¿Choʼujaasüche süshajünüin suluʼu tü Bibliakat süpüshuaʼa tü waaʼinrajatkat?

EESÜJAʼA wainmale maʼin tü kasa naluwataanakalü anain waya na kachonniikana waya jimaʼaliiwaʼaya waya jee majayünnüüiwaʼaya waya. Miyoʼuyuupa waya, wayaawata aaʼu naluwataain waya sünain tia süpüla anainjatüin wakuwaʼipa. Eesüjaʼa ayatüleʼeya waainjain tia maaʼulu mayaainjeʼe nnojoluin laülaainnapain naya waaʼu.

Müsia neʼe sukuwaʼipa tü nuluwataakalü anain waya Jehová chi Washi iipünaajachikai, nüküjain wamüin suluʼu tü Bibliakat süchiki tü nnojoluinjatkat waaʼinrüin maʼaka saaʼin aʼwaajaa maleiwayaasü, kawalaʼatale nutuma wanee wayuu nuʼwayuuse, nuʼluwajiraale nukuwaʼipa otta nuʼluwajüle (Éxodo 20:1-17; Aluwataaushikana 15:28, 29). Laülaapa waaʼin sünain anoujaa wayaawata aaʼu shiain nücheküin Jehová aneein wakuwaʼipa otta nnojotsü kapüleein tü nuluwataakalü anain waya (Éfeso 4:15; Isaías 48:17, 18; 54:13).

Eepejeʼe waneirua kasa nnojotka süküjain tü Bibliakat jamüinjatüin sukuwaʼipa. Müshiijeseʼe eein na jülüjakana aaʼin eein süpüla naaʼinrüin tü anakat neʼe saaʼin namüin süka nnojoluin süküjünüin tü waaʼinrajatkat. Naashin naya wayuukana nüküjainjeseʼe Maleiwa suluʼu tü Bibliakat anale jee mojule shia nümüin.

Na jülüjakana aaʼin tia naneeküin neʼe wanee kasa süpaʼa mma, shiasaʼa naaʼinrapa shia mojusü neʼe naaʼin sutuma. Nnojotsü nayaawatüin aaʼu nüküjain Maleiwa suluʼu tü Bibliakat tü nuluwataakalü anain jee nüküjainña tü jülüjakat naaʼin süchiki wanee kasa. Wekirajaale sünain tü Bibliakat, wayaawateerü aaʼu tü anakat jee tü mojukat noʼuluʼu Jehová süchiki wanee kasa. Aneerü tü jülüjakat waaʼin wanaapünaa sümaa tü nünüikikat otta waneekeerü wanee kasa wanaapünaa sümaa tü anakat nümüin Jehová. Waaʼinrüle tia, talateerü naaʼin Jehová watuma otta aneerü wakuwaʼipa süka anain maʼin tü kasa waneekakat (Éfeso 5:1).

Nakuwaʼipa waneinnua wayuu aʼyataapuʼukana nümüin Jehová

Jülüjale waaʼin nakuwaʼipa na aʼyataapuʼukana nümüin Jehová wayaawateerü aaʼu naaʼinrüin wanee kasa wanaapünaa sümaa tü nüchekakat Maleiwa mayaainjeʼe nnojoluin eein wanee pütchi aküjaka süchiki tia. Jamüshijaʼa José wanaa sümaa suchuntuin tü nuʼwayuusekat Potifar nümüin süinkaweein nümaa, nnojotsü eejatüin wanee pütchi eekai süküjain mojuin nümüin Jehová kawalaʼatale nutuma wanee wayuu nuʼwayuuse. Mayaainjeʼe nnojoluin süshajünüin süchiki tia, niyaawata aaʼu José mojeerüin nukuwaʼipa jee kaainjaleechi nia nuʼupala Maleiwa (Génesis 39:9). Niyaawata aaʼu José sükajee tü nüküjakat Maleiwa chaa Edén nnojoluin nücheküin kawalaʼatain nutuma wanee wayuu nuʼwayuuse (Génesis 2:24).

