¿JOUJATÜ talatüin paaʼin? Eeshii eekai talatüin maʼin naaʼin naashin soʼu kasaalüin naya. Iraata joo chi talatakai aaʼin naashin soʼu jemelin chi niʼirumakai. Aluʼujasaʼa piakai, talatüshi maʼin pia soʼu puwoutisaajünüin süka kojutüin maʼin pümüin tia. Talatüshii maʼin na wawalayuukana sutuma piiʼiyatüin sünain alin püpüla Maleiwa süka süpüshuaʼa paaʼin, süka tü pukuwaʼipakat, tü jülüjakat paaʼin otta süka tü pütsüinkat (Mar. 12:30, TNM).

Shiimainya talatüin maʼin paaʼin sünain aʼyatawaa nümüin Jeʼwaa soʼujeʼereʼeya woutiisain pia. Eepejeʼe na nnojoliinnapakana talatüin maʼin aaʼin sünain aʼyatawaa nümüin Jeʼwaa. ¿Jamüshii nnojoliika talatüin naya? ¿Jamüsü talatüinjatka waaʼin sünain aʼyatawaa nümüin Jeʼwaa? Wekirajaa sünain tia.

Talatüsü maʼin waaʼin sutuma tü pütchi süchikikat Nuluwataaya Maleiwa, süka jamüin, sajaʼttirüinjatüin süpüshuaʼa tü kasa mojusükat otta Paʼaraiisüinjatü tü mmakat sutuma. Saashin Sofonías 1:14, alüʼütsü nükalia Jeʼwaa. Eepejeʼe süpüla müin kamaʼakai saaʼin wamüin tia kaʼikat. Kamaʼale saaʼin wamüin tia kaʼikat, akulajaajeerü waaʼin sünain aʼyatawaa nümüin Jeʼwaa otta nnojoleerü talatüin waaʼin (Prov. 13:12).

Namaale waya na wawalayuukana, talateena waya sünain aʼyatawaa nümüin Jeʼwaa. Makaʼa wanoujain nünain Jeʼwaa shia sutuma weʼrüin aijiraain otta kamaneein na wawalayuukana (1 Ped. 2:12). Watüjaale saaʼu naaʼinrüin kasa mojusü wanee wawala sümaa süsalain nia naainjala, eesü süpüla mojuin waaʼin sünain aʼyatawaa nümüin Jeʼwaa.

Wanee kasa nnojoleetka talatüin atuma waaʼin shia kachiiruale waaʼin kamaʼanaa wainma korolo otta wainma nneerü. Keeʼireesü naaʼin Satanaa otta na nuluwataakana aaʼu wayaʼlajüinjanain wainma kasa nnojotka choʼujaain wamüin. Müsüjeseʼe anain sotule waaʼin tü nümakat Jesuu: «Maa aka kojutaʼatüle piamashii laama nütüma chi aʼyataaikai sünain alin nüpüla wane je sünain maalin nüpüla chi waneʼe, meechi aka Maleiwa jütüma müleka shiale kachiiruain jaaʼin tü washirüükat nuulialeʼeya» (Mat. 6:24). Kachiiruale waaʼin ayaʼlajaa süpüshuaʼa tü kasa oikkaanakat, nnojoleerü talatüin waaʼin sünain aʼyatawaa nümüin Jeʼwaa.

Aire wapüla Jeʼwaa, nnojoleerü kapüleein wamüin aaʼinraa tü nuluwataakalü anain waya (1 Juan 5:3). «Maa aka mapüsain wane wayuu süchiki aʼyatawaa, akaʼaya jiakana sütüma süpümüin maʼi jaaʼin tü nüshajakat Moisés. Anakaja müleka jüüjüüle jia tamüin taapaiwa jümüin eemerawaa. Anakaja joonoole sümaa tanüiki süpüla jüshatüinjatüin tü shiimüin tekirajeekat anain jia. Süka jamüin, mapüleejeerü jümüin aluwataanaa tatüma, mapüleejeerü jümüin tü tachekakat jüpüleerua. Müleka jüüjüüle jia tamüin, taapeerü jümüin tü eemerawaakat süka anamiain maʼi taya», müshi Jesuu (Mat. 11:28-30). Talatüsü waaʼin sutuma wayain na anoujashii shiimainshiikana. Wekirajaa sünain apünüinsü kasa talatüinjatka atuma waaʼin sünain aʼyatawaa nümüin Jeʼwaa (Hab. 3:18).

