Süsakiraka anain wayuu

Sünainjee tü aküjünakat suluʼu tü Bibliakat süchiki tü ishakat, ¿jamüsüche nanüiki na aküjaliikana pütchi nüchiki Jehová saainjünüinjatüle wanee kasa süka tü nashakat?

Jülüjainjatü maʼin naaʼin wanee anoujashi tü sümakat tü Bibliakat jee nnojoluinjatü nüneeküin tü naaʼinrüinjatkat wanaapünaa sümaa tü anakat saaʼin nümüin jee tü nümakat wanee tottoot. Tia kasa nüneekajatkat sünainpünaasü nukuwaʼipa nümaa Jehová.

Jehová, chi katakai atuma soʼu wayuu, nüküjain nnojoluinjatüin shikünüin tü ishakat (Génesis 9:3, 4). Sünain tü Pütchi Aapünakat nümüin Moisés, nüküjain Jehová namüin na israelitakana nnojoluinjatüin neküin tü ishakat süka katüin soʼu wanee kasa sutuma tü süshakat otta müshi nia namüin: «Tü kataakalü oʼuu sünainsü tü ishakat otta teʼitaain shia jümüin saaʼu tü aʼajüleekat süpüla sülaʼajaain jaainjala». ¿Kasa aainjünüinjatka süka tü mürüt oʼutunakalü aaʼin süpüla ekünaa? Anuu tü nümakat Maleiwa: «Keenainjatü nutuma tü süshakat otta nojoitüinjatü shia» a (Levítico 17:11, 13). Aküjünüsü wainmatua tia pütchikat (Deuteronomio 12:16, 24; 15:23). Anuu wanee karaloʼuta nashajaka na judíokana, kanüliaka The Soncino Chumash: «Nnojotsü anaajaanüinjatüin tü ishakat, amülainjatü shia mmoluʼu süpüla nnojoluinjatüin shikünüin». Nnojotsü nünaajaainjatüin wanee israelita süsha mürüt jee naainjain wanee kasa süka, süka niain Maleiwa katüin atuma soʼu wanee kasa.

Nnojoluitpa choʼujaain soonooin wayuu sümaa tü Pütchi Aapünakat nümüin Moisés süka naapajiraaichipain nikii chi Mesíaskai, ayatapejeʼe kojutuin maʼin nümüin Maleiwa tü ishakat. Süka eein tü nüpülainkat Maleiwa naaʼu na aluwataaushikana, naküjain namüin na anoujashiikana nnojoluinjatüin neküin isha. Oonooinjana naya sümaa tia pütchikat. Tia müsü aka saaʼin nayoutule wanee kasa eekai saapuushin sümüin shiyaakua maleiwayaasü jee nayoutule naʼluwajiraain nakuwaʼipa (Aluwataaushikana 15:28, 29; 21:25). Süchikijee tü Segunda Guerra Mundial münakat, wainma maʼin na wayuu ayuʼlakana nasha süpüla shiʼitaanüinjatüin sünain wayuu. Na aküjaliikana pütchi nüchiki Jehová nayaawata aaʼulu nnojoluin pansaain maʼin tia sümaa tü nüküjakat maʼin Maleiwa suluʼu tü Bibliakat. b

Eesüjaʼa nüküjale chi tottootkai nümüin chi wayuu awaʼnnüinjachikai, niyuʼluinjatüin nüsha waneirua semaana süpülapünaa nuwaʼnnüin, süpüla shiʼitaanüinjatüin süchikuaʼa nünain choʼujaale maʼin shia. Shiyuʼnnüle nüsha wanee wayuu, sünaajaanüle jee shiʼitaanüle nünain, nnojotsü pansaain tia sümaa tü aküjünakat suluʼu Levítico otta Deuteronomio. Nnojotsü anaajaanüinjatüin tü ishakat, amülainjatü shia, müsü süleʼejinnakai aaʼin nümüin Maleiwa. Mayaainjeʼe nnojoluitpain choʼujaain soonoonuin amaa tü Pütchi Aapünakat nümüin Moisés, na aküjaliikana pütchi nüchiki Jehová kojutusü namüin tü pütchi nuluwataakalü anain Maleiwa yala otta oonooshii naya sümaa tü nümakat süchiki nayoutuinjatüin tü ishakat. Müshiijeseʼe nnojoluin wayuʼluin washa süpüla shiʼitaanüin nünain wanee wayuu jee wanaajaain shia süpüla weʼiteʼerüin shia wanain mapa, tia nnojotsü pansaain sümaa tü nuluwataakalü anain Maleiwa.

Eesü waneirua kasa aainjünaka wamüin süka tü washakat nnojotka aküjünüin suluʼu tü Bibliakat mojule maʼin shia. Jamüshiijaʼa na anoujashiikana, eeshii na anakana amüin nayuʼluin nasha süpüla saainjünüin namüin análisis de sangre, süka sujutuneerüin mapa tia ishakat otta eesü waneirua kasa aainjünaka naküjaka na tottootkana choʼujaain maʼin nüsha chi wayuukai.