Anuu joo süchiki tü naainjakat Pablo. Aküjünüsü suluʼu Aluwataaushikana 16:3 nüchoteʼerüin Pablo süta nükorolo Timoteo. Naaʼinrüin tia süpülapünaa nalapalaain naaʼu na anoujashiikana. Suluʼu tü wetsiikulokot 4 aküjünüsü noʼunuin sainküinpünaa pueulo süpüla naküjain «tü kasa naneekakat na aluwataaushikana namaʼaleeya na laülaashii chakana Jerusalén». Sünain tü aneekünakalü aküjünüsü nnojoluin choʼujaain nachoteʼerüin süta nakorolo na anoujashiikana (Aluwataaushikana 15:5, 6, 28, 29). ¿Jamakaʼa nümaka Pablo choʼujaain nüchoteʼerüin süta nükorolo Timoteo? Shia «suulia mojujain nanüiki na judío kepiakana suluʼu tia pueulokot, jama natüjaain saaʼu napüshuaʼa wayuuin griego chi nüshikai Timoteo». Nnojotsü naainjeein Pablo wanee kasa mojeetka atuma naaʼin na anoujashiikana. Shia nüchekakaʼaya naainjain na anoujashiikana tü anakat noʼuluʼu Maleiwa süpüla sütüjaain saaʼu wayuu lotuin sukuwaʼipa tü kasa naainjakat (2 Corinto 4:2; 1 Corinto 9:19-23).

Eʼraajünüshi Pablo nümaa Timoteo süka müin nakuwaʼipa. Suluʼu Roma 14:15, 20, 21 otta 1 Corinto 8:9-13; 10:23-33, jülüjasü naaʼin Pablo anainjatüin nanoula na anoujashiikana nayaleekajaʼa na eekana süpüla mojuin akuwaʼipa sutuma wanee kasa eekai nnojolin mojuin maʼin. Anuu tü nümakat Pablo nüchiki Timoteo: «Nnojoishi eein wanee wayuu tamaa eekai müin aka naaʼin, kapülasü maʼin naaʼin tü jukuwaʼipakat. Na wane wayuukana shia neʼe kapülaka naaʼin tü nakuwaʼipakat, nnojotsü jamajatüin namüin tü nüchekakat Jesucristo. Jütüjaapejeʼe saaʼu anain maʼin nukuwaʼipa Timoteo, jama niʼyataajiraain maʼin tamaa sünain aküjaa tü pütchi anakat maʼin maʼaka naaʼin wanee jintüi aʼyataajiraakai nümaa nüshi» (Filipos 2:20-22). Anakatche maʼin nakuwaʼipa wapüleerua. Mayaainjeʼe nnojoluin nüikaleʼerüin Maleiwa tü pütchi aküjakat süchiki tia, nnojotsü neʼe naainjain tü anakat saaʼin namüin. Shia nashataka nukuwaʼipa Jehová otta Jesús sünain alin napüla wayuu. Müsüjeseʼe jülüjain naaʼin tü naneekakat suulia mojuin nanoula na anoujashiikana.

Jülüjataa waaʼin nukuwaʼipa Jesucristo, chi washatüinjachikai akuwaʼipa. Soʼu nikirajüin saaʼu wanee uuchi, nüpansaajüin niyaawatüin wanee wayuu kasain nüküjeein achiki Maleiwa nuluwataapa sünain wanee kasa. Nnojotsü shiain neʼe niyaawatüin aaʼu kasain apülajünüin nuulia jee kasain achuntunuin nümüin (Mateo 5:21, 22, 27, 28). Nnojotsü naaʼinrüin Jesús, José, Pablo otta Timoteo tü kasa keeʼireekat neʼe naaʼin. Mayaainjeʼe nnojoluin eein wanee pütchi aashajaaka süchiki tü mojukat jee anakat nümüin Maleiwa, shia naaʼinraka tü kasa anakat noʼuluʼu Maleiwa maʼaka saaʼin alinjachin Maleiwa napüla otta alin wayuu napüla, shia nikirajaka anain Jesús tia mapa (Mateo 22:36-40).

