NAMÜINJATÜ NA KACHONSHIIKANA
8: Ana pukuwaʼipa napüleerua püchonnii
¿KASA SÜNAINPÜNAAKA?
Paaʼinra napüleerua na püchonniikana tü kasa pikirajakalü anain naya. Jamüsüjaʼa süntüle wayuu pipialuʼumüin otta pümawaire nümüin chi püchonkai: «Pümaa nümüin nnojoluin taya yaʼayaa», kiʼreechi nia sünain aküjaa naʼalain.
«Wainma na wayuu makana namüin nachonnii: ‹Paaʼinra tü tamakat pümüin otta nnojo püshatüin tü taaʼinrakat›. Shiapejeʼe nashatüin na tepichikana tü wamakat jee tü waaʼinrakat noʼupala. Müshii naya maʼaka saaʼin sukuwaʼipa maawüi asaka süpüshuaʼaleʼeya tü wüin süʼütpaʼakat. Wekirajüle naya sünain wanee kasa sümaa nnojoluin waaʼinrüin shia, nayaawateerü aaʼu tia otta meena naya wamüin: ‹Jalayaai paaʼinrüin shia›» (David).
TÜ SÜMAKAT TÜ WIWÜLIAKAT: «Jia achiajaakana wayuu suulia oʼuwajaa, ¿jamakaʼa kaʼruwaraliikaʼa jia?» (Roma 2:21).
¿JAMÜSÜ CHOʼUJAAKA JAAʼINRÜIN TIA?
Na tepichikana nashatüin maʼin nakuwaʼipa na wayuu kachonniikana naya suulialeʼeya nakuwaʼipa na tepichi koleejiajiraakana namaa. Müsüjeseʼe jiain anain süpüla oʼuniraa nakuwaʼipa na jüchonniikana suluʼupünaa tü wopu anasükat. Juunteerü jaaʼinrüin tia pansaale jukuwaʼipa sümaa tü juluwataakalü anain naya.
«Eeshiijaʼa waküjale kojuyatua namüin wanee kasa sümaa müin nnojotkai naapakai saaʼin wanüiki. Shiasaʼa nnojorüle waaʼinrüin tü wekirajakalü anain naya, neimain shia wamüin. Jülüjasü maʼin naaʼin wakuwaʼipa na wachonniikana» (Nicole).
TÜ SÜMAKAT TÜ WIWÜLIAKAT: «Chi eekai kekiin nütüma chi Maleiwakai [...] nnojoleechi piamain oʼupünaa» (Santiago 3:17).
¿KASA EEKA SÜPÜLA PAAʼINRÜIN?
Püsakireʼera paaʼin: «¿Jamüsüche takuwaʼipa nümaa taʼwayuuse otta namaa tachonnii? ¿Kasa tanajawaika suluʼu telewisoot? ¿Wayuuche anamia na taʼaleewainkana? ¿Kapülasüche taaʼin nakuwaʼipa na waneinnua?». Jülüjaa paaʼin tüü: ¿Keeʼireesüche paaʼin müin nakuwaʼipa na püchonniikana maʼaka saaʼin pukuwaʼipa?
«Nnojoishii waluwataain na wachonniikana sünain aaʼinraa wanee kasa nnojotka waaʼinrüin wayakana» (Christine).
«Moto jaaʼin taainjala», püma namüin. Natüjaa aaʼu na tepichikana nnojoliin lotuin maʼin nakuwaʼipa na wayuu kachonniikana naya. Müshijeseʼe «moto jaaʼin taainjala» pümüinjachin sümüin puʼwayuuse jee namüin püchonnii paaʼinrüle wanee kasa nnojotka anain. Müle shia putuma, nayaawateerü aaʼu nnojoluinjatüin yaletayaain naaʼin otta naküjainjatüin tü shiimainkat.
«Waaʼinrüle wanee kasa mojusü, ‹moto paaʼin taainjala› anashi wamüle. Nnojorüle waaʼinrüin tia, nnojoleerü naaʼinrüin tia na wachonniikanaʼaya naainjüle kasa mojusü sümüin wayuu» (Robin).
«Anainjatü wakuwaʼipa napüleerua na wachonniikana süka shiain jülüjain maʼin naaʼin wakuwaʼipa süpüla nashatüinjatüin shia. Tü wakuwaʼipakat müsü aka saaʼin wanee karaloʼuta jutatsü noʼupala jee ekirajünawaika anain naya waneepia» (Wendell).
