee, talatüsü taaʼin sünain taaʼinrüin tü keeʼireekat paaʼin» (SAL. 40:8, TNM).
JAYEECHI: 51, 58
1, 2. (1) ¿Jamüsü nnojotka shaittaain tü woutiisaakat? (2) ¿Kasa paaʼinrajatka palajana süpülapünaa woutiisain pia?
PIAKAI jimaʼaikai, piakat majayütkat, ¿woutiiseeshii jia? Nnojotsü eein wanee kasa anaʼleekalia suulia tü woutiisaakat. Aküjünüsü suluʼu tü palajatkat ekirajaaya nnojoluin shaittaain tia. Makaʼa wanüiki shia süka piiʼiyatüin sünain paapüitpain paaʼin nümüin Jeʼwaa süpüla piʼyataainjachin nümüin soʼu kaʼikat süpüshuaʼa otta süpüla shiainjatüin paaʼinmaain tia. Süka nnojoluin shaittaain tia, laülaainjatü paaʼin süpülapünaa woutiisain pia, woutiisainjachi pia süka paaʼin pümüiwaʼa otta piyaawatüinjatü saaʼu jamaluʼuluin tü aapaakat aaʼin nümüin Maleiwa.
2 ¿Keraaichipa pia süpüla woutiisaa? «Jamüsaʼa», eeshi pümüle. «Nnojottaa», eeshi pümüleya. «Jiatta paa, tepichiyüiya pia», eesü müle nanüiki pümüin na wayuu kachonkana pia. Müle pukuwaʼipa mayaa, nnojo piyüülajaain. Ayata piʼyataain süchiirua süpüla keraainjachin pia süpüla woutiisaa. Sünain ekirajaayakat tüü, wekirajaajeerü anain jamüin choʼujaaka püchecheraain sünain tü punoujakalü anain, sünain tü kasa paaʼinrajatkat jee sünain kojutüinjatüin pümüin tü naaʼinrakat Jeʼwaa püpüleerua.
PÜCHECHERAA SÜNAIN TÜ PUNOUJAKALÜ ANAIN
3, 4. ¿Kasa eeka süpüla natüjain na jimaʼaliikana jee na majayünnüükana nünainjee Timoteo?
3 Püsakira paaʼin sünain tüü: «¿Jamüshi tanoujaka sünain eein chi Maleiwakai? ¿Jamüsü tatüjaaka saaʼu sünain shiimain nünüikin Maleiwa tü Wiwüliakat? ¿Jamüshi toonooka sümaa tü nümakat Maleiwa suulia tü sümakat tü manoujainsatkalüirua?». Püsakireʼerüle paaʼin sünain tia pütchikalüirua, paaʼinreerü tü nümakat Pablo wanaa sümaa nümüin: «Sünainjee tüü, juunteerü jiyaawatüin saaʼu tü nüchekakat jüpüleerua, je keeʼireejeerü jaaʼin jaaʼinreein tia» (Roma 12:2). Piyaawateerü aaʼu süka paaʼin pümüiwaʼa sünain aneerüin maʼin pümüin aaʼinraa tü nümakat Maleiwa. ¿Jamüsü piyaawatüinjatka saaʼu tia?
4 Jülüja paaʼin nukuwaʼipa Timoteo, chi jimaʼaikai. Jamüshijaʼa nia, niyaawata aaʼu tü shiimain ekirajünakalü anain nia suluʼujee tü karaloukta nüchikimaajatkat Maleiwa sutuma tü niikat jee tü noushukot. Anuu nünüiki Pablo nümüin: «Anakaja müleka ayatüle pia sünain tü ekirajünakat anain, tü pünoujakat anain» (2 Tim. 3:14, 15). Tü nüküjeekalü achiki Pablo, shia nüchecheraainjachin Timoteo sünain tü nunoujakalü anain süka nütüjaain saaʼu shiimain shia. Nnojoishi achecheraain neʼe nia süka shikirajüin nia tü niikat jee tü noushukot sünain tia, niyaawata aaʼu süka naaʼin nümüiwaʼa sünain shiimain tü nunoujakalü anain (paashajeʼera Hebreokana 5:14) Watta saalii tü kasa eekat süpüla natüjain na jimaʼaliikana jee na majayünnüükana nünainjee Timoteo.