Nakuwaʼipa na anoujashiikana maaʼulu

Nnojotsü jülüjainjatüin waaʼin süshajünüin suluʼu tü Bibliakat süpüshuaʼa tü kasa waaʼinrajatkat. Anasü nümüin Jehová wayaawatüle saaʼu tü nüchekakat wapüleerua jaʼitairü nnojoluin ashajünüin suluʼu tü Bibliakat süchiki tü kasa waaʼinrajatkat. Nnojotsü choʼujaain nüküjainjatüin wamüin Maleiwa waneepia tü kasa waaʼinrajatkat (Éfeso 5:17; Roma 12:2). ¿Jamüsü anakaʼa nümüin Jehová waaʼinrüle wanee kasa wanaapünaa sümaa tü nüchekakat? Shia süka talatüin naaʼin watuma suulialeʼeya waaʼinrüin tü kasa keeʼireekat waaʼin otta süka alin maʼin waya nüpüla washateein nukuwaʼipa. Sutuma tia waaʼinrüin tü kasa anakat nümüin (Proverbios 23:15; 27:11). Nnojo motuin waaʼin aneerüin wanoula sutuma tü sümakat tü Bibliakat otta nnojoleenain waya ayuulin waaʼinrüle tü sümakat.

Wekirajaa sünain tü waaʼinrüinjatkat süpüla woonooin sümaa tia pütchikat waaʼinrajatpa waneirua kasa.

Waneeküinjatpa tü wanajüinjatkat, tü washatüinjatkat jee tü waapajüinjatkat

Jülüjataa waaʼin nukuwaʼipa wanee jimaʼai aapajüinjachikai muusika. Kamalainsü maʼin nümüin süpüshi tü naapajakat, eepejeʼe wanee kasa wainmajaka atuma naaʼin, shia tü pütchi ashajünakat süchiki yarüttüin maʼin süleetürain tü muusikakat jee saashajaain süchiki aʼluwajirawaa akuwaʼipaa. Nütüjaa aaʼulu eein waneirua muusika niiʼirajaka chia eeʼirajüikai aashajaaka süchiki jashiee jee atkawaa. Sutuma alin Jehová nüpüla chi jimaʼaikai kojutusü nümüin jamüin naaʼin Jehová sutuma tü kasa naaʼinrüinjatkat. ¿Kasache naaʼinrüinjatka süpüla niyaawatüin saaʼu tü nüchekakat Maleiwa?

Sünain tü karaloʼuta nüshajakat Pablo namüin na chejeʼewaliikana Galacia, aashajaashi süchiki waneirua kasa mojusü suchuntaaka niʼiruku wanee wayuu otta tü eekat sutuma tü nüpülainkat Maleiwa. Eesüjaʼa watüjaale saaʼu jamüin nukuwaʼipa wanee wayuu eekai aaʼu tü nüpülainkat Maleiwa: aisü wayuu nüpüla, talatüshi, jimatüsü naaʼin, nnojoishi kashapajaaralin, kamaneeshi, anamia, kanoulashi, matüjainsai aashichijawaa jee atüjashi achecheraa naaʼin. ¿Jama tü kasa mojusü suchuntaakat niʼiruku wanee wayuu? Anuu tü nümakat Pablo: «Nnojotsü mochoojuin soʼu wayuu tü kasa mojusü suchuntaakat niʼiruku wanee wayuu, aʼluwajiraweeshi nukuwaʼipa, yarüttüsü nukuwaʼipa, maapülinsai nia sünain aaʼinraa kasa mojusü, aʼwaajüshi maleiwayaasü, eeʼirajitshi ouutsü, mojujiraashi sümaa wayuu, katkaarai, kachunrai, kaashichijaarai, aʼülüjiraashi sümaa wayuu, nnojotsü paaʼinwain wayuu nutuma, oushikajaashi süchiirua sukuwaʼipa wayuu, nüliratüin wayuu, epeʼrüi, maaʼin aaʼinchi sünain miʼiraa jee naaʼinrüle waneirua kasa makat aka saaʼin tia. Taküjain jümüin jüchikuaʼa maʼaka taküjain paala shia jümüin, na wayuu aaʼinrakana kasa makalaka tia, nnojoleena eʼrüin kasa anasü nuluwataapeena Maleiwa» (Galacia 5:19-23).

