1, 2. ¿Jarat tü pütchi anasü natüjaweekalü aaʼu na nikirajüinkana Jesuu? ¿Jamüsü natüjaweeka saaʼu?

NÜTÜJAWEE maʼin aaʼu Pedro, Santiago, Juan ooʼulaka Andrés joujainjatüin shikeraajüin tü nümakat Jesuu süchiki sujuttinnüinjatüin tü aʼwaajüleekat Maleiwa (Mar. 13:1-4). Müshiijeseʼe nasakirüin Jesuu: «¿Joujaleerü sujuttinnaka tü aʼwaajüleekat Maleiwa? [...]. ¿Kasa shiyaawaseetka wamüin süpüla watüjaainjatüin saaʼu sünain sülüʼülüin pükalia süpüla piweetüinjachin, tü sükaliajatkat sajaʼlajaain kasakat süpüshua?». (Mat. 24:1-3.) Nüküjüin Jesuu namüin jouleerüin kasachiki otta mülieerüin saaʼin wayuu sajaʼttiamüin tü kasakalüirua. Akaʼaya atüjaaneerü aaʼu sülüʼülaain tü kaʼi najaʼttinnajatkalü oʼu na wayuu mojulaakana nuluwataaka aaʼu Satanaa. Eepajaʼa wanee pütchi natüjaweeka aaʼu. Süchikijee nüküjüin Jesuu süchiki tü kasachiki alatajatkat maʼaka jouluinjatüin atkawaa, jamü otta mojulawaa, müshi nia süchiki wanee kasa anasü alatajatka: «Süpülapünaa süntüin tü kaʼi sajaʼlajaainjatkat oʼu kasakat süpüshua, aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mat. 24:7-14).

² Talatsü maʼin naaʼin na nikirajüinkana Jesuu süka naküjiraain nümaa «tü pütchi anasükat sümüin wayuu, süchiki nukuaippa Maleiwa sünain aluwatawaa» (Luc. 8:1; 9:1, 2). Eesüjaʼa süpüla sototaalain naaʼin tü nümakat Jesuu namüin: «Wainma wayuu eekai saapeein tachiki tayakai chi Oʼtteʼerüikai. Otta palitchon na yapakana süpüla oʼunaa sünainmüin tü wayuukolüirua süpüla naküjainjatüin tachiki sümüin. Je sükajee tia, jüchunta jümaala nümüin chi Tashikai Maleiwa süpüla nuluwataainjanain na wayuu aküjüinjanakana tachiki namüin» (Luc. 10:2). ¿Jamakuwaʼipalüinjatche  natuma süpüla naküjüin tü pütchi anasükat sümüin wayuu sainküinpünaa Mmaka? ¿Jaraliinjanache akaaliinjaka naya? ¡Talatsüjeʼe maʼin naaʼin müleka natüjaale saaʼu jamüinjatüin sukuwaʼipa shikeraajia nutuma Maleiwa! Talatsüjeʼe maʼin naaʼin wamaa neʼrüle shikeraajüin tü sümakat Mateo 24:14.

3. ¿Kasa wayaawataka atuma shikeraajüin tü sümakat Lucas 21:34? ¿Kasa jülüjüinjatka waaʼin?

³ Ekeraajüsü tü nümakat Jesuu maaʼulu süka wainmain na tooloyuu otta jieyuu aʼyataajiraakana süpüla naküjüin tü pütchi anasükat sainküin Mmaka süchiki Nuluwataaya Maleiwa (Is. 60:22). Eepajaʼa wanee kasa alatüinjatka naashin Jesuu. ¿Jarat shia? Eejeenain wainma anoujüshii kapüleejeetka namüin naaʼinmaain maʼin tü aküjaakat pütchi sajaʼttiamüin tü kasakalüirua (paashajeʼera Lucas 21:34). Wayaawata aaʼu shikeraajüin tüüʼyaa. Wainma anoujüshii kachiiruaka naaʼin waneeirua kasa suulia aküjaa pütchi. Atüjaana aaʼu tia sünainjee tü kasa naneekakat maʼaka saaʼin tü sünainpünaakat aʼyatawaa, ekirajawaa suluʼu eʼikülee miyoʼu, kamaʼanaa wainma kasa otta tü kaʼi nalatitkat sünain ashaittaa. Otta waneeinnua shapaasü naaʼin süpüleerua nousütüin anain tü neküinjatkalü aaʼu. Makalaka anain jülüjüle waaʼin tüü: «¿Teeʼiyatüinche sükajee tü kasa taneekakat otta süka takuwaʼipa palajanain tatuma tü aküjaakat pütchi?».