5, 6. ¿Jamüsü choʼujaaka piyaawatüin saaʼu sünain shiimain tü punoujakalü anain?
5 ¿Kasa shikirajaka anain pia nukuwaʼipa Timoteo? Eeshijaʼa kakaliaichire pia sünain ekirajawaa sünain tü Wiwüliakat. Mülejeʼe shia, anasü püsakireʼerüle paaʼin jamüin shiimainka tü punoujakalü anain maʼaka saaʼin nutuma Timoteo. Püchecheraale sünain tü punoujakalü anain, akooʼomüinraajeerü punoula, jaʼitaichi püpüleeruaanüin aaʼin natuma na paʼaleewainyuukana, na manoujainsaliikana jee tü suchuntaakat paaʼin.
6 Choʼujaasü piyaawatüin saaʼu süka paaʼin pümüiwaʼa jamüin shiimainka tü punoujakalü anain. Paaʼinrüle tia, atüjeechi pia süpüleerua pünüiki nasakitpa pia na paʼaleewainyuukana sünain tüü: «¿Jamüsü pütüjaaka saaʼu sünain eein chi Maleiwakai? Aipüraire wayuu Maleiwa, ¿jamüsü nuuʼulaaka eein kasa mojusü? Süka nukumalain Maleiwa tü kasakalüirua süpüshuaʼa, ¿jaraika joo kakumalain nia?». Piyaawatapa saaʼu sünain shiimain tü punoujakalü anain, nnojoleerü wainmajüin paaʼin saaʼu tia. Tü paaʼinreetkat shia keeʼireejeerüin paaʼin pikirajaain sünain tü sümakat tü Wiwüliakat.
7-9. ¿Kasa paaʼinrajatka süpüla piyaawatüin saaʼu sünain shiimain tü pikirajaakalü anain suluʼujee tü Wiwüliakat?
7 Pikirajaale sünain tü sümakat tü Wiwüliakat, atüjeechi pia asouktaa shiʼipajee tü asakinnakalü anain pia, piyaawateerü saaʼu tü puʼtchejaapuʼukalü amaa otta piyaawateerü saaʼu sünain shiimain tü punoujakalü anain (Aluw. 17:11). Eesü karalouktairua wamaʼana akaaliinjeechika pia süpüla puuntüin tia. Jamüshiijaʼa na jimaʼaliikana jee na majayünnüükana sükaaliinjain maʼin naya tü poyeetokot El origen de la vida otta tü karalouktakat ¿Existe un Creador que se interese por nosotros?
8 Süka pikirajaain sünain tü Wiwüliakat, eesüjaʼa süpüla piyaawatüitpain saaʼu tü pütchi mapüleekat suluʼu. ¿Pütüja apüleerua tü pünüikinjatkat süpüla sunoujünüinjatüin anain? Achecheraajeechi pia sünain tü punoujakalü anain pikirajaale sünain tü karalouktairua eekat wamaʼana. Paaʼinrüle tia, atüjeechi pia süpüleerua pünüiki püküjapa süchiki tü punoujakalü anain.
9 Piyaawatüinjatü saaʼu süka paaʼin pümüiwaʼa sünain shiimain tü pikirajaakalü anain suluʼujee tü Wiwüliakat. Sükaaliinjeechi pia tia süpüla keraainjachin pia süpüla woutiisaa. Anuu sünüiki wanee majayüt: «Tekirajaa maʼin anainrü tü sümakat tü Wiwüliakat, shiasaʼa tayaawatapa saaʼu sünain shiimain tü tekirajaakalü anain, woutiisasü taya». Saashin shiakat, shiaʼaya tü shiimainkat tü sunoujakalü anain.
TÜ KASA PAAʼINRAJATKAT
10. ¿Kasa naaʼinrajatka chi eekai woutiisain süpüla sütüjaanüin aaʼu kanoulain nia?