Jülüja waaʼin sajaʼttiamüin tü pütchikat eere sümüin: «naaʼinrüle waneirua kasa makat aka saaʼin tia». Nnojotsü nüküjain Pablo süpüshuaʼaleeya tü kasa mojusü suchuntaakat niʼiruku wanee wayuu. Müshijeseʼe nnojoluinjachin nümüin wanee wayuu: «Eesü süpüla taaʼinrüin waneirua kasa mojusü suchuntaaka teʼiruku süka nnojoluin süpülajünüin suluʼu tü Bibliakat». Na wayuu aashajeʼerakana pütchikat tüü nayaawatüinjatü saaʼu kasain müin aka saaʼin tia, nnojotsü nüküjain achiki Pablo tia. Na wayuu aaʼinrakana wanee kasa makalü aka saaʼin tia sümaa macheʼein naya süchiirua, nnojoleena eʼrüin kasa anasü nuluwataapeena Maleiwa.

Choʼujaasü wayaawatüinjatüin saaʼu tü mojukat nümüin Jehová. ¿Kapüleesüche tia? Jülüjataa waaʼin tüü: Nuchuntule pümüin chi tottootkai piküinjachin fruta otta verdura jee puuʼulaainjachin suulia ekaa helado, torta jee waneirua kasa makalü saaʼin tia, ¿aashin mapüleein ayaawataa saaʼu tü nnojoluinjatkat süpüla piküin? ¿Jama tü muusika naapajüinjatkat chi jimaʼai waashajaakai achiki paala? ¿Jaʼyasüche saaʼu tia muusikakat eein tü nüpülainkat Maleiwa, shiataapa jaʼyain saaʼu tü kasa mojusü suchuntaakat niʼiruku wanee wayuu? Jamüsüjaʼa süleetürain tia muusikakat nnojotsü süküjain nümüin wanee wayuu alinjatüin wayuu nüpüla, anamiainjachin nia, nütüjainjachin achecheraa naaʼin jee tü waneirua kasa eekat sutuma tü nüpülainkat Maleiwa. Nnojotsü süküjain tü Bibliakat mojule tia muusikakat, eepejeʼe süpüla wayaawatüin saaʼu nnojoluin pansaain sümaa tü nüchekakat Maleiwa. Müsia neʼe tü jülüjainjatkat waaʼin waashajeʼerapa wanee karaloʼuta, wanajüle wanee peliikula, tü wanajakat suluʼu telewisoot, tü videojuegokat, tü eʼitaanakat suluʼu Internet jee waneirua kasa.

Anainjatü wayolojo

Süküjain tü Bibliakat waneirua pütchi süchiki sukuwaʼipa waʼanaaya jee wayolojo. Eesü süpüla niyaawatüin saaʼu wanee anoujashi tü naaʼinrüinjatkat wanaapünaa sümaa tia pütchikat nüneekapa tü nüsheʼinjatkat jee sukuwaʼipa naʼanaaya. Chi wayuu aikai apüla Jehová nnojotsü naaʼinrüin neʼe tü anakat saaʼin nümüin, shia jülüjaka naaʼin tü anakat nümüin chi Washi iipünaajachikai. Maʼaka wekirajaaitpain, nnojotsü nüküjain Jehová süpüshuaʼaleeya tü mojukat nümüin. Nnojotsü maluʼuluin tia nnojoluin jamajatüin nümüin Maleiwa tü naaʼinrakat na aʼyataakana nümüin. Naatawaisü nakuwaʼipa na wayuukana suluʼu waneirua mma jaʼitairü wanaawain neʼe tü mma eere kepiain naya. Mayaainjeʼe müin shia, nüküjain Jehová suluʼu tü Bibliakat tü pütchi jülüjainjatkat naaʼin na aʼyataakana nümüin süpülapünaa naneeküin wanee kasa.

Maʼaka saaʼin tü aküjünakat suluʼu 1 Timoteo 2:9, 10: «Akaʼaya na jieyuukana anainjatü sukuwaʼipa naʼanaaya jee nnojoliinjana aʼalaajaain suluʼu nasheʼin jee laülaainjatü naaʼin, nnojoluinjatü atürensajuushin naʼwala, nnojoluinjatü nanain ooro jee kaaʼürüla jee nnojoluinjatü naʼatüin nanain kuluulu eekai kojutuin maʼin, anainjatü tü kasa naaʼinrakat». Müshiijeseʼe nayaawatüinjatüin saaʼu na anoujashiikana tü jülüjakat naaʼin na wayuukana eere kepiain naya süchiki nayolojo na aʼwaajakana Jehová. Choʼujaasü jülüjainjanain naaʼin na anoujashiikana anainjatüin nayolojo suulia mojutuin sümüin wayuu tü pütchi naküjakalü achiki nüchiki Maleiwa (2 Corinto 6:3). Chi wayuu laülaakai aaʼin sünain anoujaa nnojoleerü shapaain naaʼin sünain naaʼinrüin tü anakat neʼe saaʼin nümüin. Shia jülüjainjatka naaʼin tü naaʼinrüinjatkat suulia mojushiin shia sümüin wayuu (Mateo 18:6; Filipos 1:10).