4. (1) ¿Kasa nuchuntaka Pablo napüleerua na anoujüshii chajanakana Filipos? ¿Jamüsü nuchuntaka tia? (2) ¿Kasa wekirajaainjatka anain sünain ekirajaayakat tüü otta tü wanee? ¿Jamüsü anaka watüjaale saaʼu tia?

⁴ Na anoujüshii eejanakana nükalioʼu Jesuu yalayalasü naaʼin sümaa nnojoluin mmoluin naya seema aküjaa süchiki tü Nünüikikat Maleiwa maʼaka naainjüin shia Pablo (Filip. 1:12-14). Ayatüinjatpajaʼa palajanain natuma tü aküjaakat pütchi suulia waneeirua kasa. Müsüjeseʼe nüküjüin Pablo namüin na anoujüshii chajanakana Filipos ‹shiainjatüin naaʼinrüin tü kasa anasükat waneepia› (paashajeʼera Filipos 1:9-11). Otta shiaʼaya tü naaʼinrakat na anoujüshiikana maaʼulu. Yalayalasü maʼin waaʼin sünain aküjaa tü Nünüikikat Maleiwa. Mayaainjeʼe müin shia, ¿eesüche süpüla ayatüin palajanain watuma tü aküjaakat pütchi müleka watüjaale saaʼu tü saaʼinrakat tü nupueulosekat Maleiwa? ¡Jamüsüsaʼa! Ekirajaayakat tüü sükaaliinjeena waya süpüla jülüjüin waaʼin tü naaʼinrakat Jeʼwaa süpüla nikeraajirüin tü sümakat Mateo 24:14. ¿Kasa shiʼyataaka maʼin achiirua nupueulose Maleiwa? ¿Jamüshii sükaaliinjeenaka waya sümaa wapüshi watüjaale saaʼu tia? Otta wekirajaweerü sünain tü wanee ekirajaayakat kasainjatüin waaʼinrüin süpüla wachecherüin waaʼin otta waaʼinrüin tü saaʼinrakat tü nupueulosekat Jeʼwaa.

5, 6. (1) ¿Kasapülajatü nüshajiraka Maleiwa suluʼu tü Wiwüliakat süchiki tü nupueulose chakat iipünaa? (2) ¿Kasa shikirajaka anain waya tü niʼrakat Ezequiel?

⁵ Wainma tü kasa nnojotkat nüshajirüin Jeʼwaa suluʼu tü Wiwüliakat. Anashantasüjeʼe maʼin nüküjüle wamüin jamüin sukuwaʼipa tü wekiisholoinkot süpüla katüin woʼu otta süpüshuaʼa tü kasa chakat iipünaa. Shia nüshajiraka tü kasa watüjaainjatkalü aaʼu süpüla waainjüin tü keeʼireekat naaʼin otta tü kasa anainjatkalü atuma wakuwaʼipa (2 Tim. 3:16, 17). ¡Anashantaleesia maʼin tü ashajünakat suluʼu tü Wiwüliakat süchiki tü nupueulose Jeʼwaa chakat iipünaa! Anasü maʼin aashajeʼeraa tü nüshajakat Isaías, Ezequiel, Daniel ooʼulaka Juan süchiki tü sukuwaʼipakat nupueulose Maleiwa chaka iipünaa (Is. 6:1-4; Ezeq. 1:4-14, 22-24; Dan. 7:9-14; Alat. Map. 4:1-11). Müsü nüsünneʼerakai saaʼin Jeʼwaa wanee kuluulu suulia tü sirumatuʼukat süpüla weʼrüinjatüin tü saaʼinrakat tü nupueulose chakat iipünaa. ¿Kasapülajatü nüshajiraka shia Maleiwa suluʼu tü Wiwüliakat?

⁶ Süpülajatü watüjaain saaʼu sünainpünaain wakuwaʼipa tü nupueulose Maleiwa chakat  iipünaa. Wainma tü kasa aainjünakat maaʼulu süpüla shikeraajüin tü keeʼireekat naaʼin Jeʼwaa. Jamüshijaʼa Ezequiel, wanee nünüikimaajachi Maleiwa nüküjüin süchiki tü nupueulose Maleiwa chakat iipünaa meematüin aka saaʼin wanee kareeta. Kawachirasü maʼin shia sümaa eein süpüla sujununtaain suwachiraluʼu (Ezeq. 1:15-21). Sükajee uatua süleʼeyataain tü suuʼuikat wattaleesia oʼunüin sutuma. Otta niʼrüin Ezequiel chuwatuuishaatain eere chi Suchupeetsekai (Ezeq. 1:25-28). Ponokajasaʼa naaʼin Ezequiel tü niʼrakat. Niʼrüin Maleiwa sünain anain sukuwaʼipa nuluwataaya saaʼu tü nupueulose chakat iipünaa sümaa nuʼunirüin shia nükajee chi naaʼinkai. ¡Anakatche maʼin tü aküjünakat süchiki tü nupueulose Maleiwa chakat iipünaa!

