¿Kojutushiiche wamüin na waneinnua?
¿JAMÜSÜ ANAKAʼA KOJUTULE WAMÜIN NA WANEINNUA?
Kojutule wamüin na waneinnua eesü anajirawaa, nnojotsü alatüin kasa mojusü sünainjee.
-
Anuu sünüiki wanee pütchi suluʼujeejatü tü Bibliakat: «Oʼunusü tü jashieekat kamaneere waya sünain asoutaa, eekajasaʼa airuʼurule wanüiki sümüin wayuu eejeerü jashiee» (Proverbios 15:1). Airuʼurule nünüiki wanee wayuu jee mojutule nümüin na waneinnua nüshükajüin wayuu nooʼomüin. Sülataka kasa mojusü sünainjee tia.
-
Anuu nünüiki Jesús: «Tü naashajaakalü achiki wanee wayuu shia tü suluʼukat naaʼin» (Mateo 12:34). Nnojorüle kojutuin wamüin wanee wayuu sükajee wanüiki mojutusai nia wamüin suluʼu waaʼin otta shiale sutuma naatain nukuwaʼipa woulia, niʼiruku otta nuumain. Anasü wanouteʼerüle tü jülüjakat waaʼin nachiki na waneinnua.
Asakinnüshiinka 32.000 wayuu suluʼu 28 mma süchiki kojutule amüinñüü wayuu. Alatüshii suulia 16.000 na wayuu makana wainmain maʼin na wayuu nnojoliikana kojutuin amüin wayuu maaʼulu yaa.
TÜ ANAKAT SÜPÜLA PAAʼINRÜIN
Kojutu pümüin wayuu maʼleekalia, maʼaka naaʼin na aʼyataajiraakana pümaa otta na koleejiajiraakana pümaa, jaʼitairü naatain tü jülüjakat naaʼin suulia tü jülüjakat paaʼin. Jülüjale paaʼin tü wanaawakalü amaa paaʼin namaa, nnojoleena piyoujüin jee nnojoleerü mojuin pünüiki nachiki.
Paaʼinra kasa anasü namüin na waneinnua maʼaka saaʼinneein pümüin. Kapürale paaʼin nakuwaʼipa na waneinnua jee kojutule naya pümüin, eesüjaʼa naaʼinreerüle tia pümüin.
Moto paaʼin naainjala na waneinnua. Aire pümüin tü namakat na waneinnua jee naaʼinrüle wanee kasa nnojotka anain pümüin, nnojo jülüjain paaʼin tia. Pülatira shia sooʼopünaa paaʼin.
WAAʼINRAKA WAYAKANA AKÜJALIIKANA PÜTCHI NÜCHIKI JEHOVÁ
Wayakana aküjaliikana pütchi nüchiki Jehová, kojutusü wamüin wayuu maʼleekalia jaʼitainna jalain waya, chale waya wepialuʼu jee waʼyataaleruʼu. Wekirajüinña na waneinnua süpüla naaʼinrüin tia.
Wekirajüin wayuu maʼleekalia sünain tü Bibliakat sümaa nnojoluin wachekajüin nneerü saaʼu, nnojoliipejeʼe wapüleeruain naaʼin süpüla jülüjainjatüin naaʼin tü jülüjakat waaʼin jee nanoujainjanain sünain tü wanoujakalü anain. Shia waaʼinraka tü sümakat tü Bibliakat wekirajapa naya sünain tü wanoujakalü anain, anamiashii waya namüin jee kojutushii naya wamüin (1 Pedro 3:15; 2 Timoteo 2:24).
Nnojotsü koʼuin wakuwaʼipa sümüin wayuu. Eeshii süpüla nantüin wayuu maʼleekalia eere woutkajaain. Talatüshii waya namaa na wayuu ekirajaweekana sünain tü Bibliakat. Kojutusü wamüin wayuu maʼleekalia jaʼitairü naatain sukuwaʼipa, shiʼiruku, sünüiki otta suumain (1 Pedro 2:17).
Kojutushii wamüin na sülaülakana mma (Roma 13:1). Oonooshii waya sümaa tü naluwataakalü anain waya, wawalaajüin tü nachekajakat wamüin, waaʼinrüin tü namakat na aʼyataakana neʼipajee na sülaülakana mma süpüla anainjatüin sukuwaʼipa wayuu. Mayaainjeʼe nnojoluin sünainpünaain waya política, nnojoishii wapüleeruain aaʼin na waneinnua süpüla nooʼulaain suulia.
