Naashin na anoujakana sünain tia, eʼrüshii waya wamüliala saalinjee waaʼinrüin kasa mojusü süpülapünaa wayuuin waya jee kaainjarale waya maaʼutpünaa. Naashin nayakana, ashaʼalaasü nuulia wanee wayuu niyaawatapa saaʼu nukuwaʼipa. Moksha sünülia tia natuma. Nuuntuin wanee wayuu tia nnojotpa shapaain naaʼin saaʼu wanee kasa alataka nümüin.

Naashin na musulmanekana, eʼrüshi nümüliala wanee wayuu sünainjee naainjala na manoujainsaliikana otta süpülajatü suuʼulakünüin shiimainre nunoula. Eeshi wanee wayuu Sayyid Syeed nünülia, shikiipüʼüjana nia Sociedad Islámica del norte, naashin niakai müliapa wanee wayuu naapüinjatü analuʼut nümüin Maleiwa saaʼujee tü kasa anasü naaʼinrakat nüpüleerua otta nükaaliijainjana na müliakana.

Naashin na judíokana, wasirüjiraa müliain waya, eepejeʼe na judío anoujakana sünain süsoʼiraainjatüin naaʼin na outushiikana otta aneenain na müliakana paala sümaa nnojoluin kasain naainjalain. Eetaashii na judío anoujakana sünain tü ooʼulakaakat. Naashin nayakana, alataasü tü naaʼinkat wanee wayuu, müichia nia mayaa waneʼereʼeya sülaʼajaanapa naainjala.

Naashin na anoujakana sünain tia, joʼuuwaishi nüchikuaʼa wanee wayuu otta müliawaishi nia waneʼereʼeya nuuʼulaapa suulia aaʼinraa otta jülüjaa aaʼin kasa mojusü. Kekiire wanee wayuu, naaʼinrüle kasa anasü otta nnojorüle jülüjain naaʼin kasa mojusü, yüüʼülaa meerü tü nümülialakat. Nirvana sünülia tia natuma na anoujakana sünain budismo.

Naashin na anoujakana sünain tia, eʼrüshii waya wamüliala saalinjee naaʼinrüin kasa mojusü na wayuukana. Naküjain sünain nnojoleechin niʼrüin maʼin müliaa wanee wayuu naaʼinrüle kasa anasü, shiapejeʼe nanoujain anain analeʼeinya nukuwaʼipa wanee wayuu natuma na meʼrujusaliikana. Anashiinjatü nümüin wanee wayuu tü aletüjütkat sünain nukuwaʼipa nutuma chi maleiwayaashi kanüliakai Hado.

Naashin noʼutku wayuu chaa África, eʼrüsü maʼin wayuu sümüliala saaʼujee sümaʼüjünüin sutuma ouutsü. Eeshii eekai nanoujain sünain anakuwaʼipalüin wayuu sutuma ouutsü otta eeshii na mojukuwaʼipaliikana natuma. Akaʼaya shia, eesü tü aainjünajatkat süpüla sümalajaain namaʼüla na ouutshiikana naashin. Ayuuire wanee wayuu oʼunushi nia sümaʼanamüin ooʼulakünnuu süpüla saapünüin nümüin shipinase tü amaʼüjünakalü aka nia.

Naashin wayuukana naainnua, müliashii waya süka kaainjalain Adán sümaa Eva maʼaka süküjain tü karaloʼutakat Génesis. Akooʼomüinjünapejeʼe tia suluʼu waneirua iküleesia. Jamüshiijaʼa na katoolikokana, nanouja anainrü neʼrüinjanain müliaa süpüla anainjatüin tü iküleesia kaluʼukat naya nutuma Maleiwa jee süpüla anainjachin wanee wayuu natuma.