7. ¿Jamüsü weʼitaaka maʼin waaʼin nünain Maleiwa sünainjee tü niʼrakat Daniel?

⁷ Akaʼaya Daniel, nüshajüin wainma kasa weʼitaaka atuma waaʼin nünain Maleiwa. Niʼrüin joyotuin Jeʼwaa saaʼu tü nuluwataayakat sümaa chuwatuulin otta kooʼuisü shia (Dan. 7:9). Tü keeʼireekat naaʼin Jeʼwaa shia nütüjaain saaʼu Daniel shiʼyataain waneepia tü nupueulose chakat iipünaa süpüla shikeraajüin tü keeʼireekat naaʼin. Otta niʼrüin Jesuu niain eʼitaanüin ajapuluʼu süpüla jülüjüin naaʼin tü saaʼinrakat tü nupueulose Maleiwa yaakat mmapaʼa. Nnojoishi aikkalaain neʼe Jesuu saaʼu Nuluwataaya Maleiwa süpüla nuluwataain motsoʼo, «waneepieerü tü nuluwataayakat otta nnojoleerü ajaʼttinnüin shia» (Dan. 7:13, 14, NM). Sütütüleʼerüin maʼin waaʼin tia süpüla weʼitaain waaʼin nünain Jeʼwaa otta sünain tü kasa naaʼinrakat. Naapüin Maleiwa tü nuluwataayakat najapuluʼu chi Nüchonkai sükajee niiʼiyatüin süka nukuwaʼipa noonooin waneepia nümaa Maleiwa. Watüjaa aaʼulu niʼitaain maʼin naaʼin Jeʼwaa nünain chi Nüchonkai. Müshiʼiya wayakana  weʼitaainjatü maʼin waaʼin nünain Jesuu, chi wekiipüʼükai.

8. ¿Kasa naaʼinraka Ezequiel nümaa Isaías süchiki neʼrüin jamüin sukuwaʼipa nupueulose Jeʼwaa? ¿Kasa waaʼinrajatka sünainjee tia?

⁸ ¿Kasa waaʼinrajatka süka watüjaaitpain saaʼu tü saaʼinrakat tü nupueulose Jeʼwaa chakat iipünaa? Talatüinjatü maʼin waaʼin maʼaka naaʼin Ezequiel süka watüjaain saaʼu tü naainjakat Jeʼwaa (Ezeq. 1:28). Jülüjüle waaʼin tü saaʼinrakat nupueulose Maleiwa, sütütüleʼereerü waaʼin süpüla waaʼinrüin waneeirua kasa maʼaka sütütüleʼerüin naaʼin Isaías. Süchikijee niʼrüin Isaías tü naaʼinrakat Jeʼwaa süpüleerua tü nupueulose chakat iipünaa, nüküjamaatüin sümüin wayuu (paashajeʼera Isaías 6:5, 8). Nütüjaa aaʼu nükaaliinjünüinjachin nutuma Jeʼwaa süpüla nikeraajüin tia. ¡Talatsü waaʼin sutuma weʼrüin shiʼyataain waneepia tü nupueulosekat Maleiwa süpüla shikeraajüin tü keeʼireekat naaʼin!

9, 10. ¿Jamüsü choʼujaaka eein wanee nupueulose Maleiwa yaa mmapaʼa?

⁹ Nüneeküin Jeʼwaa nükajee chi Nüchonkai wanee pueulo yaa mmapaʼa süpüla wanaawain tü saaʼinrakat sümaa tü saaʼinrakat tü nupueulose chakat iipünaa. ¿Jamüsü nüneeka wanee pueulo Maleiwa yaa mmapaʼa süpüla shikeraajüin tü sümakat Mateo 24:14? Wekirajaa sünain apünüinsü kasa.