 Nia waʼyataaka amüin chi Kakumalakai kasakat süpüshuaʼa, chi Maleiwa talatakai aaʼin (Aluw. 17:28; 1 Tim. 1:11, TNM). Watüjaa aaʼu niain Jeʼwaa katüin atuma woʼu. Jülüjale waaʼin tia, talateena waya sünain aʼyatawaa nümüin jaʼitainna jekenain jee kakaliainnale waya woutiisain.

Eeshi wanee wawala Héctor nünülia. Alapalaaipuʼushi nia naaʼu na wawalayuukana soʼu 40 juya. Ayatüshia talatüin nia sünain aʼyatawaa nümüin Jeʼwaa mayaapejeʼe laülaaichin nia (Sal. 92:12-14). Sutuma ayuulin maʼin tü nuʼwayuusekat, nnojoluichipa nia aʼyataain maʼin nümüin Jeʼwaa maʼakaapuʼu sümaiwa paala. Eesü mojuwaire naaʼin sutuma niʼrüin ayuuitataalain shiʼipaʼaya tü nuʼwayuusekat. Ayatapajaʼa nia aʼyataain nümüin Jeʼwaa mayaapejeʼe kapüleein nümüin naaʼinmajüin nuʼwayuuse. Jülüjapa naaʼin chi wawalakai kasapülajachin nukumajüin nia Jeʼwaa, emiyoʼulaasü naalin Jeʼwaa nüpüla otta keeʼireesü naaʼin aʼyatawaa nümüin Jeʼwaa süka süpüshuaʼa naaʼin. Sutuma tia, ayatüshi nia sünain nüküjüin pütchi otta jülüjasü naaʼin Paʼaraiisüinjatüin tü Mmakat. Talatüshijeseʼe nia sünain aʼyatawaa nümüin Jeʼwaa.

Naapüin Jeʼwaa chi Nüchonkai süpüla ouktüin waaʼu. «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia», müsü tü Wiwüliakat (Juan 3:16, TNM). Weʼitaale maʼin waaʼin sünain naapajiraain nikii Jesuu waaʼu, moteerü naaʼin Maleiwa tü waainjalakat jee kateerü woʼu nutuma süpüla kaʼikat süpüshuaʼa. Kojutüinjatü maʼin wamüin tü naaʼinrakat Maleiwa wapüleerua. Müle sukuwaʼipa watuma, talateena waya sünain aʼyatawaa nümüin Maleiwa.

Jamüshijaʼa wanee wawala chejeʼewai México, Jesuu nünülia, ouktiraapuʼushi nia sünain aʼyatawaa. Eesü siraale kaʼi naaʼu sünain aʼyatawaa süpüla wainmainjatüin nneerü nükanajüin. Shiasaʼa mapa, niʼraajüin Jeʼwaa jee niyaawata aaʼu sünain nüjütüin Jeʼwaa chi Nüchon aishikai nüpüla süpüla ouktüin waaʼu. Suluʼujee tia, nüküjüin chi wawalakai nümüin Jeʼwaa sünain naapüinjatüin naaʼin süpüla aʼyatawaa nümüin süpüla kaʼikat süpüshuaʼa. Ooʼulaashi nia mapa suulia tü niʼyataainkat, eetaashi maʼaka 28 juya niʼyataain suluʼu wanee konpainyiia. Shiasaʼa maaʼutpünaa yaa, talatüshi maʼin nia süka kojuyaichin nia juya sünain aʼyatawaa waneepia nümüin Jeʼwaa.

