¿Nanouteetche saaʼin pümüin na wayuukana tü kasa mojusü müliakalü atuma wayuu jee tü mojeetkalü atuma nakuwaʼipa? Süpüla anainjachin wanee wayuu, eiyajünajatü tü ayuuliikat, nnojotsü aapünajatüin neʼe nümüin tü süpülajatkat saalin.

Jülüjataa waaʼin tü alatakat nümüin Tom. Ayuuijaashi jee outaka nia. ¿Kasache maka atuma nia? Anuu nünüiki chi tottoolu anaʼlakai nia süpülapünaa nünaajaain: «Nnojotsü jaralüin anaʼlüin jamüin aika wane kasa nünain». Aapünüsü neʼe nümüin tü süpülajatkat saalin niʼrajeʼeraiwaʼaya.

¿Müsüche neʼe sukuwaʼipa atumawaa süpüla sajaʼttajatüin tü kasa mojusü aaʼinnakat maaʼulu? Wainma kasa naaʼinraka na sülaülashiikana mma. Eeshii naikaleʼerüle pütchi, neʼiteʼerüle cámara otta nakooʼomüinrüle pulusiia. Anasiaajeʼe tia naaʼinrakat, nnojotpejeʼe ajaʼttaleein tü kasa mojusü aaʼinnakat maaʼulu. Süka jamüin, suluʼuin saaʼin wayuu aaʼinraa waneepia kasa mojusü otta naatayaa sümüin tü sunoujakalü anain.

Anuu tü nümakat Daniel, kepiashi nia Sudamérica, suluʼu wanee mma eere alin jamü: «Anapuʼusü maʼin wakuwaʼipa, nnojoliipuʼushii waya mmoluin seema aʼluwajünaa. Aluʼujasaʼa maaʼulu shapaasü maʼin waaʼin. Sükajee alin maʼin jamü, eeshii na eʼrüliikana wayumüin sümüin wayuu otta naʼluwajüin shia».

Müshi wanee wayuu oʼunakai süpüleerua kasachiki chejee Oriente Medio otta ekirajaakai mapa sünain tü Wiwüliakat: «Eepuʼule taya kepiain, apüleeruaana aaʼinchii na jimaʼaliikana sutuma napüshi, natuma na poliitikokana jee natuma na shikiipüʼükana tü iküleesiakat süpüla surulaalüin naya otta süpüla neʼnnaajünüin sutuma wayuu. Müsia neʼe tü naaʼinrakat na neʼipolokana. Tayaawata aaʼu sünainjee tia, alawaain tü namakat na sülaülashiikana mma».

Anasü maʼin tü sümakat tü Wiwüliakat, anuu sünüiki:

• «Tatüjaa aaʼulu wayuu süpüshua sünain mojulaain joʼuuiwaʼaya sünainmüinreʼeya laülaapa» (Génesis 8:21).

• «Emeejülü maʼin tü waaʼinkat suulialeʼeya wanee kasa otta kashapajaarat shia. ¿Jarat eʼraajaka shia?» (Jeremías 17:9).

• Yarüttüle naaʼin wane wayuu, kachiiruasü naaʼin oʼutaa saaʼin wayuu, aʼluwajirawaa akuwaʼipaa, aʼluwajaa, aküjaa alawaa jee mojuu anüikii sümüin wayuu (Mateo 15:19).

Isasü wachiki wasünneʼerüin tü kasa mojusü suluʼukat waaʼin otta amojujaasü maʼin shia. Shia aküjünaka tia sünain tü palajatkat pütchi (2 Timoteo 3:1-5). Mayaapejeʼe wainmain tü kasa sütüjakalü apüleerua wayuu otta eeitpain telewisoot, serulaat, Internet jee waneirua kasa, isasia neʼe wachiki. ¿Jamakaʼa isaka wachiki wanoutuin sukuwaʼipa tü kasa shapaakalü atuma waaʼin? ¿Wanouteʼereetche tia sümaa isain shia wachiki? ¿Kepisüche shia wamaʼana?

