Sunouteʼerüin nakuwaʼipa tü Bibliakat

¿JAMÜSÜ nuuntaka wanee wayuu nuuʼulaain suulia aʼluwajaa jee emiʼijaa saaʼu nneerü? Waashajeʼera süchiki tü nümakat.

«Kamalainpuʼusü maʼin tamüin anajaa sukua ama sünain ayoujirawaa» (RICHARD STEWART)

JUYA JEMEIKA OʼU NIA: 1965

NUUMAIN: JAMAICA

TÜ NAAʼINRAPUʼUKAT: EMIʼIJAI SAAʼU NNEERÜ JEE KAʼRUWARAI

TAKUWAʼIPAPUʼUKA: Miyoʼushi taya suluʼu mma maʼletseka aluʼu wayuu kanüliaka Kingston chaa Jamaica. Aisü shiiʼiree aʼyatawaa otta joutsü kaʼruwarannuu suluʼu. Mmotsü maʼin wayuu neema na mojulaashiikana, eesü shiʼira katkoʼusü waneepia.

Aʼyataasü maʼin tü teikat süpüla saapüin tü choʼujaakat tamüin otta namüin na tawalayuu motsoyünnüükana jee koleejiashii waya sutuma. Kamalainpejeʼe maʼin tamüin anajaa sukua ama sünain ayoujirawaa suulialeʼeya koleejiaa. Nnojoipuʼushi taya oʼunuin koleejialuʼumüin süka chapuʼuin taya eere shiyoujireʼennüin ama. Eeshi toʼotoopuʼule saaʼu tü amakalüirua.

Kamalainsü mapa tamüin ashaitaa saaʼu nneerü, jieyuuyuuishi taya jee akamüjapuʼushi taya mariwaana. Aʼluwajüshi taya süpüleerua tia, wainmaitka taʼapülaa suluʼujee tia. Akaijasaʼa nnojoluin toʼutüin saaʼin wayuu wanaa sümaa tia.

Tataʼünnaka mapa jee püreesaka taya atumawaa. Tojuʼitapa, ayatüsia taaʼinrüin süchikuaʼa tü taaʼinrapuʼukat. Mojuleesia maʼin takuwaʼipa, mayaainjeʼe nnojoluin jaʼyain saaʼu toʼupünaa mojulaain taya, eʼrüi wayumüin taya, jashichishi otta mojulaashi maʼin taya. Shia neʼe Jülüjaka taaʼin takuwaʼipa tamüiwaʼa.

SUNOUTEERÜIN TAKUWAʼIPA TÜ BIBLIAKAT: Shiasaʼa wanaa maʼin sümaa tia, ekirajaasü tü teikat sünain tü Bibliakat jee woutiisaka shia. Ponusü maʼin taaʼin shiiʼiratüin sukuwaʼipa tü teikat. Tatüjawee aaʼulu jamüin shiiʼirataka sukuwaʼipa, müshijeseʼe yootowalin taya namaa na Aküjaliikana pütchi.

Naata maʼin nakuwaʼipa noulia na suluʼukana tü wane iküleesiakalüirua jee shia nekirajaka anain tü sümakat tü Bibliakat. Naya neʼe aküjaka pütchi sainküin miichi maʼaka naaʼinrapuʼuin shia na anoujashii namaiwajanakana (Mateo 28:19; Aluwataaushikana 20:20). Tayaawata aaʼu nayain na anoujashii shiimainshiikana süka aijiraain naya (Juan 13:35).

Tekirajaapa sünain tü Bibliakat tayaawata aaʼu teeʼiratajatüin takuwaʼipa. Niyoutuin Maleiwa suʼluwajiraain sukuwaʼipa wayuu, talateere nia tamaa tasünneʼerajatü süpüshuaʼa tü yarüttakalü atuma teʼiruku (2 Corinto 7:1; Hebreokana 13:4). Sütanalüin taaʼin tayaawatapa saaʼu eein süpüla talatüin jee mojuin naaʼin Jehová tatuma (Proverbios 27:11). Müshijeseʼe tooʼulaain suulia akamüjaa mariwaana, kaʼapülain taya jee tachajaain maʼin sukuwaʼipa süpüla tanoutuin takuwaʼipa. Shiapejeʼe kapüleein maʼin tamüin tooʼulaain suulia jieyuuyuulin taya jee tashaitüin saaʼu nneerü.

Nnojotsü taküjain namüin na taʼaleewainkana tekirajaain sünain tü Bibliakat süka japülin taya. Nnojotpejeʼe müin takuwaʼipa taashajeʼerapa tü nümakat Jesús suluʼu Mateo 10:33 «Chi eekai japülin taka, japüijeechi taya nüka nuʼupala chi Tashi iipünaajachikai». Taküjamaatüin namüin na taʼaleewainkana tekirajaain sünain tü Bibliakat. Ponusü maʼin naaʼin tia. Taküjain namüin tanouteʼerüinjatüin takuwaʼipa.

TÜ KASA ANASÜ TEʼRAKAT: Talatüsü maʼin tü teikat taaʼinrapa tü sümakat tü Bibliakat. Nnojoluitpa shapaain saaʼin saaʼu tü taaʼinrakat. Yootowaishii waya süchiki alin maʼin wapüla Jehová. Sotule taaʼin tü takuwaʼipapuʼukat paala, ponusü maʼin taaʼin teeʼiratüin shia süka nükaalinjain taya Maleiwa. Nnojoluitpa kachiiruain taaʼin taʼluwajiraain takuwaʼipa otta wainmeein kasa tamaʼana.

Püreesashiijeʼe jee outushijeʼe taya nnojoire taapaain sümaa tü sümakat tü Bibliakat. Talatüsü taaʼin jee anasü takuwaʼipa namaa na tapüshikana sünainjee tü tatüjakat suluʼujee tü Bibliakat. Sükaalinjain maʼin taya tü taʼwayuusekat otta anasü maʼin sukuwaʼipa tü tachonkat, paaʼinwashii waya sünain aʼwaajaa Maleiwa. Taapüin analuʼut namüin na ekirajakana taya sünain tü sümakat tü Bibliakat, müshijeseʼe taküjain pütchi sümüin wayuu eepünaale taya. Kojutusü maʼin tamüin nürütkeʼerüin taya Jehová nünainmüin jee nüpüshitchipain taya.

[Ayaakuaa]

«Sütanalüin taaʼin tayaawatapa saaʼu eein süpüla talatüin jee mojuin naaʼin Jehová tatuma»

[Ayaakuaa]

Tayakai sümaa tü taʼwayuusekat jee müsia tü tachonkat

[Ayaakuaa]

Ekirajaweesü taaʼin nüchiki Maleiwa süka ponuin maʼin taaʼin shiiʼiratüin sukuwaʼipa tü teikat