Wulesü wakuwaʼipa noʼuluʼu Maleiwa. ¿Jamapuʼusü pukuwaʼipa paala süpülapünaa piʼraajüin Jeʼwaa? Naashin Pablo, süpülapünaa nekerotüin sünain anoujaa na chajanakana Roma süchepchiapuʼushii naya tü kaainjalaakat, shiasaʼa joo sutuma taashinnapain naya suulia, nüchepchiainnapa naya Maleiwa süpüla aaʼinraa tü kasa anasü nüchekakat napüleerua. Süka keisalain sümüin nakuwaʼipa nuʼupala Maleiwa, eesü süpüla katüin noʼu süpüla kaʼikat süpüshuaʼa (Roma 6:17-22). Oonooinjana wayakanaʼaya sümaa tü nuluwataakalü anain waya Maleiwa.  Waaʼinrüle tia, nnojoleerü yarüttüin wakuwaʼipa. ¿Aashin talatüin maʼin waaʼin sutuma tia?

Eetaashi joo wanee wawalaya, Jaime nünülia. Süpülapünaa nikerotüin sünain anoujaa, asheʼejiraaipuʼui nia. Nnojotpuʼusü nunoujain anain eein Maleiwa, shia nunoujapuʼuka anain tü evolución münakat. Shiasaʼa sünain tü palajatkat nukua sünain tü outkajawaakat, ponusü maʼin naaʼin süka niʼrüin na wawalayuukana sünain aijiraain maʼin naya. Suluʼujee tia, nunoukteʼerüin tü nukuwaʼipakat. Nuchuntapejeʼe nümüin Jeʼwaa süpüla nükaaliinjain nia sünain anoujaa nünain. Müshi Jaime: «Tayaawata aaʼu shiʼipaʼaya sünain aipüralin maʼin wayuu Jeʼwaa sümaa nümüliajülin wayuu». Eʼrüshi nia kasa anasü sutuma noonooin sümaa nünüiki Maleiwa. Nnojorüleje nunoukteʼerüin tü nukuwaʼipakat, ouktüshije nia naashin. Wainmainna na naʼaleewain ouktüinnapakana. Naashin Jaime, talatüshi nia soʼujee nuʼttüin sünain aʼyatawaa nümüin Jeʼwaa.

¿Kasa waaʼinrajatka sümaʼinruʼu waʼatapajüin sajaʼttinnüin tü kasa mojusü eekat yaa mmapaʼa? Maaʼulu yaa, waaʼinrüin tü keeʼireekat naaʼin Jeʼwaa, shia neʼe waʼatapajaka tü kaʼi eere kepiainjanain waya süpüla kaʼikat süpüshuaʼa. Anakajaʼa ayatüle waaʼinrüin tü sümakat tü Wiwüliakat, tü makat mayaa: «Anakaja makulajaainre waaʼin sünain aaʼinraa tü anasükat sümüin wayuu. Müleka ayatüle waya sünain tia, walaajeena waya nütüma chi Maleiwakai soʼuweena wane kaʼi» (Gal. 6:8, 9). Wachunta kaaliinwaa nümüin Maleiwa, ayata waʼatapajüin tia kaʼikat, weʼitaa kasa anasü suluʼu wakuwaʼipa, choʼujaajeerü wamüin tia süntapa tü müliaa miyoʼusükat. Ayata waʼyataain nümüin chi Wamaleiwasekai sümaa talatüin waaʼin (Alat. Map. 7:9, 13, 14; Sant. 1:2-4).

Ayatüle waʼyataain nümüin Jeʼwaa, wainmeerü kasa anasü naapaka wamüin. Nütüjaa aaʼu Jeʼwaa tü waainjakat nüpüleerua ooʼulaka aishi nia wapüla jee kojutüsü wamüin nünülia. Müleka ayatüle waʼyataain nümüin Jeʼwaa sümaa talatüin waaʼin, meerü wanüiki maʼaka naaʼin David wanaa sümaa nümüin: «Jülüjashi taaʼin Jeʼwaa waneepia. Yaashi nia yaa tekialuʼujee, nnojoleechi taya jamajüin atumawaa. Shia makaʼa talatüin maʼin taaʼin» (Sal. 16:8, 9, TNM).