¹⁰ Palajana, nüküjüin Jesuu aʼyataainjanain maʼin na nikirajüinkana süpüla naküjüin tü pütchi anasükat «suluʼupünaa süpüshuaʼa mma» (Aluw. 1:8). Waneʼeya, shia choʼujaain na aapüinjanakana tü kasa anainjatkalü atuma nanoula jee na aaʼinmajüinjanakana na aküjüliikana pütchi (Juan 21:15-17). Otta tü wanee, shia choʼujaain jülüjüin naaʼin waneepia eeinjanale noutkajaain süpüla naʼwaajüin Jeʼwaa otta tü naaʼinrajatkat süpüla anain sukuwaʼipa natuma tü aküjaakat pütchi (Heb. 10:24, 25). Mojusüjeʼe sukuwaʼipa tia müleka saainjünüle süpaʼa mmaka neʼe. Süpüla anainjatüin sukuwaʼipa tü naaʼinrakat na oushikajaakana süchiirua nukuwaʼipa Kürisüto, pansaainjatü sukuwaʼipa natuma tü aküjaakat pütchi.

11. ¿Kasa waaʼinrajatka süpüla waʼyataajiraain sümaa tü nupueulosekat Jeʼwaa?

¹¹ ¿Kasa waaʼinrajatka süpüla waʼyataajiraain sümaa tü nupueulosekat Jeʼwaa? Wanee sukuwaʼipa, shia wanaa sümaa weʼitaain waaʼin nanain na wayuu niʼitaakana ajapuluʼu Jeʼwaa nümaa Jesuu tü aküjaakat pütchi. Süpaʼapünaa mmaka süpüshuaʼa eesü tü kasa eekat süpüla nooʼulaain atuma na wawalayuukana suulia naaʼinrüin tia aʼyatawaakat. Eepajaʼa wanee kasa saaʼinmaaka maʼin tü nupueulose Maleiwa yaakat mmapaʼa. ¿Jarat shia?

12, 13. ¿Kasa naaʼinraka na laülaashiikana süpüla süküjünüin tü pütchi anasükat suluʼu noumain? ¿Jamüsü sütütüleʼeraka paaʼin tia?

¹² Aneekünüshii na laülaashii atüjakana maʼin süpüla jülüjüin naaʼin süküjünüinjatüin maʼin tü pütchikat suluʼu tü noumainkat. Süpülapünaa naneeküin wanee kasa, nekirajaa anainrü tü sümakat tü Wiwüliakat süka müin aka saaʼin wanee anakia napüleerua (Sal. 119:105). Nachuntüin maʼin nümüin Maleiwa süpüla nükaaliinjüin naya (Mat. 7:7, 8).

¹³ Maʼaka nakumajüin sukuwaʼipa tü aküjaakat pütchi na laülaashii eejanakana nükalioʼu Jesuu, müsia sukuwaʼipa natuma na anoujüshii eekana maaʼulu (Aluw. 6:4). Talatsü naaʼin süka süküjünüin maʼin tü pütchi anasükat noumainpaʼa otta suluʼu mmaka süpüshuaʼa (Aluw. 21:19, 20). Süpülapünaa naneeküin na laülaashiikana wanee kasa süpüla süküjünüin maʼin tü pütchikat, jülüjüsü naaʼin tü sümakat tü Wiwüliakat sümaa nooʼulaain nuʼunirüin naya chi naaʼinkai Maleiwa suulialeʼeya naainjirüin  tü naleʼeruʼujeejatkat (paashajeʼera Aluwataaushikana 15:28). Mayaa, neeʼiyatüin süka tü nakuwaʼipakat namüin na nawalayuukana palajanain natuma tü aküjaakat pütchi (Éf. 4:11, 12).

14, 15. (1) ¿Kasa aainjünaka süpüla süküjünüinjatüin maʼin tü pütchi anasükat sainküin mmaka? (2) ¿Jamüsü paaʼin süka piʼyataain maʼin sünain aküjaa tü pütchi anasükat süchiki Nuluwataaya Maleiwa?

¹⁴ Eeshii na nnojoliikana atüjaain saaʼu wainmain maʼin aʼyatawaa sümaa tü kasa anainjatkalü atuma nanoula na aküjüliikana pütchi maʼaka saaʼin tü karalouktakalüirua, tü ekirajünakalü anain suluʼu tü outkajaaleekat otta sünain tü outkajawaakat miyoʼu. Wainma na wawalayuu aʼyataakana maʼin süpüla nalatirüin suluʼu 600 anüikii tia karalouktakalüirua. Aainjünüsü tia süpüla sütüjaain aaʼu wayuu suluʼu sünüiki «süchikü tü kasa anashantasü naaʼinrakat Maleiwakai» (Aluw. 2:7-11). Eeshii wawalayuu jimaʼalii otta majayünnüü aʼyataakana maʼin sükajee wanee maakina kajaalapüsü maʼin chaa eere sukumajünüin tü karalouktakalüirua. Keraapa shia, aluwataanüsü sainküin mmaka süpüshuaʼa.