Nütüjaale saaʼu wanee anoujashi mojushiin niyolojo nümüin wanee wayuu, anasü nüshatüle nukuwaʼipa chi aluwataaushikai Pablo. Kapülainjatü naaʼin nanoula na wanee nuwalayuukana suulialeʼeya tü anakat saaʼin nümüin. Anuu tü nümakat Pablo: «Jüshata takuwaʼipa maʼaka tashatüin nukuwaʼipa Cristo» (1 Corinto 11:1). Müshi nia nüchiki Jesús: «Nnojotsü kapülain naaʼin nukuwaʼipa nümüiwaʼa». Anuu tü naaʼinrüinjatkat na anoujashiikana: «Na anoujashii katchinkana anoula, nakaalinjainjana na matsüinkana anoula. Nnojotsü jülüjainjatüin neʼe naaʼin nakuwaʼipa namüiwaʼa. Anashii jaaʼinrüle waneʼewai jukua wanee kasa talatüinjatkalü atuma saaʼin wayuu, tü anainjatkalü atuma sukuwaʼipa jee tü katchinjatkalü atuma saaʼin» (Roma 15:1-3).

Anainjatü tü jülüjakat waaʼin

¿Kasa waaʼinrajatka süpüla wayaawatüin saaʼu tü anakat noʼuluʼu Jehová mayaainjeʼe nnojoluin süshajünüin suluʼu tü Bibliakat tü waaʼinrüinjatkat? Aneerü tü jülüjakat waaʼin waashajeʼerüle tü Bibliakat weinshi, wekirajaale waneepia sünain otta wasakireʼerüle waaʼin sünain tü waashajeʼerakat. Nnojoleerü anoutaamaatüin wakuwaʼipa sünainjee tia. Tia müsü aka saaʼin nukuwaʼipa wanee jintüi nnojoikai miyoʼumaatüin. Müsia neʼe nukuwaʼipa chi wayuu laülaakai aaʼin sünain anoujaa, nnojotsü jaʼyain saaʼu laülaamaatüin naaʼin sünain anoujaa. Müsüjeseʼe nnojoluinjatüin süshapajaain waaʼin nnojorüle weʼramaatüin anain wakuwaʼipa. Nnojoishi neʼe waya atüjain süpüleerua ayaawataa saaʼu wanee kasa jaʼitainna kakaliainnain waya sünain anoujaa. Shia choʼujaaka wekirajaain sünain tü Nünüikikat Maleiwa jee woonooin sümaa tü sümakat (Hebreokana 5:14).

Watüjaale saaʼu tü nuluwataakalü anain waya Maleiwa mapüleejeerü wamüin woonooin sümaa. Shiasaʼa watüjaapa saaʼu tü pütchi wayaawataka anainjee tü anakat noʼuluʼu Jehová katsüinjeerü wanoula jee waaʼinreerü tü nüchekakat. Laülaapa waaʼin sünain anoujaa kojuteerü maʼin wamüin washatüin nukuwaʼipa Jehová jee chi Nüchonkai otta waneekeerü amüin wanee kasa wanaapünaa sümaa tü nümakat Maleiwa suluʼu tü Bibliakat. Talatüle naaʼin chi Washi iipünaajachikai sutuma tü kasa waaʼinrakat talataleʼejeerü maʼin waaʼin.

[Ayaakuaa]

Mayaainjeʼe naatawalin sukuwaʼipa nasheʼinpala na wayuukana suluʼu waneirua mma, jülüjainjatü waaʼin tü sümakat tü Bibliakat waneekajatpa washeʼin