10 Nnojoire naainjain wanee wayuu tü kasa anasü nüchekakat Maleiwa nüpüleerua, manoulasai nia saashin tü Wiwüliakat (Sant. 2:17). Kanourale pia jee piyaawatüle saaʼu sünain shiimain tü punoujakalü anain, atüjaaneerü aaʼu tia sükajee tü kasa paaʼinrakat. Anuu sünüiki tü Wiwüliakat: «Anakaja jaaʼinrüle waneepia tü kasa anasü nüchekakat Maleiwa jüpüleerua» (paashajeʼera 2 Pedro 3:11).
11. ¿Kasa paaʼinrajatka süpüla paaʼinrüin waneepia tü kasa anasü nüchekakat Maleiwa püpüleerua?
11 Süpüla paaʼinrüin waneepia tü kasa anasü nüchekakat Maleiwa püpüleerua, acheküsü wuleinjatüin pukuwaʼipa. Jülüja paaʼin motsoʼo kasain wayuu paaʼinrüin suʼunnaa tü aipiruasükat kashi alatüitpakat. Wanaa sümaa puuʼulakünüinkain paaʼin, ¿eesü paaʼin sünain tü anasükat süpüla paaʼinrüinjatüin shia jee sünain tü mojusükat süpüla piyouktüinjatüin shia? (Heb. 5:14). ¿Eejiraashiche pia sümaa tü ooʼulakünakalü aka paaʼin? ¿Püchecherüinche paaʼin suulia paaʼinrüin kasa mojusü natuma paʼaleewainyuu? ¿Atüjaana aaʼuchi pia sünain piain wanee wayuu anaka süpüla ashatünaa akuwaʼipa pukoleejiaseruʼu? ¿Paaʼinrüinche tü nümakat Maleiwa? ¿Shiataapa paaʼinrüin tü namakat na paʼaleewainyuukana suulia nemeeʼerainpalain pia? (1 Ped. 4:3, 4). Kapüleesia eejirawaa sümaa tia. Jaʼitainna na kakaliainnakana sünain anoujaa, eeshii japüire naya sünain aküjaa naküjüliin pütchi nüchiki Jeʼwaa. Na aapüinakana naaʼin nümüin Maleiwa, kojutüinjatü namüin naküjüliin pütchi nüchiki Jeʼwaa jee wuleinjatü tü nakuwaʼipakat.
12. (1) ¿Kasa naaʼinrüinjatka wanee wayuu süpüla naaʼinrüin tü kasa anasü nüchekakat Maleiwa nüpüleerua? (2) ¿Jamüinjatü paaʼin paaʼinrapa tü kasa anasü nüchekakat Maleiwa püpüleerua?
12 Paaʼinrüin tü kasa anasü nüchekakat Maleiwa püpüleerua müleka pükaaliinjale na wawalayuukana, puʼunüle sünain tü outkajawaakat, püküjüle pütchi, puʼuraajüle nümüin Jeʼwaa jee pikirajaale sünain tü Wiwüliakat. Chi aapakai naaʼin nümüin Jeʼwaa, talatüshi nia sünain aaʼinraa tia kasakalüirua, nnojotsü naaʼinrüin shia mojusheeka. Müsü nünüiki maʼaka naaʼin David sünain maa: «Maleiwakalee, talatüsü taaʼin sünain taaʼinrüin tü keeʼireekat paaʼin jee jülüjasü taaʼin tü puluwataakalü anain» (Sal. 40:8, TNM).
13, 14. (1) ¿Kasa akaaliinjeechika pia süpüla paaʼinrüin tü kasa anasü nüchekakat Maleiwa püpüleerua? (2) ¿Kasa naaʼinraka waneeinnua jimaʼalii jee majayünnüü woutiiseekana?
13 ¿Kasa akaaliinjeechika pia süpüla paaʼinrüin tü kasa anasü nüchekakat Maleiwa püpüleerua? Eesü waneeirua pütchi anaka süpüla püsakireʼerüin anain paaʼin otta anasü püshajüle jamüin pünüiki shiʼipajee. Anuʼusa shia: «¿Pansaasü pünüiki nümüin Maleiwa puchuntapa wanee kasa nümüin? ¿Jaʼyasü saaʼu pünüiki sünain alin püpüla Jeʼwaa? ¿Kasa pikirajaaka anain pikirajaapa pümüiwaʼa? ¿Oʼunüshi pia sünain aküjaa pütchi jaʼitainna nnojoluin ojuʼitüin na kachonkana pia?». Eesü süpüla püshajüin tü püsaʼwateekalü amüin maʼaka saaʼin anainjatüin pünüiki puʼuraajapa, tü pikirajaainjatkalü anain pümüiwaʼa suluʼujee tü Wiwüliakat jee tü paaʼinrajatkat süpüla pütüjain aküjaa pütchi.