Jamüsüjaʼa soʼu nuwaʼnnüin wanee wayuu, eesü saainjünüle nümüin tü kanüliakat hemodilución. Tia makat shia suuyanajeʼennüle süpüshi nüsha wanee wayuu jee suʼwüinjaanaka tü nüsha apütaakat, shiʼitaanakalaka süchikuaʼa nütaluʼu chi wayuukai tü isha nnojotkat nutalujutuin paala, katsüinkalaka nüsha wanee wayuu süchikuaʼa sutuma tia. Eesü sükotchojünachonle tü isha amülakat sünain nülioʼu wanee wayuu, wulekalaka shia atumaa, eekalaka süchikuaʼa tü kanüliakat glóbulos rojos, recuperación de células sünülia tia. Eesü shiʼitaanüle tü ishakat suluʼu wanee maakina, eekalaka süpüla saainjain tü saainjakat wanee kasa nüleʼeruʼuka wanee wayuu, maʼaka saaʼin tü saainjakat tü naaʼinkat, tü nüsosokot jee shiale tü nüchüʼükat. Süchikijee tia, eʼitaanüsü nünain chi wayuukai tü nüsha sulujutkat tü maakinakat. Eesü waneirua kasa eere suuyanajeʼennüin nüsha wanee wayuu suluʼumüin wanee maakina süpüla wuleinjatüin shia jee süsünneʼennüin tü kasa yarüttüsü yalakat saʼaka tü ishakat. Eesü saainjünüle tia süpüla shiyuʼnnuin wanee kasa saʼakaka tü ishakat maʼaka saaʼin globulos rojos, globulos blancos, plaqueta otta plasma, shiʼitaanakalaka sünain nüta tü wayuukai eere choʼujaain shia. Eesü shiyuʼnnüle nüsha wanee wayuu süpüla sujuruttünüin sümaa wanee wunuʼu choʼujaaka nümüin jee shiʼitaanakalaka nütaluʼu süchikuaʼa.

Eesü naatayaa sümüle tü kasa aainjünajatkat soʼu nuwaʼnnüin wanee wayuu jee naatale tü tratamiento aainjünajatkat nüpüleerua jee müsia tü exámen naainjakat chi tottootkai. Nnojoishii wayainjanain anaʼlüin waneʼewai sukua tia kasa aainjünajatkat jee nnojoishii wayain aneeküinjanain tü naaʼinrajatkat wanee anoujashi, niainjachi aneekaka chi anoujashikai tü kasa aainjünajatkat süka tü nüshakat wanaa sümaa nuwaʼnnüin, wanaa sümaa saainjünüin wanee exámen nümüin jee shiale wanee terapia. Nüsakirüinjachi chi tottootkai palajana kasain aainjünajatüin süka tü ishakat nuwaʼnnapa, nütüjaapa saaʼu tia nüneekajatü tü kasa anakat nümüin (paashajeʼera tü pütchi kanüliakat «Tü wasakirüinjatkalü anain waaʼin»).

Sotuinjatü naaʼin na anoujashiikana naapüin naaʼin nümüin Maleiwa jee alinjachi nia napüla süka süpüshuaʼa naaʼin sükajee nakuwaʼipa, süka süpüshuaʼa natchin otta jülüjainjachi nia naaʼin waneepia (Lucas 10:27). Naata maʼin nakuwaʼipa na aküjaliikana pütchi nüchiki Jehová suulia sukuwaʼipa wayuu, kojutusü namüin aleewain naya nümaa Maleiwa. Chi Maleiwa aapakai kataa oʼuu nüküjain wamüin kojutuinjatüin wamüin amülain nüsha Jesús. Anuu tü nümakat suluʼu tü Bibliakat: «Taashinnapa waya suulia waainjala sükajee suwalaajünüitpain tü waainjalakat saaʼujee amülaitpain nüsha chi Nüchonkai» (Éfeso 1:7).

[Pütchi]

[Pütchi süttaka]

TÜ WASAKIRAJATKALÜ ANAIN WAAʼIN

«Ayatüsia tashain tia», ¿meechiche taya sümüin tü tasha ayuʼnnakat taleʼeruʼujee sümaa suuyanajeʼennüin jee süshaʼwaleʼennapünaain motsoʼomüin sümaa shiʼitaanüin süchikuaʼa tataluʼu? ¿Jülüjeetche taaʼin nnojoluin choʼujaain amülain tia ishakat?

¿Mojushiijeetche tamüin saaʼu tekirajaain sünain tü Bibliakat shiyuʼnnüle tü tashakat süpüla saainjünüin wanee exámen jee shiale wanee terapia? ¿Nnojoleetche mojuin tamüin sunoutunule tia tashakat jee süpalirajaanüle sümaa wanee wunuʼu sümaa shiʼitaanüin süchikuaʼa tataluʼu?