¹⁵ Akumajünüsü maʼin sukuwaʼipa süpüla shiainjatüin waaʼinmaain tü aküjaakat pütchi namaa na wawalayuu woutkajaakana amaa. Wainma maʼin na wawalayuu aʼyataakana sünain akumajaa Piichi outkajaalee otta tü süpülajatkat outkajawaa miyoʼu. Eeshii waneeinnua akaaliinjaka nawalayuu wanaa sümaa süsetüin wüin nepialuʼu, eein wawai otta ayuulii. Eeshii eeka shikiipüʼüin outkajawaa miyoʼu jee waneeirua ekirajawaa. Tüü, shia süpüshi tü kasa eekat süpüla nnojoluin watüjaain saaʼu wainmain maʼin aʼyatawaa sünain. ¿Jamüsü shiʼyataanaka maʼin achiirua tia? Süpülajatü süküjünüin maʼin tü pütchi anasükat, anainjatüin nanoula na aküjüliikana pütchi otta wainmainjanain na wayuu eʼraajakana tü iküleesia shiimainkat. ¿Ayatüsüche shiain saaʼinrüin tü kasa anasükat waneepia tü nupueulose Jeʼwaa yaakat mmapaʼa? ¡Jamüsüsaʼa!

16. ¿Kasa anaka süpüla wekirajaain anain sümaa wapüshi aneetka atuma wakuwaʼipa?

¹⁶ ¿Wakatalüinche kaʼi süpüla jülüjüin waaʼin tü saaʼinrakat tü nupueulosekat Jeʼwaa? Eeshii wawalayuu ekirajaaka sünain tia soʼu tü ai naʼwaajakalü oʼu Maleiwa sümaa napüshi otta nekirajaapa namüiwaʼa. Anasü maʼin süpüla shikirajaanüin anain tü niʼrakat Isaías, Ezequiel, Daniel ooʼulaka Juan süchiki tü nupueulose Maleiwa chakat iipünaa. Watüjaweerü saaʼu tü saaʼinrakat nupueulose Maleiwa müleka wekirajaale sünain tü karalouktakat Los testigos de Jehová, proclamadores del Reino de Dios jee waneeirua karalouktairua otta DVD aashajaaka süchiki tia.

17, 18. (1) Püküja jamüin aneetka pukuwaʼipa paainjüle tü wekirajaaitpakalü anain. (2) ¿Kasa wasakireʼerüinjatka anain waaʼin?

¹⁷ Aneerü wakuwaʼipa jülüjüle waaʼin tü saaʼinrakat tü nupueulosekat Jeʼwaa. Ayata shiain waaʼinrüin tü kasa anasükat waneepia maʼaka saaʼinrüin tü nupueulosekat. Müle shia watuma, washateerü nukuwaʼipa Pablo, chi makai anüiki: «Nüneeküin taya süpüla aküjaa nüchiki chi Oʼtteʼerüikai sümüin wayuu. Nnojoleechi jooluʼu taya ooʼulaain suulia aʼyatawaa nümüin chi Senyotkai» (2 Cor. 4:1). Nütütüleʼerüin naaʼin na anoujüshiikana wanaa sümaa nümüin namüin: «Anakaja makulajaainre waaʼin sünain aaʼinraa tü anasükat sümüin wayuu. Müleka ayatüle waya sünain tia, walaajeena waya nütüma chi Maleiwakai soʼuweena wane kaʼi» (Gal. 6:9).

¹⁸ ¿Eesüche wanee kasa choʼujaaka süpüla wanoukteʼerüin suluʼu wakuwaʼipa süpüla shiainjatüin waaʼinrüin tü kasa anasükat waneepia? ¿Eesüche süpüla nnojoluin kachiiruain waaʼin kamaʼanaa wainma kasa otta nnojoluin jülüjüin waaʼin waneeirua kasa süpüla waʼyataain maʼin sünain aküjaa pütchi? Wekirajaweerü anain suluʼu tü wanee ekirajaayakat jaʼraisü kasa waaʼinrajatkat süpüla wanaawain tü waaʼinrakat sümaa tü saaʼinrakat nupueulose Jeʼwaa.