14 Naashin waneeinnua jimaʼalii jee majayünnüü woutiiseekana, nashajüin tü nasaʼwateekalü amüin. Eʼrüshii naya kasa anasü suluʼujee tia. Jamüsüjaʼa wanee majayüt Tilda sünülia, süsaʼwatüin shiʼipaʼaya tü keeʼireekat saaʼin, shiasaʼa sülatapa wanee juya, keraasü shia süpüla woutiisaa. Anuu nünüiki wanee jimaʼai, Patrick nünülia: «Tasaʼwatee amüinrü waneeirua aʼyatawaa nümüin Maleiwa, shiasaʼa sutuma tashajüin tü taaʼinreekat, aʼyataashi maʼin taya süchiirua».
Nuuʼulaale püshi suulia aʼyatawaa nümüin Jeʼwaa jee shiale püi, ¿ayateechia pia aʼyataain nümüin Jeʼwaa? (Paashajeʼera tü pütchikat 15).
15. ¿Jamüsü püneeküinjatka süka paaʼin pümüiwaʼa piʼyataain nümüin Jeʼwaa?
15 Suluʼu tü karalouktakat Los jóvenes preguntan eesü wanee pütchi asakinnaka anain, shia tüü: «Nuuʼulaale püshi suulia aʼyatawaa nümüin Jeʼwaa jee shiale püi, paʼaleewainyuu, ¿ayateechia pia aʼyataain nümüin Jeʼwaa?». Soteesü paaʼin piainjachin aneeküin süka paaʼin pümüiwaʼa paapüinjatüle paaʼin nümüin Jeʼwaa. Paapapa paaʼin nümüin Jeʼwaa jee woutiisapa pia, aleewajiraaichipa pia nümaa jee asoukteechi pia saaʼu tü kasa paaʼinrakat. Tü paaʼinrajatkat nüpüleerua Jeʼwaa, paaʼinrajatü shia süka paaʼin pümüiwaʼa, nnojotsü shiain süka nümajalain shia pümüin chi püshikai, tü püikat jee wanee wayuu. Paaʼinrüle tü kasa anasü nüchekakat Maleiwa püpüleerua, piiʼiyateerü sünain kojutüin pümüin tü nümakat otta achecheraajeechi pia sünain tü punoujakalü anain. Paaʼinrüle tia, keraajeechi pia süpüla woutiisaa.
KOJUTÜINJATÜ PÜMÜIN TÜ NAAʼINRAKAT JEʼWAA PÜPÜLEERUA
16, 17. (1) Woutiiseere pia jee pikeroteere sünain anoujaa, ¿kasa paaʼinrüinjatka aaʼujee tia? (2) ¿Kasa paaʼinrajatka süpüla kojutüinjatüin pümüin naakajirüin waya Jesuu suulia waainjala? Piʼitaa wanee shiyaawase.
16 Asakinnüshinka Jesuu nutuma wanee wayuu sünain jaralüin tü pütchi alanaʼleekalia saʼakajee tü pütchi aapünakat nümüin Moisés. Nümaka Jesuu nümüin: «Maleiwa, chi Pümaleiwasekai, anashi aire püpüla waneepia süka süpüshua paaʼin. Anashi jülüjüle paaʼin Maleiwa waneepia» (Mat. 22:35-37). Woutiiseere pia jee pikeroteere sünain anoujaa, paaʼinrüinjatü shia süka alin püpüla Jeʼwaa. ¿Kasa paaʼinrajatka süpüla miyoʼuinjatüin naalin Jeʼwaa püpüla? Jülüjainjatü paaʼin tü naaʼinrakat Jesuu süpüla naakajirüin pia suulia paainjala (paashajeʼera 2 Corinto 5:14, 15 otta 1 Juan 4:9, 19). Jülüjale paaʼin tia, kojuteerü shia pümüin otta keeʼireejeerü paaʼin paapüin analuʼut nümüin Jeʼwaa saaʼu naapüin chi Nüchonkai waaʼu.
