«JINTULUIWAʼAYA TAYA, AʼÜLÜJIRAAPUʼUSHII NA TAPÜSHIKANA SÜMAA AIRUʼULUIN NANÜIKI TOʼUPALA», müsü wanee wayuu Patricia sünülia. «Sünainjee tia, isasü tachiki motuinjatüin taaʼin saainjala wayuu tamüin. Shiasaʼa miyoʼupa taya, saainjünüle tamüin kasa mojusü, tekiiruʼusü waneepia otta matunkuneesat taya saʼwai sutuma». Müleka üttakuʼu müle waaʼin otta jashichikuʼu wamüle, nnojoleena waya talatüin aaʼin otta ayuuijeena waya. Naashin na ekirajaakana süchiirua tia, ¿kasa alataka namüin na nnojoliikana motuin aaʼin saainjala wayuu namüin?

• Amojujaasü nakuwaʼipa sümaa wayuu sutuma jashichikuʼu namüin. Sutuma tia, akayalaashii naya suulia wayuu otta mojusü naaʼin süka namüiwaʼain naya.

• Nnojoishii naya jameein, shapaasü naaʼin jee mojusü naaʼin waneepia.

• Nnojotsü talatüin naaʼin süka jülüjakuʼu müin naaʼin tü aainjünakat namüin.

• Mojusü naaʼin süka natüjaain saaʼu shiain anain motule naaʼin saainjala wayuu namüin.

• Akooʼomüinraasü namüin shapawaa aaʼin, ayuuishii naya sutuma tü presionkat, ayuuisü tü naaʼinkat, aisü neipüse otta waatüsü nekii waneepia. *

¿KASA WAAʼINRAJATKA MOTULE WAAʼIN SAAINJALA WAYUU WAMÜIN? Nnojoishii waya jashichikuʼu müinjanain, nnojotsü üttakuʼu müinjatüin waaʼin otta nnojoishii pasalaweeinjanain waya. Nnojotpejeʼe müinjatüin anashiikai saaʼin wamüin wanee kasa mojusü maʼin aainjünaka wamüin. Süpülapünaa walatirüin sooʼopünaa waaʼin saainjala wayuu wamüin, jülüjeesü waaʼin palajana tü waaʼinrajatkat süka anajiraweein otta aleewajiraweein waya namaa na waneinnua.

Wanee wayuu eekai motuin naaʼin saainjala wayuu nümüin, jaʼyasü naaʼu sünain niyaawatüin saaʼu sukuwaʼipa wayuu. Nütüjaa aaʼu kaainjalain wayuu süpüshuaʼa sükajee sünüiki jee sükajee tü saaʼinrakat (Roma 3:23, TNM). Anuujeseʼe sünüiki tü Wiwüliakat: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala» (Colosas 3:13).

Chi eekai motuin naaʼin saainjala wayuu nümüin, aipürai nia wayuu jee paaʼinwajiraashi nia namaa (Colosas 3:14). Saashin Clínica Mayo, ¿jameerü nakuwaʼipa na motokana aaʼin waneepia saainjala wayuu namüin?

•   Aneerü nakuwaʼipa namaa naʼaleewainyuu, atüjeena ayaawataa saaʼu tü alatakat namüin otta amülialaajeerü naaʼin naalin na kaainjalakana namüin.

• Jutateena naya suulia jülüjaa aaʼin kasa mojusü otta aneerü naaʼin nuʼupala Maleiwa.

• Nnojoleerü shapaakuʼu müin naaʼin otta nnojoleena kaashichijaaraliin naya.

• Nnojoleerü mojuwalin naaʼin.

MOTO PAAʼIN PAAINJALA. Saashin tü rewiisütakat Disability & Rehabilitation, aneena waya motule waaʼin tü waainjalakat, nnojoleena ayuulin waya otta jutateena waya suulia jülüja aaʼin kasa mojusü. Kapüleepejeʼe wamüin aaʼinraa tia saashin tia rewiisütakat. ¿Kasaka paaʼinrüinjatüin süpüla puuntuin paaʼinrüin tia?

• Nnojo jülüjain paaʼin lotuin pukuwaʼipa sünain kasa süpüshuaʼa, soto paaʼin woʼtchejaʼawalin wapüshuaʼa sümaa wanee kasa waaʼinraka (Eclesiastés 7:20).

• Piyaawata saaʼu tü kaainjalakalü atuma pia süpüla nnojoluin paaʼinrüin shia süchikuaʼa.

• Nnojo püshapajaain aaʼin süka nnojoluin sunoutaamaatüin pukuwaʼipa, eesü kakalieerüle shia süpüla sunoutaain (Éfeso 4:22-24).

• Paʼaleewajaa namaa wayuu eekai natütüleʼerüin paaʼin, eekai jülüjain naaʼin kasa anasü, eekai kamaneein otta eekai naküjain tü shiimainkat pümüin (Proverbios 13:20).

• Mojule naaʼin wanee wayuu putuma, «nnojotsü taaʼinjeein» müinjachi pia otta paashajaamaata nümaa süpüla pukumajiraain sukuwaʼipa nümaa. Aneerü maʼin paaʼin paaʼinrüle tia (Mateo 5:23, 24).

Patricia, tü wayuu wachuntayütkalü anülia, atüjaitpa süpüleerua motuin saaʼin saainjala wayuu sümüin süka shikirajaain sünain tü Wiwüliakat. Anuu sünüiki: «Nnojoluitpa üttakuʼu otta mojukuʼu müin taaʼin maaʼulu jee nnojoluitpa mojuin saaʼin wayuu tatuma. Sutuma tü sümakat tü Wiwüliakat, watüjaa aaʼu alin waya nüpüla Maleiwa otta niʼreein waya sünain anain wakuwaʼipa».

Eeshi wanee wayuu Ron nünülia, anasü naaʼin sutuma tü sümakat tü Wiwüliakat. Anuu nünüiki: «Nnojotsü süpüla taküjainjatüin namüin na wayuukana tü jülüjainjatkat naaʼin otta tü naaʼinrajatkat, eeinjaʼa süpüla taneeküin tü jülüjainjatkat taaʼin otta tü taaʼinrajatkat. Süpüla nnojoluinjatüin shapaain taaʼin otta nnojoluin jülüjain taaʼin kasa mojusü, nnojotsü üttakuʼu müinjatüin taaʼin sünain wayuu. Tayaawata aaʼu nnojoluin süpüla anain naaʼin wanee wayuu üttakuʼu sümüle naaʼin».