¿AASHIN NAYAIN TALATÜIN AAʼIN SAASHIN WAYUU OTTA ANAIN AKUWAʼIPA NA WASHINNUUKANA? Wainma wayuu kacheʼeka sümüin tia, müsüjeseʼe kachiiruain maʼin naaʼin wainmain nanneetse. ¿Shiache talateetka maʼin atuma waaʼin tia? ¿Jamüsü nakuwaʼipa na kachiiruakana aaʼin washirüü?

Saashin tü rewiisütakat Journal of Happiness Studies, eepa nümaʼana wanee wayuu tü choʼujaakat nümüin, nnojotsü talatüin maʼin naaʼin jee nnojotsü anain maʼin naaʼin sutuma kooʼomüin nükanain. «Tü nnojotkat talatüin atuma waaʼin shia sutuma kachiiruain waaʼin washirüü, nnojotsü shiain sutuma kanneetsein waya», müsü tü rewiisütakat Monitor on Psychology. Tia meematüsü aka saaʼin tü sümakat tü Wiwüliakat, alüʼütsü süpüla 2.000 juya süchikijee süshajünüin tia, müsü mayaa: «Chi eekai kachiiruain naaʼin tü nneetkat, eʼreechi kasa mojusü sünainjee tia otta eeshii eekai [...] neʼrüin namüliala sutuma tia» (1 Timoteo 6:9, 10, TNM). ¿Kasa wayu tia müliakalü atuma naaʼin wanee wayuu?

SHAPAAJEERÜ WAAʼIN JEE MATUNKUINJEENA WAYA SUTUMA JÜLÜJAIN WAAʼIN TÜ KASA WAMAʼANAKAT. «Atunkushi maʼin wanee wayuu eekai niʼyataalin, jaʼitairü paliʼirüin jee wainmain niküin; akaisaʼa chi eekai washirüin, matuinkuinsai sutuma wainmain kasa nümaʼana» (Eclesiastés 5:12).

ÜTTEERÜ NEʼE WAAʼIN SUTUMA NNOJOLUIN WEʼRÜIN TALATÜIN WAAʼIN. Üttüsü naaʼin wanee wayuu eekai kachiiruain naaʼin tü nneetkat süka ayatüin keeʼireein naaʼin kooʼomüin shia nümüin. «Chi wayuu keeʼireekai aaʼin washirüü, nnojotsü talatüin naaʼin sümaa tü kasa eekat nümaʼana, keeʼireesü naaʼin sooʼomüin» (Eclesiastés 5:10). Eeshii eekai nnojoluin naaʼinrüin waneirua kasa talateetkalü atuma naaʼin süka kachiiruain naaʼin tü nneetkat. Nnojoishii naya namaain napüshi, naʼaleewainyuu otta nnojoishii naya sünainpünaain aʼwaajaa Maleiwa.

EʼREENA WAYA WAMÜLIALA OTTA MOJEERÜ WAAʼIN MALIAJAALE JEE SÜMÜLOUIRE WANNEETSE OTTA TÜ KASA EEKAT WAMAʼANA. «Nnojo kachiiruain maʼin paaʼin washirüü. [...] ¿Jülüjasü paaʼin tia sümaa nnojoleerüin kakaliain shia pümaʼana? Katünasü shia maʼaka saaʼin sütüna warulapai otta awatüsü iipünaamüin» (Proverbios 23:4, 5).

TALATÜINJATÜ WAAʼIN SÜMAA TÜ EEKAT WAMAʼANA. «Jemeishii waya sümaa makoroloin. Je ouktapa waya, nnojoleerü kasain walüʼüjain. Je maaʼulu yaa, müleka eere tü wekakat, eere washeʼin, talatüinjana waya sümaa tia» (1 Timoteo 6:7, 8). Na wayuu talatakana aaʼin sümaa tü kasa eekat namaʼana, «mojukatche maʼin takuwaʼipa», nnojoishii majakuʼu müin otta nnojoliishii naya kachumüraliin. Nnojotsü shapaakuʼu müin naaʼinya süka nnojoluin keeʼireein naaʼin wanee kasa isaka nachiki nayaʼlajüin.

ASÜLAJÜLIINJANA WAYA. «Anakuaippaʼireʼeya chi wayuu aapakai nuulia chi aapünakai amüin» (Aluwataaushikana 20:35). Talatüsü naaʼin na asülajüliikana süka anain namüin talatüin wayuu natuma. Jaʼitairü neʼe nakatarüle kaʼi süpüla namaain naya jee naaʼinrüin wanee kasa napüleerua. Wainma kasa anasü neʼraka naya wayuukana, tia shia wanee kasa nnojotka oikünüin: aishii naya süpüla wayuu, kojutushii naya atumawaa, wayuu anashii naʼaleewainyuu jee müsia keeʼirakeerü namüin tü nasülajakat (Lucas 6:38).

KOJUTULEEINJATÜ WAYUU WAMÜIN SUULIALEʼEYA KOROLO. «Anaʼleeshia wanee wayuu eekai niküin neʼe süchon aʼttiee sümaa wayuu aika apüla nia nuulialeʼeya chi wayuu ekakai paaʼairuku sümaa wayuu üttaka aaʼin nünain» (Proverbios 15:17). ¿Jamaluʼulu tia? Shia anaʼleeka kaʼaleewainre waya wayuu aika apüla waya suulialeʼeya washirüü. Wekirajaweerü anain mapa aipüraliinjanain waya wayuu süpüla talatüin waaʼin.

Sabina shia wanee wayuu yaajeʼewat Sudamérica, shiyaawata aaʼu anain maʼin sukuwaʼipa wayuu sutuma tü sümakat tü Wiwüliakat. Wanaa sümaa nüpütüin shia chi suʼwayuusekai, aʼyataasü maʼin shia süpüleerua tü choʼujaakat sümüin otta sümüin tü piamasükat süchonnii. Piamasü shiʼyataain Sabina otta atamaʼawaisü shia 4 maalia. Shikirajaaka sünain tü Wiwüliakat mayaapejeʼe mapüsawalin shia waneepia. ¿Kasaka shiʼrüin sünainjee tia?

Mayaapejeʼe nnojoluin kooʼomüin sünneetse Sabina, anoutaasü sukuwaʼipa. Talatüsü maʼin saaʼin sutuma shikirajaain nüchiki Maleiwa otta shikirajüin wayuu nüchiki (Mateo 5:3). Aleewajiraasü maʼin shiaya sümaa waneirua wayuu sunoujiraaka amaa.

«Atüjaaneechi aaʼu kekiin maʼin wanee wayuu sutuma tü kasa anasü naaʼinrakat», müsü tü Wiwüliakat (Mateo 11:19, TNM). Atüjaaneena aaʼu kekiin maʼin waya talatüle waaʼin sümaa tü eekat wamaʼana, wasülajüliire otta kojutule wayuu wamüin suulialeʼeya korolo.