17 Pimeruule sutuma wanee wüin, nuwataataleechikalaka wanee wayuu sünain niyuʼlüin pia shirokujee tü wüinkat, ¿jameerü pünüiki nümüin chia wayuukai saaʼu nükaaliinjain pia? ¿Aashin paapeerüin analuʼut nümüin saaʼu nükaaliinjain pia? Meematsia wakuwaʼipa süka niyuʼlüin waya Maleiwa saʼakajee tü ouktaakat, süka jamüin, nuluwataain chi Nüchonkai süpüla naakajirüin waya suulia waainjala. Sükajee tü naaʼinrakat wapüleerua, eesü süpüla katüin woʼu waneepia paʼaraiisüpa tü Mmakat. ¿Aashin kojutüinjatüin wamüin tia?
18, 19. (1) ¿Jamüshi nnojoluinjachika mmoluin pia sünain aapaa paaʼin nümüin Jeʼwaa? (2) ¿Jamüsü anaʼleejeetkalia pukuwaʼipa paapüle paaʼin nümüin Jeʼwaa sümaa woutiisain pia?
18 ¿Kojutüsüche pümüin tü naaʼinrakat Jeʼwaa püpüleerua? Kojutüle shia pümüin, paapeerü paaʼin nümüin Jeʼwaa jee woutiiseechi pia. Paapapa paaʼin nümüin Maleiwa, paaʼinrüinjatü waneepia tü keeʼireekat naaʼin suulia tü keeʼireekat paaʼin. Nnojo mmoluin pia sünain paapüin pünüiki nümüin Jeʼwaa, süka jamüin, keeʼireein naaʼin anainjatüin pukuwaʼipa jee piʼrüinjatüin wainma kasa anasü nutuma süka poonooin sümaa nünüiki (Heb. 11:6). Paapapa paaʼin nümüin Jeʼwaa jee woutiisapa pia, nnojoleerü mojuin pukuwaʼipa, anaʼleejeeria maʼin. Anuu nünüiki wanee wawala woutiisaka jintüliiwaʼaya nia: «Taʼatapajüle miyoʼuin taya, tayaawatüinje saaʼu jamüin woutiiseeka taya, anapejeʼe taya süka woutiisain jintüliiwaʼaya, süka jamüin, tayouktüin tü kasa mojusü keejiakat sümüin tü manoujainsatkalüirua».
19 Niʼreein pia Jeʼwaa suluʼu anain pukuwaʼipa. Niyouktashaatain Satanaa anainjatüin pukuwaʼipa, mojutsai pia nümüin. Poonoole sümaa nünüiki Satanaa, nnojoleerü naapüin pümüin kasa anasü. ¿Jalajeeinjatka kasa anasü nüpüla, nnojoishijasa mojulaain nia? Nnojotsü eein tü kasa anasü nikirajüinjatkalü anain wayuu. Akaʼaya nia, nnojotsü katüinjatüin noʼu waneepia (Alat. Map. 20:10).
20. ¿Kasa akaaliinjeechika pia süpüla keraain pia süpüla paapüin paaʼin nümüin Jeʼwaa jee süpüla woutiisain pia? (Paashajeʼera tü pütchikat «Sükaaliinjeechi pia süpüla aleewain maʼin pia nümaa Maleiwa»).
20 Anashaatasü maʼin paapüle paaʼin nümüin Jeʼwaa. ¿Keraashiche pia süpüla woutiisaa? Mülejeʼe shia, woutiisaa mata pia. Nnojoiyüire keraain pia süpüla tia, paaʼinra tü aküjünakat suluʼu ekirajaayakat tüü süpüla puuntüin shia. Nüküjüin Pablo namüin na chajanakana Filipos sünain anain maʼin nakooʼomüinjüle waneepia tü naʼyataainkat nümüin Maleiwa (Filp. 3:16, TNM). Kacheʼere pia sümüin pütchikat tia, keraamaateechi pia süpüla paapüin paaʼin nümüin Jeʼwaa jee süpüla woutiisain pia.