Jaʼitakajaʼa pülashiin waya süpüla wasünneʼerüin tü kasa mojusü eekat suluʼu saaʼin wayuu, ayateeria neʼe shapaain waaʼin, süka jamüin, mepin shia wamaʼana.

¿Jamüsüche mepika shia wamaʼana? Anuu sünüiki tü Wiwüliakat: «Nnojoireejaʼa niainjachin [chi wayuukai] oʼunirüin nukuwaʼipa nümüiwaʼa» (Jeremías 10:23). Nnojoishii waya akumajuushin  süpüla woʼunirüin wakuwaʼipa wamüiwaʼa maʼaka nnojoluin wakumajuushin süpüla kepiain waya shiinaluʼu wüin.

¿Anashiisüche saaʼin pümüin süküjünüle sümüin wayuu tü sukuwaʼipainjatkat jee tü saaʼinrajatkat? «Nnojotsü anain ojutiraa, müinjatü shipijia püchonnii», ¿anashiijeetche sümüin wayuu süküjünüle tia sümüin? Tüü, shia neʼe süpüshi tü kasa mojujiraakalü anainjee wayuu. Shiimainpejeʼe tü sümakat tü Wiwüliakat süchiki nnojoluin süpüla woʼunirüin wakuwaʼipa wamüiwaʼa. ¿Jaraika anain süpüla oʼuniraa wakuwaʼipa?

Niajaʼa neʼe Maleiwa anakai süpüla oʼuniraa wakuwaʼipa. Jama niain kakumalain waya otta nnojoishii waya niyüülajüin. Sünainjee tü sümakat tü Wiwüliakat, wayaawata aaʼu aneein wakuwaʼipa nutuma Maleiwa. Watüjaale saaʼu tü sümakat tü Wiwüliakat, wayaawateerü aaʼu eein tü isakat wachiki otta jamüin mojuka sukuwaʼipa wayuu. Anuu tü nümakat wanee filósofo chejeʼewai Alemania: «Eetaayaai sunoutuin sukuwaʼipa wayuu jee na aluwataakana saaʼu sünainjee tü kasa mojusü alatakat sümaiwa».

Müsü nünüiki Jesuu, chi Nüchonkai Maleiwa: «Atüjaana aaʼuchi kekiin wanee wayuu sünainjee anain sukuwaʼipa tü kasa naaʼinrakat» (Lucas 7:35, TNM). Anuu tü sümakat Salmo 146:3: «Nnojo punoujain sünain süpüshuaʼa tü namakat na aluwataashiikana otta nnojo punoujain sünain tü sümakat wayuu» süka wainmain tü kasa isakat süchiki. Sükaalinjain waya tü sümakat tia pütchikat süpüla nnojoluin wanoujaʼayatüin sünain tü namakat na aluwataashiikana. Anuu tü nümakat Kenneth, wanee wayuu kepiakai suluʼu wanee pueulo chayaa Norteamérica eere jouluin kaainjarannuu: «Naashin na poliitikokana, nanoutajatü tü kasa mojusükat, isapejeʼe nachiki naaʼinrüin tia. Shiimainjaʼa tü sümakat tü Wiwüliakat süchiki tia».

Anuu tü nüshajakat Daniel, chi wayuu aküjünakai achiki paala: «Tayaawata aaʼu isain nüchiki wanee aluwataai nunoutuin sukuwaʼipa tü kasa mojusükat. Jaʼitairü nanaajüin nneerü na wayuukana suluʼu wanee wanko jee nawalaajüin pensión, nnojotsü natüjaain aaʼu aneerüle nakuwaʼipa mapeena. Wainmainna wayuu teʼrakana sümaa mojuin naaʼin jaʼitashii kanneetsein naya».

Sükaalinjain waya tü sümakat tü Wiwüliakat süpüla nnojoluin wanoujaʼayatüin tü münakat wamüin otta eesü kasa anasü waʼatapajaka sutuma, maʼaka süküjüneerüin sünain tü wanee pütchikat.