Yaletüle waaʼin walerajeena na wayuukana. Wanee wayuu yaletakai aaʼin shia jülüjaka naaʼin waneepia anain maʼin nukuwaʼipa jee nnojoluin anain tü naainjakat na waneinnua süka naatain nakuwaʼipa nuulia naashin. Eesüjaʼa müle tü jülüjakat waaʼin. Anuu tü ashajünakat suluʼu Encyclopædia Britannica: «Eeshi waneinnua wayuu jülüjakana aaʼin anain maʼin tü nakuwaʼipakat, neküin, nasheʼin jee müsia tü nanoujakalü anain noulia na waneinnua». ¿Kasa waaʼinrajatka suulia jülüjain waaʼin tia?

«Nnojoluinjatü yaletüin jaaʼin, kojutuinjana jutuma na waneinnua suulialeʼeya kojutuin neʼe jia jümüinjiraa» (FILIPOS 2:3).

¿Jamaluʼulu shia? Nnojorüle yaletüin paaʼin kojuteena pümüin na waneinnua. Piyaawateerü saaʼu eein tü kasa natüjakalü apüleerua puulia. Wanaawasü nakuwaʼipa napüshuaʼa na wayuukana.

Jülüjataa paaʼin tü alatakat nümüin Stefan. Ooʼulaashi nia suulia alerajaa wayuu, anuu tü nümakat: «Wanee kasa waainjainjatka süpüla nnojolin walerajüin wayuu shia jülüjain waaʼin natüjain maʼin na waneinnua woulia jee wayaawatüin saaʼu eein tü kasa watüjakat nanainjee».

Piyaawatüinjatü saaʼu eein tü mojukat putuma jee eein tü kasa anasü naainjakat na waneinnua puulia. Nnojo jülüjain paaʼin wanaawain sukuwaʼipa wayuu süpüshuaʼa sutuma tü naaʼinrakat wanee wayuu.

Süpülapünaa mojuin pünüiki nachiki na waneinnua, püsakira paaʼin sünain tüü:

• ¿Mojusüche maʼin nakuwaʼipa na wayuukana shiataapa neʼe naatain nakuwaʼipa toulia?

• ¿Neʼrüinche na wayuukana wanee kasa mojuka tatuma?

• ¿Kasa anasü naaʼinraka jee natüjaaka apüleerua toulia?

Jülüjale paaʼin tü paashajeʼerüitpakat, ooʼulaweechi pia suulia alerajaa wayuu jee piyaawateerü saaʼu tü kasa anasü naainjakat na waneinnua.