SÜPÜLAPÜNAA nuʼunüin Jesuu iipünaamüin, müshi nia namüin na nikirajüinkana: «Ojuitteena jia [...] suluʼupünaa süpüshuaʼa mma wattapünaa maʼi sünain aküjaa süchikü tü takuaippa jiʼrajakat akua» (Aluw. 1:8). ¿Jamüinjatche sukuwaʼipa natuma süpüla nountüin naküjüin pütchi suluʼupünaa mmakat süpüshuaʼa?

Anuu nünüiki Martin Goodman, ekirajüi nia suluʼu Universidad de Oxford: «Süka jüüjüüin na nikirajüinkana Jesuu sünain aaʼinraa tü aluwataanakalü anain naya, ayaawatüna aaʼuchii naya sünain waneejatüin sukuwaʼipa nanoula noulia na judíokana otta noulia na wanee wayuu suluwataakana aaʼu Roma». Oʼunüshi Jesuu wattapünaa maʼin sünain aküjaa sümüin wayuu tü nünüikikat Maleiwa. Nashatüinjeseʼe tia na nikirajüinkana Jesuu, nachajaain na wayuu aapajeekana süchiki «tü pütchi anasükat» (Luc. 4:43). Müshiijeseʼe eejanain «Aluwataaushi» süpüla naküjüinjatüin tü pütchi anasükat (Mar. 3:14). «Juʼuna jumaala sainküin mmakat süpüshua süpüla jüküjainjatüin tachiki sümüin wayuu [...]. Jikirajeena naya süpüla nayainjanain na tekirajüinkana maa aka jiakana», müshi Jesuu namüin (Mat. 28:18-20).

Maaʼulu yaa, watta naalii na wawalayuu ashatakana nakuwaʼipa na polookana piamamüin nikirajüin Jesuu. «¡Anii taya! Taya puluwataa», müshii naya süpüla naküjüin tü pütchikat wattapünaa maʼin (Is. 6:8, TNM). Eeshii eeka noʼunüin suluʼumüin wanee mma naatajatü süpüla naküjüin pütchi maʼaka naaʼinrüin shia na oʼunakana suluʼumüin tü Ekirajaaleekat Galaad. Eetaashii joo na okolojookana eere choʼujaain aküjülii pütchi. Eeshii na ekirajaakana sünain wanee anüikii naatajatü süpüla nakaaliinjain na wawalayuu aküjakana pütchi suluʼu tia anüikiikat. Na wawalayuu okolojookana eere alin neeʼiree na aküjüliikana pütchi jee na ekirajaakana sünain wanee anüikii naatajatü, naaʼinrüin tia süka alin napüla Jeʼwaa jee alin napüla na wayuukana. Nayaawatapejeʼe saaʼu palajana müleka kettaajeerüle nanneetse  süpüla noʼunüinjanain (Luc. 14:28-30). Jalouishii maʼin naya namüin na wawalayuukana.

Kapüleepejeʼe namüin napüshuaʼa na wawalayuukana nokolojooin eere alin neeʼiree aküjülii pütchi jee shiale nekirajaain sünain wanee anüikii naatajatü. Wasakira waaʼin wapüshuaʼa sünain tüü: «¿Eeshiiche süpüla waaʼinrüin eere woutkajaain tü naaʼinrakat wanee misioneero?».

Naaʼinrüin na nikirajüinkana Jesuu tü naaʼinrakat wanee misioneero. Eepejeʼe na nnojoliikana oʼunüin suluʼumüin wanee mma naatajatü. Jüüjüüshii naya sümüin tü pütchi nümakat Pablo nümüin Timoteo sünain ayatüinjanain naya sünain aküjaa pütchi süka shiain aneekünüin apüla naya tia (2 Tim. 4:5). Anasü maʼin waaʼinrüle tü nümakat Pablo. Aküjüinjana waya pütchi wapüshuaʼaleʼeya jee ekirajüinjana waya wayuu. Eesü süpüla waaʼinrüin eere woutkajaain tü naaʼinrakat wanee misioneero.

Na okolojookana suluʼumüin wanee mma naatajatü, nachajaainjatü sukuwaʼipa süpüla shikiralaainjatüin naaʼin suluʼu tia mmakat, süka jamüin, naatajatüin sukuwaʼipa kasa chayaa. ¿Jama wayakana? ¿Kasa eeka süpüla waaʼinrüin kapüleere wamüin okolojowaa suluʼumüin wanee mma naatajatü? Kapüleerü wamüin wokolojooin eere palitchoin aküjülii pütchi, ¿eesüche süpüla wooʼulaküin waneeirua sukuwaʼipa aküjaa pütchi? Soʼu juyakat 1940, aluwataanüshii na aküjüliikana pütchi sünain aküjaa pütchi kaayeruʼupünaa uatua süpüla semaanaka. ¿Puuʼulaküirü tia? ¿Puuʼulaküirü püküjüin pütchi nüka chi kareetachonkai? Nnojoiyüire pia aküjüin pütchi süka tiairua, puuʼulaka püküjüin pütchi süka.

