WAINMA na wawalayuu nnojoliikana sünainpünaain tü miʼiraa aainjünakat tisienpüroʼu. ¿Mojusüche naaʼin saalinjee tü kasa naneekakat? ¿Isasüche naaʼin süchiirua tü naaʼinrapuʼukat? ¿Mojusüche naaʼin nachonnii sutuma nnojoluin sünainpünaain tia? Anuu tü namakat waneinnua Aküjalii pütchi kepiakana suluʼu waneirua mma.

Sotushi naaʼin Jesús. «Süpülapünaa taküjalin pütchi nnojotsü waneepiain taya suluʼu tü iküleesiakat. Eesiaʼaya tounajaale soʼu tü miʼiraa aainjünakat tisienpüroʼu, nnojotpejeʼe kachipünaain taaʼin Jesús. Shiasaʼa maaʼulu süka nnojoluin taya sünainpünaain tü miʼiraa aainjünakat tisienpüroʼu, outkajaawaisü taya namaa na wawalayuu piantua süpüla semaanaka otta tekirajüin na wayuukana süchiki tü sümakat tü Bibliakat nüchiki Jesús» (EVE, AUSTRALIA).

Asülajüshii kasa sümüin wayuu. «Talatüshi maʼin taya süsülajünüle tamüin wanee kasa. ¡Talataleeshia taya nnojorüle taʼatapajajüin shia! Aainjawaishi taya tarjeta jee shiale tadibujaajüin wanee kasa süpüla tasülajüin shia namüin na wayuukana. Talatüsü naaʼin sutuma jee talatüshi tayakaiya» (REUBEN, IRLANDA DEL NORTE).

Nakaalinjain na eʼrakana choʼujawaa. «Anasü waaʼin walakajaapa neküin na wayuu ayuuikana. Eesia walüʼüjüle namüin postre, flores jee wasülajüle namüin wanee kasa atütülajeetka naaʼin. Nnojotsü waainjain tia soʼu wanee kashi, waainjain shia eepünaale neʼe» (EMILY, AUSTRALIA).

Jutkatirawaishii naya sümaa napüshi. «Kottiraapa na wayuukana sümaa napüshi sümaa nnojoluin shapaain naaʼin, eeshii süpüla neʼraajüin na tepichikana natuushi, noushu, nalaülayuu jee naprimose. Sutuma nnojoluin sünainpünaain waya tü miʼiraa aainjünakat jee sukuwaʼipa wayuu, nayaawata aaʼu na wapüshikana woʼunajaain naaʼu süka alin naya wapüla nnojotsü shiain saaʼujee tü miʼiraakat» (WENDY, ISLAS CAIMÁN).

Jimatüsü naaʼin: «Wainma maʼin tü taainjakat soʼu tü miʼiraa aainjünakat tisienpüroʼu, eetaayaai jimatüin taaʼin. Süka tatüjaaipain saaʼu tü sümakat Bibliakat süchiki tü aainjünüinjatkat napüleerua na wayuukana, jimatüitpa taaʼin otta aneerüin nakuwaʼipa na tachonniikana suluʼu wanee mma anakat maʼin» (SANDRA, ESPAÑA).