Saashin Naciones Unidas suumain wayuu maʼleekalia tü mmakat. Kojutuinjatü wayuu saashin otta aaʼinmajünajatü tü Mmakat. ¿Jamüsü makaʼa tia? Anuu tü nüshajakat Maher Nasser süchiki tia suluʼu tü rewiisütakat Crónica ONU: «Müliasü saaʼin wayuu sutuma süsetüin wüin, sukutkujaain mma, wainmain kaainjarannuu, eein wayuu eekai washirüin otta eekai maʼletsein. Eesü atkawaa, wainma wayuu oʼunaka suumainpaʼajee süpüleerua kasachiki, eeshii na oʼutuliikana saaʼin wayuu otta eesü ayuulii eekai koʼttulein jee waneirua kasa müliaka atuma saaʼin wayuu».

Eepejeʼe na anashiikana amüin waneeshinjachin chi aluwataakai saaʼu tü mmakat. Müinjatü sukuwaʼipa tia naashin Dante, wanee wayuu chejeʼewai Italia, filósofo, poeta otta poliitiko. Kakaliaichi outuin. Müsia neʼe nünüiki Albert Einstein, wanee cientiifico. Kakaliaichi outuin. Naashin Dante nnojotsü süpüla jimatüin saaʼin wayuu süka mojujiraain maʼin shia sünainjee poliitika. Jee nüküjain tü nümakat Jesuu suluʼu Lucas 11:17: «Müleka sütkaajiraale wane wayuuirua, ajaʼlajaajiraweena naya».

Süchikijee sujutünüin piamasü wonpa soʼunnaa tü kanüliakat Segunda Guerra Mundial, nüshajüin Albert Einstein wanee karaloʼuta sümüinjatü Asamblea General de las Naciones Unidas. Müsü nünüiki: «Suikaleʼeramaateein Naciones Unidas wanee aluwatawaa sainküin mmakat süpüla jimatüinjatüin saaʼin wayuu».

¿Nnojoliijeenache aʼluwajüin sünneetse wayuu naya aluwataaliikana? ¿Nanouteetche sukuwaʼipa tü müliakalü atuma saaʼin wayuu? ¿Nnojoleenache eʼrüliin wayumüin naya? ¿Alanaʼaleejeetche suluʼu anain nakuwaʼipa noulia na waneinnua? Sünainjee tia, sotusü waaʼin tü nümakat Lord Acton, wanee wayuu chejeʼewai Inglaterra, ashajakai süchiki kasa alatüirü, müshi nia: «Laülaale wanee wayuu saaʼu palitchon kasa, eesü süpüla sumojujaain nukuwaʼipa, laülaale nia saaʼu wainma kasa, amojujaʼaleesia nukuwaʼipa».

Paaʼinwainjatü wayuu süpüla jimatüin saaʼin. Jimateetpejeʼe saaʼin wayuu saashin tü Wiwüliakat. Nüikaleʼerüinjatü Maleiwa wanee aluwatawaa, nnojoishii nayainjanain aluwataain na poliitikokana. Sükajee niainjachin aluwataain Maleiwa, atüjaaneerü aaʼu niain neʼe anain süpüla aluwatawaa. «Nukuaippa Maleiwa sünain aluwatawaa», müsü tü Wiwüliakat süchiki tia (Lucas 4:43).

Nüküja achikit Jesuu tia wanaa sümaa nümüin: «Kasataalejese püntüin maalü [...] sünain aluwatawaa. Keeʼireesü waaʼin soonooin wayuu süpüshua yaa mmaluʼu sümaa pünüiki» (Mateo 6:9, 10). Nüikaleʼerüin Maleiwa tü Aluwatawaakat süpüla soonooin wayuu sümaa nünüiki, nnojotsü süpülajatüin saainjünüin tü nachekakat neʼe na wayuukana otta na aluwataweekana waneepia.

Saashin tü Wiwüliakat chasü iipünaa tia Aluwatawaakat (Mateo 5:3, TNM). Aluwataainjachi Maleiwa iipünaajee yaa saaʼumüin tü Mmakat. Sünainjee tia, nnojoleerü choʼujaain nneerü nümüin süpüla nunoutuin sukuwaʼipa wayuu.

Aneekünüshi Jesuu nutuma Maleiwa süpüla aluwatawaa. Anuu tü sümakat tü Wiwüliakat nüchiki Jesuu:

• «Niainjachi aluwataaka. [...] Waneepieechi nia aluwataain otta waneepieerü nutuma tü jimataakalü aaʼin» (Isaías 9:6, 7).

•   «Shiʼitaanakalaka aluwatawaa najapuluʼu otta kojutuinjachi nia atumawaa süpüla shiʼyataainjatüin wayuu nümüin sainküinjee mmakat otta saʼakajee eʼirukuukat süpüshuaʼa» (Daniel 7:14).

• «Naapaain jooluʼu chi Maleiwakai nümaa chi Cristo Nüneekajalakai tü aluwatawaakat saaʼu wayuu süpüshua. Aluwataajeechi jooluʼu chi Maleiwakai waneepia süpüla kaʼikat süpüshua» (Alateetkat Mapeena [Apocalipsis] 11:15).

Nuluwataapa Maleiwa saaʼu tü Mmakat, oonoojeerü wayuu sümaa nünüiki otta ekeraajeerü tü nümakat Jesuu soʼu niʼiküin na nikirajüinkana sünain oʼuraajaa. Anashaateerü maʼin tü mmapaʼakat süka saaʼinmajüneerüin sutuma wayuu.

Ekirajüneena na wayuukana nutuma Maleiwa süpüla kojutuinjatüin namüin tü kasa nuluwataakalü anain. Nnojoleerü mojujirawaa. Anuu tü sümakat Isaías 11:9: «Nnojoleerü jamajüin wayuu [...] süka jamüin, niʼraajüneechin maʼin Jeʼwaa sainküin mmakat».

Paaʼinweerü jee jimateerü saaʼin wayuu sainküin tü Mmakat. Tia, shia wanee kasa isaka süchiki Naciones Unidas. Müsü Salmo 37:11: «Shiimain talateenain naya süka jimateerüin naaʼin». Mapa, nnojoleerü waapüin süchiki wayuu eekai kaainjaralüin, atkawaa, müliaa jee tü kasa yarüttakalü atuma tü mmapaʼakat. ¿Joujeetche tia? ¿Joujeeiche Nuluwataaka Maleiwa saaʼu tü Mmakat? ¿Kasa naaʼinrajatka süpüla nuuntuin tia? ¿Jamüsü aneetka pukuwaʼipa Nuluwataapa Maleiwa? Aküjüneerü wamüin tia sünain tü wane pütchikat.