Weʼitaale waaʼin sünain sunoujeerüin wayuu sünain tü nünüikikat Maleiwa, aküjeena maʼin waya pütchi süka süpüshuaʼa waaʼin. Na wawalayuu okolojookana eere alin neeʼiree aküjülii pütchi jee nayale na ekirajaakana sünain wanee anüikii naatajatü, atüjashii naya ekirajaa otta kakaliainna naya sünain anoujaa. Jalouishiijeseʼe naya namüin na wawalayuukana. Na misioneerokana nachajaain sukuwaʼipa süpüla anainjatüin tü aʼyatawaa aainjünakat suluʼu tü outkajaaleekat, shiasaʼa kettaapa wanee wawala süpüla naainjain tia aʼyatawaakat, nia eʼitaanaka ajapuluʼu tia mapa. Woutiisaichire pia, eeshi süpüla piʼyataain neʼipajee na laülaashiikana jee laülaashire pia suluʼu tü outkajaaleekat (1 Tim. 3:1).

Wakaaliinjeena na wawalayuukana müleka neʼrüle waya sünain aküjaa pütchi süka süpüshuaʼa waaʼin jee waʼyataale maʼin napüleerua. Piakai jimaʼaikai, piakat majayütkat, jiakana ataralaainnakana, jütütüleʼera naaʼin na wawalayuukana otta jükaaliinja naya sünain tü choʼujaakat namüin (Col. 4:11, TNM).

Weʼraajüle na wawalayuukana, watüjaajeerü aaʼu kasain anaka süpüla wakaaliinjain anain naya. «Anakaja müleka wakaaliijiraale wapüshua», müsü tü Wiwüliakat süchiki tia (Heb. 10:24). Wachajaa sukuwaʼipa süpüla weʼraajüinjanain na wawalayuukana, kasain alatüin namüin, kasain mojuin atuma naaʼin, kasain tü choʼujaakat namüin otta kasain amalajaweein atuma nanoula. Nnojoliinjanapejeʼe waya ekeroluin sünain nakuwaʼipa. Wakaaliinja na wawalayuukana wanaa namaa na laülaashiikana jee na aʼyataakana neʼipajee (Gal. 6:1). Wayakana wapüshuaʼa, eeshii süpüla wakaaliinjain na wawalayuu laülaayuukana jee na wawalayuu eʼrakana müliaa.

Kanneetsepuʼushi maʼin paala Salvatore, shiasaʼa mapa wainma maaʼatsü shiʼipaʼaya nujuyaala. Nuikküinjeseʼe nipia otta tü kasa eejatkat nümaʼana süpüla nuwalaajüin nujuyaala. Shapaasü maʼin naaʼin Salvatore naaʼu na nüpüshikana. Naapaka achiki wanee wawalayuu sünain choʼujaain nükaaliinjünüin Salvatore. Nakaaliinjüinjeseʼe nia sümaa nüpüshi sünain tü kasa choʼujaakat namüin. Nakaaliinjain Salvatore sümaa nuʼwayuuse sünain ousütaa sünain aʼyatawaa. Yootowaishii naya wawalayuukana namaa süpüla natütüleʼerüin naaʼin. Aleewajiraashii maʼin naya wawalayuukana nümaa Salvatore otta sümaa tü nuʼwayuusekat. Mayaainjeʼe kapüleein maʼin tü alatakat nümüin Salvatore sümaa nüpüshi, talatüshii naya sotowaipa naaʼin nakaaliinjünüin natuma wanee wawalayuu.

Na anoujashii shiimainshiikana, naküjüin sümüin wayuu tü pütchi anasükat. Waküjüinjatü sümüin wayuu süpüshuaʼa tü kasa anasü sümakat tü Wiwüliakat maʼaka naainjain shia Jesuu. Müleka kapüleere wamüin okolojowaa suluʼumüin wanee mma naatajatü, anashii wakaaliinjüle na wawalayuu woutkajaakana amaa (Gal. 6:10). Süpüla ayatüin waaʼinrüin «tü anasükat sümüin wayuu», acheküshii wakatalüinjanain kaʼi süpüla wakaaliinjain naya. Waaʼinrüle tia, talateena maʼin waya (Col. 1:10; Aluw. 20:35, TNM).